Yohana 12

Yesu kabakazwa mavuta na Maria

1Viikalile siku sita hazinabita kuvikila Sikunghulu ya I Pasaka, Yesu keza Betania hayakalile Lazaro yuja, Yesu yamzusile kulawa mkifo. 2Hiko wamtendela chakuja, na Marta kamtumikila, na Lazaro kakala imonga wao waja wakalile hana gamandiya hamonga na Heyo. 3Baho Maria kasola ratli ya mavuta ga marhamu ga nardo ganogile nghani, gaguligwe na mhiya bwando, kambakaza Yesu mmigulu, kaihulula imigulu na mvili zake; ngʼanda yose yenela mnungho wa marhamu. 4Baho Yuda Iskariota, imonga wa wanahina wake, kwiza yuyo yonda yamuhonze kalonga, 5“Habali mavuta hagagulizwe kwa dinari mizo midatu, wenghigwe iwakiwa?” 6Kalonga higo si kamba kawonela bazi iwakiwa, aka, komu heyo mbavi, na heyo mgoga mkoba, na vigeligwe mgati kasolaga. 7Yesu kalonga, “Muleke yaike siku ya uzisi wangu! Kwa mzoko iwakiwa mnawo mazuwa gose hamonga na mweye, 8bali niye sili namwe mazuwa gose.”

9Na wanhu bwando mwa Wayuda vuwatangile kamba heyo kahiko, weza si giladi wamone Yesu yeka, komu na Lazaro yuja, Yesu yamzusile kulawa mkifo. 10Bali Watambika Wakulu watenda msagu wa kumkoma Lazaro vivija; 11Kwa mzoko Wayuda bwando waihagula, wamtogola Yesu kilumbo cha Lazaro.

Yesu viyengile Yerusalemu yokwagiza Mndewa

12Na siku yaikabili yake wanhu bwando wawinzile isikunghulu, wahulika kamba Yesu kokwiza Yerusalemu. 13Wasola matambi ga mitende, walawa kunze, wachola kumuhingila, walava mdongwe, “Hosiana! Yamotelwe yokwiza kwa tagwa ja Bwana, Mndewa wa Israeli!” 14Na heyo Yesu kakala yapatile mwana mhunda, kamkwela kamba vija viyandikigwe, 15“Sukuudumbe, biti Sayuni; lola Mndewa wako kokwiza, kakwela mwana mhunda!”

16Na magweka higo aho ichanduso wanahina wake hawagatangile, bali Yesu viyatunilwe, baho wakumbukile, kumbe kandikilwa gano na vivo wamtendela.

17Na wanhu waja wakalile hamonga na heyo, viyamkemile Lazaro kulawa mdikabuli na kumzusa, wamsindila. 18Kwa kilumbo hicho gamadale wachola kumuhingila, kwa vija vuwahulike kamba katenda mzonza mkulu. 19Komu Mafariseo walongelela wenyego kwa wenyego, “Movona hamdaha mbuli yoyose; loleni ulumwengu wose womkoleleza kuchugu!”

Wagriki wamuwinzile Yesu, Yesu kabeta kutunilwa na Tata

20Hakala na Wagriki bwelele mmwanza wao wakwelile kuchola kutambika kuisiku nghulu. 21Awo wamgendela Filipo munhu wa Betisaida ya Galilea, wamuwila walonga, “Mndewa, tweye tolonda kumona Yesu.”

22Na Filipo kachola kamulongela Andrea, imala baho Andrea na Filipo wamulongela Yesu. 23Yesu kawedika kalonga, “Kipigiti kivika, Mwana wa Munhu yatunizwe! 24Ihoko ihoko nomulongelani, Nzele ya ngano kamba hai-gwile hasi ife, yokala vivo iliyeka; komu ihafa, yolava mlelo bwando. 25Yoinogela mwenyecho kwiza kokigwasika, bali hiyo yokihila mwenyecho mulumwengu uno, koihonya hata kuugima wa digunge. 26Munhu yahanhumikila na yaminze, na niye hanili baho, na mtumigwa wangu kokuwa baho; na munhu yahanhumikila niye, Tata komtuniza.

27Vino loho yangu yigugumka, na niye nongeze? Tata unihonye, niinege kipigiti kino? bali vinivikile saa ino, icho kilumbo cha mgazo. Tata, uditunile twaga jako!” 28Baho diza dizwi dilawa kuulanga, “Nidituniza, na Niye nodituniza chusa.”

29Madale ga wanhu wemile wima habehibehi, vuwahulike walonga, “Kukala na kihumo.” Wayagwe walonga, “Malaika yalongile nayo.” 30Yesu kedika kalonga, “Dizwi hijo hadizile kwa kilumbo changu, komu kwa kilumbo chenu. 31Vino ikitala cha ulumwengu uno chabaha; vino imkulu wa ulumwengu uno kokwasigwa kunze. 32Na niye nihenuligwa uchana kulawa hasi, nowakwega wose kumwangu.” 33Kagalonga higo, kuno yolagusila kamba kifo kilihi chonda yafe.

Muhali na Mlangaza

34Wayagwe wa mtinghanilo wamwidika, “Tweye tuhulika muna Inzuma kamba Kristo kokala hata digunge; na gweye kolongaze, Mwana wa Munhu imwandama kwinuligwa; yuno Mwana wa Munhu yuyo yalihi?” 35Yesu kawalongela, “Wenge dabaha hamonga na mweye kwa ikipigiti kidodo tu; muhali na mlangaza, gendeni nao, giladi ziza sekediwahume, kilumbo mwene kuchola na ziza hatanga na kuyochola. 36Muhali na mlangaza, utamanileni mlangaza hiwo, giladi mgalamke wana wa mulangaza!” Ago kagalonga Yesu, kagenda na zake, kwifisa sekewamone.

Munhu kotaguswa na Longa dija diyahulike

37Vyemela kakala yotenda vilolomboto bwando, hameso gao, na hewo hawamtogole; 38giladi divikizwe dija dilonga ja Mtulandagu Yesaya diyalongile,

“Mndewa, iyo yalihi yautogole ulonzi wetu,

na mkono wa Bwana kagubulilwa yalihi?”

39Icho ikilumbo wao hawavidahile kutogola, kwa mzoko Yesaya kalonga kabili,

40“Kawatula gameso, kaitenda mizito miyoyo yao,

sikuwalole na meso gao au kuvitanga na miyoyo yao,

sikuwagoloke ilawabaho niwahonye.”

41Ulonzi hiwo kaulonga Yesaya, kilumbo kayona iyenzi yake, kazipeta mbuli zake.

42Viyemela hata mwa iwakulu bwando wamtogole, komu kwa kitando cha Mafariseo hawalongile, sukuwabagulwe muna ingʼanda ya Mulungu. 43Kilumbo wanogelwa na nhunizo za wanhu kubanza nhunizo za Mulungu.

44Na heyo Yesu kawakomhokela kalonga, “Heyo yonhogola niye, hanhogola niye niyeka, bali na Heyo Yangalile. 45Na heyo yondola niye, komulola Heyo Yangalile. 46Niye niza mulangaza wa mulumwengu, giladi munhu yoyose yonhogola, sekeyakale hadiziza. 47Na munhu yogahulika malonga gangu komu hagagoga, niye simtagusa, kilumbo sizile niutaguse ulumwengu, komu niukombole ulumwengu. 48Yondema niye na kugalema malonga gangu, kanayo wa kumtagusa: mbuli hiyo inongile, iyo yonda imtaguse siku ya ikimambukizo. 49Kilumbo niye silongile kwa giladi yangu mbe, bali Tata yangalile heyo mwenyecho kandagiza gonda niidandaye na kugalonga. 50Na niye nivimanya kamba ndagizo zake uwo ugima wa digunge; bali higo gonikidandaya niye, kamba Tata viyanongele, vivo vinilonga.”

Currently Selected:

Yohana 12: ZAM75

Highlight

Copy