MATAYO 5

Okorandia kwa Yeso ase egetunwa igoro

(Luk 6:20–23)

1Yeso agachia korora emeganda eria, agatiira gochia egetunwa igoro; na ekero aikaransire, aborokigwa baye bakamochiera. 2Agachaka koborokereria, ogoteba,

3“Mbasesenirie abare abataka ase omoika, ekiagera oboruoti bwa igoro nobwabo.

4“Mbasesenirie abaichanete, ekiagera nabache koremigwa.

5“Mbasesenirie abare noboitongo, ekiagera barabwo nabaire omwando bw’ense.

6“Mbasesenirie abare nenchara na erang’o y’okonyora oboronge, ekiagera barabwo nabaigotigwe.

7“Mbasesenirie abare namabera, ekiagera barabwo nabarorerwe amabera.

8“Mbasesenirie abare abachenu ase chinkoro, ekiagera barabwo nabarore Nyasae.

9“Mbasesenirie abagokora omorembe, ekiagera barabwo nabarokwe abana ba Nyasae.

10“Mbasesenirie abachandekire ase engencho y’oboronge, ekiagera oboruoti bwa igoro nobwabo.

11“Imosesenirie inwe, ekero bakobarama na kobachanda, na kobatebera kera ring’ana riibe ase oborimo, ase engencho yane. 12Goka na gochenga, ekiagera eng’eria yaino nenene igoro. Naki naboigo bachandete ababani abarengeo ritang’ani konya motarabao.

Amorokererio korwa ase omonyo na korwa ase etaya

(Mar 9:50; 4:21; Luk 14:34–35; 8:16; 11:33)

13“Inwe nomonyo bw’ense; korende omonyo korasirie obwansu bwaye, ninki orabekwe bwanse? Togwenereti gento kende otatiga ogotugutwa isiko, otiringwe nabanto.

14“Inwe nomobaso bw’ense. Omochie tokobiseka koagachire ase egetunwa igoro. 15Nonya nabanto tibagotongia etaya na koyemumeka negetonga, korende nigo bakoyebeka igoro ase ekebekerero, ebae oborabu bonsi abare nyomba ime. 16Na omobaso oino obare boigo ase abanto, goika barore emeremo yaino emiya, batogie Iso oino ore igoro.

Amachiko amakoro na ogochika kwa Yeso

17“Timokaga ng’a nigo nachire gosaria amachiko, gose amang’ana ’ababani; tincheti kobisaria, korende ase okobiikerania. 18Ekeene nabatebirie ng’a, goika igoro na ense nabiete, tegoeta enuguta eyemo gose aganto agake akamo ase amachiko, goika bionsi biikerane. 19Gaki monto onde bwensi orasarie richiko erimo erire rike ase amachiko aya, na kworokereria abanto boigo, oyio narokwe omoke mono ase oboruoti bwa igoro, korende oyorayakore na koyorokereria, oyio nere orarokwe omonene ase oboruoti bwa igoro. 20Naki nabatebirie inwe, onye oboronge bwaino tibokobua obw’aborokia b’amariko na Abafarisai, timogosoa nonya ng’ake ase oboruoti bwa igoro.

Endamwamu na oboiti

(Luk 12:57–59)

21“Mwaigwete ng’a abanto ba kare mbatebetigwe: Toita; na oyoraite nabe omonto okonacherwa ekina. 22Korende inche nabatebirie ng’a onde bwensi orageche oyomwabo, nabe omonto okonacherwa ekina, na oyoramogorere oyomwabo nabe omonto okoirwa ase ekegambero, na oyoramoroke oyonde Omoriri! Nagwenere omorero o kare na kare. 23Nabo gokorenta esadaka yao ase egesasimero korainyore ng’a oyomino nare ne ring’ana asore, 24otige esadaka yao agwo ase egesasimero ogende, ritang’ani mwanchane noyomino, erio oirane orue esadaka yao. 25Bwatana nomogosoeri oo bwango, ekero more nere inchera gochia ase ekegambero, erinde omogosoeri oo tabaisa gokobeka ase okoboko kw’omogambi, na omogambi akobeke ase omorendi bw’echela, na aye nobekwe ase echela. 26Nekeene nagotebirie: Tokorwa aroro nonya ng’ake goika oakane ebesa y’omoerio.

Obotomani

(Mat 18:8–9; Mar 9:43–48; Mat 19:9; Mar 10:11–12; Luk 16:18)

27“Mwaigwete ng’a ndiatebetwe: Totomana. 28Korende inche nabatebirie, ng’a onde bwensi orarigererie omokungu na korengereria gotomana nere otomanire ekero ekio ase enkoro yaye. 29Onye eriso riao ria borio rikogera okore ebibe, rirusie, oritugute are, ekiagera mbuya asore ekiimo kiao ekemo gesire, kobua omobere oo omogima gotugutwa ase omorero o kare na kare. 30Onye nokoboko kwao gw’okorio gokogera okore ebibe, konache, ogotugute are, ekiagera mbuya asore ekiimo kiao ekemo gesire, kobua omobere oo omogima gotugutwa ase omorero o kare na kare.

31“Naende ndiatebetwe; Oyoratige mokaye, tiga amoe rirube ri’ogotigana. 32Korende inche nabatebirie, ng’a onde bwensi oratige mokaye, otatiga ase engencho y’obotomani, ogerire abe omotomani; na oyoranyuome oyotigirwe, oyio otomanire.

Chimuma na obwegenwa

33“Naende mwaigwete ng’a abanto ba kare mbatebetigwe: Totiana bosa, korende oikeranerie Omonene chimuma chiao. 34Korende inche nabatebirie: Totiana ase egento kende gionsi; nonya nase igoro, ekiagera nao ekerogo ki’obonene kia Nyasae; 35gose ase ense, ekiagera nao egeteni kiaye gi’okobekera amagoro; gose ase Yerusalemu, ekiagera noro omochie bw’Omoruoti omonene. 36Na totiana ase omotwe oo, ekiagera tokonyara gokora agatukia akamo kabe akarabu gose akamwamu. 37Amang’ana aino abe: Ee, gose: Yaya; naki ayakomenteka ase aya, nigo akorwa ase oria omobe.

Tibweruseria egesiomba

(Luk 6:29–30)

38“Mwaigwete ng’a ndiatebetwe: Eriso ase eriso, na erino ase erino; 39korende inche nabatebirie: Timobaisa koamererania noyore omobe. Korende omonto karagoake orosea rwa borio, omoonchorere norw’okobee. 40Na omonto karigetie kogosoera na koira eanga yao ya ime, omotigere neya isiko boigo. 41Na onye omonto ogokobetereria kogenda nere emaeli eyemo, genda nere goika chimaeli ibere. 42Oyokogosaba, moe; na oyorigetie singo, tomorina.

Obwanchani na ogokora kw’oboikeranu

(Luk 6:27–28,32–36)

43“Mwaigwete ng’a ndiatebetwe: Ancha omogisangio oo, na ogeche omobisa oo. 44Korende inche nabatebirie: Ancha ababisa baino, mosabere aba bakobachanda, 45nario monyare koba abana ba Iso oino ore igoro, ekiagera ere nigo akobabareria omobaso oye ababe na abaya, abatweria embura abakori oboronge, na abatari gokora oboronge. 46Naki komoranche ababanchete inwe, ing’eria ki more nero? Inee! Nonya mbaria bakobanga ebango tibari gokora bo? 47Na inwe komorakwanie abamino boka, mbuya ki mwakora kobua abande? Nonya nabanto b’Ebisaku tibari gokora bo? 48Gaki inwe mobe abaikeranu buna Iso oino ore igoro are omoikeranu.”

Currently Selected:

MATAYO 5: EKEGUSIIBBLE

Highlight

Copy