Mbete Matiye 25
25
1Wara mí lák mbay a nunmbam ɓay na kandɔk wu̧y tiklari boh. Ku fa̧h lampe woyri mí ti̧h ɓay nzɔh nun nzuk mbana#25.1 Nzuk mbana ɓa Zezu. Mahɓayu si tul nam gina ye. Í mgba Mbete Matiye 8.11; 22.1-16 ke Mbete Za̧h 14.1-3 tuh ke gel ki̧na-ay. ké ƴo gina ɓay ya̧ wu̧y mbana ye, ɓay kú ɓaŋ niri ma gel ti̧hmbih-ya̧ wu̧y. 2Ké sakra wu̧y tiklari-aw, wu̧y a ndiɓi-uri ɓa kɔkɔ. Wu̧y a ndiɓi-uri ba, ru̧-ru̧. 3Kɔkɔri ra ɓaŋ hɔrɔ ɓu lampe woyri, mí ku ti̧h dan num a ɓoru. 4Ru̧nari ba, ɓaŋ hɔrɔ ɓu lampe woyri, mí ku ti̧h ke num a ɓoru ké ndɔk woyri. 5Nzuk mbana ra gi gah ya gah ya bale, ku duk nam mgbu̧ra mgbu̧ra, mí nam kal niri gba̧y.
6Haŋgel bale, ku lah kusol nzuk mgbe ɓeleŋ ɓahri : “Nzuk mbana ra ƴo gina. Í si nzɔh nun ye.”
7Wu̧y tiklari ra tom ke nam wuɗ wuɗ, mí ku lek lampe woyri. 8Dale kɔkɔri ké ndiɓi ra ku goŋ num ké ta̧w wu̧y tikla a ru̧nari ɓahri : “Í suh num woiri ndi̧ hi̧ na ɓay fe le, hɔrɔ wah ƴo gel rimna.”
9Mí ru̧nari ra yih nzak woyri ɓahri : “Nah ta suh-u hi̧ wuri ya. Numu mah lampe wah ke lampe woiri mbɔk ya. Su-su ɓay í tɔr wuri si gel-yeh num. Í yeh num nzuku a woiri.”
10Ku tɔr si yéh num ra bale, nzuk mbana ka̧h ba. Wu̧y ru̧nari ké lek mun woyri geŋ ni ba, ku si ziŋ ni rih gel ti̧hmbih-ya̧ wu̧y, mí ku tuh ful gbukru kan tul woyri. 11Bol falu bale, kɔkɔri ké ndiɓi ra gi ka̧h gel ti̧hmbih, mí ku vba̧ nzakful ɓay rih ɓil puh-u ɓahri se : “Mbay, mbay wo, í mgbur ful hi̧ na.”
12Bale mbay ɓay ɓahri : “Mí mgbur ful hi̧ wuri ley ? Mi tu wuri ya.”
13Kandɔkaw mí-i ƴo ɓah hi̧ wuri ɓahri, í ƴo tul bɔk woiri ɓay fe le, i tu nam gina gun nzuk pirmatul ya. Sa̧wseh-u kara i tu ya pi.
14Ɓayu ké gina gun nzuk pirmatul na kandɔk nzuk mbew ké tɔr si gahru ɓa ɗih-u. Ke ɗi gun-laɓ pihna yeri dale, ke wal fe ziŋna ye ku̧ ndɔk woyri ke gelu gelu. 15Gun a titilu, ke hi̧ ni lari lɔr ɓa ndiɓi. Gun a seɗe-u, ke hi̧ ni lari lɔr ɓa seɗe. Gun a sayu ba, ke hi̧ ni lari lɔr ɓa mbew. A ge ge le ke hi̧ ni lari mah ŋgerna ye ŋgerna ye, mí ke tɔr si gahru ye ra. 16Gun-ya̧ lari lɔr ndiɓi ra ti̧h za̧y si yeh fe. Ke ɗam el ziŋ lari lɔr a ɓoru ndiɓi dɔm tulu. 17Gun-ya̧ lari lɔr seɗe ra laɓ kaŋ pi. Ke tɔr si yeh fe, ke ɗam el ziŋ lari lɔr a ɓoru seɗe dɔm tulu. 18Gun ké ya̧ lari lɔr mbew ra ba, ke tɔr si ɗeh lɔkɔ, mí ke gɔr lari bahgaŋ ye ra ké ri.
19Nam kal mah fe dara mí bahgaŋ woyri el ke gel gahru gi ɓáy. Ke hi̧ ku ki̧ fal lari ye ra hi̧ ni. 20Gun ké ya̧ lari lɔr ndiɓi ɓah hi̧ bahgaŋ ye : “Gaŋ bi, i hi̧ mi lari lɔr ɓa ndiɓi, mí-i ziŋ a mbaŋu ɓa ndiɓi dɔm ri ɓa boh mí na-ay.”
21Bale bahgaŋ ye ɓah hi̧ ni ɓahri : “Su-su. Mu ɓa gun-laɓ pihna a suki. Law wo ƴo mbew ziŋ mi. Ké mu mgba sa̧w fe bi a ndi̧ ɓa suki-ay le, fe bi a ŋgi̧-u, mi kú̧ ndɔk wo. Mú gi kaɓ ɓil law rihna bahgaŋ wo-ay.”
22Gun a seɗe-u gi. Ke ɓah hi̧ bahgaŋ ye ɓahri : “Gaŋ bi, i hi̧ mi lari lɔr ɓa seɗe, mí-i ziŋ a ɓoru seɗe dɔm ri ɓa niŋ mí na-ay.”
23Bale bahgaŋ ye ɓah hi̧ ni ɓahri : “Su-su. Mu ɓa gun-laɓ pihna a suki. Law wo ƴo mbew ziŋ mi. Ké mu mgba sa̧w fe bi a ndi̧ ɓa suki-ay le, fe bi a ŋgi̧-u, mi kú̧ ndɔk wo. Mú gi kaɓ ɓil law rihna bahgaŋ wo-ay.”
24Bale gun-laɓ pihna a a̧y ké ya̧ lari lɔr mbew ra gi. Ke ɓahri : “Gaŋ bi, mi tu ɓahri se, a woiri ra, i kpuh mbamba. Waka ké i pah pay ya mí i ziŋ ri fe pay. Waka ké i mi̧h mi̧hri ku̧ ri ya kara i mbu̧h fe payu mbah pul pi. 25Hȩkme laɓ mi. Mí-i ɗeh lɔkɔ, mi mbek ri lari woiri ra. Fe woiri mí na-ay.”
26Mí bahgaŋ ye fer nzak ye ɓahri : “A wo gun-laɓ pihna-ay law wo ɓa law a pipiri-u, mu ɓa nzuk law hȩkme. Mu tu ɓahri se, waka ké mi pah pay ya, mí-i ziŋ ri fe pay. Waka ké mi mi̧h mi̧hri ku̧ ri ya kara mi mbu̧h fe payu mbah pul pi ra wa, 27ani mú-u poŋ lari bi-ay hi̧ nzuk a ɓoru sɔɓ nunu ɓay mí ziŋ mbihlari a ɓoru dɔm tulu ke elna bi ya le ? 28Kaŋ dale í mgba ni. Í nah lari lɔr ké mbew ra hi̧ nzuk ké ƴo ke lari lɔr ɓa boh-aw. 29Nzuk a suŋ suŋ gbam ké ko fal fe ké bahgaŋ ye ndoh ndɔk ye ɓa suki le, bahgaŋ ye ɓay hi̧ ni a ɓoru dɔm ri hi̧ ŋgi̧na-aw ɓay na hɔtɔk hɔtɔk kal a pol ra ɓáy. Mí nzuk a a̧y ké hi̧ fe bahgaŋ ye ti̧h suk ya bale, fe a ndi̧ ké na ndɔk ye ra ku nah-u kpɔɗ. 30Kandɔkaw mí gun-laɓ pihna a a̧y ké ti̧h suk ya ra, í mgba ni, í vbu ni ɓu kala ɓil tirim. Gelu-aw mí ke vúh rew ke mbihnun darara darara. Ke sú̧ sel ye ŋger ŋger.”
31Nam ké gun nzuk pirmatul ɓay el gi ɓil riŋ ɗina ye ke tem nzak pihna yeri gbam le, namu-aw mí ke káɓ ké ndiseŋe tul arŋgaw mbay. 32Ke ɗí sa̧wnzukri gbam gi pol ye. Ke kéhr nzukri gel seɗe kandɔk nzuk fe hɔlna ké kehr samiri ke guyri kaŋ. 33Ke mbú̧h samiri ku̧ fál ndɔk lakna ye. Guyri ba, ke kú̧ fál ndɔk kperu ye. 34Wara mí mbay ra ɓay ɓah hi̧ nzukri ké ƴo fál ndɔk lakna ye ɓahri : “Í gi wuri, a woiri ké mgbɔkɔ bah bi ku̧ tul woiri, í ya̧ wuri fe baah ké ɓa lák mbay ye ké-e lek geŋ wuri ke titilu da̧y ké-e ti sa̧w laɓ nunmbam ke tusiɓa. 35Ɓayu ké ɗaka i mi, mí i hi̧ mi fe su̧na, mi su̧. Kɔkmbih i mi, mí i hi̧ mi mbih, mi nzo. Mi gi ɓa gahru, mí i mgba in ziŋ mi. 36Mi ta ke gar ya, mí i ndoh mi gar. Mi na ɓa sena, mí i gi so mi. Ku mgba mi na vul mgbal, mí i gi mgba sa̧w bi pi.”
37Wara mí a woyri sa̧w Ŋgerzah ku ɓay el vbi ni ɓahri : “Gaŋ wah, seh a suŋ mí ɗaka i mu, mí nah hi̧ mu fe su̧na, kɔkmbih i mu, mí nah hi̧ mu mbih nzona le ? 38Seh a suŋ mí mu gi ɓa gahru, mí nah mgba in ziŋ mu le ? Seh a suŋ mí mu ta ke gar ya, mí nah ndoh mu gar le ? 39Seh a suŋ mí mu na ɓa sena, mu na vul mgbal, mí nah mgba sa̧w wo le ?”
40Mí Mbay ɓay yih nzak woyri ɓahri : “Ɓa ketina, i ƴo ziŋ mi gaŋ. Mi ƴo ɓah ɓayay hi̧ wuri, suki a suŋ ké i laɓ ziŋ gun bah bi mbew, a ye ké nzukri ko ni ɓa nzuk ya ra, ɓa a bi gaŋ, mí i laɓ ziŋ mi-aw.”
41Wara mí Mbay ɓay ɓah hi̧ nzukri ké ƴo fál ndɔk kperu ye ɓahri : “Í tɔr wuri ma sa̧, nazi ta wuri. Í si wuri kaɓ ɓil hɔrɔ ké na sew ke sew ɓa ŋgɔh. Hɔrɔ ra lek lewsa̧ ɓa fe mbay záh tukala ke záh nzak pihna yeri. 42Ɓayu ké ɗaka i mi, mí i hi̧ mi fe su̧na ya. Kɔkmbih i mi, mí i hi̧ mi mbih nzona ya. 43Mi gi ɓa gahru, mí i mgba mi gahru ya. Mi ta ke gar ya, mí i hi̧ mi gar ndohna ya. Mi na ɓa sena, mi na vul mgbal, mí i si so mi ya.”
44Wara mí ku ɓay el ɓah hi̧ Mbay ɓahri : “Gaŋ wah, seh suŋ mí ɗaka i wuri, kɔkmbih i wuri, i gi ɓa gahru, i si diŋ ndikpo, i na ɓa sena, i na vul mgbal, mí nah so wuri ya le ?”
45Wara mí Mbay ɓay el ɓahri : “Ɓa ketina, i saŋ mi gaŋ. Mi ƴo ɓah ɓayay hi̧ wuri, fe ké i poŋ laɓ ziŋ gun bah bi, a ye ké nzukri ko ni ɓa nzuk ya-aw, ɓa a bi gaŋ, mí i poŋ laɓ ziŋ mi-aw.”
46Nzukri ké ƴo fál ndɔk kperu ye-aw, ku ɓay tɔr si gel ké vba̧na kal law nzukri sew ke sew ɓa ŋgɔh. Nzukri ké tu Ŋgerzah ɓa záh woyri ba, ku káɓ ke ɔkna sew ke sew ɓa ŋgɔh. »
Currently Selected:
Mbete Matiye 25: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
