लूका 5

पैहले चेले रा सादेया जाणा

(मत्ती 4:18-22; मरकु. 1:16-20)

1होर एक ध्याड़े यीसू गलील समुद्र (गन्नेसरेता री झीला) रे बाढे खड़ीरा था। एक बौह्त बडी भीड़ परमेसरा रा बचन सुणने रे कठे यीसू पर पया करहा ई थी। 2कि तिन्हें गलील समुद्रा रे बाढे दो किस्तिया लगिरी देखी, होर मछी पकड़ने वाल़े तिन्हा किस्तिया परा ले उत्तरी किन्हें जाल धोया करहा ऐं थे। 3तिन्हा किस्तिया मन्झा ले एकी किस्ती पर जेह्ड़ी समौना री थी, तेता पर चढ़ी किन्हें, तिन्हें तेस किन्हें बोल्या कि, किस्ती जो बाढे ले थोह्ड़ा जे दूर हटाई ले, तेबे से बैठी किन्हें लोका जो किस्तिया प्रयाल्हे ले उपदेस देंदा लग्या। 4जेबे से भीड़ा किन्हें गल्ला करी चुक्केया, ता तिन्हें समौना किन्हें बोल्या, “आपणी किस्ती जो डुघे जे पाणी वाले लई चल, होर मछि पकड़ने रे कठे जाल पाई दे।”

5समौने यीसू जो जवाब दितेया कि, “हे माल्का, आस्से सारी रात बडी मैहनत किती होर कुछ नी पकड़ेया; पर तेबे बी तेरे बोलणे ले हांऊँ जाल पाई देहां।” 6तेबे समौन होर तेसरे साथिये जाल पाया, होर तिन्हें बौह्त सारी मछिया पकड़ी लई, होर तिन्हारे जाल फटणे ही वाल़े थे। 7एता पर तिन्हें आपणे साथिया जो, जो दूजी किस्तिया पर थे, इसारा कितेया कि, आई किन्हें मदद करा: होर तिन्हें आई किन्हें, दो किस्तिया एथी तक भरी लई कि स्यों डुबणे ही वाली थी। 8ये देखी किन्हें समौन पतरस यीसू रे पैरा पर पई गया, होर बोल्या, “हे प्रभु, मेरे वाले ले चली जा, क्यूंकि हांऊँ ता एक पापी माह्णुंआं!” 9क्यूंकि इतनी सारी मछिया पकड़ने पर तेस जो होर तेसरे साथीया जो बौह्त हरानी हुई। 10समौना रे साथी जब्दी रे मह्ठे याकूब होर यहून्ना भी हरान हुए। तेबे यीसूए समौना किन्हें बोल्या, “मत डर, ऐबे ले तुध लोक मेरे चेले बनाणे।” 11होर स्यों किस्तिया जो बाढे लई आये होर सब कुछ छाडी किन्हें तेसरे चेले बणने रे कठे तेस साउगी चली पये।

कोढ़ी माह्णुं रा ठीक हूंणां

(मत्ती 8:1-4; मरकु. 1:40-45)

12जेबे यीसू केसी गांऊँआं मन्झ था, तेथी एक माह्णुं था जो कोढ़ा किन्हें भरीरा था, होर यीसू जो देखी किन्हें से आपणे मुंहा रे भारे पई पया, होर अर्ज किती कि, “हे प्रभु अगर तुस्से चाहो ता मुंजो ठीक करी सक्हा ऐं।” 13यीसूए आपणा हाथ बढ़ाई किन्हें से छुही लया होर बोल्या, “हांऊँ चाहां कि तू ठीक हुई जा,” होर झटपट तेसरा कोढ़ ठीक हुई गया। 14तेबे यीसूए से खबरदार कितेया कि, “केसी किन्हें देख्या बोल्दा, पर याजका जो जाई किन्हें आपणे आपा जो दस, होर कोढ़ ठीक हूंणे रे बारे मन्झ जो व्यवस्था मूसे दितिरी, तेता रे मताबक बलि चढ़ा, ताकि लोका जो पता लगे कि तू ठीक हुई गईरा।”#5:14 लैव्य. 14:2-32 15पर यीसू री चर्चा होर भी फैहल्दी गयी, होर भीड़ा री भीड़ तेस ले सुणने रे कठे होर आपणी ब्मारीया ले ठीक हूंणे रे कठे, कठी हुई। 16पर से सुनसान जगहा मन्झ लग जे जाई किन्हें प्रार्थना करदा रैंहयां था।

अध्रन्गा रे ब्मार रा ठीक हूंणा

(मत्ती 9:1-8; मरकु. 2:1-12)

17होर एक ध्याड़े यीसू उपदेस देआ करहा था, होर गलील जिल्ले होर यहूदिया ईलाके रे कई गांऊँआं ले, होर यरुस्लेम सैहरा ले फरीसी लोक होर व्यवस्था स्खाणे वाल़े आई किन्हें तेथी बैठिरे थे। होर ब्मारा जो ठीक करणे रे कठे प्रभु री सामर्थ यीसू साउगी थी। 18होर कुछ लोके एक अध्रन्गा रा मरीज सण बिस्त्रे यीसू वाले ल्यान्देया होर स्यों तेस जो अंदर लेई जाणे री कोसिस करदे रहे। 19पर बौह्त भीड़ा री वजहा ले स्यों तेस जो अंदर नी लई जाई सके तेबे तिन्हें छापरा प्रयाल्हे चढ़ी किन्हें होर प्राल हटाई किन्हें, से सण बिस्त्रे बीचा मन्झ यीसू रे साम्हणें तुआरी दितेया। 20तिन्हें तिन्हारा विस्वास देखी किन्हें तेस किन्हें बोल्या, “हे माह्णुंआं, मैं तेरे पाप माफ करी दिते।” 21तेबे व्यवस्था स्खाणे वाल़े होर फरीसी लोक बैहस करदे लगे कि, “ये कुणहां, जो परमेसरा री निंदा करहा? परमेसरा जो छाडी किन्हें कोई होर पाप माफ नी करी सक्दा।”

22यीसूए तिन्हारे मना री गल जाणी किन्हें, तिन्हा किन्हें पुछेया कि, “तुस्से आपणे मना मन्झ क्या बैहस करहा ऐं? 23असान क्या आ? क्या ये बोलणा कि, तेरे पाप माफ हुई गये, या ये बोलणा कि उठ आपणा बिस्त्रा चक होर हांडदा लग 24ताकि हांऊँ तुस्सा जो साबित करी सकूं कि हांऊँ माह्णुं रा मह्ठा धरती पर पाप माफ करणे रा हक रख्हा आ।” यीसूए तेस अध्रन्गा रे मरीजा किन्हें बोल्या, “उठ आपणा बिस्त्रा चक होर हांडदा लग होर आपणे घरा जो चली जा।” 25अध्रन्गा रा मरीज झटपट तिन्हारे साम्हणें ले उठेया, होर जेस पर जे से लेटिरा था तेस जो चकी किन्हें, परमेसरा री बड़ाई करदा हुआ आपणे घरा जो चली गया। 26तेबे सब लोक हरान हुए होर परमेसरा री बड़ाई करी किन्हें बोल्दे लगे, होर बौह्त डरी किन्हें बोल्दे लगे कि, “आज आस्से नौखी गल देखी।”

लेवी रा सादेया जाणा

(मत्ती 9:9-13; मरकु. 2:13-17)

27होर तेता ले बाद यीसू बाहर गया, होर लेवी जेस जो मती भी बोल्हे थे चौकी पर बैठिरे देख्या, से चुंगी लैणे वाल़े था। यीसूए तेस किन्हें बोल्या, “आ मेरा चेला बण।” 28होर तेबे से सभ कुछ छाडी किन्हें, यीसू रा चेला बणने रे कठे तेस साउगी चली गया। 29होर लेवी लोके आपणे घरा मन्झ तेसरे कठे बौह्त बडी धाम किती; होर चुंगी लैणे वाल़ेया री होर जेह्ड़े तेस साउगी खाणा खांदे बैठिरे थे एक बौह्त बडी भीड़ थी। 30होर फरीसी लोक होर तिन्हारे व्यवस्था स्खाणे वाल़े तेसरे चेले किन्हें ये बोली किन्हें गलांण करदे लगे कि, “चुंगी लैणे वाल़े होर पापिया साउगी खांहां पीहां!” 31यीसूए तिन्हा जो जवाब दितेया कि, “भले चंगे जो बैदा री ज्रूरत नी ई, पर ब्मारा जो बैदा री ज्रूरत ई। 32जो आपणे आपा जो धर्मी सोच्हा ऐं तिन्हा जो मेरी ज्रूरत नी ई, पर तिन्हा जो मेरी जरूरत ई स्यों जे आपणे आपा जो पापी मन्हां ऐं तिन्हारे मना जो बदलने रे कठे आईरा।”

ब्रता पर सुआल

(मत्ती 9:14-17; मरकु. 2:18-22)

33एक ध्याड़े यहूदी अगुवे यीसू किन्हें बोल्या, “यहून्ना बपतिस्मा देणे वाल़े रे चेले ता ब्रत रख्हा ऐं होर प्रार्थना करहा ऐं, होर तिहां ईं फरीसी लोका रे चेले भी करहे, पर तेरे चेले हमेसा किधियो खाहें-पीहां ऐं?” 34यीसूए तिन्हा किन्हें बोल्या, “जेबे तक नंऊँआं लाड़ा बरातिया साउगी रैंहयां ता स्यों कधी भी ब्रत नी करदे। 35पर स्यों ध्याड़े आऊणें, जेबे जे नंऊँआं लाड़ा तिन्हा ले लग कितेया जाणा, होर तेबे तिन्हा, तिन्हा ध्याड़े मन्झ ब्रत करणा।” 36तिन्हें एक होर उदाहरण भी तिन्हा किन्हें बोल्या कि: “कोई माह्णुं नंऊँऐं कपड़े मन्झा ले कपड़ा छेकी किन्हें पुराणे कपड़ेया री टाल्ही नी ल्गान्दा, नी ता धोणे ले बाद नौंईं टाल्ही फटी जाणी होर से टाल्ही पुराणे कपड़ेया साउगी मेल नी खांदी। 37होर नंऊँऐं अंगूरा रा रस पुराणे चामड़े रे थैलू मन्झ कोई नी भरदा, नी ता नंऊँऐं अंगूरा रा रसा सीजी किन्हें चामड़े रे थैलू फाड़ी देणा, होर अंगूरा रा रसा खिंडही जाणा; होर चामड़े रे थैलू रा भी नास हुई जाणा। 38पर नंऊँआं अंगूरा रा रस नौंईं चामड़े रे थैलूया मन्झ भरणा चहिए। 39कोई माह्णुं पुराणा अंगूरा रा रस पी किन्हें नंऊँआं नी चाहन्दा क्यूंकि से बोल्हा कि पुराणा ई ठीक आ।”

Currently Selected:

लूका 5: MJLNT

Highlight

Copy