Mbete Matiye 27
27
1Tipele za̧y bale ŋgernzuk fe puhna Ŋgerzahri ke ŋgernzuk gun Izarayelri ŋga̧h tul ɓay woyri ɓay i Zezu. 2Ku ŋga̧h ni si keni ndoh ndɔk Pilaɗ ké sezar pih ni ɓa guvener tusiɓa Zude.
3Wara mí Zudas nzuk-te Zezu ra ko ŋgernzukri kuŋ salɓay hul kan tul Zezu bale, law ye se ni ɗɔk ɗɔk, mí ke el si ke lari ké bon say ra hi̧ ŋgernzuk fe puhna Ŋgerzahri ke ŋgernzuk gun Izarayelri. 4Ke ɓahri : « Mi laɓ suya. Mi te nzuk law a teh-u. »
Mí ku ɓahri : « Ɓay wah ta-a. Ɓay wo sa̧ munu. »
5Zudas ba, mȩk lari ra wa̧y ku̧ siɓa ké vul kani Ŋgerzah, mí ke tɔr si tasol#27.5 Í mgba Mbete Fe laɓna Tempuki 1.18-19 tuh ke gel ki̧na-ay. i tul ye.
6Ŋgernzuk fe puhna Ŋgerzahri fa̧h lari ra, mí ku ɓahri : « Lari-ay ɓa lari sem. Suya ɓay ɓaŋ fe-u mbu̧h ke lari fe hi̧na Ŋgerzah. »
7Bale ku lek ɓay ké haŋsekle woyri, mí ku si yeh keni waka nzuk-mboh iri laɓ gelu ɓa gel-gɔr hul sa̧wnzuk a ɓoruri. 8Sa̧wu mí nzukri ƴo ɗi waka-aw ɓa Waka Sem ka̧h guri-ay. 9Wara mí ɓay ké Zeremi gun nzak pihna Ŋgerzah a lewsa̧ vbeh ra laɓ ƴo gelu. Ɓayu ɓahri, gun Izarayelri mgba tul nzuk-hɔl sami mah ke lari bon say. 10Mí ku ya̧ lari-u si yeh keni waka nzuk-mboh iri. Fe-u laɓ kandɔk ké Ŋgerzah ɓah hi̧ gun nzak pihna#27.10 Í mgba Mbete Zacharie 11.12-13 ke Mbete Jérémie 18.2-3 ke 19.1-13 ke 32.6-15 tuh ke gel ki̧na-ay. .
11Mí Zezu ƴo pol guvener. Guvener vbi ni ɓahri : « A wo mú-u ɓa mbay ziɓri ra le ? »
Zezu ba, yih nzak ye ɓahri : « Nzak wo mí ɓah-aw. »
12Ŋgernzuk fe puhna Ŋgerzahri ke ŋgernzuk gun Izarayelri dir ɓay ku̧ tul Zezu, mí ke fer ɓay ya. 13Wara mí Pilaɗ ɓahri : « Daɓa ɓayri kú-u goh mu keni-ay ra wa, mu lah ya lo ? »
14Mí Zezu fer ɓay mbew ya. Fe-u na guvener Pilaɗ ɓa saŋ hi̧ ni ke kaɓ yer.
15Gelke ti̧hmbih-i guy buma ka̧h le, guvener ƴo sel mgbal mbew ɓa fe laɓna ye. Ke ƴo sel mgbal a a̧y ké ziɓri yih ɓayu. 16Ké mbihmbamu-aw, mgbal a hani mbew ƴo ri. Riŋ ye ɓa Bar-Abba. Ɓay fe laɓna ye ya̧ gelri gbam. 17Mí gun Izarayelri mbu̧h ké ndiseŋe bale, guvener vbi niri ɓahri : « Mí sel nzuk a suŋ le ? Ké sel Bar-Abba mini Zezu ké i ɗi ɓa Ŋgermbay ra le ? »
18Pilaɗ tu ɓahri se, ɓa sere mí ku ndoh Zezu ndɔk ye. 19Pilaɗ kaɓ ndiseŋe tul arŋgaw mbay, mí wu̧y ye pih nzak pihna si ka̧h ni ɓahri se : « Mú lu mun wo ke ɓil ɓay nzuk law a teh-u-aw ma fal. Kerɓay zɔklɔ mi ɓay lɔlɔ a suya-u ké mi lɔl ziŋ ni ke suŋay. »
20Ŋgernzuk fe puhna Ŋgerzahri ke ŋgernzuk gun Izarayelri ndoh ɓay ɓil law daɓa nzukri hi̧ kú sɔk Pilaɗ ɓá sel Bar-Abba. Zezu le kú i ni i. 21Pilaɗ vbi ɓay ra ɓáy ɓahri : « Ké sakra nzukri ké seɗe ra wa, a ge mí i yih ɓay mí sel ni le ? »
Mí ku ɓahri : « Bar-Abba mí mú sel ni. »
22Pilaɗ ɓahri : « Mí-aw ba, a fe mí-i láɓ ziŋ Zezu ké i ɗi ni ɓa Ŋgermbay ra le ? »
Gbam woyri ɓahri : « Ɓar ni ɓar gaŋ. »
23Pilaɗ ba, ɓahri : « Suya fe gaŋ mí ke laɓ mah ziŋ hul ké tul kpuh vbatay le wo ? »
Bale ku vba̧ nzak ɓa mgbe-u gurum gurum : « Ɓar ni ɓar gaŋ. »
24Pilaɗ ko ɓahri, gosoɓay mba ni. Su̧hɓay gun Izarayelri mgbe goɗoɗo goɗoɗo le, el mgbe ra ɓáy bale, Pilaɗ ya̧ mbih, mí ke wɔk ndɔk ye ké nun nzukri gbam. Ke ɓahri se : « Mi ta ɓil ɓay hul nzuk law a teh-u-ay ya. Ɓa ɓay woiri sa̧. »
25Bale gun Izarayelri gbam el ke ɓayu ɓahri : « Ɓay hul ye-aw le, nah ya̧ ku̧ tul wah ke tul gun wah pi. »
26Wara mí Pilaɗ sel Bar-Abba. Zezu ba, ke ndoh ni ndɔk soze yeri. Ku zɔr ni ke ndehdɔŋ dara kú ɓar ni ɓáy.
27Wara mí sozeri kal ziŋ ni rih ɓil kerpuh guvener, mí ku ɗi tɔr soze a ɓoruri gbam gi mbu̧h tul ye. 28Ku lu gar ye, ku el ndoh ni mah gar mbay ké si̧h hola hola. 29Ku kaŋ ŋgatukru ɓa guɓatul mbay ndoh tul ye. Ku ndoh ka̧wkpuh ɓa mahwu̧y mbay ké ndɔk lakna ye. Ku huk pol ye, mí ku sak ni kandɔkay : « Soko woiri wo, mbay ziɓri. »
30Ku sa-sam ku̧ nun ye, mí ku nah ka̧wkpuh ké ndɔk ye ra vba̧ tul ye keni kɔy kɔy. 31Ku sak ni mah niri bale, ku lu mah gar mbay ra el ndoh ni gar ye, mí ku si ziŋ ni ma gel-ɓar nzukri ké tul kpuh vbatay.
32Sina woyri ku ko nzuk Siren#27.32 Siren ɓa puh ké Afirik ké tusiɓa Libi. a hani ƴo kalna. Riŋ ye ɓa Simu. Sozeri hah ni suk kpuh vbatay hul Zezu. 33Ku ka̧h gel kú-u ɗi ɓa Golgota. Golgota sɔk ɓahri, gbogbotul. 34Ku hi̧ ni yim kú-u zukru ke sa̧wkpuh mir#27.34 Í mgba Mbete Matiye 2.11 tuh ke gel ki̧na-ay ɓay ko ɓay sa̧wkpuh mir ɓa fe ké hi̧ sena voh ké mun nzuk.. Zezu pu̧h ruɓ, mí ke sa nzo ya.
35Ku ɓar ni ké tul kpuh vbatay bale, ku fa̧h gar ye kehr ku̧ ke gelu gelu, ku nda ɓele keni#27.35 Í mgba Mbete Siŋ (Psaumes) 22.19 tuh ke gel ki̧na-ay.. 36Ku kaɓ ƴo kɔr ni. 37Gbekre kú-u vbeh fe salɓay hul ye kan ri, ku ɓar fál síɓa tul ye. Salɓayu vbeh kandɔkay : « Zezu mí na-ay mbay ziɓri. » 38Wara mí ku ɓar nzukbaa ŋgomnari seɗe ké ta̧w ye#27.38 Í mgba Mbete Esaïe 53.12 tuh ke gel ki̧na-ay., nzuk a mbewu ké fál ndɔk lakna ye, nzuk a seɗe-u ba, ké fál ndɔk kperu ye.
39Nzukri ké ƴo kalna le te tul woyri ɓoko ɓoko ƴo far ni keni#27.39 Í mgba Mbete Siŋ (Psaumes) 22.8 tuh ke gel ki̧na-ay.. 40Ku ɓahri : « A wo ké mu ɓahri, mu háw vul kani Ŋgerzah, mí ɓil nam say le, mu él mboh ƴo gelu ra, mú ya̧ mun wo. Ké mu ɓa gun Ŋgerzah ra, mú ɗer ke tul kpuh-ay. »
41Kaŋ pi mí ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri ke ŋgernzuk gun Izarayelri ƴo sak ni. 42Ku ƴo ɓahri : « Ke ya̧ nzuk a ɓoruri, mí ke mah ya̧ mun ye ya dih. Mbay gun Izarayelri ra ké ɗer ke tul kpuh-ay hi̧ na náh ko dara náh kán law wah tul ye ɓáy. 43A ye ké-e poŋ mun ye hi̧ Ŋgerzah ra, Ŋgerzah yih ɓay ye le, ké ten ni ke ɓil ɓayay, ɓayu ké-e ɓahri se, Ŋgerzah mí ɓa bah ye. »
44Nzukbaa ŋgomnari kú-u ɓar niri ké ta̧w ye kara ƴo far ni pi.
45Seh ƴo tul puh bale tirim ya̧ gel kpu̧ru ka̧h sa̧wseh say bɔklew. 46Sa̧wseh say ka̧h, mí Zezu ɗi fe ɓeleŋ ɓahri : Eli, Eli lema sabaktani ?
Ɓayu yih ɓahri, Ŋgerzah bi, Ŋgerzah bi wo, ɓay fe mú-u poŋ mi diw le#27.46 Gel ki̧na-u titil ɓay ɓil Mbete Siŋ (Psaumes) 22.1. Gelke i ki̧ siŋay ka̧h ɔh tɔru le, i tú ɓahri se, nzuk ké ɓah ɓayu si gaɗa. Ŋgerzah poŋ nzuku diw wu̧m ya, wara le ɓayu ɓa ɓay haw ŋgermu. ? 47Nzuk a haniri ké ƴo ɗih ya ɓá lah fe ɗina ye ra bale, ku ɓahri : « Nzuk ra ɗi Eli gun nzak pihna Ŋgerzah a lewsa̧. »
48Nzuk mbew ké sakra woyri ba, ur ke ɗukna si mbi sifoŋ ŋga̧h ké nzak ka̧wkpuh mí sa̧h ke yim a su̧h-u#27.48 I mgba Mbete Siŋ (Psaumes) 69.22 tuh ke gel ki̧na-ay.. Ke ndar si tuŋ nzak Zezu ɓay ké ƴo̧k. 49Nzuk a ɓoruri ƴo ɓah hi̧ nzuk ra ɓahri, ké poŋ, kú ko, Eli gun nzak pihna ra ɓay gi ya̧ ni mini ani le ?
50Zezu el vba̧ nzak ɓeleŋ ɓáy bale, ke poŋ tem mun ye tɔr si záh.
51Mí í ko, baw gar a yih-u ké kuŋ gel ƴona Ŋgerzah ke gel ƴona nzukri ké ɓil vul kani#27.51 Ɓay tu ɓay gar ké kuŋ ɓil vul kani Ŋgerzah ké kehr gel ƴona nzukri ke gel ƴona Ŋgerzah le, í ki̧ Mbete Exode 26.31-33. gɔh tir ke síɓa ka̧h siɓa poŋ gel ƴona Ŋgerzah na ŋgah. Tusiɓa laŋ yik yik. Fihriri sak ɓukuku ɓukuku pi. 52Tupalri mgbur na ŋgah ŋgah hi̧ sa̧w nzuk Ŋgerzahri kú-u poŋ tukala lewsa̧ ra, ku ti̧h ke pa̧ymun a foyu. 53Ku ti̧h ke lɔkɔ hul woyri fal ti̧hna Zezu ke pa̧ymun a foyu, mí ku si rih ɓil puh ké law Ŋgerzah te sa sari#27.53 Puh-u ɓa Zurusalem. Ɓay tu ɓay puh ké law Ŋgerzah te sa sari le, í ki̧ Mbete Ten sa̧wɓay 21.10, Mbete Galaɗri 4.25-26, Mbete Ebereri 12.18-24 pi. hi̧ daɓa nzukri ko niri ko-ko. 54Kumandah ke soze yeri ké ƴo kɔr gel-ɓar Zezu ra ko tusiɓa ké laŋ pi, ku ko fe a ɓoruri ké kal kaŋ pi, mí tem mun woyri ti̧h kereŋ kereŋ. Ku ɓahri se : « Nzukay, ke ɓa gun Ŋgerzah gaŋ. »
55Daɓa wu̧yri ƴo ri. Ku ƴo ɓa ɗih-u ké sar gel ké gel-ɓar ni ƴo ko kona. 56Wu̧y a hani-uri ur ke tusiɓa Galile ƴo dih fal Zezu, ku so ni. Ké sakra wu̧yri ra Mari ké Makdala, Mari mah Zak ke Zezeɓ, wu̧y Zebede pi. 57-58Nzuk fe ziŋna a hani mbew ƴo ri#27.57-58 Í mgba Mbete Esaïe 53.9 tuh ke gel ki̧na-ay.. Riŋ ye ɓa Zezeɓ ké Arimate. Ke dih fal Zezu pi. Seh na nzȩh bale, ke si ta̧w Pilaɗ vbi ni hul Zezu. Wara mí Pilaɗ pih bolnzak hi̧ soze yeri ɓay kú poŋ ful hi̧ Zezeɓ ɓá ɗer hul Zezu. 59Ke ɗer hul Zezu, mí ke kuh hulu ke ladara a puki ké taŋ fi̧nak fi̧nak. 60Ke mbi si mbek ké ɓil hoh kasaw kú-u fel lewsa̧ ɓay mbek hulri ɓilu. Hoh-u ku mbek ri hul mbew ya ɓáy. Ku kikri mah kasaw mbih nzaku, mí ku tɔr. 61Mari ké Makdala ke Mari a ɓoru ƴo ri. Ku kaɓ ƴo ko kona ma hoh kasaw ra.
62Tipele-u ké nam a seɗe-u ɓil nam ti̧hmbih-i guy buma, ŋgernzuk fe puhna Ŋgerzahri ke fariziri si ta̧w Pilaɗ. 63Ku ɓahri : « Mbay, nah ker ɓay si tul ɓay ké nzuk nzak rɔkna ɓah ra. Seh ké-e ƴo ke nun ɓáyaw, ke ɓahri se, nam a sayu fal hul ye le, ke él kaɓ ke nun. 64Kaŋaw mí mú pih bolnzak hi̧ sozeri ɓá kɔr tupal ye ra ka̧h nam a sayu rɔkɔ nzuk-dih fal yeri ɓá gi rih hul ye, mí ku él ɓah hi̧ gun Izarayelri ɓahri, nzukaw ti̧h ke puh záh el kaɓ ke nun. Dale ɓay fe rɔkna woyri-aw ɓay suya kal fe rɔkna a pol ka-kal. »
65Pilaɗ yih nzak woyri ɓahri : « Sozeri ra mí kaɓaw. Í hi̧ niri kú si kɔr tupal ra kandɔk ké i tu-tu ra. »
66Kandɔkaw mí ku si, ku ri̧h nzak tupal ra el laɓ zezele fe guvener kan ri dara ku hi̧ sozeri ra kɔr ɓáy.
Currently Selected:
Mbete Matiye 27: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
