Mbete Marki 1
1
1Ɓaysuki hul Zezu ké ɓa Ŋgermbay gun Ŋgerzah titil kandɔkay.
2Ɓaysuki ra ti kandɔk ké Ezay gun nzak pihna Ŋgerzah a lewsa̧ vbeh ɓayu. Ŋgerzah pih ɓahri se : Í ko, mi pih gun nzak pihna bi ƴo pol wo#1.2 Í mgba Mbete Exode 23.20 tuh ke gel ki̧na-ay. ɓay lek ful geŋ mu#1.2 Í mgba Mbete Malachie 3.1 tuh ke gel ki̧na-ay.. 3Kusol ye mgbe ɓil lawkɔr ɓahri, í lek wuri mahful geŋ Miƴori, fulu sa gelaw mí í lek ɓá na kparak kparak#1.3 Gel ki̧na-ay Mbete Esaïe 40.3. .
4Kandɔkaw mí Za̧h ti̧h ɓil lawkɔr, ke ƴo hi̧ nzukri ti̧h ɓil batem a mbih. Ke ƴo ka-kah ɓay batem a mbilaw, kú mbi law woyri ké tul suya ma fal el kan law tul Ŋgerzah ɓay hi̧ salɓay suya ɓá lu ké tul woyri. 5Ziɓri ur ke tusiɓa Zude gbam mbu̧h ma ta̧w Za̧h. Ziɓri riw ké Zurusalem kara pi. Ku hi̧ Za̧h soh niri mbih batem ɓil mahmbih Zurdeŋ. Nzak woyri ƴo ten ɓay suya woyri.
6Za̧h ra ndoh gar kú-u kaŋ ke pirma zɔŋzɔŋ#1.6 Í mgba gel ki̧na-ay tuh ke Mbete Matiye 3.4.. Ke ŋga̧h si̧h ye ke sal ho̧ko. Fe su̧na ye ɓa zele ke num zuhru. 7Ke ka-kah ɓahri : « Nzuk a luki ƴo gina. Ɗíŋ tul ɓay sel sal sabɔk ye kara mi mah ya. 8A bi, mi hi̧ wuri ti̧h ɓil batem a mbih. A ye le ke ɓay hi̧ wuri ti̧h ɓil batem a Tempuki. »
9Ké ɓil namuri-aw Zezu ur ke Nasareɗ ké tusiɓa Galile gi ka̧h ta̧w Za̧h, mí ke hi̧ Za̧h soh ni mbih batem ɓil mahmbih Zurdeŋ. 10Zezu ƴo ti̧h ke ɓil mbih, sa gelaw mí ke ko nunmbam mgbur ɓoloŋ, mí ke ko Tempuki ɗer kandɔk mbɔre gi kaɓ tul ye. 11Kusol ba, ti̧h ke nunmbam ɓahri : « A wo mú-u ɓa gun sana bi. Law bi na sa tul wo. »
12Sa gelaw mí Tempuki sɔkrɔ ni si ɓil lawkɔr. Ke laɓ nam bon niŋ ké ɓilu. 13Nam bon niŋaw, nzukbaa a ye mbay záh tukala ƴo ndoh law Zezu ke ɓay. Zezu kaɓ gel ƴona nayri. Tem nzak pihnari ƴo so ni.
14-15Seh kú-u mgba Za̧h mbih vul mgbal ra, Zezu si tusiɓa Galile. Ke ka-kah ɓahri : « Lák mbay Ŋgerzah gi ka̧h da. Le í mbi law woiri ké tul suya ma fal el kan law woiri tul Ŋgerzah. Í ya̧ ɓaysuki lák mbay ye ma law woiri. »
16Zezu si sina ke ɓel mahmbih Galile, ke ko nzukri seɗe ɓa Simu ke yi̧n ye Andere. Ku ƴo vbu kȩke woyri ɓayu kú-u ɓa nzuk-mgba nzuyri. 17Zezu ɓah hi̧ niri ɓahri : « Í gi fal bi. Mi ɓay sɔɓ wuri ti̧h ɓa nzuk-mgba nzukri hi̧ mi. »
18Ku poŋ kȩke woyri. Sa gelaw mí ku dih fal ye. 19Zezu loh tɔɓ, mí ke el ko nzuk a ɓoruri seɗe ɓa Zak ke yi̧n ye Za̧h. Bah woyri ɓa Zebede. Ku kaɓ ɓil kumbon ƴo lek nun kȩke. 20Sa gelaw mí Zezu ɗi niri. Gun Zebederi ba, ku poŋ bah woyri ke nzuk pihnari ké ɓil kumbon, mí ku si fal ye.
21Zezu ke nzuk-dih fal yeri si ka̧h Kapernayum. Nam ɔknari, Zezu ƴo si vul misoŋ. Sa gelaw mí ke firma nzukri ɓay Ŋgerzah. 22Gosoɓay zi nzukri ɓay tul fe firma ye, ɓayu ké fe firma ye na kandɔk fe firma nzuk-sɔk mbete bolkusol Ŋgerzahri ya. Ku ƴo mbi ɓay Ŋgerzah firma nzukri keni. A ye ba, ke ɓah ɓayuri kandɔk a ye mí ke ɓa mbay bolkusolu.
23Záh ƴo tul nzuk a hani ké kaɓ ɓil vul misoŋaw. 24Sa gelaw mí ke vba̧ nzak ɓahri : « Zezu ké Nasareɗ, a fe wo mí ƴo sakra wah le ? Mu gi ɓay ɓeɓ na wa ? Mi tu mu tu-tu. Mu ɓa nzuk lawpuki Ŋgerzah. » 25Mí Zezu hah záh ɓahri : « Poŋ nzak wo-aw. Mú ti̧h ke tul nzukay. »
26Záh ra laŋ nzuk ra yik yik, ke vba̧ nzak ɓeleŋ, mí ke ti̧h ke tul nzuku poŋ ni gaŋ ba.
27Nzukri riw kaɓ yer. Fe-u na niri ɓa saŋ hi̧ ku fah ɓay ké sakra haniri. Ku ƴo ɓahri, sam fe firma fe mí kari le ? Ke firma ɓay Ŋgerzah ɓa foyu ke kusol mbay. Ke hah záh tukalari mí ku hȩk ni.
28Kandɔkaw mí riŋ ɗina Zezu mgbe ké tusiɓa Galile riw. Sa gelaw mí mberem ye ya̧ tusiɓa-aw ya̧h ya̧h.
29Zezu ti̧h ke vul misoŋ. Sa gelaw mí ke si kerpuh Simu ke Andere. Zak ke Za̧h mí si ziŋ niri pi. 30Mahfay Simu na sena. Mun ye zaŋ biɗ biɗ. Sa gelaw mí ku ɓah ɓayu hi̧ ni. 31Zezu si ta̧w mahfay ye ra ɓay ɔr ni. Zezu ɓá mgba ndɔk ye le, mun mahfay ra voh, mí ke ur mgba niri gahru.
32Bɔklew, seh ƴo riŋna bale, nzukri fa̧h nzuk senari riw gi keni ku̧ ta̧w Zezu#1.32 Ziɓri ɓahri, seh riŋ, tipele teh ɓa nam mbew. Nam ɔkna woyri ɔh ɓay fe le, seh riŋ. Ɓa nam pihna a titilu. Sa̧wu mí ku fa̧h senari gi keni ma ta̧w Zezu. Nam ɔkna woyri ɔh, mahful laɓ pihna ƴo ri wara. Ɓay lah ɓay ki̧na nam ziɓri, í ki̧ ɓay nam ɔkna ɓil Mbete-ƴah tɔh riŋri.. Ku fa̧h nzukri ké záh ƴo tul woyri gi keni pi. 33Nzukri riw ké ɓil puh-aw mbu̧h hani ké nzak vul mer mer. 34Zezu gah daɓa nzukri ké gi ke sena woyri ɓoɗ ɓoɗ. Ke ni̧h záhri ɓa ŋgi̧-u pi. Ke hah niri ɓáh ɓay ɓay fe le, ku tu ni tu-tu.
35Tipele teh ɔh ya ɓáy, mí Zezu ur tɔr si gel ké nzukri ta ri ya. Ke kaɓ ri ƴo ɓah ɓay ke Ŋgerzah. 36Simu ke mbaŋ yeri faŋ bol ye. 37Ku ziŋ ni, mí ku ɓahri se : « Nzukri ƴo ƴah mu wa, ani le ? »
38Ke ɓahri : « Náh si wuri ma puh a ɓoruri ɓay mí ka-kah ɓay lák mbay Ŋgerzah ké ri. Sa̧wɓay gina bi munu. »
39Kandɔkaw mí ke si ke vul misoŋ vul misoŋ ké tusiɓa Galile gbam, ke ƴo ka-kah ɓay lák mbay Ŋgerzah. Mí ke ni̧h záhri hi̧ ti̧h ke tul nzukri.
40Nzuk ndɔɓe gi ta̧w Zezu. Ke huk siɓa ké pol ye ɓahri : « Ŋgerna woiri mah gah ndɔɓe bi-ay hi̧ mun bi teh. Le saŋna-si gel kani Ŋgerzah ɓay lu ké tul bi. »
41Law Zezu sa̧h. Ke ndar ndɔk mí za nzuk ndɔɓe ra ɓahri : « Mi yih. Ful-si gel kani Ŋgerzah ɓay dim ni ɓá ƴo ri. Mú teh wara. »
42Sa gelaw mí ndɔɓe ra ɔh, mí ke teh.
43-44Sa gelaw mí Zezu pih ni si gel kani Ŋgerzah. Ke bak nzuk ra ɓahri se : « Ko-ko mú ɓah ɓayu hi̧ nzuk. Wara le mú si gel kani Ŋgerzah sɔk mun wo hi̧ nzuk fe puhna Ŋgerzah ɓá ko. Mú si ke puhna ɓay mun tehna wo kandɔk ké Moyiz vbeh ɓil mbete bolkusol Ŋgerzah ɓay hi̧ kú te-teh ɓayu ɓahri, ndɔɓe wo ɔh ɓa ketina#1.43-44 Ɓay lah ɓay fe puhna ké sɔk ɓay nzuk ndɔɓe na ɓa teh-u, í ki̧ wuri Mbete Lévitique 14.1-7.. »
45Bale nzuk ra tɔr si ka-kah ɓayu hi̧ daɓa nzukri lah. Ɓayu seh par par. Kaŋ mí Zezu ziŋ ful-ka̧h puh ɗeŋ ya. Wara le ke si nzak gakra. Dale nzukri ur ke gelri ɓoɗ ɓoɗ gi ma ta̧w ye.
Currently Selected:
Mbete Marki 1: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
