MATAYO 4

Ogoteemwa kwa Yeso ase erooro

(Mar 1:12–13; Luk 4:1–13)

1Erio Yeso akairwa n’Omoika ase erooro gochia goteemwa na Saitani. 2Akeng’ata amatuko emerongo ene, omobaso na obotuko. Nyuma ase aya enchara ekamoria. 3Omoteemi agacha, akamotebia, “Onye kore Omwana o Nyasae, tebia amagena aya abe omogati.” 4Korende ere akairaneria, “Nerikire: Omonto takoba moyo ase omogati bwoka, korende ase kera ring’ana rikorwa ase omonwa o Nyasae.” 5Erio Saitani akamoira goika omochie omochenu, akamobeka igoro ase egechuria gie Hekalu egetambe mono. 6Akamotebia, “Onye kore Omwana o Nyasae, etugute gochia inse, ekiagera nerikire:

“Ere nagochikere abamalaika baye bakorende,

na barabwo nabakoimokie ase amaboko abo,

erinde togochwa okogoro kwao ne rigena.”

7Yeso akamotebia, “Naende nerikire: Toteema Omonene, Nyasae oo.” 8Naende Saitani akamoira ase ekegoro egetambe mono, akamworokia amaruoti onsi ay’ense, na obonene bwabo, 9akamotebia, “Ebi bionsi ninkoe, koratung’ame na gonsasima.” 10Erio Yeso akamotebia, “Karue aa, Saitani! Ekiagera nerikire:

“Osasime Omonene, Nyasae oo, omokorere ere bweka.” 11Erio Saitani akamotiga, na rora, abamalaika bagacha, bakamokorera.

Yeso okogenda komenya Kapernaumu, omochie o Galili

12Ekero Yeso achia koigwa ng’a Yohana osibirwe echela, akaimoka, akagenda Galili. 13Akaimoka korwa Nazareti, akagenda, akamenya Kapernaumu, omochie ore ang’e nenyancha ase chimbebe chia Sabuloni na Nafutali, 14rinyare goikerana eriatebetwe nomobani Isaya,

15“Ense ya Sabuloni na ense ya Nafutali,

enchera egochia enyancha ng’umbu ya Yorodan,

Galili, ense y’abanto b’Ebisaku,

16abanto abamenyete omosunte ime, barorire omobaso omonene,

na abamenyete ensemo y’ekiriri ki’amakweri,

omobaso obabareire.”

Yeso ogochaka korandia

(Mar 1:14–15; Luk 4:14–15)

17Korwa ekero ekio Yeso agachaka korandia, ogoteba, “Onchoka, ekiagera oboruoti bwa igoro bwaikire ang’e.”

Yeso okorangeria aborokigwa baye be ritang’ani

(Mar 1:16–20; Luk 5:1–11)

18Ekero arenge gotaara ensemo y’enyancha ya Galili, akarora abamura babere ba ise omo, Simion oyokorokwa Petero, na Anderea omwabo, bakoruta ekeonga enyancha ime, ekiagera nabarubi barenge. 19Akabatebia, “Inchuo montunyane na inche nimbakore mobe abarubi b’abanto.” 20Erio kegima bagatiga ebionga biabo, bakamotunyana. 21Naende gakogenda korwa aroro, akarora abamura babere bande ba ise omo, Yakobo omwana o Zebedi, na Yohana omwabo, barenge obwato ime amo na Zebedi ise bakoroisia ebionga biabo, nabarabwo akabarangeria. 22Erio kegima bagatiga obwato boria, bagatiga na ise, bakamotunyana.

Orogendo rwa Yeso na emeremo yaye agwo Galili

(Luk 6:17–19)

23Erio Yeso nigo arenge konagoetanana ase ense engima ya Galili, okworokereria ase chisinagogi chiabo, okorandia amang’ana amaya ay’oboruoti, okogwenia amarwaire onsi na oboreu bwonsi obwarenge ase abanto. 24Chinkuma chiaye chigasarera ase ense yonsi ya Siiria; bakamorentera abarwaire bonsi ababwatire namarwaire ao ao, na obororo, na ababwatire nebirecha, na abaare ne chindurume, na abarenge amagata, akabagwenia. 25Emeganda emenge ekamotunyana korwa Galili, na Dekapoli, na Yerusalemu, na Boyahudi, na ng’umbu ya Yorodan.

Currently Selected:

MATAYO 4: EKEGUSIIBBLE

Highlight

Copy