LUKA 10

Obotomwa bw’aborokigwa emerongo etano na ebere

1Nyuma ase aya Omonene agachora abande emerongo etano na ebere, akabatoma babere babere bamotang’anere kogenda kera omochie na kera aase arengereretie kogenda ere omonyene. 2Akabatebia, “Rigesa nerinene, korende abakori emeremo nabake; gaki mosabe Omonene bwe rigesa atome abakori emeremo ase rigesa riaye. 3Bwatia enchera; rigereria, nabatomire inwe buna chimanwa chie ching’ondi gati‐gati ye chisese chi’orosana. 4Timobogoria ekemoya, gose esaro, gose ebikoroto; gose timokwania monto nchera. 5Na enyomba ende yonsi morasoe, ritang’ani mobore: Omorembe obe ase enyomba eye. 6Onye omonto bw’omorembe oreo, omorembe oino noikaranse asare; korende onye taibo, nobairanere inwe. 7Mobeere ase enyomba eyio, morie na konywa ebi bakobaa, ekiagera omokori emeremo nagwenerete aegwe eng’eria yaye. Timoetanana enyomba ase enyomba. 8Na omochie onde bwonsi morasoe, kobarabaroisie, karie eki barabae. 9Mogwenie abarwaire abareo, batebie: Oboruoti bwa Nyasae bwabaikeire ang’e. 10Kero kende gionsi mogosoa omochie, na barabwo batabaroiseti, soka korwa aroro, eta ase chinchera chiaye, motebe: 11Nonya norotu rw’omochie oino rwabwatereire amagoro aito twarwabusire asemore, korende manya aya, ng’a oboruoti bwa Nyasae bwaikire ang’e. 12Nabatebirie, nabe aororo ase Sodomu ase rituko riria kobua omochie oria.”

Okoragererigwa ase emechie etari nokwegena

(Mat 11:20–24)

13“Obobe nobwao, Korasin! Obobe nobwao, Bethisaida! Ekiagera onye mbiakoregete ase Turo na Sidoni ebikone bie chinguru ebiakoregete asemore, abanto b’aroro anga mbaonchogete kare na goikaransa babegete chianga chie chigunia na beagete ribu. 14Korende nebe aororo ase Turo na Sidoni ase rituko riria ri’ekina kobua asemore. 15Naye Kapernaumu, noimokererigwe igoro? Noche goikigwa goika Eora y’amakweri.

16“Oyorabaigwere inwe, nanyigwere nainche, na ere oyorabaange inwe, onyangire nainche, na ere oyoranyange inche, omwangire ere oyontomete.”

Okoirana kwa baria emerongo etano na ebere

17Baria emerongo etano na ebere bakairana nomogoko, bagateba, “Omonene, nonya nebirecha biatoigwereire ase erieta riao.”

18Akabatebia, “Naroche Saitani okogwa korwa igoro buna okomesa. 19Rora, nabaeire okobua gotindacha ching’iti chionsi, na ebiuge, ne chinguru chionsi chi’oria omobisa; gose gento kende tikeri kerabaite. 20Nonya nabo timogoka ase aya, ng’a ebirecha biabaigwereire, korende goka ekiagera amarieta aino arikirwe igoro.”

Okoiraneria kwa Yeso ng’a mbuya mono

(Mat 11:25–27; 13:16–17)

21Ase ekero keria Yeso agasasoka ase Omoika Omochenu, akabora, “Nakobakire aye Tata, Omonene o igoro na ense, ng’a kwabisire amang’ana aya ase abare nobong’aini ne chisemi, na koyamaanora ase abana abake. Ee, Tata, oko nakwo kwarenge ogwancha kwao okuya. 22Naeirwe ebinto bionsi na Tata one; monto onde tari omomanyete Omwana gose nere ng’o, otatiga Tata, gose Tata nere ng’o, otatiga Omwana, na onde bwensi Omwana anchire komoorokeria.”

23Akeonchorera aborokigwa baye, akabatebia bobisi, “Nasesenirie amaiso aya arorire aya mwarorire inwe! 24Naki nabatebirie, ababani abange na abaruoti bakarigia korora aya mwarorire inwe, tibayarora, na koigwa aya mwaigure, tibayaigwa.”

Buna okonyora obogima bwa kare na kare

(Mat 22:34–40; Mar 12:28–31)

25Na rora, omworokia bw’amachiko agatenena okomoteema, okobora, “Omworokia, inki ndakore nyore obogima bwa kare na kare?”

26Ere akamoboria, “Ase amachiko inki kerikire? Naki ogosoma?”

27Akairaneria, “Mwanche Omonene Nyasae oo nenkoro yao yonsi, na omoyo oo bwonsi, ne chinguru chiao chionsi, na obong’aini bwao bwonsi, na omogisangio oo buna bweanchete.”

28Akamotebia, “Kwairaneirie buya. Kora iga, nario orachie kare.”

Omoreng’anio bw’Omosamaria omuya

29Omonto oria akarigia gwekora omonyene oboronge, akaboria Yeso, “Omogisangio one nere ng’o?”

30Yeso akairaneria, “Narenge omonto ore gotirimboka korwa Yerusalemu kogenda Yeriko. Ere akaumera abauri, na barabwo bakamoumokera, bakamorusia chianga, bakamoaka chingoma, bakagenda, bakamotiga oisire gokwa. 31Ekaba agwo omokuani oyomo akaoroka, ogoeta ase enchera eria, akamorora, agaeta ensemo. 32Na Omolawi boigo agachia goika aase aria, akamorora; nere agaeta ensemo. 33Korende Omosamaria oyomo, kagoeta, agacha aase arenge; ere agachia komorora, akamororera amabera. 34Nabo akamoika ang’e, akamoboa chingoma chiaye, akamoaka amaguta na edivai; akamoriinia ase etigere yaye igoro, akamoira ase enyomba y’abageni, akamorwaria. 35Goika mambia yaye akarua chisiringi ibere, akaa omonyene enyomba, akamotebia: Morende buya; na kende gionsi orarue kobua, kondairane naende, ningoakane. 36Naki rende oroche ase abaiga batato, norori orenge omogisangio oye ere oyogwete ase amaboko ’abauri?”

37Akabora, “Noria omororerete amabera.”

Yeso akamotebia, “Genda naye okore boigo.”

Martha na Mariamu

38Bagachia koba nkogenda bare, agasoa ase agachie akamo, na omokungu oyomo, erieta riaye Martha, akamoroisia nyomba mwaye. 39Ere narenge nomosubati omwabo ore korokwa Mariamu. Mariamu nigo aikaransete ase amagoro a Yeso, okoigwa amang’ana aye. 40Korende Martha nigo arenge gochandeka ase ogokora okonge, akamochiera, akabora, “Omonene, torochi aye buna oyominto antigire ngokora kera egento inche bweka? Motebie ankonye.”

41Omonene akamoiraneria, “Martha, Martha, nigo okwerosia na gweichania ase engencho y’ebinto ebinge, 42korende egento ekemo gioka keganeirie. Mariamu ochorire ensemo ere engiya, eye ataurwe nonde.”

Currently Selected:

LUKA 10: EKEGUSIIBBLE

Highlight

Copy