Yohana 15

Mtongoni na matambi gake

1Niye nene mtongoni wa ikweli, na Tata wangu iyo mnghulima. 2Tambi dili mmwangu kamba hadilela, kodisegeza; na tambi dilela kodidahulila, giladi diyohe kulela. 3Mweye mziga kungʼala kwa mzoko wa dija dilonga diniwalongeleni. 4Kaleni mgati mmwangu, na niye mmwemu; kamba vija tambi hadidaha kulela dili yeka, kamba hadikalile mumtongoni, igambile vivo na mweye, kamba hamkalile mmwangu.

5Niye namtongoni, amweye mwamatambi; yonda yakale mgati mmwangu na niye mgati mmwake, hiyo kolela nghani, kilumbo ihawa niye haduhu, mweye hamdaha kutenda mbuli yoyose. 6Munhu kamba hakalile mgati mmwangu, kokwasigwa kunze kamba tambi, kwiza donyala, na wanhu wodizola na kujasa hamoto, dosakala. 7Mweye muhakala mgati mmwangu, na malonga gangu gahakala mgati mmwemu, puleni dimulonda jojose, na mweye motendelwa. 8Tata wangu kotunizwa kwa vija vumumpula, giladi mulele mujo nghani, na mogalamka wanahina wangu.

Ndengha ya kumnogela Yesu; twa mbwiga za Yesu

9Kamba vija Tata viyanogele niye, na niye viniwanogeleni mweye, kaleni muna unogelo wangu! 10Muhazigoga ndagizi zangu, mokala muunogelo wangu, kamba vija niye vinizigogile ndagizi za Tata wangu na kukala muunogelo wake.

11Higo nimulongelani giladi ndenghelelo yangu iwe mgati mmwemu, na ndenghelelo yenu ivikizwe. 12Ndagizi yangu iyo ino, Mwinogele mweye viniwanogeleni! 13Haduhu mwene unogelo bwando kubanza uno, munhu kulava ugima wake kwa kilumbo cha mbwiga zake. 14Mweye mgalamka mbwiga zangu, muhatenda gonimulagizani. 15Siwakemani kabili watumwa, kwa mzoko mtumwa hadimanya diyotenda bwana wake, bali mweye niwakemani mbwiga, kilumbo gose ganihulike kwa Tata wangu, niwapetelani. 16Mweye hamnisagule niye, komu niye niwasaguleni na kumwikani mchole, mkalele mujo, na mujo wenu kwiza ukale, giladi jojose jonda mumpule Tata kwa twaga jangu, yamwingheni. 17Gano nomulagizani mweye, giladi mwinogele.

Wihilo wa imbago

18Vyemela ulumwengu uhawehila, mvimanya kamba uni-hila niye haichanduso kubanza mweye. 19Kamba muwile wa ulumwengu, ulumwengu uhawanogele vumuli wake; komu mweye si wa ulumwengu, bali niwasagulani mulumwengu, na kwa kilusu hicho ulumwengu uwehila. 20Gelegezeni uja ulonzi unimlongeleni, Mtumigwa si mkulu kubanza bwana wake; ihawa wangadusa niye, wowagadusani na mweye, na kamba wadigoga longa jangu, wodigoga na ijenu. 21Komu gano gose womtendelani kilumbo cha twaga jangu, kwa mzoko hawamtangile Heyo Yangalile. 22Kamba sizile na kulonga nawo, isambi wawe na zambi; bali kwa vino wabule ulekelo wa zambi zao. 23Ayo yonihila niye, kamwihila na Tata wangu. 24Kamba sitendile kazi kumwao hazitendagwa na munhu iyagwe, isambi wawe na zambi; avino sambi wazona, na kutwihila niye na Tata wangu. 25Bali divikizwe dija dilonga jandikigwe muna Inzuma yao, Wanihila hali bule kilumbo.

Loho Mataza vonda yasanghane

26Yaheza hiyo Mataza yonda nimgalileni kulawa kwa Tata, yuyo Loho Mulonga Ikweli yalawile kwa Tata, heyo konisindila. 27Na mweye vivo mosindila, kilumbo kulawa chanduso mkala hamonga na niye.

Currently Selected:

Yohana 15: ZAM75

Highlight

Copy