Mbete Marki 2
2
1Zezu el si Kapernayum. Nam kal ndi̧ dara nzukri lah ɓahri, ke ƴo puh. 2Daɓa nzukri gi mbu̧h ké ta̧w ye. Ku mbah ɓil kerpuh hi̧ gel ƴona nzuk ké pol kɔkɔ kara ta-a. Zezu ƴo ɓah ɓay lák mbay Ŋgerzah hi̧ niri. 3Nzukri niŋ suk nzuk ké mun ye hu yɔh gi keni ma ta̧w Zezu. 4Mí ku ziŋ ful ka̧h keni ta̧w ye ya ɓay tul daɓa nzukri. Ku hil si tul vul ké síɓa, ku ziŋ gel ké Zezu kaɓ ri ké siɓa, mí ku nzohlo tul vul ra ɗer nzuk ké mun ye hu yɔh ra ke hih nam ye. 5Zezu ɓá ko law woyri kú-u kan tul ye bale, ke ɓah hi̧ nzuk ké mun ye hu yɔh ra ɓahri : « Gun bi, salɓay suya lu ké tul wo. »
6-7Nzuk-sɔk mbete bolkusol Ŋgerzah a haniri kaɓ vulaw pi. Ku lah ɓay ké Zezu ɓah ra bale, ku ŋgu̧hru ɓay ma law woyri ɓahri : « Ani mí ke ɓah kaŋay le ? Gunwo̧ro-ay leh tul ye ke Ŋgerzah. Ŋgerzah mbew yaŋ mí mah lu salɓay suya ké tul nzuk. Nzuk a ɓoru ta-a. » 8Zezu tu fahɓay woyri ké tem ye. Sa gelaw mí ke ɓahri : « Ɓay fe mí fahɓay ƴo law woiri kaŋay le ? 9Sakra ɓáh hi̧ nzuk ɓahri, ké ur mbi hih nam ye, ké si sina ke ɓáh hi̧ nzuk ɓahri, salɓay suya ye lu, a suŋ mí kpuh le ? 10Mí ɓay í tu ɓahri se, gun nzuk pirmatul ɓa mbay mí ƴo ke ŋgerna ké tusiɓa ɓay lu salɓay suya ké tul nzukri le ... »
Zezu poŋ nzak ɓay ye, ke el sɔɓ nun ma tul nzuk ké mun ye hu yɔh ra, ke ɓahri : 11« A wo mí-i ƴo ɓah hi̧ mu, mú ur síɓa, mú mbi hih nam wo. Mú el si puh. »
12Nzuk ra ur gaŋ ba. Sa gelaw mí ke mbi hih nam ye, mí ke ti̧h tɔr ké nun daɓa nzukri. Kaŋ mí nzukri kaɓ yer, ku el dim Ŋgerzah ɓahri : « Nah ko fe a kandɔkay bɔk mbew ya ɓáy. »
13Zezu el si ɓel mahmbih Galile. Daɓa nzukri gi ndur ndur ma ta̧w ye, mí ke firma niri ɓay lák mbay Ŋgerzah.
14Ke kal ma pol bale, ke ko Levi, gun Alfe. Ke kaɓ gel pihna ye ƴo mbu̧h lampoh. Mí Zezu ɗi ni : « Mú dih fal bi-ay. »
Levi ur ba, mí ke dih fal Zezu.
15Seh a hani Zezu kaɓ nzak fe su̧na ké puh Levi. Daɓa nzuk-mbu̧h lampohri ke nzuk suya a ɓoruri kaɓ nzak fe su̧na ziŋ Zezu ke nzuk-dih fal yeri, ɓayu ké daɓa nzukri-aw ƴo dih fal Zezu. 16Nzuk-sɔk mbete bolkusol Ŋgerzah a haniri ké ɓa fariziri ɓá ko Zezu ƴo su̧ fe ziŋ nzuk suyari-aw le, ku ɓah hi̧ nzuk-dih fal yeri ɓahri : « Metere woiri ƴo su̧ fe ziŋ nzuk-mbu̧h lampohri ke sam nzuk suya a ɓoruri-aw ley ? »
17Zezu ɓá lah ɓay kú-u ɓah ra, mí ke ɓah hi̧ niri ɓahri : « Nzuk mun gahnari si seh dɔkta ya. Nzuk senari mí si seh dɔkta. Mi gi ɓay nzukri ké ƴo tul mbete bolkusol Ŋgerzah ya. Wara le mi gi ɓay nzuk suyari. »
18Nzuk-dih fal Za̧h batisiri ke nzuk-dih fal fariziri ƴo tul saŋ mbih woyri, mí ku gi ɓah hi̧ Zezu ɓahri : « Nzuk-dih fal Za̧hri ke nzuk-dih fal fariziri toŋ saŋ mbih ba, ɓay fe mí nzuk-dih fal wori saŋ mbih ya le ? »
19Zezu ɓah hi̧ niri ɓahri : « Nzukri ké gi gel ti̧hmbih nzuk-ya̧ wu̧y a foyu ɓay saŋ fe su̧na ani lo ? Ke ƴo haŋsekle woyri ɓáy le, ku su̧ fe, ku nzo fe ɓáy. 20Mí nam ƴo gina ɓay hi̧ nzuk wu̧y a foyu ɓá ta-a. Namu-aw dara ku sáŋ mbih ɓáy.
21Nzuk ké ɓay mbi nzak gar a foyu sa̧h keni nun ta̧w gar ta-a rɔkɔ gar a foyu-aw ɓá el gɔh ta̧w gar ra tir ma pol hi̧ garu suya mba a pol. 22Nzuk ta aŋ yim a pa̧wu ku̧ ta̧w ɓɔl ho̧ko ya. Yimu yi̧ŋ le, ta̧w ɓɔl ra ɓay fur dale, yim a pa̧wu ɓay ku̧ kpah. Ta̧w ɓɔl kara ɓay ɓe-ɓeɓ pi. Kaŋ dale nzukri aŋ yim a pa̧wu ku̧ ɓil ɓɔl ho̧ko a foyu. »
23Nam ɔkna a hani bale, Zezu ke nzuk-dih fal yeri si ke mahful sekle waka fe pay, wara mí nzuk-dih fal yeri ƴo haw tul fe pay o̧kro su̧#2.23 Ɓay o̧kro su̧ tul fe pay na ɓil Mbete Deutéronome 23.26. Bolkusol Moyiz hi̧ mahful ɓay nzuk ɓá o̧kro fe pay waka nzuk a ɓoru ke ndɔk su̧. . 24Fariziri ɓah ɓay hi̧ Zezu ɓahri : « Mú ko nzuk-dih fal wori. Ku ƴo laɓ fe ké bolkusol Ŋgerzah hah laɓu ke nam ɔkna. »
25Mí Zezu ɓahri : « I ki̧ ɓay fe laɓna Daviɗ a lewsa̧ ké gel ki̧na a a̧y ké fe su̧na poh ni, kaŋ ya le#2.25 Ɓay fe laɓna Daviɗ ra na ɓil Mbete 1 Samuel 21.1-7. ? Ɗaka i ni ke bɔh sina yeri. 26Ke si vul kani Ŋgerzah ké ta̧w Abiyatar ŋgernzuk fe puhna. Peŋ ké nzuk fe puhnari puh hi̧ Ŋgerzah, bolkusol Ŋgerzah hah nzuk a garuri sú̧-u. Nzuk fe puhnari kaŋto mí ƴo ke ful ɓay su̧-u. Mí a ye Daviɗ ke su̧, ke el wal hi̧ bɔh sina yeri su̧ pi ra wa, ani le ? »
27Zezu el ɓahri : « Ŋgerzah hi̧ nam ɔkna ɓay tul nzuk, ke laɓ nzuk ɓay tul nam ɔkna ya. 28Kaŋ mí gun nzuk pirmatul ɓa mbay ké tul nam ɔkna kara pi. »
Currently Selected:
Mbete Marki 2: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
