Senesi 27

Kaia o le tapuaki e Sakopo

1Na matua Isaake, ti kua fakapouli ona mata, ti na leaise koi tio a ia. I se aso, na kalagai loa e ia Esau, lona vosa uluaki, o pati kiate ia : Ei loku vosa ! Na tali loa Esau : Ko leinei au ! 2Na pati loa Isaake : Ko leinei foki kua kau matua, ti e leaise kau iloa le aso o loku mate. 3Koia i le aso nei, e kau kole atu ai kiate koe ke ke too au masafu, mo lau kalolo, mo lau taga gasau, ti ke ano ki le vao o fanai mai se manu kiate au. 4Teuteui mai loa kiate au se nea kai leia e kau manako ki ai, ti ke aumai loa a ia kiate au ke kau kai, o tupu ke kau tapuaki loa kiate koe i mua o loku mate. 5Na logo loa Lepeka ki le masau a Isaake ki lona vosa ko Esau. Ti na ano loa Esau ki le vao o fana ke aumai se manu ki lona tamana.

6Na pati loa Lepeka ki lona tama ko Sakopo : Ko leinei, na kau logo kua masau lou tamana ki lou taina ko Esau, o pati : 7Aumai kiate au se manu, ti ke teuteui mai kiate au se nea kai ke kau kai ; ti e kau tapuaki loa kiate koe i mua o le Eteleno, i mua o loku mate. 8I le temi nei, ei loku tama, fakalogo mai ki loku leo, ti ke fai a nea fuli ala e kau fakatotonu atu kiate koe. 9Ano ki le kau manu, o too i ai ni uviki koti e lua, o aumai laua kiate au ; e kau teuteui loa ki lou tamana se nea kai leia e manako ki ai, 10ti e ke ave loa a ia ke kai e lou tamana, o tupu ke tapuaki atu loa a ia kiate koe i mua o lona mate. 11Na tali loa Sakopo ki lona tinana : Ko leinei, e fulufulu loku taina ko Esau, kae e leaise kau fulufulu. 12Ti kapau e fafa mai loa loku tamana kiate au, ti e kau liliu loa kiate ia ko se tagata kaka, ti e kau aumai loa le malaia kiate au, kae leai le tapuaki. 13Na pati loa lona tinana kiate ia : Ei loku tama, ke vilo le malaia lena kiate au ! Fakalogo mai fua ki loku leo, ti ke ano o too mai a manu. 14Na ano loa Sakopo o too a manu o aumai ki lona tinana, leia na teuteui ia loa se nea kai leia na manako ki ai Isaake. 15Ti na too loa e Lepeka a kofu o Esau ko lona tama uluaki, ona kofu fulumalie ala na tuku i fale, ti na fakatui loa e ia latou kia Sakopo, lona tama muli. 16Ti na kofu loa e ia a lima o Sakopo ki le kilii koti, mo lona ua leia na leaise fulufulu. 17Ti na teki loa e ia ki lima o lona tama ko Sakopo le nea kai mo le pane ala na teuteui e ia.

18Ti na ano loa Sakopo ki lona tamana, o pati : Ei loku tamana ! Ti na pati loa Isaake : Ko leinei au ! Ko ai a koe, ei loku vosa ? 19Ti na tali loa Sakopo ki lona tamana : Ko au ko Esau, ko lou vosa uluaki ; kua kau fai le nea leia na ke pati mai ki ai. E kau kole atu kiate koe ke ke tuu la ki aluga o tonatona, ti ke ke kai ki le manu leia kua kau teuteui, o tupu ke ke tapuaki mai loa kiate au. 20Ti na pati loa Isaake ki lona vosa : Ei loku vosa, ki le vave nei o lau maua le manu ! Ti na tali loa Sakopo : Talie ko le Eteleno lou Atua, leia na aumai ia le manu ki oku mua. 21Ti na pati loa Isaake kia Sakopo : Soso mai ake ke kau fafa kiate koe, ei loku vosa, ti ke kau iloa pe ko koe ko loku vosa totonu ko Esau, pe leai. 22Na soso ake loa Sakopo kia Isaake lona tamana, ti na fafa loa Isaake kiate ia, o pati : Ko le leo, ko leia o Sakopo, kae ki lima, ko la o Esau. 23Na leaise iloa loa e ia ko Sakopo, talie na fulufulu ona lima ofaipe lima o lona taina ko Esau. Ti na tapuaki loa a ia kiate ia. 24Na pati loa a ia : Pe ko koe ko loku vosa ko Esau ? Ti na tali loa Sakopo : Ko au. 25Ti na pati loa Isaake : Fakafeofi mai le nea kai kiate au, ke kau kai ki le manu o loku vosa, ti ke kau tuku kiate koe laku tapuaki. Na avake loa e Sakopo le nea kai ki lona tamana, ti na kai loa a ia ; na toe avake foki e Sakopo kiate ia se vino, ti na inu loa a ia.

26Ti na pati loa Isaake lona tamana kiate ia : Ke ke soso mai, ti ke sogi mai kiate au, ei loku vosa !

27Ti na soso ake loa Sakopo o sogi kiate ia. Ti na nanamu loa Isaake ki le sauga o ona kofu ; ti na tapuaki loa a ia kiate ia, o pati : Ko leinei, e tatau le sauga o loku vosa mo le sauga o se faisaga leia kua tapuakii e le Eteleno.

28Ke tuku e le Atua kiate koe le sasau o le lagi,

Mo le gako o le kele,

Mo le fulumeto, ti mo le vino o lasi ai !

29Ke fakalogo ni kakai kiate koe,

Ti ke punou ni puleaga i ou mua !

Ke ke pule ki ou fetaina,

Ti ke punou a vosa o lou tinana i ou mua !

Ke malaia leia e tutuku ia a koe,

Ti ke tapuakina leia e tapuaki loa kiate koe.

30I le oki o le tapuaki a Isaake kia Sakopo, ti nao mavae atu fua Sakopo i lona tamana, kae kaku ake loa Esau lona taina mei lana kapu manu. 31Na teuteui foki e ia se nea kai, o ave ki lona tamana ; ti na pati loa a ia ki lona tamana : Tuu ki aluga, ei loku tamana, ti ke kai ki le manu a lou vosa, o tupu ke tapuaki lou laumalie kiate au ! 32Na pati loa lona tamana ko Isaake kiate ia : Ko ai a koe ? Ti na tali loa a ia : Ko au Esau, lou vosa uluaki. 33Na lulu katoa loa Isaake i le lasi o lona ofolele, ti na pati loa a ia : Ko ai leia na kapu ia se manu o aumai kiate au ? Talie kua kau kai ki nea fuli i mua o lau kaku mai, ti kua kau tapuaki kiate ia. Koia, e tapuakina maoki loa a ia. 34I le logo a Esau ki masau a lona tamana, na tagi leo lasi loa a ia, i le lasi o lona mamae, ti na pati loa a ia ki lona tamana : Tapuaki mai foki kiate au, ei loku tamana ! 35Na pati loa Isaake : Na au lou taina o kakai au, ti kua too e ia lou tapuaki. 36Na pati loa Esau : E tonu ai lona igoa leia ko Sakopo, talie ko le tua lua leinei o lana fakalaka iate au. Na uluaki too mua e ia loku tuulaga o le vosa uluaki, ti ko leinei i le aso nei kua toe too e ia loku tapuaki. Ti na toe pati loa a ia : Pe leaise ke nofo mo se tasi ake tapuaki kiate au ? 37Na tali loa Isaake kia Esau : Ko leinei, kua kau fakanofo a ia ke pule kiate koe, ti kua kau tuku ke fakasausau ona fetaina fuli kiate ia. Kua kau tuku kiate ia le fulumeto mo le vino o lasi. Kolea le nea leia ke kau toe maua loa kiate koe, ei loku vosa ? 38Na pati loa Esau ki lona tamana : Pe ko le tapuaki fua lena e tasi e ke maua, ei loku tamana ? Tapuaki mai foki kiate au, ei loku tamana ! Ti na tagi loa Esau o leo lasi.

39Na tali loa lona tamana ko Isaake kiate ia :

Ko leinei !

E sala loa lou nofoaga i le gako o le kele Mo le sasau o le lagi, i aluga.

40E ke mauli loa ki lau seleta,

Ti e ke fakasausau loa ki lou taina.

Kae i se aso e ke lauatea loa meiate ia,

Ti e ke fatii loa le laakau o le popula leia e teki loa e ia ki lou ua,

Ti e ke tiaki loa a ia ki mamao.

41Na somo loa i le loto o Esau se vesia lasi kia Sakopo, o tupu ko le tapuaki leia na tuku kiate ia e lola tamana ; ti na pati loa Esau i lona loto : Kua vave fua a aso o le putu o loku tamana, ti e kau tamate loa loku taina ko Sakopo. 42Na fakasa loa kia Lepeka a masau o lona tama uluaki ko Esau. Ti na kalagai loa e ia lona tama muli ko Sakopo, o pati kiate ia : Ko leinei, e fia taui e lou taina ko Esau kiate koe, ti e afa e ia ke tamate a koe. 43Koia ei loku tama, i le aso nei fakalogo mai ki loku leo ! Tuu o sola ki loku tuagaane ko Lapane, i Salani ; 44ti ke nofo loa i ai i se ga temi ikiiki, 45o kaku ki le fimalie o le loto o lou taina, ki le oki o lona ita kiate koe, ti ke galoi e ia le nea leia na ke fai kiate ia. E kau toe tuku logo atu loa kiate koe ke ke toe liliu mai. Kolea e kau sala ai loa mo koulua toka lua i se aso e tasi ?

46Na pati loa Lepeka kia Isaake : Kua kau fakalialia ki le mauli o tupu ko oku fugao, a taineliki o Eti. Kapau e toe avaga loa Sakopo mo se taine o Eti, ofaipe laua anei, kolea loa le uiga o le mauli kiate au ?

Currently Selected:

Senesi 27: FB2000

Highlight

Copy