MATAYO 6

Okorua ebiegwa kwa bobisi

1“Mwerende timokora ogokora kwaino okuya ase amasio ’abanto, erinde mororwe nabarabwo, ekiagera komogokora ayio, timori neng’eria ase Iso oino ore igoro.”

2“Gaki gokorua ebiegwa, tobugia engoma, buna baria abang’ainereria bagokora ase chisinagogi na ase chinchera chinene chi’emechie, erinde batogigwe nabanto. Nekeene nabatebirie ng’a banyorire eng’eria yabo. 3Korende aye, gokorua ebiegwa, nonya nokoboko kwao gw’okobee tikomanya ekio okoboko kwao gw’okorio kogokora, 4ebiegwa biao binyare koba bobisi; na Iso oo oyokorora bobisi nagoakane.”

Ogosaba kwa bobisi

5“Ekero mogosaba, timoba buna baria abang’ainereria; ekiagera barabwo nigo banchete gotenena na gosaba ase chisinagogi na ase amatabekania e chinchera, banyare kororwa nabanto. Nekeene nabatebirie ng’a banyorire eng’eria yabo. 6Korende aye ekero ogosaba, soa nyomba mwao ime, osieke egesieri, omosabe Iso oo ore bobisi; na Iso oo oyokorora bobisi nagoakane.”

7“Ase ogosaba kwaino timogotererera amang’ana a bosa buna abanto b’Ebisaku; naki barabwo nigo bagokaga ng’a nabaigugwe ase obonge bw’amang’ana abo. 8Gaki timoba omogwekano oyomo nabarabwo, ekiagera Iso oino namanyete aya moganetie, ritang’ani motaramosaba.”

Ogosaba kw’Omonene

(Luk 11:2–4)

9“Inwe gaki, saba iga:

Tata oito ore igoro,

Erieta riao risikwe.

10Oboruoti bwao boche,

Ogwancha kwao gokoreke ense,

Buna kogokoreka igoro.

11Otoe intwe rero endagera yaito.

12Otwabere ebibe biaito,

Buna intwe tokobaabera abagotokorera bobe.

13Totoira ase ogoteemwa,

Korende ototoorie korwa ase oria omobe.

[Naki oboruoti, ne chinguru, na obonene nobwao, emiaka na emiaka. Amina.] 14Naki inwe kamoraabere abanto ogosaria kwabo, naboigo na Iso oino ore igoro nabaabere inwe. 15Korende motaabereti abanto ogosaria kwabo, na Iso oino takobaabera ogosaria kwaino.”

Okweng’ata

16“Ekero mokweng’ata timokonyiria amasio aino buna abang’ainereria, ekiagera barabwo nigo bakonyiria amasio abo, erinde banyare kororwa nabanto ng’a mbeng’atete. Nekeene nabatebirie ng’a banyorire eng’eria yabo. 17Korende aye, gokweng’ata, eake amaguta omotwe oo, bwesibie obosio bwao, 18tobaisa kororwa nabanto ng’a mbweng’atete, korende ororekane ase Iso oo ore bobisi, na Iso oo oyokorora bobisi nagoakane.”

Obotenenku bw’ekeene

(Luk 12:33–34)

19“Timogacha chinibo chiaino ase ense, aase ebigwankwa na oboboosu bigosaria, na abaibi bakobochora na koiba; 20korende mogache chinibo chiaino igoro, aase ebigwankwa na oboboosu bitagosaria, na abaibi batakobochora na koiba. 21Ekiagera aase enibo yao ere, nao nenkoro yao ekoba.”

Oborabu na omosunte

(Luk 11:34–36)

22“Etaya y’omobere neriso. Nabo onye eriso riao rire rigiya, omobere oo bwonsi noichorwe noborabu; 23korende onye eriso riao rire riibe, omobere oo bwonsi noichorwe nomosunte. Onye oborabu boria bore ime yao bwabeire omosunte, omosunte oyio nomonene mono.”

Ogwechanda, na okomosemeria Nyasae

(Luk 16:13; 12:22–31)

24“Onde tari oranyare gokorera abanene babere, ekiagera nageche oyomo, na anche oyonde, gose nabwatane noyomo, na achaye oyonde. Timokonyara gokorera Nyasae na enibo.

25“Ase ayio nabatebirie ng’a timochandeka igoro y’obogima bwaino, eki morarie, gose eki moranywe, gose ase emebere yaino, eki morabeke. Inee! Obogima tibori obonene kobua endagera? Na omobere tori omonene kobua chianga? 26Morigererie chinyoni chia igoro! Chirochio tichiri gosimeka, tichiri kogesa, tichiri gosangereria gochia biage, na Iso oino ore igoro nigo agochirageria. Inee! Inwe timobueti rigori riabo? 27Naende ning’o ore asemore oranyare gwechanda komenta ekerengo gi’okoboko okomo ase obotambe bwaye? 28Ne chianga, nase ki mogochiechandera? Morigererie ebisicha bi’orosana buna bigokina; tibiri gokora emeremo, gose tibiri gwesisa; 29korende nabatebirie, nonya n’Sulemani ase obonene bwaye bwonsi tabegete chianga buna ekemo ki’ebi. 30Korende onye Nyasae okoboyia obonyansi bw’egetii oboreo rero, na ankio botugutwe ase omorero, Inee, takomenta kobaboyia inwe, abamore nokwegena ogoke? 31Gaki, timona gwechanda mogoteba: Ninki torarie? Gose: Ninki toranywe? Gose: Ninki torabeke? 32Naki abanto b’Ebisaku nigo bakorigia ebio bionsi; korende Iso oino ore igoro omanyire ng’a moganetie ebinto ebio bionsi. 33Korende ritang’ani rigia oboruoti bwa Nyasae na oboronge bwaye, na ebinto ebio bionsi namomenterwe.

34“Gaki, timwechandera ay’ankio, ekiagera ankio nariechande rinyene. Kera rituko ndiisaine nogwechanda kwaye.

Currently Selected:

MATAYO 6: EKEGUSIIBBLE

Highlight

Copy