Yohana 16

1Malonga higo nimulongelani, kwiza sekemwize kwihilwa. 2Mobaguligwa muna zingʼanda za Mulungu; amba vivo saa yokwiza, munhu yomkomani vonda yagese, kamulavila Mulungu nhambiko. 3Na higo womtendelani kwa mzoko hawamtangile Tata hebu niye. 4Komu niwalongelani higo giladi, kipigiti hicho kihavika, mgamanye kamba niye niwalongela.

Ahaja ichanduso gano siwalongeleni, kilumbo nghala namwe hamonga. 5Baye vino nochola kumwake Heyo Yangalile; wala haduhu imonga wenu wa kuniuza, Kochola kwahi? 6Avo kwa kilumbo niwalongela higo, na nyululuko zimema mmoyo mmwenu. 7Bali nomulongelani ya ihoko, vonoga kumwenu, niye nhyole; kilumbo kamba sicholile, na heyo Mataza honda yeze kumwenu; komu nihachola, nomgala kumwenu. 8Ayo yaheza kouhuguza ulumwengu kwa ikivugulo cha zambi na ihoko na ikitala. 9Kwa kivugulo cha zambi, kilumbo hawanhogola niye. 10Kwa kivugulo cha ihoko, kilumbo nochola kwa Tata, avo honda mmbone kabili. 11Kwa kivugulo cha kitala, kilumbo yuja imkulu wa ulumwengu uno kamala kutaguswa.

12Vyemela nihali nago bwando ga kuwalongelani, bali nihagalonga vino, muhalemelwe. 13Komu ayo vonda yeze, iyo Loho wa ikweli kowalongoza na kuwengiza mwikweli yose, kwa mzoko honda yalonge kwa msagu wake mwenyecho, bali kowalongela gonda yahulike na kupeta vigweka vonda vize. 14Heyo konhunila niye, kilumbo kogasola gali mmwangu na kuwengha kivugulo. 15Na gose gayali nago Tata, gangu; kileka nongile kamba, kosola igangu na kuwalavilani kivugulo.

Susuwalo jetu dogaluka ndenghelelo

16Kihali kipigiti kidodo na mweye honda mmbone; na kwiza kipigiti kidodo, na mweye mombona. 17Aho wayagwe wa iwanahina wake wailongela, “Mbuli gani ino iyolonga, Kihali kipigiti kidodo na mweye honda mmbone, na kwiza kipigiti kidodo na mweye mombona; na vija viyalongile, kamba nochola kwa Tata? 18Walonga, Mbuli gani ino iyolonga, isigala kipigiti kidodo; hatutanga diyolonga.” 19Yesu kavitanga kamba wolonda kumuuza, kawalongela, “Vija vinongile, Kisigala kipigiti kidodo na mweye honda mmbone, na kwiza kipigiti kidodo na mweye mombona, dijo hijo mkalile mkiuzagiza? 20Ihoko ihoko nomulongelani, mweye molila na kwiyalala, komu ulumwengu wokimozamoza, na mweye msusuwala; bali susuwalo jenu dogaluka ndenghelelo. 21Mtwanzi hoyolela, kana msusuwalo, kilumbo kipigiti chake kivika; komu yahamala kumulela mwana, haigelegeza kabili ija mgaduko, kilumbo cha ndenghelelo za kuleligwa munhu mulumwengu. 22Na mweye vino vivo msusuwala; komu niye nomonani kabili, na miyoyo yenu kwiza yodenghelela, na ndenghelelo yenu haduhu wa kuwasegezela.

23Vyemela siku hiyo honda mniuze mbuli yoyose; ihoko nomulongelani, muhampula Tata mbuli yoyose komwinghani kwa twaga jangu. 24Na dilelo hamnampula kinhu kwa twaga jangu; puleni, na mweye mopata, ndenghelelo yenu iwe ndundumba.

Tupule mditagwa ja Yesu yaihumile imbago

25Higo nigalonga na mweye kwa ngubikilo, komu kidami chokwiza chonda nonge namwe kimwagaiya kivugulo cha Tata, kabili si kwa ngubikilo. 26Isiku dija mopula kwa twaga jangu, wala siwalongelani kamba niye nowapulilani kwa Tata. 27Kwa mzoko Tata mwenyecho kawanogelani, kilumbo mweye mnogela niye na kutogola kamba ndawa kwa Tata. 28Ndawa kwa Tata, niza hano haulumwengu, kabili nouleka ulumwengu, nochola kwa Tata.”

29Wanahina wake walonga, “Lola vino kolonga utobola, kahi hulonga kwa ngubikilo yoyose. 30Avino tuvimanya kamba gweye kugatanga magweka gose, wala hulonda munhu, yakuuze; avo tutogola kamba gweye kulawa kwa Mulungu.”

31Yesu kawedika, “Che, motogola vino? 32Loleni saa yokwiza na vino ivika, vyemela mopwililika imonga imonga na kumwake, monileka nene nili yeka; bali niye sili yeka, kilumbo Tata kahamonga na niye. 33Na higo nimulongelani mkale na mbeho zilawile kumwangu; mulumwengu mnawo mgaduko, komu funyeni umoyo; niye niuhuma ulumwengu.”

Currently Selected:

Yohana 16: ZAM75

Highlight

Copy