Luka 8
8
Awe mɛ ndo ana Yezo ndoɔ ndoni kɔi
1So pɛni, Yezo agwe na ndo akota kɔdɔrɔ, nga na ndo akɛtɛ kɔdɔrɔ. Lo ĩ si kai ko, lo ha tɛnɛ tɛ Nzapa, lo pa nga Nzɔ̃ Pa ti lo Lɛngɔ Gbia tɛ Nzapa. Lo nɔ ndo ndoni kɔi na ava lo sui kɔi ndoni sɛ. 2Lo nɔ nga ndo na awe mɛ ndo lo toma asiɔ tɔrɔ na ya tɛrɛ la, lo sara nga ngã na tɛrɛ la. Ili awe ni ko lo mɛ: Maria (andoili lo ya, Maria wa Magadala), lo ndo la Yezo atoma asiɔ tɔrɔ mbara mbara na ya tɛrɛ lo, 3na Zani mɛ kɔ lo la Suza, Suza ni adu wa batangɔ kwa tɛ Erodɛ, na Suzani, nga na ambanga awe mɛ ndɛ̃ ma wo ma mɛ ndo amu aye tɛ la so zangɔ na Yezo na ava lo.
Matɔ tɛ wa kĩngɔ ale tɛ
(Mat. 13.1-9; Mar. 4.1-9)
4Azi ndolo ndo na ya kɔdɔrɔ kɔi kɔi so ndoga ka tɛ Yezo. Ngoi mɛ azi butu butu ĩ bombi tɛrɛ la ko, lo to matɔ hɛ̃ la ya: 5“Mbanga zo kɔi, anɔ ka yaka so kĩngɔ ale tɛ. Ngoi mɛ lo so ndokĩ ale tɛ ni ko, mbanga asa so bɛ lege. Azi adɔrɔ ni, ahũ adɛrɛ nga ni atɛ. 6Mbanga ale tɛ ni asa na ndo sese mɛ aalingbi tɛrɛ lo na tɛ́nɛ. Ngoi mɛ tɛ ni ĩ ko ko, angbã so ndo ko aulɛ, na lo mɛ ya, ta ngu na ya sese ni ma. 7Mbanga ale tɛ ni asa na ya sã ti kĩ. Sã ti kĩ na ale tɛ abombi amai ndoni kɔi, ko sã ti kĩ avĩ ale tɛ ni aho ni. 8Kanda mbanga ale tɛ mɛ ndɛ̃ asa ndo na nzɔ̃ sese. Ngoi mɛ ale tɛ ĩ ko, ĩ mai ko, ale nzɛngbɛ nzɛngbɛ.” Yezo ĩ tɛnɛ so we ko, lo pa na kɔngɔ ya: “Zo ko la ma lo adu da ko, ale lo ma!”
Nda mɛ Yezo ndotɛnɛ tɛnɛ na ya matɔ (Mat. 13.10-17; Mar. 4.10-12)
9Ava Yezo ahũnda lo na nda matɔ mɛ fɛrɛ lo to. 10Lo gbinya hɛ̃ la ya: “Na ndo tɛnɛ ko ti lo Lɛngɔ Gbia tɛ Nzapa ko, bo ĩ la Nzapa afa ĩ na lo mɛ ta azi ahĩnga ma. Kanda tɛ ambanga azi ko, andopa lo ni hɛ̃ la na ya matɔ ya,
Ala ba ndo, ko ta ala hũ ye kɔi ma.
Andopa ni na ya matɔ hɛ̃ la ya, ala ma ndo,
Ko ta ala hĩnga nda ni ma.”
Yezo atɔndɔ nda matɔ tɛ wa kĩngɔ ale tɛ
(Mat. 13.18-23; Mar. 4.13-20)
11“Ĩ ma nda matɔ ko fɛrɛ lo mɛ: ale tɛ adu nga ma tɛnɛ tɛ Nzapa. 12Ambanga azi adu nga ma bɛ lege mɛ ale tɛ asa da. Ngoi mɛ ala ma tɛnɛ tɛ Nzapa ko, Satana aga ahã tɛnɛ ni ka bɛ la azi. Satana ali so, so gbanzingɔ la ya, ta ala ye lo tɛ Nzapa ma, so ala so. 13Azi mɛ ndɛ̃ adu nga ma sese mɛ aalingbi tɛrɛ lo na tɛ́nɛ. Ngoi mɛ ala ma tɛnɛ tɛ Nzapa ko, ala ye lo ni na dengɔ bɛ. Kanda ta tɛnɛ ni ali bɛ la ma. Ala ye lo ni bo ti pɛ ngoi yakere, ko ala dɔ ni azia na ngoi ko la Satana atara na bɛ la. 14Ale tɛ mɛ asa na popo asã ti kĩ adu nga ma azi mɛ ama tɛnɛ tɛ Nzapa. Ko sɔngɔ bɛ, na luangɔ nwa, nga na dengɔ bɛ ti le sese apia aho tɛnɛ ni. Ta ala hɛ̃ nga nzɔ̃ ale ma. 15Ale tɛ mɛ asa na nzɔ̃ sese adu nga ma azi mɛ ama tɛnɛ tɛ Nzapa, ko ala bata ni ka ya bɛ la mɛ nzɔ̃ni buai. Ta ala dɔ tɛnɛ tɛ Nzapa azia ma, ala du azi mɛ ndohɛ̃ ale.”
Matɔ ti mɔinda
(Mar. 4.21-25)
16“Ta andozɔ mɔinda so kpãngɔ na gbe ta, bere so kpãngɔ na gbɛ tange ma. Kanda andozɔ ni ya akpa ni ndozu, wa azi mɛ ndoli da ahũ ndo yango. 17Ye zu ko la Nzapa ahɔndɛ ko, asi gbanda yango. Ye zu ko la na gbɛ mbingo ko, azi ahĩnga gbanda ni, ko asi nga gbanda yango ngbɛ̃.
18“Ale ĩ bata li ĩ na se ko la ĩ ndoma na tɛnɛ! Ta sanga ma, zo ko la adu na ye ko, Nzapa ahɛ̃ lo gbanda ye mɛ ndɛ̃ ndoni. Wa tɛ zo ko la na nyi ye ko, Nzapa amu gbanda nyi ye ni ko la lo ndoda bɛ lo ya, ni na ni.”
Ta Yezo na ayata Yezo
(Mat. 12.46-50; Mar. 3.31-35)
19Ta Yezo na ayata Yezo aga ata Yezo, ko na lo tɛ azi mɛ ndo so ndo ko butu butu ko, ta ala lengbi ndo ti singɔ ka tɔ̃nda lo ma. 20La azi apa hɛ̃ Yezo ya: “Ta mɔ na ayata mɔ la ka gegi, ala ye bangɔ mɔ.” 21Yezo apa hɛ̃ azi zu ya: “Ta mbi na ayata mbi la azi ko ndoma tɛnɛ tɛ Nzapa, ndotɔndɔ nga ni.”
Yezo agbanzi kpengba yá ka lɛ ngu
(Mat. 8.23-27; Mar. 4.35-41)
22Mbanga lá kɔi, Yezo na ava lo ako ya ngɔ, ko lo pa hɛ̃ la ya: “E fa ngu, é gwe ka mbage ni.” La ala ɔ. 23Ngoi mɛ ava lo so ndogbi ngɔ ko, Yezo ala tɛ lo langɔ. Bo ngoi kɔi ko, kpengba yá ato nda yangɔ so lɛ ngu. Ngu so ndosa ya ngɔ pua pua, ala ndo na ya kwa. 24Ava lo ai tɛrɛ la ka tɔ̃nda lo, andũ lo. Lo ĩ zingɔ ko, ala pa hɛ̃ lo ya: “Gbia, Gbia, e na kpilingɔ!”
Ko Yezo agbo ndo yá, agbo nga ndo kpengba mɔpo, la yá azia yangɔ, mɔpo adɔ alo, la lɛ ngu ade ngĩ. 25Yezo apa hɛ̃ ava lo ya: “Ta ĩ ye lo tɛ mbi ma ya nɛ?” Ko mbɛtɔ agbɔ̃ ndo la, ala bema sĩ, ko ala so ndotɛnɛ ka popo tɛ la ya: “Kɔli olo lo na? Abɛ nga yá na ngu, lo ĩ hɛ̃ nyɔ hɛ̃ la ko, ala ma nyɔ lo oo!”
Yezo atoma asiɔ tɔrɔ na ya tɛrɛ kɔli kɔi
(Mat. 8.28-34; Mar. 5.1-20)
26Ala nɔ ava ngɔ ka tɛ azi ti sese ti Gerasa mɛ na mbage kpo. Sese ti Gerasa na sese ti Galilea ndobangbi lɛ la. 27Ngoi mɛ Yezo alo ka ya ngɔ so ndoko ka gegi ko, mbanga kɔli kɔi ti kɔdɔrɔ ni ko aga, angoro lo. Kɔli ni ko ndo na asiɔ tɔrɔ na ya tɛrɛ lo. Ato ndo gã ko, ta lo ndoyu bɔngɔ ma, ta lo ndola nga ya da ma, lo ndodu tɛ lo na ndo asɛndɛ. 28Ngoi mɛ lo ĩ hũ Yezo ko, lo dɛ kɔngɔ, lo kuku gbɛlɛ lo, lo tɛnɛ tɛnɛ na kɔngɔ ya: “Yezo, Nyi Nzapa mɛ ka yayu, ye mɛ mɔ ye lingɔ na mbi nɛ? Mbi gbɔ̃ gɛrɛ mɔ, ta mɔ gia mbi ma!” 29Lo tɛnɛ so, na lo mɛ ya, Yezo ahɛ̃ nyɔ hɛ̃ asiɔ tɔrɔ mɛ na ya tɛrɛ lo ya, ala si. (Asiɔ tɔrɔ ni ko ndosa ndo tɛrɛ lo fani sĩni. Andogbele ndo ti lo na gɛrɛ lo na ngo nwa so batangɔ lo, ko lo ndofara ndo ni lo zi. Ko asiɔ tɔrɔ ni ndomu ndo lo, agwe na lo ka bɛ ndo.)
30Yezo ahũnda lo ya: “Ili mɔ na?” Lo gbinya hɛ̃ Yezo ya: “Ili mbi la ‘Ngbunguma.’ ” Lo tɛnɛ ndo so, na lo mɛ ya, asiɔ tɔrɔ ma wo ma ali ndo ya tɛrɛ lo. 31Asiɔ tɔrɔ ko avɔrɔ ndo tɛrɛ la hɛ̃ Yezo ya, ta lo to ani ka lifɛlo ma.
32So ndo ko nɛ ko, akɔsɔ ma wo ma so ndotɛ ndo na tɛrɛ hɔtɔ. Ko asiɔ tɔrɔ ko avɔrɔ tɛrɛ la hɛ̃ Yezo ya, lo hɛ̃ ani lege, ko ani nɔ, ani li na ya tɛrɛ akɔsɔ ni ko. La Yezo ahɛ̃ la lege. 33La asiɔ tɔrɔ ko alo ka tɛrɛ kɔli ko asi, anɔ ali na ya tɛrɛ akɔsɔ. Akɔsɔ ko zu alo ka bɛ li hɔtɔ, akpɛlɛ agwe asa ka ya ngu, akpili.
34Ngoi mɛ awa batangɔ akɔsɔ ĩ hũ lo mɛ asi ko, ala yɔ kpɛ, agwe apa pa ni hɛ̃ azi mɛ ka kɔdɔrɔ, apa nga hɛ̃ ala mɛ ndola ka gbɛ yaka. 35La azi anɔ so bangɔ lo mɛ fɛrɛ asi. Ala ĩ si so tɔ̃nda Yezo ko, ala hũ kɔli mɛ fɛrɛ asiɔ tɔrɔ alo ya tɛrɛ lo asi, lo du so tɔ̃nda Yezo na bɔngɔ tɛrɛ lo, kɔdɛ tɛ lo ati nga nzɔ̃ni. Azi ko ĩ hũ so ko, mbɛtɔ agbɔ̃ la. 36Ko azi mɛ ndo ahũ aye ni ko zu na lɛ la, akambisa hɛ̃ afɔ̃ la mɛ aga gesi, se mɛ fɛrɛ asiɔ tɔrɔ alo na ya tɛrɛ kɔli ko asi na ni. 37Azi ti sese ti Gerasa zu ĩ hũ so ko, ala pa hɛ̃ Yezo ya, lo lo so sese tɛ ani lo ɔ, ta sanga ma, mbɛtɔ agbɔ̃ ndo la sĩ. Ko Yezo ako ya ngɔ, ya ni gwe, 38la kɔli ko fɛrɛ asiɔ tɔrɔ asi na ya tɛrɛ lo, avɔrɔ tɛrɛ lo hɛ̃ Yezo ya, ni na lo ani ngbã ndoni kɔi. Ko Yezo akɛ̃, apa hɛ̃ lo ya: 39“Diri ka tɛ mɔ, ko mɔ pa hɛ̃ azi lo zu mɛ Nzapa ali tɛrɛ mɔ.” La kɔli ko agwe, apa ló zu mɛ fɛrɛ Yezo ali tɛrɛ lo hɛ̃ azi zu mɛ ka kɔdɔrɔ.
Yezo asara nyi Yairo nga na wali mɛ na nga ti niɛnɛ
(Mat. 9.18-26; Mar. 5.21-43)
40Ngoi mɛ Yezo ĩ lo ka mbage kpo ĩ diri ko, azi butu butu anɔ ayamba lo, ta sanga ma, azi zu ndoku ndo lo. 41La mbanga kɔli kɔi mɛ gbia ti ya da sambela tɛ Ayuda aga, ili lo la Yairo. Lo kuku gbɛlɛ Yezo, lo gbɔ̃ gɛrɛ lo sĩ nvɛni ya, lo ga ka tɛ ni. 42Lo gbɔ̃ ndo gɛrɛ lo, na lo mɛ ya, lo ndo na ngbongi nyi lo ti wali mɛ na buru nga ma ge tɛ sui kɔi ndoni sɛ. Ko ngbongi nyi lo ni ndoili ndo bɛ lo. La Yezo aye, anɔ ka tɛ lo.
Ngoi mɛ Yezo so ndogwe ka tɛ Yairo ko, azi butu butu afɔ̃fɔ̃ lo mbage na mbage. 43Mbanga zo wali kɔi ndo so ndo ko, lo ndo na nga ti mɛnɛ, ko mɛnɛ ni ndosa ndo lo. Lo la ndo na ngã ti mɛnɛ ni so tɛrɛ lo buru sui kɔi ndoni sɛ. Lo gbɛ̃ ndo faranga tɛ lo zu hɛ̃ amɔnganga, ya ala sara ni, ko ala ha ndo sarangɔ lo gba. 44Lo ga ti pɛko Yezo, lo i tɛrɛ lo ka tɔ̃nda lo. Lo bɔrɔ nyɔ bɔngɔ tɛ lo. Lo ĩ bɔrɔ nyɔ bɔngɔ tɛ lo ko, mɛnɛ tɛ lo afa bo na ngoi ni ko. 45Ko Yezo ahũnda azi ya: “Zo mɛ abɔrɔ mbi na?” Azi zu akɛ̃ ya, ta ani bɔrɔ lo ma. La Petro apa hɛ̃ lo ya: “Wa hangɔ lo tɛ Nzapa, azi butu butu aka mɔ kɛrɛrɛ, la ala ndofɔ̃fɔ̃ mɔ mbage na mbage!” 46Yezo agbinya hɛ̃ lo ya: “Mbanga zo kɔi abɔrɔ mbi, ta sanga ma, mbi ma ge gbɛ tɛrɛ mbi ya, mbanga nguru tɛ mbi asi.” 47Zo wali ko ĩ hũ ya, Yezo agbɔ̃ nda ni wɛ ko, lo ga ka gbɛlɛ Yezo, tɛrɛ lo so ndodɔ kpu kpu kpu, lo kuku. Lo kambisa hɛ̃ Yezo na gbɛlɛ azi zu nda mɛ lo bɔrɔ na Yezo, nga na se mɛ tɛrɛ lo aha bo so hiɔ. 48Yezo apa hɛ̃ wali ko ya: “Nyi mbi, mɔ ye lo tɛ mbi la mɔ so. Wa gwe nzɔ̃ni o.”
49Kanda na ngoi ko Yezo ade na tɛnɛngɔ tɛnɛ ko, mbanga zo kɔi alo ka tɛ gbia Yairo aga, apa hɛ̃ Yairo ya: “Nyi mɔ akpi wɛ, zia giangɔ bɛ wa hangɔ lo tɛ Nzapa.” 50Yezo ĩ ma tɛnɛ ko kɔli ko atɛnɛ ko, lo pa hɛ̃ Yairo ya: “Ta mbɛtɔ agbɔ̃ mɔ ma. Ye bo lo tɛ mbi, nyi mɔ na songɔ.” 51Ngoi mɛ Yezo ĩ si ka tɛ Yairo ko, lo kɛ̃ ya, ta ni na zo kɔi ani li ka ya da ma, wenge bo Petro na Yoanɛ, na Zaki, na to nyingambi nga na ta lo. 52Azi zu ndoto ndo to, ndodema nga ndo so nyingambi ni. La Yezo apa hɛ̃ la ya: “Ĩ zia tongɔ to. Ta lo kpi ma, lo la langɔ.” 53Azi ĩ ma so ko, ala sa na ngia gua, ae Yezo, ta sanga ma, ala hĩnga ndo ya, nyingambi ni akpi biani. 54La Yezo agbɔ̃ ti nyingambi ni, atɛnɛ tɛnɛ hɛ̃ lo na kɔngɔ ya: “Nyi mɛ, lo ndozu!” 55Tɔrɔ tɛrɛ nyingambi ni adiri ati da, la lo lo ndozu bo na ngoi ni ko. Yezo ahɛ̃ nyɔ hɛ̃ azi ko ya, ahɛ̃ lo ye lo tɛ. 56Awa dúngɔ nyingambi abema sĩ. Ko Yezo ahɛ̃ ndo nyɔ hɛ̃ Ia ya, ta ala pa lo ni hɛ̃ zo kɔi ma.
Currently Selected:
Luka 8: NGB87
Highlight
Share
Copy
Want to have your highlights saved across all your devices? Sign up or sign in
Ngbandi New Testament © United Bible Societies, 1987.
