Mbete Matiye 28
28
1Nam a seɗe-u ɓil nam ti̧hmbih-i guy buma ɓa baw nam ɔkna kal. Nam ti̧hmbih a sayu ka̧h da. Namu ɓa nam a titilu ɓil dimasi. Gel pele, Mari ké Makdala ke Mari a ɓoru, ku ti̧h ɓay si ko tupal Zezu. 2Ɓil namaw mí tem nzak pihna Gaŋ tul feri riw ɗer ke nunmbam gi. Í ko, tusiɓa laŋ yik yik kikri mah kasawaw vbu fál mbew, mí tem nzak pihna-aw kaɓ tulu. 3Mun ye ndu̧y kandɔk sakna mbam. Gar ye pu kpa̧h kpa̧h#28.3 Sa̧w nzak ɓahri, kandɔk neige. Neige pu kpa̧h kpa̧h kandɔk ndoy tul nday kaŋ.. 4Sozeri ké kɔr tupal ra, mun woyri to kpak kpak ɓa hȩkme. Ku lih siɓa kandɔk hulri kaŋ. Bol falu wu̧yri ka̧h tupal. 5Tem nzak pihna ra ko wu̧yri ra bale, ke ɓahri : « Í laɓ wuri hȩkme ya. Mi tu ɓahri se, i ƴo ƴah hul Zezu kú-u ɓar ni ké tul kpuh munu. 6Hul ye ta gelay ya ɓayu ké-e ti̧h ke puh záh ke pa̧ymun a foyu kandɔk ké-e ɓah ɓayu pol ra. Í gi wuri ko gel-mbek hul ra ké na-ay. 7Í si gah, í ɓah hi̧ nzuk-dih fal yeri ɓahri, Zezu ti̧h ke puh záh ke pa̧ymun a foyu. Í lah wuri, ke tɔr pol hi̧ wuri ma Galile. Ku zíŋ ni ké ri. Í lah, mi ɓah hi̧ wuri da. » 8Wu̧yri ra el ti̧h ke ɓil hoh kasaw-mbek hul ra ke hȩkme pi ke law rihna a luki pi. Mí ku ti̧h ɓa gah-u ke ɗukna si ɓah ɓayu hi̧ nzuk-dih fal Zezuri lah.
9Wu̧yri si mahful kɔɓ ɓáy, mí í ko, ɓa Zezu mí nzɔh nun woyri. Ke ɓahri : « Soko woiri wo. »
Ku gi ta̧w Zezu, mí ku huk pol ye. Ku mgba bɔk ye, mí ku dim ni. 10Wara mí Zezu ɓahri : « Í laɓ hȩkme ya. Í si ɓah hi̧ yi̧n biri ɓahri se, kú si Galile le, ku zíŋ mi ké ri. »
11Wu̧yri-aw tɔr, mí í ko, soze-kɔr tupal a haniri ra el si ɓil puh mí ndazi ɓay feri ké kal ke gelu gelu hi̧ ŋgernzuk fe puhna Ŋgerzahri lah. 12Ŋgernzuk fe puhna Ŋgerzahri mbu̧h hani ke ŋgernzuk gun Izarayelri, mí ku mbu̧h nzak mbew. Ku fa̧h lari mah fe, mí ku hi̧ sozeri ɓahri se, 13sozeri ɓá ɓahri, ku na nam, mí nzuk-dih fal yeri gi mbi hul ke suŋ, mí ku tɔr keni. 14Ɓayu toh ra suk guvener le, ŋgernzuk fe puhna Ŋgerzahri ke ŋgernzuk gun Izarayelri ɓay voh law ye rɔkɔ ké laɓ fe a se-u ziŋ niri soze-kɔr hulri.
15Sozeri ya̧ lari ra, mí ku ɓah ɓayu kandɔk kú-u sɔk niri. Ɓayaw ra mí ziɓri ƴo tulu kpu̧ru ka̧h guri-ay.
16Nzuk-dih fal Zezu a boh falu mbewri tɔr si tusiɓa Galile. Ku si tul kasaw a a̧y ké Zezu sɔk niri pol ra. 17Ku ko Zezu, ku huk siɓa ké pol ye mí ku dim ni. Keni-aw kara kerɓay zukru niri. 18Zezu loh ma ta̧w woyri, mí ke ɓah ɓayay hi̧ niri ɓahri : « Mi ziŋ huhrumun-lak mbay tul feri gbam ké nunmbam pi ké tusiɓa pi. 19Kaŋ dale í si wuri. Sina woiri le í hi̧ sa̧wnzukri gbam ɓá ti̧h ɓa nzuk-dih fal biri, kú ti̧h ɓil batem mbu̧h ziŋ Ŋgerzah ɓa sa̧w ye a ye Gaŋ tul feri riw ké riŋ ye mbew yaŋ, a ye, baah, gun, Tempuki. 20Í firma niri kú ƴo tul ɓay biri ké mi ɓah hi̧ wuri. Í ko, mi ƴo ziŋ wuri nam ke nam ka̧h sew a ɔh tɔr sewri. »
Currently Selected:
Mbete Matiye 28: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
