LUKA 12

Yeso ogokurera aborokigwa baye tibang’ainererigwa

1Ekero ekio omosangererekano bw’abanto chilifu chinyinge bagachia gosangerereka goika bagatachana. Yeso agachaka gotebia aborokigwa baye ritang’ani, “Mwerende nememera y’Abafarisai, engencho yaye nobong’ainereria. 2Korende ing’ana rinde tiriri rimumekeirie, ritache koorokigwa, gose eribisekanete ritache komanyekana. 3Nabo onsi aya mogokwana ase omosunte, naigugwe ase omobaso; naro aya mokomonyererana ase ebinyomba ime nararigwe igoro ase ebirama.

Oyogwenerete koirokwa

(Mat 10:28–33)

4“Nabatebirie inwe abasani baane, timoiroka abwo bagoita omobere, na nyuma ase ayio tibari negento baranyare gokora kobua. 5Korende nimbakurere oyo morairoke: Moiroke oria ore nokobua, nyuma ase ogoita omonto omoruta ase omorero o kare na kare. Ee, nabatebirie, moiroke oria! 6Inee! Chinchiro isano tichiri koonigwa ase chibesa ibere? Naende nonya nakamo kabo tikari kwebwa ase obosio bwa Nyasae. 7Nonya nechitukia chi’emetwe yaino chiabarirwe chionsi. Timoiroka; inwe imobuete rigori rie chinchiro chinyinge.

8“Inche nigo nkobatebia, kera oyomo oranyatore ase mwanyabanto, Omwana‐o‐mwanyabanto nere namwatore ase abamalaika ba Nyasae; 9korende oyorankane ase mwanyabanto, nere nakanwe ase abamalaika ba Nyasae. 10Na kera oyomo orakwane ring’ana riibe igoro ase Omwana‐o‐mwanyabanto, naaberwe; korende ere oyorarame Omoika Omochenu takwaberwa. 11Naende kobakobaira ase chisinagogi, na ase abagambi, na ase abare nokobua, timochandeka buna morachie koiraneria gose buna morakwane, 12ekiagera Omoika Omochenu noborokererie ensa eyio eyio ayamogwenerete gokwana.”

Okogania ebiabande, na omoreng’anio bw’omonda omoriri

13Omonto oyomo ase omoganda akamotebia, “Omworokia, tebia momura ominto anyatanere omwando oito.”

14Akamoboria, “Omonto oyo, ning’o ombekire koba omogambi gose omwatanani igoro asemore?” 15Akabatebia, “Rigereria, erende korwa ase okogania okobe, ekiagera obogima bw’omonto tibori ase obonge bw’enibo yaye abwate.” 16Akabatebia omoreng’anio, akabora, “Omogondo bw’omonto omonda okama mono. 17Agachaka korengereria ase omoyo oye ime: Inki ngokora, ekiagera tindi naase nkobeka okwama kwane? 18Akabora: Ninkore iga: Nintagore ebiage biane, mbiaagache ebinene kobua, na aroro ningache endagera yane yonsi, na ebinto biane. 19Erio nintebie omoyo one: Aye omoyo, nore nenibo enyinge kwegacheire emonga y’emiaka emenge; timoka, orie, onywe, ogoke. 20Korende Nyasae akamotebia: Omoriri oyo, obotuko obo omoyo oo oraganigwa, na enibo kwegacheire ang’e, neya ng’o erabe? 21Naboigo are ere oyokwegachera emonga omonyene, na ere tari omonda ase Nyasae.”

Ogwechanda na okomosemeria Nyasae

(Mat 6:25–34)

22Agatebia aborokigwa baye, “Ase aya nabatebirie, timochandeka igoro y’obogima bwaino, eki morarie; gose ase emebere yaino, eki morabeke. 23Ekiagera obogima nobonene kobua endagera, na omobere nomonene kobua chianga. 24Rigereria ebigonkoru, tibiri gosimeka, tibiri kogesa, tibiri nemonga gose ekiage, korende Nyasae nigo akobirageria. Na inwe imobuete rigori rie chinyoni! 25Ning’o ore asemore oranyare gwechanda komenta ekerengo gi’okoboko okomo ase obotambe bwaye? 26Ase ayio, onye timori konyara gokora nonya ne ring’ana erire rike buna eri, nase ki mogwechandera amang’ana ande? 27Rigereria ebisicha buna bigokina; tibiri gokora emeremo gose gwesisa, korende nabatebirie, nonya n’Sulemani ase obonene bwaye bwonsi tabegete chianga buna ekemo ki’ebi. 28Onye Nyasae okoboyia obonyansi bw’egetii oboreo rero, na ankio botugutwe ase omorero, Inee, takomenta kobaboyia inwe abamore nokwegena ogoke? 29Inwe, timorigia eki morarie, gose eki moranywe; gose timoba nomoyo bw’ogwechanda. 30Naki abanto b’ebisaku bi’ense nigo bakorigia ebinto ebio bionsi, korende Iso oino omanyire ng’a moganetie ebio bionsi, 31Korende rigia oboruoti bwa Nyasae, na ebinto ebio namomenterwe inwe.

32“Timoiroka inwe abamore omoganda omoke, ekiagera Iso oino ororire buya kobaa oboruoti. 33Oonia ebio more nabio, morue ebiegwa; mwekorere ebimoya bitari kogota amo nenibo etari gokea igoro, aase omoibi atagoika, gose ebigwankwa gosaria. 34Ekiagera aase chinibo chiaino chire nao chinkoro chiaino chikoba.

Okogania gw’okorenda, na omoreng’anio bw’abasomba abegenwa na abatari abegenwa

35“Tiga ebinema biaino biboyigwe, ne chitaya chiaino chioke; 36na inwe mobe buna abanto baganyete omonene obo, gakoirana korwa ase omoyega bw’enyangi, erinde kagocha na gotura, erio kegima bamoigorere. 37Mbasesenirie abasomba baria ekero omonene obo agocha abanyore barendete. Ekeene nabatebirie: Neboyie, abaikaransie ase endagera, ache abakorere. 38Naende karache ase oborendi bwa kabere gose oborendi bwa gatato, abanyore barendete, mbasesenirie abasomba baria. 39Korende manya aya, onye omonyene enyomba namanyete ensa omoibi agocha, anga narendete, taiberwa. 40Nainwe nabo, mobe ang’e, ekiagera ensa motakagereti, nero Omwana‐o‐mwanyabanto arache.”

41Petero akamoboria, “Omonene, nintwe ogotebia omoreng’anio oyo, gose nase abanto bonsi?”

42Omonene akabora, “Ning’o rende ore omosomba omwegenwa, naende ore omong’aini, omonene oye arabeke igoro ase enyomba yaye yonsi, ae abanto endagera ekerengo kiabo ase ekero kegwenerete? 43Nasesenirie omosomba oria ekero omonene oye arache amonyore ogokora bo. 44Ekeene nabatebirie, namobeke igoro ase ebi abwate bionsi. 45Korende omosomba oria karatebe ase omoyo oye ime: Omonene one otebanire gocha, naende achake goaka abasomba bande, abasacha na abakungu, na koria, na konywa, na gotinda, 46omonene bw’omosomba oria nachiche rituko atakagereti, na ensa atamanyeti, nigo aramonachane abe ebing’ese, namoe ensemo yaye amo nabategeneti. 47Naende omosomba oria omanyete ogwancha kw’omonene oye, na tebeka ang’e, gose gokora ogwancha kwaye, naakwe ebiranya ebiroro, 48korende oria otamanyeti, ko ere okorire ayagwenerete ogoakwa, naakwe ebiranya ebiororo. Kera oyoeirwe ebinge, korwa asare ere nabiganigwe ebinge; na ere oyoeirwe ebinge kobua, korwa asare nabiganigwe ebinge kobua.

Ebimanyererio bi’ebiro

(Mat 10:34–36; 16:1–4; Mar 8:11–13)

49“Nigo nachire gotongia omorero ase ense; onye ngwoka ore, anga ninki ndigetie naende? 50Ninde nebatiso nkobatiswa, naende ninchandeke mono goika eikeranigwe! 51Inee! Mokagete ng’a nigo nachire ng’ee ense omorembe? Nabatebirie, taibo, korende nogwatanana. 52Naki korwa bono ase enyomba nababe abanto batano baatananeke, batato ase babere, naende babere ase batato. 53Mbaatananeke, ise na omwana omomura, na omwana omomura na ise, ng’ina na omwana omoiseke, na omwana omoiseke na ng’ina; ng’ina biara, na moka momura oye, moka momura oye na ng’ina biara.”

54Naende agatebia emeganda, “Ekero mokorora riire rikoimoka bosongo, erio mwateba bwango: Embura netwe; yaba bo. 55Naende ekero mokorora embeo ekorwa irianyi mwabora. Nebe eguru‐gura; yaba bo. 56Inwe abang’ainereria! Imomanyete ense na erioba, buna bikororekana, korende naki rende, motamanyeti ekero eke?

57“Naende naki ase emioyo yaino motari gwatanana ayare boronge? 58Nabo ekero okogenda nomogosoeri oo ase omogambi, kora omokia kobwatana nere komore inchera, tachicha kogokurura ase omogambi, na omogambi oria akobeke ase amaboko ’omorendi bw’echela, na omorendi oria akorute echela. 59Nagotebirie, tokorwa agwo nonya ng’ake goika oakane kegima ebesa y’omoerio.”

Currently Selected:

LUKA 12: EKEGUSIIBBLE

Highlight

Copy