Mbete Marki 3
3
1Zezu el si vul misoŋ. Nzuk mbew ké ndɔk ye hu yɔh kaɓ ri. 2Nzukri ko kona yi̧m ma tul Zezu ɓay ko-u. Ke gah nzuk ke nam ɔkna dale, ku láɓ ɓay kan tul ye. 3Mí Zezu ɓah hi̧ nzuk ké ndɔk ye hu yɔh ra ɓahri : « Ur síɓa. Mú ƴo. »
4Mí ke ɓahri : « Bolkusol Ŋgerzah hi̧ nzukri ful ɓay laɓ suki ke nam ɔkna mini ɓay laɓ suya ke nam ɔkna le ? Ɓay ya̧ nzuk mini ɓay i nzuk le ? »
Mí ku kaɓ silili. 5Ke ko gel ma tul woyri ke nun a si̧h-u. Law ye sa̧h ɓay tul law kpuhna woyri. Mí ke ɓah hi̧ nzuk ké ndɔk ye hu yɔh ra ɓahri : « Mú ndar ndɔk wo. »
Nzuk ra ndar ndɔk ba, ndɔk ye el kpuh kpaŋ ƴo gelu.
6Sa gelaw mí fariziri ti̧h ke ɓil vul misoŋ si mbu̧h nzak mbew ke nzuk mbay Eroɗri. Ku lek ɓay i Zezu.
7-8Zezu fa̧h nzuk-dih fal yeri, mí ku tɔr ziŋ ni si ɓel mahmbih Galile poŋ nzuk a ɓoruri. Mí daɓa nzukri ɓa ŋgi̧-u ur ke gelri ɓoɗ ɓoɗ dih fal ye. Daɓa nzukri ur ke tusiɓa Galile, tusiɓa Zude ke Zurusalem pi. Daɓa nzuk a ɓoruri ur ke tusiɓa Idume ke tusiɓa ké na kala mbih Zurdeŋ. Ku ur ke puh a lukiri Tir ke Sidoŋ ke gun puh a ɓoruri ké ɗoŋ ri-aw pi. Nzukri-aw lah ɓay fe laɓna Zezu mí ku gim ma ta̧w ye. 9-10Mí ke ɓah hi̧ nzuk-dih fal yeri ɓahri, kú loh kumbon ma ta̧w ye ɓay rɔkɔ daɓa nzukri ɓá ndakla ni, ɓayu ké Zezu gah senari ɓa ŋgi̧-u. Kaŋ mí nzuk senari nzu̧h ni ɓay za ni.
11Gelke záhri ké ƴo tul nzukri ko Zezu dale, ku gi fal hani fal hani guɓ siɓa ké pol ye. Ku vba̧ nzak ɓahri : « A wo, mu ɓa gun Ŋgerzah. »
12Mí Zezu hah niri ɓa kpuh-u, kú hi̧ nzukri ɓá tu ni ya.
13Zezu tɔr si tul kpar. Ke ɗi nzukri ké-e yih ɓay woyri, mí ku gi ta̧w ye. 14Ke lu gun nzak pihnari ɓa boh falu seɗe ɓay hi̧ kú ƴo ziŋ ni dale, ké pih niri si ka-kah ɓay lák mbay Ŋgerzah hi̧ nzukri. 15Ke hi̧ niri ŋgerna-ni̧h záhri. 16Riŋ gun nzak pihnari ké boh falu seɗe ra mí na-ay : Simu ké Zezu tu riŋ ye ɓa Piyer, 17-19Zak gun Zebede ke yi̧n ye Za̧h. A woyri ra Zezu ɗi niri ɓa Bowaneze. Riŋu yih ɓahri, pomna mbam#3.17-19 Bowaneze sɔk ɓahri, pomna mbam. Zak ke Za̧h ɓa nzukri ké law woyri fa̧h niri ɓa gah.. Tɔr gun nzak pihna a ɓoruri ɓa Andere, Filiɓ, Bartelemi, Matiye, Toma, Zak gun Alfe, Tade, Simu ké ɓa nzuk-ri̧h si̧w ɓay tusiɓa woyri, Zudas Isikariyoɗ a ye ké-e te Zezu ra pi.
20Zezu ke nzuk-dih fal yeri si rih vul bale, daɓa nzukri el mbu̧h hani ké ta̧w ye ɓáy. Kaŋ mí Zezu ke nzuk-dih fal yeri ziŋ ful-su̧ fe ya. 21Nzuk in Zezuri ɓá lah ɓayu le, ku ur si ɓay kɔklɔ ni. Ku ƴo ker ɓahri, tul ye sɔ-sɔɓ.
22Nzuk-sɔk mbete bolkusol Ŋgerzahri ké ur ke Zurusalem ba, ƴo ɓahri : « Mbay záh tukala a ye Belzebul ra ƴo tul ye ɓay fe le, ke ŋgerna záh-aw mí ke ƴo ni̧h záhri ké tul nzukri-aw. »
23Zezu ɗi niri mí ɓah lawɓay ɓahri : « Mbay záh tukala ɓay ni̧h záh yeri ani le ? 24Puh lakna a suŋ suŋ ké nzukuri kehr hani le, ta kaɓ ya. 25Kerpuh ké nzukuri kehr hani le, ta kaɓ ya. 26Mbay záh tukala ur ra ruh ziŋ záh yeri mí kehr hani le, puh lakna ye ta kaɓ ya. Ké puh lakna ye kehr ya-aw kara puh lakna ye ƴo ɔh-u. 27Ɓay fe le se-se ɓay nzuk ɓá rih puh nzuk huhrumun ɓay fa̧h fe yeri. Wara le nzuk ra ɓay ŋga̧h nzuk puh-u pol dara mí ke fá̧h fe yeri riw ɓáy#3.27 Lawɓay ké Zezu ɓah-aw sɔk ɓahri, a ye Zezu ke ɓa riɓa ra. Nzuk ké ƴo ke ŋgerna ɓa mbay záh tukala. Fe ziŋna ba, ɓa nzukri..
28Ɓa ketina. Mi ƴo ɓah hi̧ wuri ɓahri, mahful ɓay lu salɓay suya gbam ké tul nzuk pirmatulri ƴo ri. Ɓay a suya-uri ké nzukri ɓeɓ keni riŋ gun nzuk pirmatul kara mahful-lu ƴo ri pi. 29Mí nzuk a a̧y ké fah Tem lawpuki le, salɓay suya ye ɓay lu ké tul ye ya wu̧m. Wara le salɓay suya ye na tul ye ɓa ŋgɔh. »
30Zezu ɓah ɓayay ɓay fe le, nzuk-sɔk mbete bolkusol Ŋgerzahri ɓahri se, záh tukala ƴo tul ye.
31Mah Zezu ke yi̧n yeri gi ka̧h mí ƴo kala. Ku ɗi ni. 32Daɓa nzukri kaɓ ɗoŋ ni, mí ku ɓahri : « Zezu, mah wo ke yi̧n wori ke manah wori ƴo kala. Ku yih ɓay ko mu. »
33Zezu ba, ɓahri : « A ge mí ɓa mah bi ke yi̧n biri le ? »
34Ke ko gel ma tul nzukri ké ɗoŋ ni, ke ɓahri se : « Í ko mah bi ke yi̧n biri ké ƴo-ay, 35ɓayu ké nzuk a a̧yri ké laɓ fe ké Ŋgerzah yih le, a woyri mí ku ɓa mah bi, yi̧n bi, manah biri. »
Currently Selected:
Mbete Marki 3: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
