Yohana 17

Mhulilo ya Mtambika wetu mkulu

1Malonga higo kagalonga Yesu, kenula meso gake yolola kuulanga, kalonga, “Tata, ikipigiti kivika, mtunile Mwanago, giladi Mwanago na heyo yakutunile gweye! 2Kamba vija vumgwelele ukalangama kwa wose wene zinghuli, giladi wose waja waumgwelele, yawenghe ugima wa digunge. 3Na ugima wa digunge uwo uno, wakutange gweye Mulungu wa hakwe wa ikweli, na Yesu Kristo yutumile. 4Niye nikutunila mulumwengu; niimambukiza kazi ija yungwelele niisanghane. 5Na vino Tata, unhunile niye hamonga na gweye kwa nhunilo zija zinili nazo, ihali tanhu ulumwengu haunagesigwa.

6Twaga jako niwabwililisila wanhu waja waungwelele mulumwengu; wakala wako, kungwelela niye, na mbuli yako waigoga. 7Vino wavitanga kamba gose gaungwelele galawa kumwako. 8Avo malonga gauninghile niye, niwengha wawo; na hewo wagabokela, watanga kisigi kamba ndawa kumwako, wotogola kamba gweye gwegwe unhumile.

Yesu viyotupulila tungʼale mwihoko

9Hiwo nowapulila; siupulila ulumwengu, komu waja wauninghile, kilumbo awo iwo wako, 10Na vyose ivyangu ivo vyako, na ivyako ivo vyangu, na niye nhunilwa mgati mmwawo.

11Avo niye nokwiza kumwako; kabili namduhu mulumwengu, bali wano wabaha haulumwengu; Tata Ungʼalile, wemilize wano kwa tagwa jako diuninghile, giladi wegondanye kamba tweye vituli hamwe. 12Vinghalile baho hamonga na hewo, niwemiliza kwa tagwa jako diuninghile, niwateganya; kahi kuduhu imonga wao yagile komu yuyuja imwana wa ikibi, giladi jandiko divikizwe. 13Na vino nokwiza kumwako, na gano nogalonga mulumwengu, giladi wakale na ndenghelelo yangu, na ivikizwe mgati mmwao. 14Niye niwengha ndagizi zako, na ulumwengu uwehila, kilumbo hewo si wa ulumwengu, kamba niye vinili si wa ulumwengu. 15Niye sipula, uwalave mulumwengu aka, komu uwemilize na yuja Imbananzi. 16Hewo si wa ulumwengu, kamba niye vinili si wa ulumwengu. 17Uwasunhe kwa ija ihoko; mbuli yako iyo ihoko. 18Kamba vija vundagize mulumwengu, na niye vivo nowalagiza mulumwengu. 19Avo niye nokilava ningʼale kilumbo chao, giladi na wawo wangʼale mwihoko, wagalamke wako.

Yesu viyotupulila wakristo wawe hamwe

20Vyemela si hewo wayeka wonipulila, komu na waja wonda wanhogole kwa kilumbo cha mbuli yao. 21Giladi waigoge hamonga kamba gweye Tata vuuli mgati mmwangu, na niye mgati mmwako, na hiwo vivo wawe mgati mmwetu, giladi ulumwengu utogole kamba gweye gwegwe unhumile. 22Na nhunilo zija ziungwelele niye, niwengha na hewo, giladi wawe hamwe kamba tweye vituli hamwe. 23Niye mgati mmwao, na gweye mgati mmwangu, giladi wenele hamonga muna ukungulufu giladi ulumwengu uvimanye kamba gweye unhumile na kuwanogela kamba vunogele niye.

24Tata, hiwo wauninghile nolonda wawe hamonga na niye hosehose hanili, kwiza wayone nhunizo yangu ija uuninghile, kwa mzoko kuninogela ihali tanhu ulumwengu haunagesigwa. 25Tata mwene ihoko, ulumwengu haukutangile, bali niye nikutanga, na hiwo wavitanga kamba gwegwe unhumile. 26Na niye niwalongela twaga jako, kabili nowagongʼondeza dija, giladi unogelwa uja uunogele niye, uwe mgati mmwao na niye nghale mmwao.”

Currently Selected:

Yohana 17: ZAM75

Highlight

Copy