लूका 6
6
अरामा रे ध्याड़े रा प्रभु
(मत्ती 12:1-8; मरकु. 2:23-28)
1फेरी यीसू अरामा रे ध्याड़े नाजा री डोहर्रिया मन्झा ले हुई किन्हें जाया करहा था, होर तेसरे चेले नाजा री सीरी तोड़ी-तोड़ी किन्हें, होर हाथा किन्हें मली-मली किन्हें खांदे जाहें थे। 2तेबे फरीसी लोका मन्झा ले कई लोक बोल्दे लगे, “तुस्से तेस कामा जो किधियो करहा ऐं, जेस जो अरामा रे ध्याड़े मन्झ करणा ठीक नी आ?” 3यीसूए तिन्हा किन्हें बोल्या, “क्या तुस्से ये नी पढ़ेया कि आस्सा रे बापदादे राजा दाऊदे जेबे से होर तेसरे साथी भूखे थे, ता तिन्हें क्या कितेया? 4से परमेसरा रे घरा मन्झ किधियो गया, होर चढ़ाईरी रोटिया खाध्ही, तिन्हा रोटिया जो याजका जो छाडी किन्हें कोई होर नी खाई सक्दा था, होर तिन्हें स्यों रोटिया आपणे साथिया जो भी दिती?”#6:4 लैव्य. 24:5-9, 1 समू. 21:6 5होर यीसूए तिन्हा किन्हें बोल्या, “हांऊँ माह्णुं रा मह्ठा अरामा रे ध्याड़े रा भी प्रभु आ।”
बेजान हाथ वाल़े माह्णुं रा ठीक हूंणा
6केसी होर अरामा रे ध्याड़े यीसू यहूदी सभा मन्झ जाई किन्हें उपदेस देंदा लग्या; होर तेथी एक माह्णुं था, जेसरा सीधा हाथ बेजान हुई गईरा था। 7व्यवस्था स्खाणे वाल़े होर फरीसी लोक तेस पर दोस ल्गाणे री ताका मन्झ थे कि, देख्हा ऐं कि से अरामा रे ध्याड़े तेस जो ठीक करहा कि नी। 8पर यीसू तिन्हारे विचार जाणहां था; एता कठे यीसूए तेस बेजान हाथा वाल़े माह्णुं किन्हें बोल्या, “उठ, मन्झ भर खड़ा हुई जा।” से उठी किन्हें खड़ा हुई गया। 9यीसूए तिन्हा किन्हें बोल्या, “हांऊँ तुस्सा ले ये पूछ्हा कि अरामा रे ध्याड़े व्यवस्था रे मताबक क्या करणा ठीक आ भला या बुरा करणा, जान बचाणा या नास करणा?” 10होर तिन्हें चारो वखा तिन्हा सभी जो देखी किन्हें तेस आदमी किन्हें बोल्या, “आपणा हाथ अगे कर।” तिन्हें तेह्ड़ा ई कितेया, होर तेसरा हाथ ठीक हुई गया। 11पर स्यों आपे ले बाहर हुई गये होर बैहस करदे लगे कि आस्से यीसू किन्हें क्या करिए?
यीसू रे बारा चुणिरे चेले
12होर तिन्हा ध्याड़े यीसू प्हाड़ा पर प्रार्थना करणे रे कठे निकल्या, होर तिन्हें परमेसरा रे कठे सारी रात प्रार्थना करदे-करदे बिताई दिती। 13जेबे ध्याड़ा सुर्हू हुई गया, ता तिन्हें आपणे चेले जो सादी किन्हें तिन्हा मन्झा ले बारा चेले चुणी लये, होर तिन्हें तिन्हा जो चुणिरे चेले बोल्या। 14होर स्यों यूंआं ऐं, समौन जेसरा नांऊँ जे तिन्हें पतरस भी रख्या था; होर तेसरा भाई अन्द्रियास होर याकूब होर यहून्ना होर फिलिप्पुस होर बरतुल्मै। 15होर मत्ती होर थोमा होर हलफईसा रा मह्ठा याकूब होर समौन जेहड़ा जेलोतेस दला#6:15 ये एक कट्टर राजनीतिक दला रा नाऊँ था जेह्ड़े रोम देसा रे बरखलाफ काम करहे थे, जेसरा से सदस्य हुआ करहा था रा था। 16होर याकूबा रा मह्ठा यहूदा होर यहूदा इस्करयोति, जो यीसू जो पकड़वाणे वाल़ा बणेया।
उपदेस देणा होर ठीक करणा
(मत्ती 4:23-25)
17तेबे यीसू आपणे चेले साउगी प्हाड़ा ले उतरी किन्हें चौरस जगहा मन्झ खड़ेया, होर तेसरे चेलेया री बडी भीड़, होर सारे यहूदिया ईलाके होर यरुस्लेम सैहरा होर सुर होर सैदा रे सैहरा रे समुद्रा रे बाढे बौह्त सारे लोक तेथी थे, 18जो तेसरी सुणने होर आपणी बमारिया ले ठीक हूंणे रे कठे तेस वाले आईरे थे। होर दुस्टात्मा रे स्ताईरे लोका जो भी ठीक करहा ऐं थे। 19होर सभ तेस जो छुणां चाहें थे, क्यूंकि तेस मन्झा ले सामर्थ निकली किन्हें सभी जो ठीक करहा ई थी।
आसिसा रे धन्य बचन
(मत्ती 8:1-12)
20तेबे यीसूए आपणे चेलेया री तरफ देखी किन्हें बोल्या;
“धन्य ऐं तुस्से, जो गरीब ऐं,
क्यूंकि परमेसरा रा राज तुस्सा रा आ।
21धन्य ऐं तुस्से, जो ऐबे भूखे ऐं;
क्यूंकि तुस्से रजाए जाणे;
धन्य ऐं तुस्से, जेह्ड़े ऐबे रोहां ऐं,
क्यूंकि तुस्सा हास्णा।
22धन्य ऐं तुस्से, जेबे माह्णुं रे मह्ठे रे चेले हूंणे वजहा ले लोका तुस्सा किन्हें नफरत करहे, होर तुस्सा जो काढी दे, होर तुस्सा री बदनामी करहे, होर तुस्सा रा नांऊँ बुरा जाणी किन्हें नकारी दे।”
23“तेस ध्याड़े तुस्सा खुस हुई किन्हें उछ्लणा होर कूदणा, क्यूंकि देखा, तुस्सा रे कठे स्वर्गा मन्झ बौह्त बडा इनाम रखिरा: तिन्हारे बापदादे नबिया साउगी भी तेह्ड़ा ई करदे रैंहयां ऐं थे।”
दुखा रे बचन
24“तुस्से जो अमीर ऐं, तुस्सा जो बौह्त सजा मिलणी!
क्यूंकि तुस्से आपणी खुसी पाई चुके।
25तुस्से जो जेसरे वाले सभ कुछ आ जेह्ड़ा तुस्से चाहें, तुस्सा जो बौह्त सजा मिलणी!
क्यूंकि तुस्सा भूखे रैंह्णां,
तुस्से जो ऐबे हासा ऐं, तुस्सा जो बौह्त सजा मिलणी!
क्यूंकि तुस्सा दुःखी हूंणां होर रोणा।
26होर तुस्से जेजो सभ लोक खरा बोले, तुस्सा जो बौह्त सजा मिलणी!
क्यूंकि तिन्हारे बापदादे भी झूठे नबिया जो खरा बोल्हा ऐं थे।”
दुस्मणा किन्हें प्यार
(मत्ती 5:38-48; 7:12)
27“पर हांऊँ तुस्सा सुणने वाल़ेया किन्हें बोल्हा कि, आपणे दुसमणा किन्हें प्यार रखा; जो तुस्सा किन्हें नफरत करहे, तिन्हारा भला करा। 28जो तुस्सा जो स्राप दे, तिन्हा जो तुस्से आसरीवाद देआ: जो तुस्सा री बेज्जती करहे, तिन्हारे कठे प्रार्थना करा। 29तेरे मुंहा रे सीधी तरफ तुजो चांडा मारे, ता तेस वखा जो आपणे मुंहा रा दूजा पासा भी फेरी दे, तेस जो कुरता लैणे ले भी नी रोक। 30जो कोई तुध ले मांगे, तेस जो दे; होर जो तेरी चीजा लई ले तेस ले दबारा वापस नी मांग। 31होर जेह्ड़ा तुस्से चाहें कि लोक तुस्सा साउगी करहे, तुस्से भी तिन्हा साउगी तेह्ड़ा ई करा।”
32“अगर तुस्से आपणे प्यार रखणे वाल़े किन्हें ई प्यार रखघे, ता तुस्सा री तेता मन्झ क्या बड़ाई हुई? क्यूंकि पापी भी आपणे प्यार रखणे वाल़ेया किन्हें प्यार रख्हा ऐं। 33होर अगर तुस्से आपणे भलाई करणे वाल़ेया साउगी ई भलाई करहा ऐं, ता तुस्सा री तेता मन्झ क्या बड़ाई हुई? क्यूंकि पापी भी ता एह्ड़ा ई करहा ऐं। 34होर अगर तुस्से तिन्हा जो धुआर देहां ऐं, जिन्हा ले दबारा वापस पाणे री आस रखो, फेरी किधियो लोक तुस्सा री तारीफ करहे? क्यूंकि पापी पापिया जो धुआर देहां ऐं, ताकि तितना ई फेरी दबारा वापस पाई सको। 35बल्कि आपणे दुसमणा किन्हें प्यार रखा, होर तिन्हारा भला करा: होर दबारा वापस पाणे री आस नी रखी किन्हें धुआर देआ; होर तुस्सा जो बड़ा इनाम मिलणा। होर तुस्सा परमप्रधाना रे बच्चे बणना, क्यूंकि से तिन्हा पर जो धन्यावाद नी करदे होर बुरे ऐं से तिन्हा दुहींया पर तरस करहा। 36जेह्ड़ा तुस्सा रा बापू दया करणे वाल़ा, तिहां ई तुस्से भी दया करणे वाल़े बणा।”
दोस नी लगाऊआ
(मत्ती 7:1-4)
37“केसी रा न्याय मत करहा ता तुस्सा रा भी न्याय नी हूंणा। दोस मत लगाऊआ, ता तुस्सा पर भी दोस नी लगाया जाणा। माफ करा, ता तुस्से भी माफ किते जाणे। 38देई करा, ता तुस्सा जो भी दितेया जाणां: लोका तुस्सा जो पूरा नापी किन्हें, दबाई-दबाई किन्हें होर हिलाई-हिलाई किन्हें दली किन्हें तुस्सा री फाल्हे मन्झ पाणा, क्यूंकि जेस नापा किन्हें तुस्से नाप्हा ऐं, तेस ई नापा किन्हें तुस्सा रे कठे भी नाप्या जाणा।”
39फेरी यीसूए तिन्हा किन्हें एक उदाहरण बोल्या, “क्या काणा, काणे जो पैंडा दसी सक्हा? क्या तिन्हा दुहिंआं गढे मन्झ नी पऊणा? 40चेला आपणे गुरु ले बडा नी आ; पर जेबे तेस सिद्ध हुई जाणा, ता तेस आपणे गुरु साहीं बणी जाणा। 41तू किधियो आपणे भाई री छोटी जे गलती जो देख्हा, होर आपणी बडी गलती तुजो नी सूझ्दी? 42होर जेबे तेरी आपणी गलतिया कितनी बडी ई, ता तू आपणे भाई जो किधियो बोल्हा कि ‘हाऊँ तेरी छोटी जे गलती ठीक करूं।’ ओ पाखंडी, पैहले आपणी गलतिया जो सुधार, तेबे तु तेसरी मदद करी सक्हा कि से आपणी गलतिया जो सुधारी सको।”
जेहड़ा डाल तेहड़ा फल
(मत्ती 7:16-20; 12:33-35)
43“कोई खरा डाल नी आ, जो बुरा फल ल्याए, होर ना ता कोई बुरा डाल आ, जो खरा फल ल्याए। 44हरेक डाल आपणे फला ले पछ्याणया जाहाँ; क्यूंकि लोक झाकड़ा ले अंजीर नी तोड़दे, होर ना झड़बेरी ले अंगूर। 45खरा माह्णुं मना रे भण्डार ले खरी गल्ला काढा; होर बुरा माह्णुं मना ले भण्डार ले बुरी गल्ला काढा; क्यूंकि जो मना मन्झ भरीरा, सेई मुंहा पर आई जाहाँ।”
घर बनाणे वाल़े दो माह्णुं
(मत्ती 7:24-27)
46“जेबे तुस्से मेरा ग्लाईरा नी मन्नदे, ता तुस्से मुंजो हे प्रभु, हे प्रभु किधियो बोल्हा ऐं? 47जो कोई मेरे वाले आहूँआं होर मेरी गल्ला सुणी किन्हें तिन्हा जो मन्हां, हांऊँ तुजो दस्हा कि से केस साहीं आं। 48से तेस माह्णुं साहीं आं, जिन्हें जे घर बनाणे रे टैमा जमीन डुघी खणी किन्हें चट्टाना प्रयाल्हे नींऊ पाई, होर जेबे बाढ़ आई ता धारा तेस घरा पर लगी, पर तेस जो हिलाई नी सकी; क्यूंकि से पक्का बणीरा था। 49पर जो सुणी किन्हें नी मन्नदा, से तेस माह्णुं साहीं आं, जिन्हें जे जमीना प्रयाल्हे बगैर नींऊँआं रा घर बणाया। जेबे तेस पर धारा बजी, ता से झटपट पई गया; होर से पई किन्हें सत्यानास हुई गया।”
Currently Selected:
लूका 6: MJLNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
