Senesi 28

Sola o Sakopo : moe i Petele

1Na kalagai loa e Isaake a Sakopo, ti na tapuaki loa a ia kiate ia, o tuku kiate ia le fakatotonu leinei : Aua na ke avaga loa mo se taine o taineliki o Kanaane. 2Tuu a koe ki aluga, o ano ki Patane-Alame, ki le fale o Petuele, ko le tamana o lou tinana, ti ke filifili loa i ai sau avaga i taineliki o Lapane, ko le tuagaane o lou tinana. 3Ke tapuaki le Atua Mafimafi kiate koe, o fakatuputupua mo liuliuga a koe, ke ke liliu ko ni kakai mauke ai ! 4Ke tuku atu e ia kiate koe mo lou sakoga le tapuaki a Apalaamo, o tupu ke ke maua tofiga le fenua leia e ke nofo ai ofaipe se tagata matapule, leia kua soli e ia kia Apalaamo.

5Ti na kakau loa e Isaake a Sakopo ke ano : Ti na ano loa a ia ki Patane-Alame, kia Lapane, ko le vosa o le tagata Asilia ko Petuele, ti ko le tuagaane o Lepeka, tinana o Sakopo mo Isaake.

6Na tio loa Esau ki le tapuaki a Isaake kia Sakopo ti mo lana kakau a ia ke ano ki Patane-Alame, o filifili i ai sana avaga, ti mo le fakatotonu leia na fai e ia i le temi leia na tuku ai lana tapuaki : Ke aua na ke too loa sau avaga i taineliki o Kanaane. 7Na tio loa a ia ki le fakalogo a Sakopo ki lona tamana mo lona tinana, o ano ki Patane-Alame. 8Ti na matala loa Esau ki le veli o taineliki o Kanaane ki le loto o lona tamana ko Isaake.

9Ti na loto loa a ia ke toe filifili se tasi ona avaga. Koia na ano ai loa Esau kia Isemaele, ko le vosa o Apalaamo, ti na avaga loa a ia mo lona taine ko Maalate, le tuagaane o Nepasote.

10Na ano loa Sakopo mei Pele-Sepa ki Salani. 11Ti na kaku loa a ia ki se ganea, leia na moe ai loa a ia, talie kua galo le laa. Na too loa e ia se fatu o uluga ki ai, ti na moe loa a ia i le ganea lena. 12Ti na moe miti loa a ia : Ti ko leinei, na tuu se kakega i le kele ti na tau lona tumutumu ki le lagi. Ti ko leinei, na pale mo ifo a aselo o le Atua i le kakega lena. 13Ti ko leinei na nofo le Eteleno i aluga o le kakega ; ti na pati loa a ia : Ko au ko le Eteleno, ko le Atua o lou tamana ko Apalaamo, ti ko le Atua o Isaake. Ko le kele lena e ke moe ai, e kau soli loa a ia kiate koe mo lou sakoga. 14E tatau loa lou sakoga mo le efu o le kele ; e ke mafolafola loa ki le potu uesite mo le potu esite, ki le potu noleto mo le potu saute ; ti e tapuakina loa a famili fuli o le malama nei iate koe mo lou sakoga. 15Ko leinei, e kau nofo mo koe, e kau taupau loa a koe i ganea fuli ala e ke ano loa ki ai, ti e kau toe aumai loa a koe ki le fenua leinei ; talie e leaise kau tiaki noa loa a koe, kae kau fakasoko loa a nea fuli ala na kau fakapapau atu kiate koe.

16Na ala ake loa Sakopo i lana moe, o pati : E nofo maoki le Eteleno i le ganea leinei, kae e leaise kau iloa a ia. 17Na i loa Sakopo, ti na pati loa a ia : E fakaii ai le ganea leinei ! Ko le fale leinei o le Atua ! Ko le matapa leinei o Selo ! 18Ti na tuu ake loa Sakopo i le usu, o too le fatu leia na uluga ki ai, ti na fakatuu loa e ia a ia ke liliu ko se fatu fakamaoki, ti na liligi loa e ia se lolo ki lona tumutumu. 19Ti na tuku loa e ia ki le ganea lena le igoa ko Petele ; kae na igoa le kolo i mua ko Lusi. 20Ti na fai loa e Sakopo lana fakapapau, o pati : Kapau e nofo le Atua mo au, o taupau au i le fanoga leia e kau fai, kapau e tuku mai e ia kiate au se pane ke kau kai mo ni teu ke kau lava, 21ti kapau e kau toe liliu i le tokamalie ki le fale o loku tamana, ti e liliu loa le Eteleno ko loku Atua. 22Ko le fatu leinei kua kau fakatuu ti kua kau fakatapui, e liliu loa ko le fale o le Atua ; ti e kau soli loa kiate ia le vaega kau agafulu o nea fuli ala e soli mai loa e ia kiate au.

Currently Selected:

Senesi 28: FB2000

Highlight

Copy