Yohana 18

Yesu kagogigwa habugano ja Getsemane

1Yomala Yesu kalawa hamonga na wanahina wake kuchola umwambu wa kizanda cha Kedroni; hakala baho bugano, kengila heyo na wanahina wake. 2Na Yuda yuja yamuhimbile kahatanga ihanhu haja, kilumbo Yesu kakala yochola hiko miyanza bwando hamonga na wanahina wake. 3Avo Yuda viyamalile kubokela didale ja asikali na iwasongolo walawile kwa iwakulu wa nhambiko na Mafariseo, kachola na heyo hiko na vimuli na mizele. 4Na Yesu kagamanya gose gonda gampate, kalawilila kawalongela, “Momzahila yalihi?” 5Wamwidika, “Yesu Mnazareti.” Yesu kawalongela, “Iyo nene.” Ija Yuda mwene kumulava kema wima hamonga na hewo. 6Yesu viyawalongele, “Iyo nene,” wabwela kuchugu, wagwa hasi. 7Na heyo kawauza viyagwe, “Momzahila yalihi?” 8Walonga, “Yesu Mnazareti.” Yesu kawedika yolonga, “Nimulongelani, iyo nene; ihawa monizahila niye, walekeni wano wachole!” 9Giladi divikizwe dija dilonga diyalongile, “Waja wauninghile simwagize hata imonga wao.”

10Bali Simoni Petro kakala na sime, kaisomola na kumsuna mtumigwa wa Mtambika Mkulu, kamkanha digwiti ja ukulume; na yuja imtumwa twaga jake Malko. 11Yesu kamulongela Petro, “Bweza sime yako mulupata lwake; che, kikonha kiyaninghile Tata, konda nileke kukingʼwela?”

Petro kawadumba wanhu, kambela Yesu

12Waja asikali na mkulu wao na watumigwa wa Wayuda wamgoga Yesu, wamdaza nzabi. 13Ilawa baho wamgalila Anasi, kwa mzoko kakala mkwe yake Kayafa, yuja yakalile Mtambika Mkulu mwaka uja. 14Na heyo Kayafa iyo yuja yawenghile Wayuda uja msagu, kamba vinoga munhu imonga yafe kwa kilumbo cha lukolo.

15Wakala Petro na mwanahina iyagwe womsondelela Yesu; na hiyo imwanahina kakala yamanyike na Mtambika Mkulu, kengila hamonga na Yesu halukumbi lwa Mtambika Mkulu. 16Bali Petro kema kunze hamulango; baho imwanahina iyagwe yamanyike na Mtambika Mkulu, kalawa kalonga na msepa mlango, kamgala Petro mgati. 17Yuja pinga msepa mlango kamulongela Petro, “Na gweye che, huli mwanahina imonga wa imunhu yuno?” Na heyo kalonga, “Si nene.”

18Na waja wasongolo na nyakadala wakala wemile, wabwinha moto wa mingheya, kilumbo kukala na beho; wakala wokota moto, na Petro na heyo kakala baho hamonga na hewo yokota moto.

Yesu hakitala cha mtambika mkulu

19Na heyo mtambika mkulu kamuuza Yesu mbuli za wanahina wake na mbuli za malangulizo gake. 20Yesu kamwidika, “Niye nonga na ulumwengu kimwagaiya; mazuwa gose nilangukiza mzingʼanda za kupulila na mdihekalu haja vuwamemaga Wayuda wose, wala silongile mbuli kwa ubadagi. 21Vilihi vuniuza? wauze waja wahulike viniwalongele; hewo wagamanya gaulongile.” 22Viyalongile higo, mtumwa imonga yemile habehi yake, kamtowa Yesu kofi yolonga, “Komwidika hivo Mtambika Mkulu?” 23Yesu kamwidika, “Kamba nonga vihile, sindila gaja gehile; bali nihalonga vinogile, konhowela choni?”

24Basi Anasi kamgala yadazigwe nzabi vivo kwa Kayafa, Mtambika Mkulu.

25Na Simoni Petro kakala yemile yokota moto; baho wamulongela, “Che, agweye nagwe huli imonga wa wanahina wake?” Na heyo kabela yolonga, “Si nene.” 26Mtumwa imonga wa Mtambika Mkulu, na heyo lukolo lumwe na yuja yakanhigwe digwiti na Petro, kalonga, “Che, niye sikonile gweye kuna dibugano hamonga na heyo?” 27Petro kabela viyagwe, na mhunde nzogolo keka.

Yesu habehi ya Luwali Pilato

28Imala baho wamsola Yesu kulawa kwa Kayafa, wamvikiza mngʼanda ya kitala, na avo ikala imitondo; komu wawo wenyego hawengile mngʼanda ya kitala, sikuwambule mwiko, giladi waije sikunghulu ya Pasaka. Pilato kawalawila kunze kalonga, “Nhaguso zilihi zimgambile imunhu yuno?” 30Wamwidika wolonga, “Kamba yuno hatendile gehile, hisambi tumgale kumwako.” 31Pilato kawalongela, “Msoleni mwemwe, mkamlamule kwa ija Nzuma yenu!” Wayuda wamulongela, “Tweye twabule lwamu lwa kukoma munhu.” 32Giladi divikizwe dija dilonga diyalongile Yesu, yolagila kamba kifo kilihi chonda yafe.

Yesu kausindila undewa wake

33Baho Pilato kengila kabili mdingʼanda ja ikitala, kamkema Yesu kamulongela, “Che, gweye gwegwe Mndewa wa Wayuda?” 34Yesu kamwidika, “Gano goulonga golawa mgati mmwako, ama wanhu yungwa wakulongele mbuli yangu?” 35Pilato kedika, “Aka, niye na Muyuda? lukolo lwako na Watambika Wakulu wakugalile kumwangu; kubananga choni gweye?” 36Yesu kalonga, “Undewa wangu hauli wa ulumwengu uno; kamba undewa wangu uwile wa ulumwengu uno, watumigwa zangu wahangombeleze, isambi ngeligwe mmikono ya Wayuda; bali undewa wangu hauli hano.” 37Pilato kamulongela, “Hivo gweye kwa mndewa?” Yesu kedika, “Ona, gweye kulonga, niye na mndewa; ndeligwe kilumbo cha gano, kileka nizile mulumwengu, giladi niisindile ihoko, ayo yali wa ihoko kodihulika dizwi jangu.” 38Pilato kamulongela, “Ihoko iyo ilihi?”

Baraba kadoholigwa

Yomala kawalawila Wayuda viyagwe, kawalongela, “Niye sitatile kihile chochose kumwake. 39Bali kumwenu kuwaga luto, niye kuwadoholela munhu imonga muna ikilingalinga cha Pasaka; ayo molonda niwafungulile mndewa wa Wayuda?” 40Wadunhula bwato kabili walonga, “Si yuyo, bali Baraba!” Na yuja Baraba kakala mbokonyo.

Currently Selected:

Yohana 18: ZAM75

Highlight

Copy