LUKA 11

“Ogosaba kw’Omonene”

(Mat 6:9–13)

1Ngosaba arenge aase gete. Gakoorire, oyomo bw’aborokigwa baye akamotebia, “Omonene, tworokie ogosaba buna Yohana orokereretie aborokigwa baye.”

2Akabatebia, “Komogosaba, teba iga:”

“Tata [oito ore igoro],

Erieta riao risikwe,

Oboruoti bwao boche,

3Otoe kera rituko endagera yaito.

4Otwabere ebibe biaito, ekiagera intwe tokwabera

kera oyomo otokorire bobe.

Totoira ase ogoteemwa,

[Korende ototoorie korwa ase oria omobe.”]

Ogosaba gw’okogenderera, na omoreng’anio bw’omosani ore gosaba omogati botuko gati

(Mat 7:7–11)

5Akabatebia, “Ning’o asemore ore nomosani oramochiere botuko gati amotebie: Mosani, ing’a singo emegati etato, 6ekiagera omosani one ochire asende korwa orogendo, na inche tindi na gento nkomoa; 7na oria ore ime namoiranerie, na goteba: Tondosia, egesieri giasiekirwe, na inche amo nabana baane twararire borere, tinkonyara koimoka nkoe? 8Nabatebirie, nataimoka amoe ekiagera nomosani oye, korende ekiagera oria tari gotiga ogosaba, naimoke na komoa ebio bionsi arigetie. 9Na inche nkobatebia nde inwe: Saba, namoegwe; rigia, namonyore; tura, namoigorerwe. 10Ekiagera kera oyogosaba, nigo akoegwa, na ere oyokorigia, nigo akonyora, na ere oyogotura, nigo akoigorerwa. 11Naki monto onde nare asemore oyore ise, na omwana oye amosabe omogati, Inee, namoe rigena? Gose karamosabe enswe, ase ribaga ri’enswe namoe eng’iti? 12Gose karamosabe rigena ri’engoko namoe ekeuge? 13Onye inwe, abamore ababe, momanyete koa abana baino ebiegwa ebiya, Inee, Iso oino ore igoro takomenta mono kobaa bonsi, abakomosaba, Omoika Omochenu?”

Yeso okoiraneria igoro y’ogosoerwa ng’a nigo are gokora emeremo ase ogokonywa kwa Beelizebuli

(Mat 12:22–30; Mar 3:22–27)

14Bono ngoseria arenge ekerecha rimama. Ekero ekerecha keria giasokire, omonto oria rimama agakwana; abanto bagakumia. 15Abande babo bagateba, “Nase Beelizebuli, omonene bw’ebirecha, akorusia ebirecha.”

16Abande ase okomoteema bakarigia aborokie egekone buna ekemanyererio korwa igoro. 17Ere konya omanyire ebirengererio biabo, akabatebia, “Kera oboruoti kobwatananekanire borobwo obonyene nigo bogosareka, na enyomba yaatananekire ero enyene nigo ekogwa. 18Naboigo Saitani karaatananeke ere omonyene, oboruoti bwaye naki boratenene? Naki inwe iga mogoteba ng’a nigo ngoseria ebirecha ase Beelizebuli. 19Na inche onye ngoseria ebirecha ase Beelizebuli, Inee, abana baino nase ng’o bakobiseria? Ase engencho eyio, barabwo nababe abagambi baino. 20Korende kondaserie ebirecha ase ekiara kia Nyasae, nabo oboruoti bwa Nyasae bwabacheire. 21Omonto bwe chinguru ore nebinto bi’esegi, gakorenda enyomba yaye, enibo yaye nigo ekoba ase omorembe, 22korende oyore ne chinguru kobua, ere karamochiere na komobua, nigo akomoura ebinto biaye bi’esegi bionsi ebiegenerete, na ebisakorwa biaye obiatanana. 23Omonto otari amo nainche nigo are mamincha asende, na ere oyotari gosangereria amo nainche nigo agoserebania.

Obobe bw’ogotaonchoka kegima

(Mat 12:43–45)

24“Ekero ekerecha ki’eubi kiarure ase omonto, nigo kegoeta gati aase atari namache, gekorigia aase kegotimokera; getanyoreti kiabora: Ning’irane ase enyomba yane ase narwete. 25Gakegocha, kiayenyora yaabusirwe, yaroisigwe. 26Erio kiagenda, kiarentana ebirecha bitano na bibere binde ebire ebibe gokebua kerokio ekenyene. Birobio bigosoa na komenya aroro; okoba kw’omoerio kw’omonto oyio kwaba okobe kobua okwe ritang’ani.”

27Ekero agokwana aya, omokungu oyomo ase omoganda agaaka eriogi, akamotebia, “Nesesenirie enda yakobogoretie, ne chimbeere kwagongete!”

28Korende Yeso akabora, “Mbuya kobua, basesenirie abakoigwa ring’ana ria Nyasae na koribwata!”

Ogokurerwa ase ogotarigia ebikone

(Mat 12:38–42; Mar 8:12)

29Ekero emeganda yamentekanete, agachaka gokwana, “Ekegori eke nekegori ekebe, gekorigia egekone buna ekemanyererio, korende tigekoegwa egekone otatiga eki’omobani Yona. 30Naki buna Yona abete ekemanyererio ase abanto ba Nineva, naboigo Omwana‐o‐mwanyabanto arache koba ase ekegori eke. 31Eting’ana ya Irianyi netenene ase rituko ri’ekina amo nabanto b’ekegori eke; ere nabanachere ekina, ekiagera nigo arwete ase chinsinyo chi’ense anyare koigwa obong’aini bwa Sulemani; na rora, oyobuete Sulemani naiga are. 32Abanto ba Nineva nabatenene ase rituko ri’ekina amo nabanto b’ekegori eke, na barabwo nabakenachere ekina, ekiagera baonchogete ase okorandia kwa Yona; na rora, oyobuete Yona naiga are.

Amorokererio korwa ase etaya

(Mat 5:15; 6:22–23)

33“Omonto gatongirie etaya tari koyebeka ase ekenunchi gose ayemumeke negetonga, korende nigo akoyebeka igoro ase ekebekerero, erinde abagosoa barore oborabu. 34Etaya y’omobere oo neriso riao; ekero eriso riao rire rigiya, omobere oo bwonsi nigo oichire noborabu; korende ekero eriso riao rire riibe, omobere oo bwonsi nigo oichire nomosunte. 35Gaki renda, oborabu obwo bore ime yao tibocha koba omosunte. 36Nabo omobere oo bwonsi korabe noborabu, ensemo ende teba omosunte, omobere oo noichore noborabu kegima, buna etaya ase amasase aye egwoka oborabu.”

Yeso ogokwana obobe igoro y’Abafarisai na abanto b’amachiko

(Mat 23:1–36; Mar 12:38–40; Luk 20:45–47)

37Ekero arenge gokwana, Omofarisai oyomo akamorangeria aragere amo nere. Agasoa, agaikaransa koragera. 38Omofarisai oria agachia korora, agakumia ekiagera ataisabete ritang’ani atararagera. 39Omonene akamotebia, “Bono inwe Abafarisai iga mogosibia egekombe na esani korwa isiko, korende ime yaino nigo moichire obouri na obobe. 40Inwe abariri, ere oyokorete egia isiko, tari ere okorete nekia ime nakerokio? 41Korende karue esadaka y’ebire ime; naende rora, ebinto bionsi nebichenu asemore.

42“Korende obobe nobwaino Abafarisai, ekiagera mokorua ensemo ya ikomi ye chiarare, na kera egesaku gie chinyeni, mogotiga oboronge na obwanchani bwa Nyasae. Naro aya nabagwenerete moyakore, motari gotiga ayande. 43Obobe nobwaino, Abafarisai! Ekiagera mwanchete goikaransa aase e ritang’ani ase chisinagogi, na gokwanigwa ase chichiiro. 44Obobe nobwaino! Ekiagera mogwekaine chimbeera chitari kororekana, na abanto baeta igoro yaye batamanyeti.”

45Omonto oyomo bw’amachiko akairaneria, akamotebia, “Omworokia, kogoteba aya, nigo ogotochaya naintwe.”

46Agateba, “Nainwe abanto b’amachiko, obobe nobwaino! Ekiagera mogotweka abanto chigurube chindito, na inwe abanyene timori gokuna chigurube echio nonya nase ekemo ki’ebiara biaino. 47Obobe nobwaino! Ekiagera mokoagacha chimbeera chi’ababani, abwo chisokoro chiaino chiaitete. 48Naboigo inwe mwabeire abarori na gwanchera ogokora gwe chisokoro chiaino, ekiagera nabwo babaitete, na inwe mokoagacha chimbeera chiabo. 49Nase ayio Obong’aini bwa Nyasae nigo bwatebete: Nintome asebare ababani na abatomwa; baite abande babo na kobachanda, 50erinde amanyinga ’ababani bonsi, ayaitegete korwa omochakano bw’ense naganigwe ase ekegori eke, 51korwa amanyinga ’Abeli goika amanyinga a Zakaria; oria oiteretwe gati y’egesasimero ne Hekalu. Ee, nabatebirie, narigigwe ase ekegori eke. 52Obobe nobwaino, inwe abanto b’amachiko! Ekiagera mwarusirie ekeigorero gie chisemi; inwe abanyene timwasoa, na baria abaare gosoa mwabatangire.”

53Agachia gosoka korwa aroro, aborokia b’amariko na Abafarisai bagachaka komomiga namaborio amakong’u, na komochegia akwane igoro y’ebinto ebinge; 54bakomotega, banyore ring’ana korwa ase omonwa oye, erinde banyare komosoera.

Currently Selected:

LUKA 11: EKEGUSIIBBLE

Highlight

Copy