Yohana 14
14
Ukazi bwando kumwake Tata: tumona Tata tuhawa na Yesu
1Sukumdungwedungwe mmoyo mmwenu; momtogola Mulungu, nhogoleni na niye! 2Mngʼanda ya Tata wangu muna ukazi bwando; kamba si vivo, nihamulongeleni, kilumbo nogenda kuwatunduwilila ihanhu mkakale. 3Na nihachola kutunduwila ihanhu, nobwela kabili nimgomeleni kumwangu, giladi hanili niye, na mweye muwe baho. 4Na niye kunichola, nzila moitanga.” 5Tomaso kamulongela, “Mndewa, tweye hatukutangile kuuchola, avo toitangaze inzila?” 6Yesu kawalongela, “Niye nene nzila na ihoko na upile; munhu heza kwa Tata komu kilumbo changu. 7Kamba mnhangile niye, muhamtangile na Tata; kulawa lelo mumtanga, na avo mumona.” 8Filipo kamulongela, “Mndewa, utulagile Tata, vivo tulonda.” 9Yesu kamulongela, “Niye nghala hamonga na mweye mazuwa gano gose, na gweye Filipo hunhangile? yambonile niye, kamona na Tata; avo gweye kolongaze, Utulagile Tata? 10Hutogole kamba niye namgati mwa Tata, na Tata kamgati mmwangu? ganiwalongele sigalonga kwa msagu wangu, komu Tata yokala mgati mmwangu kosanghana kazi zake. 11Nhogoleni kamba niye namgati mwa Tata, na Tata kamgati mmwangu; au kamba hamnhogole niye, togoleni kwa kilumbo cha zija zikazi zenyego!
Loho Mataza wa ikweli yokala mgati mwetu
12Ihoko ihoko nomulongelani, yonhogola niye, na kazi zinitenda niye, na heyo kwiza kozitenda, vyemela kozitenda nghulu kubanza hizo, kilumbo nochola kwa Tata. 13Mweye muhapula jojose kwa twaga jangu, ajo noditenda, giladi Tata yatunizwe mgati mwa Imwana. 14Muhamhula mbuli yoyose kwa twaga jangu, noitenda.
15Muhanogela, mozigoga mbila zangu. 16Na niye nompula Tata, na Heyo kowenghani Wa kuwatazani, yakale namwe hata digunge. 17Yuyo Loho wa ikweli; ulumwengu haudaha kumbokela, kilumbo haumona wala haumtangiie, bali mweye momtanga, kwa mzoko kokala kumwenu, kabili kokuwa mgati mmwenu.
18Siwalekani mweye na ukiwa; nokwiza kumwenu. 19Kisigala kipigiti kidodo, ulumwengu kabili honda umbone; bali mweye mombona, kilumbo niye nampile, na mweye mokuwa wapile. 20Isiku dijo mweye motambula kamba niye namgati mwa Tata wangu, na mweye mwamgati mmwangu, na niye mgati mmwenu.
21Ayo yabokele mbila zangu na kuzigoga, hiyo yuyo yanogele; na ayo yanogele konogelwa na Tata wangu, na niye nomnogela na kwilaviliza kumwake.”
22Yuda, bali si yuja Iskariota, kamulongela, “Mndewa, vikuwaze vuulonda kwilaviliza kumwetu bali si kwa ulumwe-ngu?” 23Yesu kedika kamulongela, “Munhu yahanogela, kodigoga longa jangu, na Tata wangu komnogela, na tweye tokwiza kumwake na kukala kumwake. 24Munhu kamba hanogele, hagoga malonga gangu; na hivo imbuli imuhulika si yangu komu ya Tata Yangalile.
Loho ya nogelo yogela tindiwalo ja Yesu
25Higo gago nimulongeleni vinghalile kumwenu. 26Bali Hiyo Yonda Yamtazeni iyo Loho Yangʼalile, na heyo Tata komgala kwa twaga jangu, komulangukizani gose na kuwakumbusa gose ganiwalongeleni.
27Tindiwalo nomulekelani, na tindiwalo jangu nowengha; viniwengha niye, si vivo kamba ulumwengu vuulava; sukumdungwedungwe mmiyoyo mmwenu wala sukumdumbe! 28Muhulika vinimlongeleni, Nochola, kabili nokwiza kumwenu; kamba muhaninogele, muhadenghelele kilumbo nochola kwa Tata, kwa mzoko Tata yuyo mkulu kubanza niye. 29Avo niwalongelani hadinalawilila tanhu, giladi vonda dilawilile kwiza mtogole. 30Niye silonga namwe malonga bwando kabili; kokwiza imkulu wa ulumwengu uno, na heyo kabule kinhu kumwangu. 31Bali giladi ulumwengu utange kumbe nimnogela Tata, na niye notenda kamba vija Tata viyandagize.
Segeleni, tucholeni.
Currently Selected:
Yohana 14: ZAM75
Highlight
Share
Copy
Want to have your highlights saved across all your devices? Sign up or sign in
New Testament in Zaramo © United Bible Societies, 1975.
