LUKA 9
9
Obotomwa bw’abatomwa ikomi na babere
(Mat 10:5–15; Mar 6:7–13)
1Akarangeria baria ikomi na babere akabaa chinguru na okobua igoro ase ebirecha bionsi na ase okogwenia amarwaire. 2Akabatoma korandia oboruoti bwa Nyasae na kogwenia abarwaire. 3Akabatebia, “Timobogoria gento ase orogendo rwaino, nonya nenyimbo, gose esaro, gose omogati, gose chibesa; naende timoba ne chianga ibere. 4Naende enyomba ende yonsi morasoe, mobeere aroro goika moruo. 5Naende abatabaroiseti, komogosoka korwa omochie oria, mokong’onte orotu rw’amagoro aino, erinde robe kirori asebare.”
6Bakagenda, bagaetanana ase emechie, bakorandia enchili, na kogwenia abanto chinsemo chionsi.
Ogoichana kwa Herode
(Mat 14:1–2; Mar 6:14–16)
7Bono Herode omoruoti akaigwa onsi ayakorekire, agaichanigwa mono, ekiagera abande baare goteba ng’a Yohana obokigwe korwa ase abakure, 8na abande ng’a n’Elija oorokire, na abande ng’a noyomo bw’ababani abakoro obokire. 9Herode agateba, “Yohana inamonachete omotwe, korende ning’o oyo rende naigure amang’ana are buna aya?” Akarigia komorora.
Okoragerigwa kw’abanto chilifu isano
(Mat 14:13–21; Mar 6:30–44; Yoh 6:1–13)
10Abatomwa baria ekero bachia koirana bagatebia Yeso amang’ana onsi ayabakorire. Erio akabaira, akagenda amo nabarabwo bobisi gochia ase omochie okorokwa Bethisaida. 11Emeganda egachia korora, ekamotunyana, na ere akabaroisia, agakwana nabarabwo amang’ana ’oboruoti bwa Nyasae, akagwenia abarenge nokogania gw’okogwenigwa. 12Rigachaka kogoroba, na baria ikomi na babere bakamochiera, bakamotebia, “Tiga omoganda ogende goika ase ebichie ne chinsemo chietanaine, banyore aase bakorara amo nendagera, ekiagera aiga nigo tore aase egesomo.”
13Akabatebia, “Inwe bae endagera!”
Bakabora, “Titobwati kende kobua emegati etano ne chinswe ibere. Gose togende kogorera abanto aba bonsi endagera?” 14Naki mbarengeo abasacha chilifu isano iga.
Agatebia aborokigwa baye, “Baikaransie abanto aba ase ebiombe, na kera ekeombe koreng’ana emerongo etano.”
15Bagakora boigo, bakabaikaransia bonsi. 16Akabogoria emegati eria etano ne chinswe chiria ibere, akarigereria igoro, akabisesenia, akabisamunyora, akaa aborokigwa babiterekere abanto. 17Bonsi bakaria, bakaigota. Na ebisamunye biria biatigarete bigasangererigwa, bigaichora ebitonga ikomi na bibere.
Okoorokia gwa Petero ng’a Yeso nere Kristo
(Mat 16:13–19; Mar 8:27–29)
18Agachia koba ngosaba are ere bweka, aborokigwa baye nigo barenge amo nere, akababoria, “Abanto nigo bakobora ng’a ninche ng’o?”
19Bakairaneria, “Yohana Omobatisi; abande Elija, na abande ng’a oyomo ase ababani abakoro obokire.”
20Akababoria, “Nainwe nigo mokobora ng’a ninche ng’o?” Petero akairaneria, “Kristo o Nyasae.”
Yeso okobana ogokwa na okoboka kwaye
(Mat 16:20–21; Mar 8:30–31)
21Akabachika na kobakania tibatebia monto ring’ana eri, 22ogoteba, “Negwenerete Omwana‐o‐mwanyabanto anyore ogochandeka ase chinchera chinyinge, na kwangwa nabagaaka, na abakuani abanene, na aborokia b’amariko, naende aitwe, na ase rituko ria gatato naboke.”
Okorangerigwa kw’ogwekeyia omonyene
(Mat 16:24–28; Mar 8:34—9:1)
23Agatebia bonsi, “Oyorigetie gontunyana, tiga ekaane ere omonyene, etweke omosalaba oye kera rituko antunyane. 24Naki onde bwensi orarigie koegera obogima bwaye oyio nabosirie; na oyorasirie obogima bwaye ase engencho yane, oyio naboegere. 25Ekiagera inki keragwenere omonto karanyore ense yonsi, ko esirie gose gwesaria ere omonyene? 26Naki kera omonto orandorere obosooku inche na amang’ana aane, Omwana‐o‐mwanyabanto kagocha ase obonene bwaye, namororere obosooku ase Ise na ase abamalaika abachenu. 27Korende nabatebirie ekeene, mbare abanto ase aba bateneine aa, abataigwe amakweri nonya ng’ake, goika barore oboruoti bwa Nyasae.”
Okoonchoka ekieni kwa Yeso
(Mat 17:1–8; Mar 9:2–8)
28Agachia koba amatuko ang’e atano na atato nyuma ase amang’ana aya, akaira Petero, na Yohana, na Yakobo, agatiira gochia egetunwa igoro gosaba. 29Ekaba kagosaba, ekieni ki’obosio bwaye gekaonchoka, ne chianga chiaye chikaba chindabu, chikameka‐meka. 30Naende rora, abanto babere bagakwana nere, nabwo Musa na Elija. 31Abwo barorekanete ase obonene, na gokwana amang’ana ay’ogokwa kwaye, aya agwenerete goikerania Yerusalemu. 32Petero na baria barenge amo nere, konya babwatirwe ne chitoro, korende nigo batagesetie, bakarora obonene bwaye, na abanto baria babere bateneine amo nere. 33Ekero abanto aba baare korua asare, Petero agatebia Yeso, “Omonene, imbuya intwe koba aiga; tokore ebigutu bitato, ekemo ekiao, na ekemo ekia Musa, na ekemo eki’Elija”; tamanyete aya agokwana.
34Ekero agokwana amang’ana aya riire rigacha rikababisia, bakairoka kobachia gosoa ase riire. 35Eriogi rigasoka korwa ase riire riria rigoteba, “Oyo n’Omwana one, Omochorwa one; moigwere ere!”
36Ekero eriogi riakwanire, Yeso akarorekana ore bweka. Na barabwo bagakira, tibatebia monto ase amatuko aria ring’ana rinde rionsi ri’ayio baroche.
Okogwenigwa kw’omomura obwatire nekerecha
(Mat 17:14–18; Mar 9:14–27)
37Rituko ria kabere ekero baare gotirimboka korwa ase egetunwa, omoganda omonene okaumerana nere. 38Naende rora, omonto oyomo ase omoganda oria agaaka egeturi, okobora, “Omworokia, nagosabire, origererie omomura one, ekiagera ere nomwana one omomoima. 39Na rora ekerecha nigo gekomobwata, na ere bwango nigo akorera, naende kemogaragaria, erinde asokia amasombogoku, korende tikeri komorua otatiga ase okomosionora mono. 40Nasaba aborokigwa bao bageserie, korende tibanyara.”
41Yeso akairaneria, “Inwe ekegori getari nokwegena, naende ekebe, nimbe amo nainwe goika ririri, na koremereria nainwe? Renta omwana oo aiga.”
42Agachia koba nkomochiera are ekerecha keria gekamoigusia na komoiyeria. Yeso agakania ekerecha keria, akagwenia omwana oria, akamoirania ase ise. 43Abanto bonsi bagakumia ase okobua kwa Nyasae.
Obobani bwa kabere bwa Yeso igoro y’ogokwa kwaye
(Mat 17:22–23; Mar 9:30–32)
Korende ekero bonsi babete nogokumia ase amang’ana onsi akorete, agatebia aborokigwa baye, 44“Tiga amang’ana aya asoe ase amato aino, ekiagera Omwana‐o‐mwanyabanto ngochia are kobekwa ase amaboko ’abanto.” 45Korende tibamanya ring’ana riria, rikaba ndiabiseka asebare, erinde tibarimanya. Bakaba nobwoba komoboria engencho ye ring’ana riria.
Okworokereria igoro y’oboitongo
(Mat 18:1–5; Mar 9:33–37)
46Okoengererania kogatuboka ase egati yabo ng’a ning’o asebare ore omonene kobua abande. 47Korende ekero Yeso achia komanya ebirengererio bie chinkoro chiabo, akabogoria omwana, akamobeka ang’e asare, 48akabatebia, “Onde bwensi oramwanche omwana oyo ase erieta riane, onyanchire inche; na oyoranyanche inche, omwanchire ere oyontomete. Ekiagera ere oyore omoke ase egati yaino, oyio nere omonene.”
Okworokereria igoro y’okobogorerania
(Mar 9:38–40)
49Yohana akairaneria, “Omworokia, ntwarora omonto ogoseria ebirecha ase erieta riao, tokamokania, ekiagera tabwataini naintwe.”
50Korende Yeso akamotebia, “Timomokania, ekiagera oyo otari mamincha yaino nigo are ensemo yaino.”
Yeso okomanora kogenda Yerusalemu. Abasamaria abatakoroisia abageni
51Ekero amatuko aye aika ang’e kogenda igoro, akamanora kogenda Yerusalemu. 52Agatoma abatomwa komotang’anera, bagende na gosoa ase agachie k’Abasamaria, bamoroiserie aase. 53Abanto b’omochie oria tibamoroisia, ekiagera arenge kogenda Yerusalemu. 54Aborokigwa baye Yakobo na Yohana bagachia korora, aya, bakabora, “Omonene, norigetie toborie omorero oike korwa igoro obasirie [buna Elija akorete]?”
55Akeonchora, akabakania. [Akabora, “Timomanyeti nomoika ore naki more noro. 56Ekiagera Omwana‐o‐mwanyabanto tachete gosiria obogima bw’abana ba mwanyabanto, korende kobotooria.”] Bakagenda ase agachie kande.
Amateemwa ase abwo barigetie koba aborokigwa
(Mat 8:19–22)
57Ekero baare kogenda nchera omonto oyomo akamotebia, “Ningotunyane aande onsi ase okogenda.”
58Yeso akamotebia, “Ebibwe mbire namakuruma, ne chinyoni chia igoro nchire nebiswa, korende Omwana‐o‐mwanyabanto tari naase akobeka omotwe oye.”
59Agatebia oyonde, “Ntunyana!” Ere akabora, “Omonene, ritang’ani ing’a ribaga ngende gotindeka tata.”
60Akamotebia, “Tiga abakure batindeke abakure babo, korende aye genda orandie oboruoti bwa Nyasae.”
61Naende oyonde nere akabora, “Omonene, ningotunyane, korende ritang’ani ing’a ribaga mbaakere ng’a batigare buya abanto b’enyomba yane.”
62Yeso akamotebia, “Omonto tari orabeke okoboko kwaye ase obokombe bwe chieri, naende arigererie nyuma, oragwenere ase oboruoti bwa Nyasae.”
Currently Selected:
LUKA 9: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
