Luka 7

Yezo asara wa kwa tɛ mbanga gbia tɛ aturugu ti Roma

(Mat. 8.5-13)

1Ngoi mɛ Yezo ĩ pa tɛnɛ ko zu hɛ̃ azi wɛ ko, lo hã nɔ lo gwe ka Kapɛrnaumɛ. 2Mbanga gbia tɛ aturugu ti Roma ndodu ndo ka Kapɛrnaumɛ, lo ndo na wa kwa tɛ lo kɔi mɛ lo ye lo ma wo ma. Tɛrɛ wa kwa ni ko ndosɔ ndo, ko lo ndoili ndo bɛ lo. 3Ngoi mɛ gbia ko ĩ ma pa tɛ Yezo ko, lo mu ambanga akangba tɛ Ayuda, lo to la ka tɛ Yezo ya, ala nɔ apa hɛ̃ lo ya, se lo ye ko, lo ga, lo sara wa kwa tɛ ni. 4Akangba ko anɔ, asi ka tɛ Yezo, alamana tɛrɛ la hɛ̃ lo sĩ ya: “Kɔli ko adu zo mɛ lengbi ti mɔ zangɔ lo. 5Lo ye azi ti ale tɛ e sĩ, lo hɛ̃ faranga, la awa na da sambela ge tɛ e.” 6Yezo aye, la lo na akangba ko agwe lege kɔi.

Ala ĩ doli na da tɛ gbia tɛ aturugu ko, gbia ni amu afɔ̃ lo, ato la ya, ala nɔ, apa hɛ̃ Yezo ya: “Wa hangɔ lo tɛ Nzapa, ta mɔ gia tɛrɛ mɔ sanga sanga ma, na lo mɛ ya, ta mbi lengbi ti mɔ lingɔ ge ya da tɛ mbi ma. 7Nda mɛ fɛrɛ mbi hũ ya, ta mbi nvɛni mbi nɔ ka tɛ mɔ ma la. Kanda tɛnɛ bo tɛnɛ ti nyɔ mɔ, wa tɛrɛ wa kwa tɛ mbi ahã. 8Agbia mɛ aɔ mbi da, kanda aturugu mɛ mbi ɔ nga la da. Wa se mbi pa hɛ̃ kɔi ya: ‘Nɔ’ ko, lo nɔ, bere se mbi pa hɛ̃ mbanga ya: ‘Ga’ ko, lo ga. Ko se mbi pa nga hɛ̃ wa kwa tɛ mbi ya: ‘Li ye olo’ ko, lo li ni.” 9Yezo ĩ ma kwa mɛ gbia ko ato hɛ̃ lo ko, lo bema. La lo sana tɛrɛ lo ka tɛ azi butu butu mɛ fɛrɛ aga pɛko lo, lo pa hɛ̃ la ya: “Mbi pa hɛ̃ ĩ ya, ta mbi dɛ mbi hũ zo aye lo tɛ mbi, nga ma tɛ kɔli olo bɛ gbɔ ma. Bɛ nga ka sese ti Izrayɛlɛ ko, ta mbi hũ zo gi tɛrɛ olo da ma.” 10Azi mɛ fɛrɛ ato la ka tɛ Yezo ĩ diri ka ya da tɛ gbia tɛ aturugu ko, ala tã tɛrɛ wa kwa ko ahã wee!

Yezo aso ngbongi nyi we muã mɛ akpi

11Ĩ la bu nda ĩ de ko, Yezo ahã nɔ, agwe ka mbanga kɔdɔrɔ mɛ ili ni la Nainɛ. Lo na ava lo, nga na azi butu butu anɔ ndo ndoni kɔi. 12Ngoi mɛ Yezo ĩ doli na nyɔ gbágbá mɛ aka kɔdɔrɔ kɛrɛrɛ ko, lo hũ azi so ndogwe na kinda ka ndo sende. Adu ndo kinda tɛ ngbongi nyi we muã, ko ngbongi nyi ni ndo kɔli. Awa kɔdɔrɔ ma wo ma ndo so tɔ̃nda we muã ko. 13Ngoi mɛ Gbia Yezo ĩ hũ we muã ko ko, ama vundu tɛ lo, apa hɛ̃ lo ya: “Zia to!” 14Ko Yezo ai tɛrɛ lo, abɔrɔ sandugu ti kwá, ko awa yɔngɔ ni adɔ alonga. La Yezo anɛ ya: “Nyi kɔli, mbi pa hɛ̃ mɔ ya, mɔ lo ndozu!” 15La nyi kɔli mɛ wa kwáni alo, adu na nda lo, ato nda tɛnɛngɔ tɛnɛ. Yezo amu lo ahɛ̃ ta lo. 16Mbɛtɔ agbɔ̃ azi zu, ko ala ndogonda ndo Nzapa ya: “Mbanga kota wa pangɔ nyɔ Nzapa asi ge tɛ e!” Ala ndopa nga ndo ya: “Nzapa aga so zangɔ e azi tɛ lo!” 17Ko azi ti sese ti Yudea kwɛ zu, na azi ti sese mɛ so tɔ̃ Yudea ama ndo pa ti ye mɛ Yezo ali.

Yoanɛ ato ava lo na kwa ka tɛ Yezo

(Mat. 11.2-19)

18Ava Yoanɛ akambisa hɛ̃ Yoanɛ ye zu mɛ Gbia Yezo ali. Yoanɛ aili azi sɛ so popo tɛ ava lo, 19ato la ka tɛ Yezo ya, ala hũnda lo ya: “Mɔ du zo mɛ ndo e ma ya lo na gangɔ, bere e ku zo mɛ ndɛ̃?” 20Ngoi mɛ ala ĩ si ka tɛ Yezo ko, ala pa hɛ̃ lo ya: “Yoanɛ wa hɛ̃ngɔ batisimɔ ato e ya, e hũnda mɔ ya: ‘Mɔ zo mɛ ndo e ma ya lo na gangɔ, bere e ku zo mɛ ndɛ̃?’ ” 21Bo na ngoi ni ko ndo ko, Yezo asara azi gba mɛ na ngã tɛrɛ la, lo sara awa zɛ̃, lo toma asiɔ tɔrɔ na ya tɛrɛ azi. Lo sara nga lɛ awa ziba ma wo ma. 22So pɛni, lo gbinya tɛne hɛ̃ azi mɛ Yoanɛ ato la ka tɛ lo ya: “Ĩ diri ĩ gwe, ĩ kambisa hɛ̃ Yoanɛ alo mɛ ĩ hũ na lɛ ĩ, nga na omɛ mɛ ĩ ma na ma ĩ. Ĩ hũ awa ziba ahũ ndo yango, awa zɛ̃ adɔ nɔ na Seni, tɛrɛ awa ndiba ati nzɔ̃ni, awa kpua ama ndo ngere ngere, awa kwáni aso. Ĩ ma andopa Nzɔ̃ Pa hɛ̃ awa yɛlɛ. 23Dengɔ bɛ ati na zo ko la ta zia gbanda yengɔ lo tɛ mbi ma.”

24Ngoi mɛ azi mɛ Yoanɛ ato la ka tɛ Yezo ĩ diri ĩ gwe ko, Yezo ato nda pangɔ lo tɛ Yoanɛ hɛ̃ azi butu butu ya: “Zo mɛ ĩ nɔ ka bɛ ndo ĩ hũ lo na? Zo mɛ ĩ hũ lo ko, lo nga ma sã mɛ ya ndoyingi ni? Ipɔ! 25Wa zo mɛ ĩ nɔ kai ĩ hũ lo na? Ĩ nɔ, ĩ hũ kɔli mɛ ayu abɔngɔ ti kota ngere? Ipɔ! Awa yungɔ abɔngɔ ti kota ngere, na azi ko la nwa ako ndo la ndodu tɛ la ka ya ngbo tɛ agbia. 26Wa zo mɛ ĩ nɔ kai ĩ hũ lo na? Ĩ nɔ, ĩ hũ wa pangɔ nyɔ Nzapa? Biani, mbi pa hɛ̃ ĩ ya, zo ko la ĩ nɔ ĩ hũ lo ko, abɛ nga awa pangɔ nyɔ Nzapa ko, lo ɔ la. 27Ta sanga ma, Yoanɛ adu zo mɛ Buku tɛ Nzapa ndopa lo tɛ lo ya, Nzapa apa ya:

‘Ba, mbi to wa pangɔ kwa tɛ mbi uzu tɛ mɔ ya, Lo lɛkɛ lege hɛ̃ mɔ, mɔ ɔ da.’ ”

28La Yezo apa nga ya: “Mbi pa hɛ̃ ĩ ya, na popo tɛ azi mɛ adu la so lɛ sese olo ko, ta zo mɛ aɔ Yoanɛ bɛ gbɔ da ma. Kanda zo mɛ yakere buai ka Kɔdɔrɔ Gbia tɛ Nzapa ko, zo mɛ aɔ Yoanɛ la.”

29Azi zu, na awa sɔrɔngɔ lapo ndoma ndo tɛnɛ mɛ Yezo atɛnɛ. Ala hĩnga ndo ya, Nzapa ndoli ye na seni, la ala nɔ ka tɛ Yoanɛ amu batisimɔ. 30Kanda Afarizeo na awa hangɔ ndia akɛ̃ ndo ye mɛ Nzapa asepara lingɔ hɛ̃ la, ko ala kɛ̃ ndo ya, ta Yoanɛ ahɛ̃ ani batisimɔ ma.

31Yezo apa nga ya: “Mbi lengbi ti hangɔ azi ti ngoi olo na ana? Azi ti ngoi olo akpa ana? 32Ala kpa nga ma ayangambi mɛ adunga so lɛ kɔdɔrɔ, la ambanga ndoili afɔ̃ la, apa hɛ̃ la ya: ‘E de ngɔ hɛ̃ ĩ ya, ĩ dɔ dɔ, ko ta ĩ dɔ dɔ ma! E ye bia ti vundu hɛ̃ ĩ ya, ĩ to to, ko ta ĩ to to ma!’ 33Ta sanga ma, Yoanɛ wa hɛ̃ngɔ batisimɔ aga ndo, akɛ̃ tɛngɔ bɛta tɛ, akɛ̃ nga nyɔngɔ vinɔ, ko ĩ pa ndo ya: ‘Lo na siɔ tɔrɔ ya tɛrɛ lo!’ 34Wa na olo ko, mbi Nyi Zo mbi ga, mbi ndotɛ bɛta tɛ, mbi ndonyɔ nga vinɔ, ko ĩ nɛ ya: ‘Ĩ ba kɔli olo, kwa tɛ lo bo la tɛngɔ tɛ na nyɔngɔ vinɔ. Tɛ lo afɔ̃ lo la awa sɔrɔngɔ lapo na awa lingɔ siɔ ye!’ 35Kanda azi zu mɛ ahĩnga ndara tɛ Nzapa la ndohĩnga ya, ndara tɛ lo adu bɛta ndara.”

Yezo atɛ ye ka ya da tɛ Simɔ

36Mbanga Farizeo kɔi aili Yezo ya, lo ga ka tɛ ni lo tɛ ye. Ili Farizeo ni ko la Simɔ. La Yezo anɔ, adu tise ya, ni tɛ ye. 37Mbanga wali kɔi nga ndo so ya kɔdɔrɔ ni ko, lo wa lingɔ siɔ ye. Lo ĩ ma ya, Yezo ndotɛ ye ka tɛ Farizeo ko, lo mu mbenda mɛ yɔmbɔ asĩ da, lo nɔ na ni kai. Alɛkɛ ndo mbenda ni na tɛ̃ne mɛ ili ni la albatrɛ. 38Wali ko ĩ si kai ko, adɔ alo so pɛko Yezo, na gu gɛrɛ lo. Lo to to, lo hĩni gɛrɛ Yezo na ngulɛ ti lɛ lo. So pɛni, lo mbo gɛrɛ Yezo na kwa li lo, lo bɔmbɔ gɛrɛ Yezo, lo kĩkĩ yɔmbɔ ndo ni. 39Farizeo mɛ fɛrɛ aili Yezo ĩ hũ so ko, atɛnɛ ka ya bɛ lo ya: “Se kɔli olo adu wa pangɔ nyɔ Nzapa biani ko, ale lo hĩnga ya, wali mɛ abɔrɔ tɛrɛ ni ko, lo wa lingɔ siɔ ye.” 40La Yezo apa hɛ̃ Farizeo ko ya: “Simɔ, mbi na tɛnɛ ti tɛnɛngɔ hɛ̃ mɔ.” Simɔ agbinya hɛ̃ lo ya: “Wa hangɔ lo tɛ Nzapa, tɛnɛ ni nɛ?” 41La Yezo apa hɛ̃ lo ya: “Kɔli kɔi azɛ̃ ndo azi sɛ na faranga. Lo zɛ̃ zo ti kɔi na faranga ngbangbo kɔ̃, lo zɛ̃ zo ti se na faranga sui kɔ̃. 42Nvɛ̃ faranga ĩ hũ ya, ta ala na faranga ti tiɔngɔ na sende tɛ ni mɛ ka li la ma ko, lo dɔ faranga ni, lo zia ka li la zu se. Wa mbi hũnda mɔ, na popo tɛ awa sende ko sɛ ko, zo mɛ bɛ lo na yengɔ nvɛ̃ faranga gba na?” 43Simɔ agbinya hɛ̃ lo ya: “Mbi da bɛ mbi ya, adu zo mɛ nvɛ̃ faranga azia faranga gba ka li lo.” Yezo apa hɛ̃ lo ya: “Seni la nyɔ mɔ.” 44So pɛni, Yezo asana tɛrɛ lo ka tɛ wali ko, apa hɛ̃ Simɔ ya: “Mɔ hũ wali olo mɛ? Mbi ga fɛrɛ ge ya da tɛ mɔ, ko ta mɔ hɛ̃ mbi ngu ya, mbi kpo na gɛrɛ mbi ma. Ko lo kpo gɛrɛ mbi na ngulɛ ti lɛ lo, lo mbo ni na kwa li lo. 45Ngoi mɛ fɛrɛ mɔ yamba mbi ko, ta mɔ bɔmbɔ mbi ma. Ko gã mɛ fɛrɛ mbi li so ya da olo ko, ta wali olo anzɛ̃ na bɔmbɔngɔ gɛrɛ mbi ma. 46Ta mɔ sa yɔmbɔ li mbi ma, kanda lo sa nzɔ̃ yɔmbɔ na ndo gɛrɛ mbi. 47Nda mɛ mbi pa hɛ̃ mɔ ya, kota yengɔ mɛ lo ye na mbi ko, afa ya, Nzapa aka lɛ lo ndo asiɔ ye ma wo ma mɛ lo li. Kanda zo ko la Nzapa aka lɛ lo ndo asiɔ ye yakere mɛ lo li ko, yengɔ mɛ lo ye na Nzapa adu yakere.” 48So pɛni, Yezo apa hɛ̃ wali ko ya: “Nzapa aka lɛ lo ndo asiɔ ye tɛ mɔ.” 49Azi mɛ ndo ana lo ndotɛ ye so ndotɛnɛ ka bɛ la ya: “Zo olo, abɛ nga asiɔ ye ko, lo ndoka lɛ lo ndo ni ko, lo na?” 50La Yezo apa hɛ̃ wali ko ya: “Mɔ ye lo tɛ mbi la mɔ so. Wa gwe nzɔ̃ni oo!”

Currently Selected:

Luka 7: NGB87

Highlight

Copy