लूका 7

एक सूबेदारा रा विस्वास

(मत्ती 8:5-13)

1जेबे यीसू लोका जो आपणी सारी गल्ला सुणाई चुक्केया, ता से कफरनहूम सैहरा मन्झ आया। 2होर तेथी एक सूबेदार था जेसरा सेऊआदार इतना ब्मार था कि से मरणे ई वाल़ा था, से सेऊआदार तेसरे कठे बौह्त प्यारा था। 3जेबे तिन्हें यीसू रे बारे मन्झ सुणेया ता कुछ यहूदी लोक होर यहूदी मुखिये तेस वाले ये अर्ज करणे रे कठे तेस वाले भेजे कि, से आई किन्हें तेसरे सेऊआदारा जो ठीक करी दे। 4स्यों यीसू वाले आई किन्हें तेस किन्हें बड़ी मिन्नत करदे लगे, “से एस लायक आ कि, तू तेसरे कठे ये करहे। 5क्यूंकि से आस्सा री जाति किन्हें प्यार रख्हा होर तिन्हें ई आस्सा रे यहूदी सभा जो बणाईरा।” 6होर यीसू तिन्हा साउगी चली गया, होर जेबे से घरा रे नेडे था, ता सुबेदारे तेस वाले कई दोस्ता रे ज्रीए ये खबर भेजी कि, “हे प्रभु दुःख नी उठा, क्यूंकि हांऊँ एस लायक नी आ कि, तू मेरे घरा मन्झ आये। 7एता कठे मैं आपणे आपा जो एस लायक भी नी समझ्दा कि हांऊँ तेरे वाले आऊँ, पर सिर्फ बोली दे ता मेरे सेऊआदारा ठीक हुई जाणा। 8हांऊँ भी केसी रे अधीन रैहणे वाल़ा माह्णुं आ, होर स्पाही मेरे अधीन ऐे, होर जेबे हांऊँ एकी जो बोल्हा, ‘जा,’ ता से चली जाहाँ, होर दूजे जो बोल्हा कि, ‘आऊ,’ ता से आहूँआं; होर आपणे केसी सेऊआदारा जो बोल्हा कि, ‘ये कर,’ होर से तेहड़ा ई करहा।”

9ये सुणी किन्हें यीसू जो हरानी हुई, होर तिन्हें पीछे मुड़ी फेरी किन्हें तेस्सा भीड़ा किन्हें जो तेसरे साउगी चलिरी थी बोल्या, “हांऊँ तुस्सा किन्हें बोल्हा की मुंजो इस्राएल देसा मन्झ कोई एह्ड़ा माह्णुं नी मिल्या जो मेरे पर विस्वास करा।” 10होर जो दोस्त सुबेदारे भेजिरे थे, तिन्हें घरा जाई किन्हें तेस सेऊआदारा जो ठीक ठाक देखेया।

विधवा रे मह्ठे जो जिन्दगी देणा

11थोह्ड़े ध्याड़े ले बाद यीसू नाईन सैहरा जो गया, होर तेसरे चेले, होर बडी भीड़ भी तेस साउगी चली। 12जेबे से गांऊँआं रे फाटका वाले पुज्हेया, ता लोके एक मरिरे जो अर्थी पर चक्की किन्हें बाहर लई जाया करहा ऐं थे। से आपणी माऊआ रा कल्हा-कल्हा मह्ठा था, होर से जन्नानी एक विधवा थी, होर गांऊँआं रे बौह्त सारे लोक तेस्सा साउगी थे। 13तेस्सा जो देखी किन्हें प्रभु दया किन्हें भरी गया, होर यीसूए तेस्सा विधवा किन्हें हिम्मत देंदे हुए बोल्या, “मत रो।” 14तेबे तिन्हें नेडे जे आई किन्हें अर्थी छुही; होर अर्थी चकणे वाल़े रुकी गये, तेबे तिन्हें बोल्या, “हे जुआन, हांऊँ तुजो बोल्हा, उठी जा!” 15तेबे से मुर्दा उठी बैठया, होर बोल्दा लग्या: होर तिन्हें से तेसरी माऊआ जो सौंपी दितेया। 16ये देखी किन्हें सभ लोक बौह्त डरी गये, होर स्यों परमेसरा री बड़ाई करी किन्हें बोल्दे लगे कि, “आस्सा रे बीचा मन्झ एक बड़ा नबी आई गईरा। होर परमेसरे आपणे लोका जो मदद करणे रे कठे आई गईरा।” 17होर तेसरे बारे मन्झ ये गल सारे यहूदिया ईलाके होर ओरले परले, नेडे रे सारे ईलाके मन्झ फैल्ही गयी।

यहून्ना बपतिस्मा देणे वाल़े रा सुआल

(मत्ती 11:2-19)

18होर यहून्ना बपतिस्मा देणे वाल़े रे चेले आई किन्हें यहून्ना जो इन्हा गल्ला री खबर दिती। 19तेबे यहून्ने आपणे दो चेले प्रभु वाले ये सुआल करणे रे कठे भेजे कि, “क्या तू सेई मसीह आ जेस जो भेजणे रा वादा परमेसरे कितिरा था, या आस्से केसी होरी जो नह्यालिए?” 20यहून्ना रे चेले तेस वाले आई किन्हें बोल्या, “यहून्ना बपतिस्मा देणे वाल़े आस्से तेरे वाले ये पुछणे रे कठे भेजिरे कि, आऊणें वाल़े तुस्से ई ऐं कि, आस्से केसी होरी जो नह्यालिए?” 21तेस ई टैम यीसूए कईया जो बमारिया ले, होर पीड़ा, होर दुस्टात्मा ले छुड़ाया, होर बौह्त सारे काणे लोका री हाखिया जो ठीक कितेया। 22होर यीसूए यहून्ना रे चेले किन्हें बोल्या, “जो कुछ तुस्से देख्या होर सुणेया, जाई किन्हें यहून्ना बपतिस्मा देणे वाल़े किन्हें बोली देआ कि, काणे देख्हा ऐं, लंगड़े चल्हा फिरहा ऐं, कोढ़ी ठीक किते जाहें, होर टौणें सुणहां ऐं, मरिरे या जो जिउंदा कितेया जाहाँ, होर गरीबा जो खुसी री खबर सुणाई जाहीं। 23होर धन्य ऐं स्यों, जो मेरे पर विस्वास करणा नी छाडदे।”

24जेबे यहून्ना बपतिस्मा देणे वाल़े रे भेजिरे दूत चली गये, ता यीसू यहून्ना रे बारे मन्झ लोका किन्हें बोल्दा लग्या, “तुस्से बियाबान जगहा मन्झ क्या देख्दे गईरे थे? क्या बागरा किन्हें हिल्दे लगिरे सरकंडे जो? 25ता फेरी तुस्से क्या देख्दे गईरे थे? जिन्हें मैहंगे कपड़े पैहनीरे थे? नी, जो मैहंगे कपड़े पैन्हां ऐं होर सुख विलासा किन्हें रैंहयां ऐं, स्यों राजमहला मन्झ रैंहयां ऐं। 26ता फेरी तुस्से क्या देख्दे गईरे थे? क्या केसी नबी जो देखणे रे कठे? हां, हांऊँ तुस्सा किन्हें बोल्हा, बल्कि नबी ले भी बडे जो। 27ये सेई आ, जेसरे बारे मन्झ लिखिरा कि:

‘देखा, हांऊँ आपणे दूता जो तेरे अगे-अगे भेज्हा, जेस तेरे अगे-अगे पैंडा ठीक करणा।’”

28हांऊँ तुस्सा किन्हें बोल्हा कि, जितने भी लोका रा संसारा मन्झ जन्म हुईरा, तिन्हा मन्झा ले यहून्ना बपतिस्मा देणे वाल़े ले कोई बडा नी हुआ। पर जो परमेसरा रे राजा मन्झ छोटे ले छोटा आ से तेस ले बडा आ। 29जेबे तिन्हें ये सुणेया कि यीसूए क्या बोल्या, तेबे सभीए एथी तक कि चुंगी लैणे वाल़े भी यहून्ना ले बपतिस्मा लई किन्हें ये मनी लया कि परमेसर धर्मी आ। 30पर फरीसी लोके होर व्यवस्था स्खाणे वाल़े आपणे बारे मन्झ परमेसरा री इच्छा जो टाल्ली दिती, क्यूंकि तिन्हें यहून्ना ले बपतिस्मा लेणे ले ना करी दिती।

31“एता कठे हांऊँ एस जमाने रे लोका री तुलना केस साउगी करूं कि स्यों केस साहीं ऐं? 32स्यों तिन्हा बच्चेया साहीं ऐं जो बजारा मन्झ बैठिरे एक दूजे किन्हें चिंगी-चिंगी किन्हें बोल्हा ऐं कि, ‘आस्से तुस्सा रे कठे बंसरी बजाई, होर तुस्से नी नाचे, आस्से रोये, पर तुस्से नी रोये!’ 33क्यूंकि तुस्से यहून्ना बपतिस्मा देणे वाल़े रे कठे सिकायत करहे कि तिन्हें आपणा टैम रोटी खाणे होर अंगूरा रा रस पीणे मन्झ नी लगाया; फेरी भी तुस्से बोल्हा ऐं कि, तेस मन्झ दुस्टात्मा ई। 34हांऊँ माह्णुं रा मह्ठा आया होर आम लोका साहीं खांहां पिहां, होर तुस्से बोल्हा ऐं कि, ‘पेटू होर पियक्कड़ माह्णुंआं, चुंगी लैणे वाल़ेया रा होर पापिया रा दोस्त।’ 35पर माह्णुं रे काम एस गल्ला रा फैसला करहे कि बुद्धिमान कुणहां।”

फरीसी लोका रे घरा मन्झ एक पापण ज्नाने जो माफी मिलणा

36फेरी केसी एक फरीसी लोके यीसू किन्हें अर्ज किती कि, मेरे साउगी खाणा खाऊआ। इधी कठे से तेस फरीसी रे घरा मन्झ जाई किन्हें खाणा खांदे बैठया। 37तेस सैहरा री एक पापण ज्नाने ये जाणी किन्हें कि यीसू केसी फरीसी रे घरा मन्झ खाणा खांदे बैठीरा, से संगमरमरा रे भांडे मन्झ कीमती इत्र लई आई। 38होर आई किन्हें यीसू रे पीछे खड़ी हुई गई, होर रोंदे हुए तेसरे पैरा जो आपणी हाखिया रे पाणी किन्हें सग्दी होर आपणे मूंडा रे बाला किन्हें पुन्झ्दी लगी। होर तेस्से तेसरे पैर बार-बार चूमी किन्हें पैरा गास इत्र मल्या। 39ये देखी किन्हें, से फरीसी जिन्हें जे यीसू सादिरा था, आपणे मना मन्झ सोच्दा लग्या, “अगर ये नबी हुन्दा ता जाणी लैंदा कि, ये जे तेस जो छुहेया करहा ई, से कुणहीं होर केह्ड़ी ज्नाने ई? क्यूंकि से ता पापण ई।”

40तेसरे मना री गल्ला जाणी किन्हें यीसूए बोल्या कि, “हे समौन हांऊँ तेरे किन्हें कुछ बोलणा चाहां।” तिन्हें बोल्या, “हे गुरु बोल।” 41यीसूए ये उदाहरण देई किन्हें बोल्या “केसी महाजना रे दो देहणदार थे, एकी पर पांज सौ ध्याड़े री कमाई री कीमता री बराबरी रा कर्ज था, होर दूजे पर पंज्याह ध्याड़े री कमाई री कीमता री बराबरी रा कर्जा था। 42क्यूंकि स्यों कर्जा वापस करणे री हालता मन्झ नी थे इधी कठे महाजने अनुग्रह करी किन्हें दुहीं रे कर्ज माफ करी दिते। इधी कठे तिन्हा मन्झा ले केस देहणदारा तेस किन्हें ज्यादा प्यार रखणा।” 43समौने जवाब दितेया, “मेरी समझा मन्झ से, जेसरा जे तिन्हें ज्यादा कर्ज माफ कितेया तेस ज्यादा प्यार रखणा।” यीसूए तेस किन्हें बोल्या, “तैं ठीक बोल्या।” 44होर यीसूए तेस्सा ज्नाने री तरफा मुड़ी किन्हें समौना किन्हें बोल्या, “क्या तू देखा कि एस्से ज्नाने क्या कितेया? हांऊँ तेरे घरा मन्झ आया पर आस्सा रे रुआजा रे मताबक तैं मेरे पैरा धोणे रे कठे पाणी नी दितेया। पर एस्से जन्नाने मेरे पैर हाखिया रे आंसू किन्हें सगे, होर आपणे बाला किन्हें पुन्झे।” 45आस्सा रे रुआजा रे मताबक तैं चूमी किन्हें मेरे स्वागत नी कितेया, पर जेबे ले हांऊँ आईरा तेभे ले एस्से जन्नाने मेरे पैर चूमणे नी छाडे। 46तैं मेरा आदर करणे रे कठे मेरे मूंडा पर जैतूना रा तेल नी मल्या; पर एस्से मेरे पैरा पर कीमती खुस्बूदार इत्र मल्या। 47“इधी कठे हांऊँ तुध किन्हें बोल्हा कि, एस्सा रे बौह्त सारे पाप माफ हुई गये, इधी कठे ऐस्से बौह्त प्यार जाहिर कितेया। पर जेसरा थोह्ड़ा माफ हुईरा, तेस थोह्ड़ा ई प्यार जाहिर करणा।” 48होर यीसूए तेस्सा ज्नाने किन्हें बोल्या, “तेरे पाप माफ हुई गये।” 49तेबे जो लोक तेस साउगी खाणा खांदे बैठिरे थे, स्यों आपणे-आपणे मना मन्झ सोच्दे लगे कि, “ये कुणहां आ जो पापा जो माफ करा जेस जो सिर्फ परमेसर माफ करी सका?” 50पर यीसूए ज्नाने किन्हें बोल्या, “परमेसरे तू बचाई लिती, क्यूंकि तैं मेरे पर विस्वास कितेया। सांति किन्हें चली जा।”

Currently Selected:

लूका 7: MJLNT

Highlight

Copy