Mbete Matiye 26
26
1-2Zezu ɓah ɓayri-aw ɔh ba, ke ɓah hi̧ nzuk-dih fal yeri ɓahri se : « A woiri i tu da. Toŋ nam seɗe ɓay ti̧hmbih-i guy buma ɓá ti, mí ku ndóh gun nzuk pirmatul ndɔk Rɔmri hi̧ kú ɓar ni ké tul kpuh vbatay. »
3Ɓil sa̧wseh-u-aw ŋgernzuk fe puhna Ŋgerzahri ke ŋgernzuk puh woyri gun Izarayelri, ku mbu̧h haniri ké kerpuh ŋgernzuk fe puhna, a ye Kayif. 4Ku lek ɓay mgba ni ke kuŋɓay, le kú i ni. 5Ku ɓahri se, ku ta mgba ni ke nam ti̧hmbih ya rɔkɔ nzukri ɓá ur ŋgermu.
6-7Zezu si Beɗtani ké kerpuh Simu ké ndɔɓe nzom ké mun ye. Ku kaɓ nzak fe su̧na bale, wu̧y a hani rih si tul Zezu ke kuh num ba̧ri a suki ké lari-u ŋger mbamba, mí ke fer numu ku̧ tul Zezu. 8Nzuk-dih fal yeri ko fe ké wu̧yaw laɓ, mí nun woyri si̧h. Ku ɓahri, sam fe ɓeɓna fe mí kaŋ le ? 9Numay ɗam le, ɓay ziŋ lari ɓa ŋgi̧-u mah so keni ko̧hkori.
10Zezu tu su̧hɓay woyri, mí ke ɓahri : « Ɓay fe mí i ƴo law wu̧yay ke ɓay le ? Fe ké-e laɓ ziŋ mi-ay na ɓa suki. 11Ko̧hkori ƴo ziŋ wuri kpatara. A bi ba, mi káɓ ziŋ wuri kpatara ya. 12Num ké wu̧yay fer ku̧ mun bi-ay, ɓa num-gɔr mi munu. 13Ɓa ketina, mi ƴo ɓah ɓayay hi̧ wuri, gelri riw kú-u ka-kah ɓaysuki hul bi ké ri le, ku hí̧ riŋ ɗina wu̧yay mgbe pi. »
14Wara mí Zudas Isikariyoɗ nzuk-dih fal ye mbew ké sakra nzuk-dih fal ye a boh falu seɗeri si ta̧w ŋgernzuk fe puhna Ŋgerzahri. 15Ke ɓahri : « A fe mí i hí̧ mi ɓay mí ndoh ni ndɔk woiri le ? »
Mí ku ten lari ɓa bon say hi̧ ni#26.15 Lari ɓa bon say ŋgi̧ ya. Mah lari-yeh mgbal. Ké ta̧w ziɓri, ku ƴo yeh mgbalri ke lari ké ŋgi̧ ya. Ɓay tu ɓay lari bon say ra le, í ki̧ Mbete Exode 21.32 ke Mbete Zacharie 11.12.. 16Ur ke seh-u mí ke mu̧h kpɔl ƴo geŋ sa̧wseh a a̧y ké-e ɓay ndoh Zezu ké ndɔk woyri.
17Nam a titilu ɓil nam ti̧hmbih-su̧ peŋ dan is ka̧h. Nzuk-dih fal Zezuri vbi ni ɓahri : « Fál suŋ mú-u yih ɓay náh lek gel fe su̧na ti̧hmbih-i guy buma wahri ké ri ɓay náh su̧ fe le ? »
18Mí ke ɓahri : « Í si wuri ɓil puh-aw#26.18 Sa̧w nzak vbeh ɓahri, puh-aw. Puh-u ɓa Zurusalem. ké ta̧w nzuk mbew. Í ɓah hi̧ ni ɓahri, metere ɓahri, nam ye ka̧h da. Ké kerpuh wo mí metere ƴo gi ɓay su̧ fe su̧na ti̧hmbih ke nzuk-dih fal yeri ké ri. »
19Nzuk-dih fal Zezuri ra laɓ kandɔk ké-e pih niri, mí ku lek fe su̧na ti̧hmbih-i guy buma ra.
20Seh riŋ bale, Zezu kaɓ nzak fe su̧na ke nzuk-dih fal ye a boh falu seɗeri. 21Ku ƴo su̧ fe, mí Zezu ɓahri : « Mi ƴo ɓah hi̧ wuri ɓahri se, nzuk mbew ké sakra woiri-ay ɓay te mi. »
22Nzuk-dih fal yeri lah ɓayu kaŋ ba, law woyri rih niri mba. A ge ge le ɓah hi̧ Zezu ɓahri : « Gaŋ bi, a bi ya, ra ma ? »
23Mí ke yih nzak woyri ɓahri : « Nzuk ké kaɓ nzak fe su̧na-ay ziŋ mi#26.23 Sa̧w nzak vbeh ɓahri, nzuk ké ndoh ndɔk ɓil tasaw fe su̧na ziŋ mi. Ké gel fe su̧na ti̧hmbih-i guy buma ziɓri, a woyri gbam ku ndoh ndɔk woyri ɓil tasaw ziŋ ni. Fe laɓna-u ɓa fe laɓna law in. Sa̧wu mí ku ta tu ɓahri, nzuk-te Zezu ɓa Zudas. Í mgba Mbete Siŋ (Psaumes) 41.9 tuh ke gel ki̧na-ay., a ye mí ke ɓay te mi. 24Gun nzuk pirmatul ɓá hu kandɔk ɓay gun nzak pihna Ŋgerzah a lewsa̧ri vbeh kaŋ. Kúy. Koseh ƴo geŋ nzuk ké te ni. Koseh ké ƴo geŋ nzuku-aw, mah le, mbuŋ ni ya mí su. »
25Bale Zudas nzuk-te ni ra ɓah ɓay ra ɓahri : « Metere, a bi ya, ra ma ? »
Zezu ɓahri : « Ɓayu ti̧h ke nzak wo da. »
26Zezu ke nzuk-dih fal ye a boh fal seɗeri ƴo su̧ fe, ke mbi peŋ, ke el ke tumbɔl hi̧ Ŋgerzah, mí ke gɔh. Ke wal hi̧ nzuk-dih fal yeri ɓahri : « Í ya̧, í su̧. Peŋay ɓa mun bi. »
27Ke mbi koɓ a ŋga̧h sal in#26.27 Koɓ a ŋga̧h sal in ké ziɓri ƴo nzo-u ké gel fe su̧na ti̧hmbih-i guy buma na ɓay tul sal in ké Ŋgerzah ŋga̧h ziŋ niri ke sew Moyiz.. Mí ke el ke tumbɔl hi̧ Ŋgerzah, ke ndar hi̧ niri. Ke ɓahri : « Í nzo ndi̧ ndi̧ gbam woiri. 28Yimay ɓa sem bi ké Ŋgerzah ŋga̧h sal in ziŋ daɓa nzukri. Semu fer ku̧ siɓa ɓa sem ké lu salɓay suya ké tul woyri. 29Mi ƴo ɓah ɓayay hi̧ wuri, mi ta nzo mbih lehna kpuh viyȩh ti̧hmbih-ay mba ur ke aŋay. Namu ké mi ɓay mbi koɓ a a̧y ɓa a foyu ɓa nam ké mi ɓay nzo mbih lehna kpuh viyȩh-ay ziŋ wuri ké puh lakna bah bi#26.29 Sa̧w nzak gerek vbeh ɓahri, nzo yim, mí nah ten sa̧w fe laɓna ziɓri ké gel fe su̧na ti̧hmbih-i guy buma. Ké gel fe su̧na-aw, ku ndar koɓ yimri ɓa niŋ ké sɔk ɓay fe niŋ. Koɓ a titilu sɔk ɓay ɗina ké Ŋgerzah ɗi gun Izarayelri ɓa nzuk yeri. Koɓ a seɗe-u sɔk ɓay bolkusol ké Ŋgerzah hi̧ niri ke sew Moyiz. Koɓ a sayu sɔk ɓay sal in ké Ŋgerzah ŋga̧h ziŋ niri ke Moyiz ké tul kasaw Sinay. Koɓ a ɔh tɔru sɔk ɓay loŋna riŋ Ŋgerzah ke mun rihna ɓay law in ye ké mgba ziŋ niri ké ten mun.. »
30Kandɔkaw ku ɗi siŋ pirna hi̧ Ŋgerzah fal fe su̧na ti̧hmbih, mí ku ti̧h si tul kasaw Oliveh.
31Wara mí Zezu ɓah hi̧ niri ɓahri : « Riŋ bi ɓay ti̧h ɓa ndaw lihna hi̧ wuri gbam ke suŋay. I ɗúk poŋ mi kandɔk ɓay ké mbete bolkusol Ŋgerzah ɓah lewsa̧ ɓahri, ke ɓay i nzuk-hɔl sami le, samiri ɓay zikri kparki kparki#26.31 Gel ki̧na-u na ɓil Mbete Zacharie 13.7.. 32Fal ti̧hna bi ke puh záh ke pa̧ymun a foyu dale, mi sí pol hi̧ wuri ma tusiɓa Galile. »
33Mí Piyer el ke ɓay ɓahri : « Nzukri gbam poŋ mu kara a bi mi ta poŋ mu ya gaŋ. »
34Zezu ba, el ɓah ra ɓáy ɓahri : « Mu ɓay poŋ mi ɓa ketina. Mi ƴo ɓah hi̧ mu ɓahri se, suŋay gaŋ dara tuhndoy mgbal ɓá kah le, mu má̧y ɓay tul bi bɔk say ɓahri, mu tu mi ya. »
35Piyer ɓahri : « Ɓa ra hul gaŋ kara mi hú ziŋ mu. Mi má̧y ɓay tul wo ya. »
Tɔr nzuk-dih fal ye a ɓoruri gbam ɓah kaŋ pi.
36Wara mí Zezu ke nzuk-dih fal yeri si ka̧h gel a hani ké tul kasaw Oliveh. Riŋ gelu ɓa Gesemani. Ke ɓah hi̧ nzuk-dih fal yeri ɓahri : « Í kaɓ gelay geŋ mi. Mí si ɓah ɓay ziŋ Ŋgerzah ké sa̧-aw. »
37Ke fa̧h Piyer ke gun Zebederi ké seɗe si ziŋ ni. Law ye se ni kal ŋgɔŋ, law ye titil kuŋna. 38Wara mí ke ɓah hi̧ Piyer-ri ɓahri : « Law sena mbaŋ law bi mah hul. Í kaɓ ke nun geŋ mi. »
39Ke loh tɔɓ ké ta̧w woyri, mí ke guɓ siɓa ke nzaklaw ye ƴo goŋ Ŋgerzah. Ke ɓahri : « Baah, ful a ɓoru ƴo ra ri ɓay hi̧ koɓ haŋ fa̧hna wo ké tul suya nzukri ɓá kal le, mú loh ma fal hi̧ mí nzo ya#26.39 Sa̧w nzak gerek ɓahri, ful ƴo ra ri le, mú lu koɓ yim-ay ke tul bi ma fal. Koɓ ra ɓa haŋ fa̧hna Ŋgerzah mí kandɔk yim ƴo hi̧ mun nzukri laŋ teka teka, koɓ haŋ fa̧hna Ŋgerzah hi̧ mun nzukri rol kaŋ. Í mgba Mbete Ten sa̧wɓay 14.10 ke Mbete Esaïe 51.17,22 ke Mbete Siŋ (Psaumes) 75.8-9 tuh ke gel ki̧na-ay. . Keni-aw kara mú laɓ fe ké law bi yih ya. Mú laɓ fe ké mu yih ma. »
40Zezu ur el si ta̧w nzuk-dih fal yeri ké say ra, mí ke ziŋ niri ké tul nam. Ke ɓah hi̧ Piyer ɓahri : « Ŋgerna-kaɓ ke nun geŋ mi sa̧wseh mbew mba mu ley ? 41Í ƴo tul bɔk. Í goŋ Ŋgerzah rɔkɔ fe-leh law ɓá ndih wuri. Tem nzuk yih ɓay laɓ suki, mí huhrumun nzuk mah ya. »
42Ke el si gel goŋ bah ye ra ɓáy. Ke ɓah ra ɓáy : « Baah, ful a ɓoru ɓay hi̧ koɓ haŋ fa̧hna wo ké tul suya nzukri ɓá kal ra ta-a, mah ɓay mí nzo le, mú hi̧ fe-u ti̧h kandɔk ké mu yih. »
43Ke el gi ta̧w nzuk-dih fal yeri ké sayaw, mí ke ziŋ niri tul nam. Nam laɓ niri ro̧ko ro̧ko. 44Ke poŋ niri na nam, ke el a bɔk sayu si gel-ɓah ɓay ziŋ bah ye. Ke el ɓah ra ɓáy. 45Wara mí ke el si ta̧w nzuk-dih fal yeri. Ke ɓahri : « I toŋ ɔk mun woiri ɓil nam ɓáy le ? Í ko, sa̧wseh gun nzuk pirmatul ka̧h da. Ku gi ɓay ndoh ni ndɔk nzuk suyari. 46Ur síɓa, náh si nzɔh nun woyri. Í ko nzuk-te mi ké gi-aw. »
47Ke ƴo ɓah ɓay kɔɓ ɓáy bale, í ko, Zudas ké ƴo sakra nzuk-dih fal ye a boh falu seɗeri ra nda pol daɓa nzukri ɓa ŋgi̧-u gi ti̧h tul ye. Nzukuri mgba mahwu̧yri ke kpuhri ké ndɔk woyri gbiri gbiri. Ŋgernzuk fe puhna Ŋgerzahri ke ŋgernzuk gun Izarayelri mí pih niri. 48Nzuk-te Zezu ra sɔk niri fe kú-u ɓay tu ni keni. Ke ɓahri se : « Nzuk a a̧y ké mi hu̧hru ma law bi le, ɓa a ye munu. Í mgba ni. »
49Zudas ɓá ka̧h ké ta̧w Zezu bale, ke hu̧hru ni ma law ye ɓahri se : « Soko woiri metere bi. »
50Mí Zezu ɓah hi̧ ni ɓahri : « Ya̧h, mu gi da. »
Wara mí ku mgba ni.
51Í ko. Nzuk mbew ké sakra nzuk-dih fal Zezuri lu mahwu̧y, mí ke te gaysuk gun-laɓ pihna ŋgernzuk fe puhna Ŋgerzah fekeɗ kuŋ. 52Wara mí Zezu ɓahri : « El ke mahwu̧y wo ndoh vulu. Nzuk ké i hul ke mahwu̧y le, ke hu hul mahwu̧y pi. 53Uwa, mu tu ya le wo ? Mi goŋ ra bah bi Ŋgerzah sona le, ke píh tem nzak pihna ye a ŋgermuri ho̧k ho̧k#26.53 Sa̧w nzak ɓahri, ke píh lezoŋ tem nzak pihna ye a ŋgermuri ɓa boh falu seɗe ya le ? Ŋgi̧na nzukri ɓil lezoŋ mbew le, ka̧h sɔɗ sɔɗ boh gel tɔtɔklɔ (6.000) ya le, sɔɗ sɔɗ boh gel boh falu seɗe (12.000). hi̧ mi ya le ? 54Mí-aw ra wa, ɓay ké na ɓil mbete Ŋgerzah ra ɓay laɓ ƴo gelu ani ɓáy le ? Ɓay fe le ɓa ra fe fe gaŋ kara ɓay Ŋgerzah ɓay laɓ kandɔk ké-e ɓah. »
55Sa̧wseh-u, Zezu ɓah hi̧ daɓa nzukri ra ɓahri : « I gi wuri ke mahwu̧yri ke kpuhri ɓay mgba mi keni wa, mi ɓa nzukbaa le wo ? Nam ke nam mi kaɓ ɓil ila vul kani Ŋgerzah ƴo firma nzukri ɓay ye, mí i mgba mi ya. 56Mí fe-ay gbam ti̧h da hi̧ ɓay ké na ɓil mbete vbehna gun nzak pihna Ŋgerzahri laɓ ƴo gelu. »
Wara mí nzuk-dih fal yeri ɗuk poŋ ni.
57Nzukri ra mgba Zezu mí maŋ ni si ka̧h kerpuh Kayif ŋgernzuk fe puhna Ŋgerzah. Nzuk-sɔk mbete bolkusol Ŋgerzahri ke ŋgernzuk gun Izarayelri mbu̧h ri hani geŋ ni. 58Piyer ba, mbehle sina fal woyri si ka̧h kerpuh ŋgernzuk fe puhna Ŋgerzah ra. Ke rih, mí ke kaɓ ziŋ gun-laɓ pihna ŋgernzuk fe puhna Ŋgerzahri ɓay ko ani mí ɓayu ɓay ɔh le. 59Ŋgernzuk fe puhna Ŋgerzahri ke ŋgernzuk-kuŋ salɓay a ɓoruri gbam ba#26.59 Sa̧w nzak gerek ɗi maŋna ŋgernzuk-kuŋ salɓayri ɓa sanhedereŋ. , ku ƴah nzukri ké ɓay kuŋ ɓay ku̧ nzak Zezu ɓo ŋgernzukri ɓá kuŋ salɓay hul kan tul Zezu. 60Daɓa nzukri gi kuŋ ɓayri ɓoɗ ɓoɗ ku̧ nzak ye, mí ɓay woyri-aw mgba tul ye mbew ya. Ɔh tɔru bale, nzukri seɗe gi. 61Ku ɓahri : « Gunwo̧ro-ay ɓahri se, ke mah ɓay haw vul kani Ŋgerzah. Ɓil nam say mí ke él mboh ƴo gelu. »
62Mí ŋgernzuk fe puhna Ŋgerzah ur síɓa wuɗ. Ke ɓahri : « Ɓay ké nzukri laɓ kan tul wo-ay ra wa, mu fer ɓayu ya le wo ? »
63Zezu ƴo ɗeŋ. Mí ŋgernzuk fe puhna Ŋgerzah ra el ɓahri : « Mú hah mun wo ke riŋ Ŋgerzah a ye Ŋgɔhnzuk, mú ɓah nzak wo hi̧ náh lah, mu ɓa Ŋgermbay, gun Ŋgerzah ra le ? »
64Zezu ɓahri : « Ɓayu ti̧h ke nzak wo. Ɓay a ɓoru-ay ƴo ri. Mi ƴo ɓah ɓayay hi̧ wuri, ur ke guri-ay, i ɓay ko gun nzuk pirmatul kaɓ ɓel Ŋgerzah nzuk huhrumun a luki ɓa ndɔk lakna ye. I kó gina ye ɓil ɗikmambam ur ke nunmbam#26.64 Í mgba Mbete Daniel 7.13-14 tuh ke gel ki̧na-ay. . »
65Wara mí ŋgernzuk fe puhna Ŋgerzah gɔh gar mun ye tir. Ke ɓahri se : « Nzukay fah Ŋgerzah munu. Nah zɔklɔ mun wahri ɓay tul ɓay a lah-u ɓáy le ? A woiri i lah nzak ye ké fah Ŋgerzah. 66Kerɓay woiri na ani ké tul ye le ? »
Ŋgernzuk-kuŋ salɓayri yih nzak ŋgernzuk fe puhna Ŋgerzah ra ɓahri : « Ke mah hul gaŋ. »
67Wara mí ku sa-sam ku̧ nun ye. Ku ɗur ni, ku mbal ni. 68Ku ɓahri : « A wo Ŋgermbay, Ŋgerzah ɓá ndoh riŋ nzukri ké vba̧ mu-ay ké nzak wo, mú ten hi̧ na. »
69Piyer ba, kaɓ ɓil kerpuh ŋgernzuk fe puhna Ŋgerzah ra bale, gun kaɓna a wu̧yu gi ta̧w Piyer. Ke ɓahri : « A wo ra mu ɓa bɔh sina Zezu ké Galile ra pi. »
70Mí Piyer ma̧y ɓay ké pol daɓa nzukri ɓahri : « Mi tu sam ɓay wo ké mu ɓayay ya. »
71Bale Piyer loh si ƴo nzak ila, mí wu̧y a ɓoru ɓa gun kaɓna ko ni, mí ke ɓah hi̧ nzukri ké ƴo ri-aw ɓahri : « Gunwo̧ro-aw ɓa bɔh sina Zezu ké Nasareɗ ra. »
72Piyer ma̧y ɓay ra ɓáy. Ke hah mun ye ɓahri se : « Bɔk mbew bi gel-tu nzuk ra ya. »
73Bol falu ndi̧ bale nzukri ké ƴo ri-aw loh si ta̧w ye, mí ku ɓahri : « Ketina. A wo-ay, mu ƴo sakra nzuk yeri ɓayu ké sam ɓay ɓahna wo-ay mí ten mu ɓa ziɓ a tusiɓa Galile. »
74Wara mí Piyer hah hul ɓahri : « Bɔk mbew bi gel-tu nzuk ra ya. »
Sa gelaw mí tuhndoy mgbal kah koŋroŋ. 75Mí Piyer ker si tul ɓay ké Zezu ɓahri, dara tuhndoy mgbal ɓá kah le, a ye ke má̧y ɓay tul Zezu bɔk say ɓahri, ke tu ni ya.
Kandɔkaw Piyer ti̧h kala mí nduh mahrew. Ke vuh ke mbihnun vɔh vɔh.
Currently Selected:
Mbete Matiye 26: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
