Luka 6
6
Yezo aba azi na nda lá ti wɔngɔ tɛrɛ
(Mat. 12.1-8; Mar. 2.23-28)
1Ĩ ti na mbanga lá ti wɔngɔ tɛrɛ ko, Yezo na ava lo so ndofangbi lɛ yaka ti le tɛ mɛ ili ni la ble. Ava lo akɔrɔ le ble ni, atina na yamba ti la, atɛ. 2Ambanga Afarizeo ĩ hũ so ko, ala hũnda ava Yezo ya: “Nda mɛ ĩ ndoli ye mɛ ndia tɛ e akɛ̃ ya, ta zo ali na lá ti wɔngɔ tɛrɛ ma nɛ?” 3Ko Yezo agbinya hɛ̃ la ya: “Mbi hĩnga nzɔ̃ni ya, ĩ di mbɛti ti ye mɛ ndo Davidi ali, na ngoi mɛ ndo gwɛ̃ agbɔ̃ lo nvɛni, agbɔ̃ nga azi tɛ lo. 4Alu ndo ndia ya, bo awa lungɔ Nzapa na ye la alengbi ti tɛngɔ mapa mɛ alu na Nzapa. Abɛ nga so ko, Davidi ali ndo ka ya da Nzapa, alɔ mapa mɛ alu na Nzapa, atɛ. Lo hɛ̃ nga ndo mbanga hɛ̃ azi tɛ lo, ala tɛ.” 5La Yezo apa nga hɛ̃ la ya: “Mbi Nyi Zo mbi Gbia ti ndo lá ti wɔngɔ tɛrɛ.”
Kɔli mɛ ti lo azĩ
(Mat. 12.9-14; Mar. 3.1-6)
6Ĩ ti na lá ti wɔngɔ tɛrɛ mɛ ndɛ̃ ko, Yezo ali ya da sambela tɛ Ayuda, ato nda hangɔ azi na tɛnɛ tɛ Nzapa. Mbanga kɔli kɔi mɛ ti lo ti kɔti azɛ̃ nga ndo so ya da sambela ni ko. 7Awa hangɔ ndia na Afarizeo so ndoba Yezo toka toka ya, lo ka na sarangɔ zo na lá ti wɔngɔ tɛrɛ. Ta sanga ma, ala ndogi ndo kɔdɛ ya, ani lua lo na ló, wa ani vɔ̃ to tɛrɛ lo ya, lo li siɔni. 8Kanda Yezo ahĩnga ndo dangɔ bɛ tɛ la. La lo pa hɛ̃ kɔli ko ti lo azɛ̃ ya: “Dɔ mɔ lo na gbɛlɛ azi zu.” Kɔli ko adɔ alo na gbɛlɛ azi. 9La Yezo ahũnda la ya: “Mbi hũnda ĩ, ye mɛ ndia tɛ e ahɛ̃ e lege ya, e li nɛ? Ndia tɛ e ahɛ̃ e lege ya, e li nzɔ̃ ye na lá ti wɔngɔ tɛrɛ, bere e li siɔ ye? E sara zo, bere e zia lo lo kpi?” 10Lo ba lɛ la zu, so pɛni lo pa hɛ̃ kɔli ko ya: “Ye ti mɔ.” Kɔli ko ĩ ye ti lo ko, ti lo ati nzɔ̃ni. 11Ngɔnzɔ agbɔ̃ ambanga azi sĩ, ko ala to nda bimbingɔ tɛnɛ na popo tɛ la, na lo ye mɛ ala lengbi ti lingɔ na Yezo.
Awa pangɔ kwa sui kɔi ndoni sɛ mɛ Yezo asara akpa
(Mat. 10.1-4; Mar. 3.13-19)
12Na ngoi ko ndo ko, Yezo ama ka ndo hɔtɔ so sambelangɔ, ko lo mu bi ni ko zu lo sambela na Nzapa. 13Ngoi mɛ nda ĩ de ko, lo ili ava lo, ko lo sara azi sui kɔi ndoni sɛ so popo tɛ la, lo kpã la awa pangɔ kwa tɛ lo. 14Ili la lo mɛ: Simɔ (mɛ Yezo ahɛ̃ lo ili mɛ ndɛ̃ ya Petro), na Andre mɛ nyita Simɔ, na Zaki, na Yoanɛ, na Filipo, na Bartelemi, 15na Matie, na Toma, na Zaki mɛ nyi Alafe, na Simɔ mɛ andoili lo ya wa gingɔ lipandasi, 16na Yudasi mɛ nyi Zaki, nga na Yudasi Iskariɔtɛ mɛ ndo ati wa tɛngɔ gbe kuni Yezo.
Yezo asara awa nga
(Mat. 4.23-25)
17Yezo na ava lo alo ka ndo hɔtɔ azu. Ala ĩ si na sese mɛ kpa kpa kpa ko, ala dɔ alonga. Ava lo mɛ ndɛ̃ ma wo ma ndo so ndo ni ko. Azi butu butu aga nga ndo so ndo ko. Ala lo ka sese ti Yudea zu, ti Yeruzalɛmɛ, nga ka kɔdɔrɔ ti Tirɛ na ti Sidona mɛ ndodu na nyɔ ngu. 18Ala ga ndo ya, ani ma tɛnɛ mɛ Yezo ndotɛnɛ, ko lo sara nga ngã tɛ ani. Yezo asara nga ndo azi mɛ asiɔ tɔrɔ ndogia la. 19Azi zu ndogi ndo kɔdɛ ya, ani bɔrɔ tɛrɛ lo, ta sanga ma, mbanga nguru ndolo ndo ka ya tɛrɛ lo asi ko, asara la zu.
Nzɔ̃ lo na siɔ lo
(Mat. 5.1-12)
20La Yezo aba ava lo, apa hɛ̃ la ya:
“Dengɔ bɛ ati na ĩ awa yɛlɛ,
Ta sanga ma, Kɔdɔrɔ Gbia tɛ Nzapa adu kɔdɔrɔ tɛ ĩ!
21Dengɔ bɛ ati na ĩ azi mɛ na gwɛ̃ na olo mɛ,
Ta sanga ma, ĩ lua gbanda tɛ ti tɛngɔ ma wo ma!
Dengɔ bɛ ati na ĩ azi mɛ ĩ ndoto to na olo mɛ,
Ta sanga ma, ĩ e gbanda ngia!
22“Dengɔ bɛ ati na ĩ, se bɛ azi akɛ̃ ĩ ka ka ka, se ala toma ĩ, aguru ĩ, asamana na ĩ na lo tɛ mbi Nyi Zo ya, ĩ du asiɔ azi! 23Ngoi mɛ se azi ali aye ni ko na tɛrɛ ĩ, ĩ saba, ko ĩ separa nga kela kela, ta sanga ma, kota mbana gɛrɛ ĩ ndoku ĩ ka yayu. Se mɛ ndo akotara la agia nga na awa pangɔ nyɔ Nzapa la.
24“Kanda siɔ lo ati na ĩ awa nwa,
Ta sanga ma, nzɔ̃ lo ati na ĩ wɛ!
25“Siɔ lo ati na ĩ azi mɛ ĩ na tɛ ma wo ma na olo mɛ,
Ta sanga ma, gwɛ̃ agbɔ̃ ĩ gbanda!
“Siɔ lo ati na ĩ azi mɛ ĩ ndoe ngia na olo mɛ,
Ta sanga ma, ĩ ti gbanda awa vundu, ĩ to nga gbanda to!
26“Siɔ lo ati na ĩ, se azi zu agonda ĩ, ta sanga ma, se mɛ ndo akotara la ndogonda nga na awa nvɛnɛ mɛ ndonɛ ya, ani awa pangɔ nyɔ Nzapa la!”
Ale ĩ ndoye awa kɛngɔ ĩ
(Mat. 5.38-48; 7.12a)
27“Kanda mbi pa hɛ̃ ĩ azi mɛ ĩ ndoma mbi ya, ĩ ye awa kɛ̃ngɔ ĩ, í li nzɔ̃ lo tɛrɛ azi ko la bɛ la akɛ̃ ĩ. 28Ĩ sunu azi ko la ndoye ya, siɔ lo ati na ĩ. Ĩ sambela na lo tɛ azi ko la ndohɛ̃ ĩ pɛnɔ. 29Se zo aba ma mɔ ko, ye mbage ni hɛ̃ lo, lo ba nga. Se zo akpata kota bɔngɔ tɛ mɔ ko, zia lo mu nga ndozu bɔngɔ tɛ mɔ. 30Zo ko ayɔ ye ti mɔ ko, hɛ̃ ni hɛ̃ lo, ko se zo akpata ye tɛ mɔ na ti mɔ ko, zia ni hɛ̃ lo. 31Ye mɛ ĩ ndoye ya, azi ndoli tɛrɛ ĩ ko, ĩ li nga bo gi tɛrɛ ye ni ko na tɛrɛ la.
32“Se bɛ ĩ aye bo azi ko la bɛ la aye ĩ ko, ta ĩ kpa bɛ ĩ ya, Nzapa na hɛ̃ngɔ ĩ mbana gɛrɛ ĩ ma. Se mɛ nga awa lingɔ siɔ ye ndoye bo na azi mɛ ndoye la la. 33Se ĩ li nzɔ̃ lo bo na tɛrɛ azi ko la ndoli nzɔ̃ lo tɛrɛ ĩ ko, ta ĩ kpa bɛ ĩ ya, Nzapa na hɛ̃ngɔ ĩ mbana gɛrɛ ĩ ma. Se mɛ nga awa lingɔ siɔ ye ndoli nzɔ̃ lo na tɛrɛ afɔ̃ la la. 34Se ĩ zɛ̃ faranga bo na azi ko la ĩ ndolɛndɛrɛ ya, ala na tiɔngɔ sende ni ko, ta ĩ kpã bɛ ĩ ya, Nzapa na hɛ̃ngɔ ĩ mbana gɛrɛ ĩ ma. Awa lingɔ siɔ ye ndozɛ̃ nga faranga bo na afɔ̃ la awa lingɔ siɔ ye ya, ala diri bo na faranga mɛ ala zɛ̃. 35Kanda ale ĩ ndoye awa kɛ̃ngɔ ĩ, ĩ ndoli nzɔ̃ lo tɛrɛ la, ĩ ndozɛ̃ nga la na faranga, wa ta ĩ lɛndɛrɛ ya, ala diri na ni hɛ̃ ĩ ma. Ĩ lua gbanda kota mbana gɛrɛ ĩ, ko ĩ ti nga gbanda aya Nzapa mɛ ka yayu. Ta sanga ma, lo ndoli nzɔ̃ bɛ hɛ̃ azi ko la ta ahĩnga nzɔ̃ lo mɛ andoli tɛrɛ la ma, lo ndoli nga nzɔ̃ bɛ hɛ̃ asiɔ azi. 36Ale ĩ ndoma vundu tɛ azi nga ma se tɛ To ĩ Nzapa.”
Ta ĩ fa ngbanga tɛ afɔ̃ ĩ ma
(Mat. 7.1-5)
37“Ta ĩ fa ngbanga tɛ afɔ̃ ĩ ma, so Nzapa afa ngbanga tɛ ĩ. Ta ĩ fa ngbanga ĩ bi li afɔ̃ ĩ ma, so Nzapa afa nga ngbanga abi li ĩ. Ale ĩ ka lɛ ĩ ndo asiɔ ye tɛ afɔ̃ ĩ, wadila Nzapa aka nga lɛ lo ndo asiɔ ye tɛ ĩ. 38Ale ĩ hɛ̃ ye hɛ̃ afɔ̃ ĩ, wadila Nzapa ahɛ̃ nga ye hɛ̃ ĩ, asa aye ma wo ma nvɛni na ya bozo tɛ ĩ, ayingi ni afɔ̃ngbi ka ka ka, asĩ nga soro soro. Ko ye mɛ lo na hɛ̃ngɔ ĩ ko, lo na hangɔ na ye mɛ ndo ĩ ndohɛ̃ afɔ̃ ĩ.”
39Yezo ato matɔ hɛ̃ la ya: “Ta wa ziba alengbi ti gbɔ̃ngɔ ti fɔ̃ lo wa ziba, anɔ lo na nɔ ma. Se lo li so ko, ala zu sɛ asa ya du. 40Ta wa nrandangɔ ye ndoɔ wa hangɔ lo na ye ma. Kanda wa mandangɔ ye ko la ahĩnga ye mɛ aha na lo zu ko, lo ti wa kɔdɛ nga ma wa hangɔ lo na ye. 41“Mɔ ndoba bo nyi sã pele mɛ ati lɛ nyita mɔ, wa ta mɔ ndohũ ponzo kɛkɛ mɛ ati lɛ mɔ ma ya nɛ? 42Mɔ mɛ ta mɔ ndohũ bɛ ponzo kɛkɛ mɛ ati lɛ mɔ ma ko, ta mɔ pa hɛ̃ nyita mɔ ya: ‘Nyita mbi, zia mbi hã nyi sã pele ko la ati lɛ mɔ, mbi zi’ ma. Wa poroso, ponzo kɛkɛ mɛ ati lɛ mɔ ko, hã ni uzu mɔ zi, mɔ hũ ndo nzɔ̃ni, wa se mɛ mɔ hã nyi sã pele mɛ ati na lɛ nyita mɔ, mɔ zi la!”
Kɛkɛ na le kɛkɛ
(Mat. 7.16-20; 12.33-35)
43Yezo ato matɔ hɛ̃ la ya: “Ta siɔ le kɛkɛ ndole ka li nzɔ̃ kɛkɛ ma. Ta nzɔ̃ le kɛkɛ ndole nga ka li siɔ kɛkɛ ma. 44Andohĩnga kɛkɛ kɔi kɔi na le lo. Ta andokɔ mango ka li nganya ma. Ta andokɔ nga mbunga ka li kɛkɛ borongo ma. 45Nzɔ̃ zo ndoli anzɔ̃ lo, na lo mɛ ya, bɛ lo nzɔ̃ni. Siɔ zo ndoli asiɔ lo, na lo mɛ ya, bɛ lo siɔni. Ta sanga ma, tɛnɛ mɛ asĩ ka ya bɛ zo la nyɔ zo ndotɛnɛ.”
Da tɛ wa ndara na da tɛ wa buba
(Mat. 7.24-27)
46“Ĩ ndoili mbi ya: ‘Gbia, Gbia,’ wa ta ĩ ndoli ye mɛ mbi ndopa hɛ̃ ĩ ya, ĩ li ma ya nɛ? 47Zo zu mɛ ndoga ge tɛ mbi, ndoma tɛnɛ tɛ mbi, ndoli nga tɛnɛ ni na seni ko, mbi na fangɔ ĩ na zo mɛ zo ni ko akpa lo. 48Lo kpa nga ma zo mɛ ato nda wangɔ da. Lo gɛ̃ sese ali lipi lipi, ko lo kpã gu gɛrɛ da ni na ndo tɛ́nɛ. Ngoi mɛ ngu ĩ sĩ, ĩ mu da ni, ĩ boroka nga ni ko, ta ako da ni ma. Ta sanga ma, lo wa da ni nzɔ̃ni. 49Wa zo ko la ama tɛnɛ tɛ mbi, ta lo li ni na seni ma ko, lo kpa nga ma zo mɛ awa da tɛ lo na ndo sese gɛgɛrɛ. Ta lo gɛ̃ sese ali lipi lipi ma, ta lo kpa gu gɛrɛ da tɛ lo na ndo tɛ́nɛ ma. Ngoi mɛ ngu ĩ sĩ, ĩ mu da ni, ta ĩ ninga ma ko, da ni abukana, akara lupu lupu.”
Currently Selected:
Luka 6: NGB87
Highlight
Share
Copy
Want to have your highlights saved across all your devices? Sign up or sign in
Ngbandi New Testament © United Bible Societies, 1987.
