Senesi 29

Sakopo i Salani

1Na soko atu loa e Sakopo lona fanoga, ti na ano loa a ia ki le fenua o vosa o le potu Esite. 2I se aso, na tio loa a ia ki se sosoni leia na tuu i loto o faisaga ; ti na i ai ni kau ovi e tolu ala na malolo i ona tafatafa, talie na fakainu i le sosoni lena a kau manu. Ti na lasi ai le fatu leia na tapono ki ai le sosoni. 3Na fakatasi a kau manu fuli ki ai ; na tekai loa le fatu mei le gutu o le sosoni, kae fakainu loa a manu, ti na toe teki loa le fatu ki le gutu o le sosoni.

4Na pati loa Sakopo ki le kau tausi manu : Ei oku fetaina, pe kotou au meifea ? Na lotou tali loa : E motou nofo i Salani. 5Na pati loa a ia kia latou : Pe kotou iloa Lapane, ko le vosa o Nakole ? Na lotou tali loa : E motou iloa a ia. 6Na pati loa a ia kia latou : Pe malolo a ia ? Na lotou tali loa : E malolo a ia ; ti ko leinei lona taine ko Lasele e au mo lana kau manu. 7Na pati loa a ia : Koi loa ai le aso, e leikiaise tatae le temi leia e tonu ke tanaki ai a kau manu ; kotou fakainu a ovi, ti kotou ano o tuku latou ke kai saele. 8Na lotou tali loa : E leaise feala ke motou fai le nea lena, kae e leikiaise tanaki mai a kau manu fuli i mua ; ti e tekai loa le fatu i le gutu o le sosoni, ti e fakainu loa a ovi.

9Koi lolotoga masau a ia kia latou, kae kaku ake loa Lasele mo le kau manu a lona tamana, talie na tausi manu a ia. 10I le tio a Sakopo kia Lasele, le taine o Lapane, le tuagaane o lona tinana, mo le kau manu a Lapane, le tuagaane o lona tinana, na soso loa a ia ki le sosoni, o tekai kese le fatu i le gutu o le sosoni, kae fakainu loa e ia le kau manu a Lapane, le tuagaane o lona tinana. 11Ti na sogi loa Sakopo kia Lasele, ti na tagi leo lasi loa a ia. 12Na fakasa loa e Sakopo kia Lasele ko le famili totonu a ia o lona tamana, ko le tama a ia o Lepeka. Ti na makape loa Lasele o fakasa ki lona tamana. 13I le logo a Lapane ki le masau kia Sakopo, le tama o lona tuagaane, na makape loa a ia ki ona mua, o luluku a ia ki ona lima, o sogi kiate ia, ti na taki ake loa e ia a ia ki lona fale. Na fakamatala loa e Sakopo kia Lapane a nea fuli ala na soko kiate ia. 14Ti na pati loa Lapane kiate ia : E maoki ko koe ko loku ivi ti ko loku kanofi.

Lea mo Lasele

Na nofo loa Sakopo i le masina e tasi i le fale o Lapane.

15I se aso na pati loa Lapane kia Sakopo : Ko loku famili totonu a koe, kae e leaise ko se tupuaga lena ke ke gaoi noa kiate au : Fakasa mai kiate au pe kolea lou totogi ! 16Na i ai ni taineliki e toka lua o Lapane : Na igoa le uluaki ko Lea, ti na igoa le lua ko Lasele. 17Na mata fuluveli a Lea, kae na fuafuamalie mo fulumalie a Lasele. 18Na mamana Sakopo kia Lasele, ti na pati loa a ia : E kau fakasausau loa kiate koe i fetuu e fitu ki le lua o ou taine, ko Lasele. 19Ti na pati loa Lapane : E kau malie ia ake lona soli atu kiate koe, i lona soli ki se tagata kese. Nofo i loku fale !

20Ti na gaoi loa Sakopo i fetuu e fitu kia Lasele ; kae na fai loa a fetuu ana kiate ia pe ni ga aso teiki fua, i le lasi o lona alofa kia Lasele. 21I le oki o fetuu ana, na pati loa Sakopo kia Lapane : Soli mai kiate au laku avaga, talie kua katoa loku temi, ti e kau ano loa kiate ia. 22Na fakaafe loa e Lapane le kakai fuli o le ganea lena ki le kaitasi o le avaga. 23I le afiafi pouli, na too loa e Lapane lona taine ko Lea, o ave kia Sakopo. Ti na ano loa Sakopo kia Lea. 24Na soli foki e Lapane ki lona taine ko Lea le fafine fakasausau ko Silipa ke kaunaga kiate ia.

25I le ala usu ake, na tio loa Sakopo ko Lea. Ti na pati loa Sakopo kia Lapane : Kolea le nea leia kua ke fai kiate au ? Pe na leaise kau gaoi i lou fale kia Lasele ? Kolea kua ke kakai ai au ? 26Na pati loa Lapane : E leaise ko le aga masani o le fenua leinei ke fakaavaga le taine muli i mua o le taine uluaki. 27Fakaoki le vasaa mo le uluaki. E motou toe soli atu loa kiate koe mo Lasele, ti e ke toe gaoi loa kiate au i ni iki ake fetuu e fitu. 28Na fai loa Sakopo ki ai, ti na fakaoki loa e ia le vasaa mo Lea. Ti na soli loa e Lapane kiate ia lona taine ko Lasele ke avaga mo ia. 29Ti na soli foki e Lapane ki lona taine ko Lasele le fafine fakasausau ko Pila ke kaunaga kiate ia.

30Na ano loa Sakopo kia Lasele, ti na alofa loa a ia kiate ia o lasi ake ia Lea. Ti na toe gaoi loa a ia i le fale o Lapane i ni iki ake fetuu e fitu.

Fanau a Sakopo

31Na tio loa le Eteleno na leaise alofa Sakopo kia Lea ; ti na fakafanaunau loa e ia a Lea, kae fakapaa loa e ia a Lasele. 32Na tinae loa a Lea, ti na fanaui loa e ia se tama, o fakaigoa loa e ia ko Lupeni, talie na pati loa a ia : Kua tio le Eteleno ki loku fakataulaloi. I le aso nei e alofa loa loku avaga kiate au. 33Na toe tinae loa a ia, ti na fanaui loa e ia se tasi a tama, ti na pati loa a ia : Kua iloa e le Eteleno e leaise alofaia au, ti kua soli mai e ia kiate au le vosa leinei. Ti na soli loa e ia kiate ia le igoa ko Simeone. 34Na toe tinae loa a ia, o fanaui loa e ia se tasi a tama, ti na pati loa a ia : I le faiaga loa leinei, e pipiki loa loku avaga kiate au, talie kua kau fanaui kiate ia ni vosa e tolu. Ti na soli loa e ia ki le vosa lena le igoa ko Levi.

35Na toe tinae loa a ia, o fanaui loa e ia se tasi a tama, ti na pati loa a ia : I le faiaga loa leinei, e kau fakavikiviki loa ki le Eteleno. Ti na soli loa e ia ki le vosa lena le igoa ko Suta. Ti na gato loa lana fanaunau.

Currently Selected:

Senesi 29: FB2000

Highlight

Copy