Yohana 13

Yesu viyawasunhile wanahina imigulu

1Viikalile hainavika siku nghulu ya Pasaka, Yesu mwenyecho kavimanya kamba saa yake ivika ya kulawa muna ulumwengu yachole kwa Tata, na heyo vija viyawanogele wanhu wake wali mulumwengu, kawanogela kuvikila ikidugalo.

2Hata kipigiti cha mandiya ga ikilo, shetani kaziga kumgela Yuda mwanage Simoni Iskariota moyo wa kumuhimbila. 3Avo Yesu kakala yovimanya kamba Tata kamwingha vyose mmikono yake, viyalawile kwa Mulungu na kuchola kwa Mulungu. 4Kenuka hana gamandiya, keka hamngwazo nguwo zake, kasola kitambala, kezinga mkigudi. 5Imala kagela mazi muna umkungu, kandusa kuwasunha iwanahina wake migulu na kuihangusa na kija kitambala kiyezingile. 6Hivo keza kwa Simoni Petro; ayo kamulongela, “Mndewa, gweye kosunha imigulu niye?” 7Yesu kamwidika yolonga, “Gweye dinitenda, vino huditanga, komu kodimanya cha hamwande.” 8Petro kamulongela, “Gweye honda usunhe migulu yangu ngʼo!” Yesu kamulongela, “Kamba sikusunhile, honda upetwe na niye.” 9Simoni Petro kamulongela, “Mndewa, si migulu yangu iyeka, komu na mikono na iditwi jose!”

10Yesu kamulongela, “Munhu yamalile koga, hasulukila koga, isigale kugela nhende, kilumbo kangʼala lukuli lose, na mweye mngʼala, bali si mose.” 11Kilumbo kamtanga yuja yolonda kumuhonza, kileka yolonga, “si mose mngʼalile.”

Luto lwa sambi dijo nogelo

12Viyamalile kuwasunha imigulu na kuzisola nguwo zake, kakala viyagwe kawalongela, “Che, avo mgatanga higo ganimtendeleni? 13Mweye munghemaga Mlangulizi na Mndewa; avo mulongaga goya, kwa mzoko hivo nili. 14Basi vihawa niye Mndewa na Mlangulizi niwasunhani imigulu, vilumba na mweye vivo mwisunhe imigulu mwemwe kwa mwemwe. 15Niwenghani luto; kamba niye viniwatendeleni, na mweye mtende vivo. 16Ihoko ihoko nomulongelani, nyakadala hawaga mkulu kubanza bwana wake hebu mtumigwa kubanza yuja yamgalile. 17Muhagatanga higo, mwimota kamba muhagasanghana.

18Silonga kivugulo cha mweye mose; niwatanga waja wasagule; komu jandiko divikizwe, Yadile chakuja changu, kaninulila kisiginho chake. 19Lulawile vino nomulongelani tanhu haganavika, giladi aho honda gavikile, kwiza mtogole kamba niye iyo nene. 20Ihoko ihoko nomulongelani, Yonda yambokele munhu yoyose yonda nimgale, kambokela niye; na heyo yombokela niye, kambokela Heyo Yangalile.”

Yesu kambwimwindula Yuda Iskariota mna iwanahina

21Yomala Yesu kadudumka mloho yake, kasindila yolonga, “Ihoko ihoko nomulongelani, imonga wenu konihimbila.” 22Wanahina wasinhuka, welola kwa kwilola, hawatangile komlonga yalihi. 23Kakala imonga muna iwanahina wake yoibandama hamhambaga ya Yesu, ija Yesu kamnogela. 24Simoni Petro kamfunyiza, kamulongela, “Uza iyo yalihi iyomulonga?” 25Na heyo yakalile behi hamhambaga ya Yesu, kamuuza, “Mndewa, yuyo yalihi?” 26Na heyo Yesu kamulongela, “Iyo yonda nimzanhikile ditonge na ku-mwingha.” Kazanhika ditonge na kumgwelela Yuda mwanage Simoni Iskariota. 27Mhunde viyadile, Mwenembago kamwingila; Yesu kamulongela, “Gauli nago gatende mbwisa!” 28Waja wakalile hana gamandiya, haduhu yaimanyile ija sosombi ya kumulongela higo. 29Waja wayagwe wagesa kwa uja mkoba uyagalaga, na Yesu vija viyamulongele, Gula vinhu vitulonda kwa isikunghulu! hebu yawenghe kinhu iwakiwa. 30Na heyo viyabokele dija ditonge, kahalawa iho dimwe kwa dimwe, na kipigiti kija kikala ikilo.

Ndagizo ya isambi yonda iwahuguze walumwengu

31Viyahalawile Yuda, Yesu kalonga, “Avo Mwana wa Munhu katunilwa, na Mulungu katunizwa kumwake. 32Na Mulungu nayo komtunila Mwanage kumwake, na avo bwisa komtuniza. 33Mweye wana wadodo, kisigala kipigiti kidodo nihali hamonga na mweye; monizahila, na vija viniwalongele Wayuda, Kamba niye kunichola, mweye hamdaha kwiza; vyemelaga na mweye nomulongelani. 34Nomwinghani mbila iyagwe, Mwinogele! kamba vija viniwanogeleni mweye, na mweye mwinogele vivo. 35Kileka wanhu wose wovimanya kamba mweye mwa wanahina wangu, muhainogela mwemwe kwa mwemwe.”

Petro kaidundula

36Simoni Petro kamulongela, “Mndewa, kochola kulihi?” Yesu kamwidika, “Kunichola vino, hudaha kuminza; komu aho hamwande kominza.” 37Petro kamulongela, “Mndewa, habali niye sidaha kukuwinza vino? Hata niye noulava upile wangu kwa kilumbo chako!” 38Yesu kamwidika, “He! na gweye koulava upile wako kwa kilumbo changu? ihoko ihoko nokulongela, nzogolo hanakwika, na gweye kombela miyanza midatu.”

Currently Selected:

Yohana 13: ZAM75

Highlight

Copy