Luka 9

Yezo ato ava lo sui kɔi ndoni sɛ na kwa

(Mat. 10.5-15; Mar. 6.7-13)

1Yezo abombi ava lo sui kɔi ndoni sɛ, ahɛ̃ la nguru, azia nga ló gbia hɛ̃ la ya, ala toma asiɔ tɔrɔ zu na ya tɛrɛ azi, ala sara nga nga na tɛrɛ azi. 2So pɛni, lo to la ya, ala nɔ apa pa ti lo Lɛngɔ Gbia tɛ Nzapa, ko ala sara nga awa nga. 3Na ɔngɔ tɛ la ko, lo pa hɛ̃ la ya: “Ta ĩ mu ye kɔi, ĩ gwe na ni fɔnɔ ma. Ta ĩ mu ngómbé, na bozo, na tɛ, nga na faranga ma. Ko ĩ yu bo ndozu bɔngɔ kɔi so tɛrɛ ĩ, ta ĩ mu nga mbanga ndozu bɔngɔ mɛ ndɛ̃ ma. 4Ndo kwɛ ko la ĩ si da, se zo ayamba ĩ ka ya da tɛ lo ko, í ngbã bo so ya da ni ko ngbĩi, nga ka ĩ lo ndo ko ĩ ɔ. 5Kanda ndo kwɛ ko la azi akɛ̃ yambangɔ ĩ da ko, í zia kɔdɔrɔ tɛ la ĩ ɔ, ko ĩ goro sese ti pɔrɔ tɛ ĩ, so tisangɔ la ya, siɔ ye tɛ la angbã na li la nvɛni.” 6Ava lo ĩ ma tɛnɛ ko wɛ ko, ala hã nɔ aɔ. Ala ndoɔ ndo na ya kɔdɔrɔ zu, so ndopa Nzɔ̃ Pa hɛ̃ azi, so ndosara nga awa ngã na ndo kwɛ zu.

Bɛ Erodɛ angbã ngbũ

(Mat. 14.1-12; Mar. 6.14-29)

7Na ngoi ko ndo ko, Erodɛ mɛ gbia ama ndo pa ti aye zu mɛ asi. Ko ta lo hĩnga ndo ye mɛ lo lengbi ti lingɔ ma, ta sanga ma, ambanga azi ndopa ndo ya: “Yoanɛ mɛ wa hɛ̃ngɔ batisimɔ aso na pe kwá.” 8Ambanga mɛ ndɛ̃ ya: “Elia la adiri aga.” Ko ambanga mɛ ndɛ̃ ndopa tɛ la ndo ya: “Mbanga wa pangɔ nyɔ Nzapa ti gã la aso na pɛ kwá.” 9La Erodɛ apa ya: “Mbi hɛ̃ ndo nyɔ, afa gɔ̃ Yoanɛ. Wa zo olo mɛ mbi ndoma azi ndotɛnɛ tɛnɛ ti aye zu mɛ lo ndoli ko, lo na?” Ko Erodɛ agi ndo kɔdɛ ya, ni hũ Yezo.

Yezo ahɛ̃ tɛ hɛ̃ azi koto kɔ̃ ala tɛ

(Mat. 14.13-21; Mar. 6.30-44; Yoa. 6.1-14)

10Awa pangɔ kwa tɛ Yezo ĩ diri ko, ala kambisa hɛ̃ lo aye zu mɛ ndo ala li. La Yezo amu la, agwe na la na kunɛ la ti lege mɛ agwe ka kɔdɔrɔ mɛ ili ni la Bɛtɛsaida. 11Kanda azi ko butu butu ama ndo ya, ala ɔ ti lege ni ko, la ala nɔ nga pɛko la. Ala ĩ si kai ko, Yezo ayamba la, apa hɛ̃ la pa ti lo Lɛngɔ Gbia tɛ Nzapa, asara nga awa ngã.

12Ngoi mɛ ndɔ ĩ to nda dengɔ ko, awa pangɔ kwa tɛ Yezo sui kɔi ndoni se ai tɛrɛ la ka tɔ̃nda lo, apa hɛ̃ lo ya: “Pa hɛ̃ azi olo butu butu ya, ala gwe ka kɔdɔrɔ, nga ka gbe yaka mɛ na tɔnda e, ko ala gi tɛ ti tɛngɔ, nga na ndo ti langɔ, ta sanga ma, e ge bɛ ndo.” 13La Yezo apa hɛ̃ la ya: “Ĩ nvɛni ĩ hɛ̃ la tɛ ala tɛ.” Ava lo agbinya hɛ̃ lo ya: “E bo na mapa kɔ̃, na susu sɛ. Mɔ ye ya e nɔ e vɔ̃ tɛ e ga na ni, e hɛ̃ azi olo zu atɛ?” 14(Akɔli mɛ ndo so ndo ko, ala ndo nga ma ge tɛ koto kɔ̃.) Yezo apa hɛ̃ ava lo ya: “Ale ĩ bombi la sui kɔ̃, sui kɔ̃, ko ĩ pa hɛ̃ la ya, ala dunga tise.” 15Ava lo ama nyɔ lo, apa hɛ̃ azi zu adunga tise. 16Yezo alɔ mapa ko kɔ̃ na susu ko sɛ, aya lɛ lo ndozu, ahɛ̃ sia kɔli hɛ̃ Nzapa na lo ni. So pɛni, lo kara ya ni, lo hɛ̃ ava lo ya, ala kangbi na azi mɛ aga butu butu. 17Ala zu atɛ ndo ni, ya la asĩsĩ. Tanga tɛ mɛ angbã, asĩ gogo sui kɔi ndoni sɛ, ko ava lo amu agwe na ni.

Petro apa ya Yezo lo Mɛsia

(Mat. 16.13-19; Mar. 8.27-29)

18Mbanga lá kɔi, Yezo so ndosambela na kunɛ lo, ko ava lo anɔ ata lo. Lo hũnda ava lo ya: “Azi ndopa ya mbi na?” 19Ava lo agbinya hɛ̃ lo ya: “Ambanga ndopa ya, mɔ Yoanɛ wa hɛ̃ngɔ batisimɔ, ambanga ya, mɔ Elia. Ambanga mɛ ndɛ̃ ndopa tɛ la ya, mɔ mbanga wa pangɔ nyɔ Nzapa ti gã la mɔ so na pɛ kwa.” 20La Yezo ahũnda ava lo ya: “Wa ĩ, ĩ ndonɛ tɛ ĩ ya mbi na?” Petro agbinya hɛ̃ lo ya: “Mɔ Mɛsia mɛ Nzapa ato mɔ.”

Yezo apa lo ti kwá tɛ lo nga na lo ti songɔ tɛ lo

(Mat. 16.20-28; Mar. 8.30—9.1)

21Yezo ahɛ̃ nyɔ hɛ̃ ava lo ya, ta ala pa hɛ̃ zo kɔi ya, ni Mɛsia ma. 22Lo pa nga ya: “Ale mbi Nyi Zo mbi hũ pɛnɔ ma ya ma. Ko akangba ti kɔdɔrɔ, na agbia tɛ awa lungɔ Nzapa na ye, nga na awa hangɔ ndia na kɛ̃ngɔ mbi. Na hongɔ mbi, ko na pɛ bi ta ko, mbi so.” 23So pɛni, lo pa hɛ̃ azi zu ya: “Se zo aye ya, ni ga e na ni, e ɔ ndoni kɔi ko, ale lo zia dangɔ bɛ lo na tɛrɛ lo nvɛni, ale lo yɔ nga krusi tɛ lo lá kwɛ kwɛ, so fangɔ ya, ni ye hũngɔ pɛnɔ, wadila lo ga, ko mbi na lo e ɔ ndoni kɔi. 24Ta sanga ma, zo ko la aye batangɔ du tɛ lo ko, tɔrɔ tɛrɛ lo na kpingɔ. Wa zo ko la ndoka tɛrɛ lo na lo tɛ mbi ko, tɔrɔ tɛrɛ lo na songɔ. 25Se zo alua aye ti tise zu, wa se lo yu lege tɛ Nzapa, bere tɔrɔ tɛrɛ lo akpi ko, aye ni ko zu ati gɛgɛrɛ. 26Se kamɛnɛ agbɔ̃ zo na lo tɛ mbi Nyi Zo, nga na lo ti tɛnɛ tɛ mbi ko, kamɛnɛ agbɔ̃ nga gbanda mbi na lo tɛ zo ni ko, na ngoi mɛ gbanda mbi ga na ya ndima tɛ mbi, na tɛ To mbi nga na tɛ aangelo mɛ santo. 27Mbi pa hɛ̃ ĩ ti bɛta tɛnɛ ya, ambanga azi mɛ so ndo mɛ na hũngɔ Nzapa na lɛngɔ gbia tɛ lo, uzu wa ala kpili.”

Trrɛ Yezo na bɔngɔ tɛ lo agbinyangbi

(Mat. 17.1-8; Mar. 9.2-8)

28Yezo ĩ tɛnɛ so, ĩ la so pɛni ge tɛ pɔsɔ kɔi ko, lo mu Petro, na Yoanɛ, nga na Zaki, ala ma ka ndo hɔtɔ so sambelangɔ Nzapa. 29Ngoi mɛ lo so ndosambela ko, yangba lɛ lo agbinyangbi ati ndɛ̃, bɔngɔ tɛ lo ati mbufuni pɛpɛpɛ. 30Bo ngoi kɔi, azi sɛ asi so ndo ko, ala na Yezo so ndotɛnɛ tɛnɛ. Adu ndo Mɔizɛ na Elia mɛ ndo akpili. 31Ala ga ndo na ndima ti yayu na tɛrɛ la. Ala na Yezo ndotɛnɛ ndo tɛnɛ na lo ti se mɛ Yezo na kɔngɔ na nda kwa tɛ lo, nga na lo ti se kwa mɛ lo na kpingɔ ka Yeruzalɛmɛ. 32Langɔ aho Petro na afɔ̃ lo. Ko ngoi mɛ ala ĩ zingɔ ko, ala hũ ndima tɛ Yezo, ala hũ nga akɔli sɛ mɛ ana Yezo so ndolonga. 33Ngoi mɛ akɔli ko azia Yezo, so ndogwe ko, Petro apa hɛ̃ Yezo ya: “Wa hangɔ lo tɛ Nzapa, nzɔ̃ni la e ndo mɛ. E na wangɔ gofa ota, kɔi tɛ mɔ, kɔi tɛ Mɔizɛ, kɔi tɛ Elia.” (Ta Petro ahĩnga ndo nda tɛnɛ mɛ lo ndotɛnɛ ma.) 34Ngoi mɛ Petro so ndotɛnɛ so ko, da baba asi avĩ lɛ lá, la gbede ni ati ndo la. Ava lo ĩ hũ gbede ti da baba ĩ ti ndo la ko, mbɛtɔ agbɔ̃ la. 35Ko ala ma legɔ̃ zo ka ya da baba ni so ndotɛnɛ tɛnɛ ya: “Nyi mbi mɛ mbi sara lo mbi kpã lo mɛ, ĩ ma nyɔ lo!” 36Legɔ̃ zo ko ĩ tɛnɛ so wɛ ko, ala hũ Yezo angbã bo na kunɛ lo. Ava Yezo adu nga kpɔ, ko na ngoi ni ko, ta ala pa nga pa ti ye mɛ ala hũ hɛ̃ zo kɔi ma.

Yezo asara nyingambi mɛ na siɔ tɔrɔ ya tɛrɛ lo

(Mat. 17.14-18; Mar. 9.14-27)

37Ndã ĩ de, ala ĩ lo ka ndo hɔtɔ ĩ zu ko, azi butu butu anɔ so ngorongɔ Yezo. 38Mbanga kɔli kɔi adu so popo tɛ azi ko butu butu, ade kɔngɔ ya: “Wa hangɔ lo tɛ Nzapa, mbi gbɔ̃ gɛrɛ mɔ, bi lɛ mɔ ndo ngbongi nyi mbi. 39Siɔ tɔrɔ asa tɛrɛ nyi mbi ni, ayingi lo kpu kpu kpu, ko bo ngoi kɔi lo ndodɛrɛ kɔngɔ, fulu so ndosi yanga lo. Siɔ tɔrɔ ni ndogia lo, ko ta ndoye longɔ ka ya tɛrɛ lo singɔ woni ma. 40Mbi vɔrɔ tɛrɛ mbi hɛ̃ ava mɔ ya, ala toma siɔ tɔrɔ ni asi, ko ala ha gba.” 41La Yezo apa ya: “Ee, ĩ du azi mɛ ta ĩ ye lo tɛ Nzapa ma, ĩ nga asiɔ azi. Mbi ngbã gbanda bo ngoi zu ndoni kɔi na ĩ nga na gbengɔ bɛ mbi na lo tɛ ĩ?” Ko Yezo apa hɛ̃ kɔli ko ya: “Ga na nyi mɔ ni ge.” 42Ngoi mɛ nyingambi ko ĩ doli na Yezo ko, siɔ tɔrɔ abi lo tise, ayingi lo kpu kpu kpu. Yezo ĩ hũ so ko, agbo ndo siɔ tɔrɔ ko, asara nyingambi ni, adiri na lo hɛ̃ to lo. 43Ngoi mɛ azi zu ĩ hũ kota nguru tɛ Nzapa ko, ala bema sĩ.

Yezo ati pa lo ti kwa tɛ lo nga na lo ti songɔ tɛ lo

(Mat. 17.22-23; Mar. 9.30-32)

Ngoi mɛ ndo azi ade na bemangɔ na lo ti ye zu mɛ Yezo ali ko, Yezo apa hɛ̃ ava lo ya: 44“Tɛnɛ mɛ mbi ndotɛnɛ hɛ̃ ĩ na olo ko, ĩ ma ni nzɔ̃ni. Tɛnɛ ni lo mɛ: awa kɛ̃ngɔ mbi na kangɔ mbi Nyi Zo hɛ̃ azi mɛ ndɛ̃.” 45Ko ta ava lo ahĩnga nda tɛnɛ ko lo tɛnɛ ma, lo hɔndɛ ndo la na nda tɛnɛ ni ya, so ala hĩnga. Ko mbɛtɔ ti hũndangɔ lo na nda tɛnɛ ni ko agbɔ̃ ndo la.

Zo mɛ aɔ afɔ̃ lo zu

(Mat. 18.1-5; Mar. 9.33-37)

46Ava lo ato nda bimbingɔ tɛnɛ so hĩngangɔ zo mɛ aɔ afɔ̃ lo zu so popo tɛ la. 47Yezo ahĩnga ndo dangɔ bɛ tɛ la. La lo mu nyingambi, lo kpã so tɔ̃nda lo, 48lo pa hɛ̃ la ya: “Zo ko la ayamba nyingambi olo na lo tɛ mbi ko, afa ya, lo yamba nga mbi nvɛni. Wa zo ko la ayamba mbi ko, afa ya, lo yamba nga wa tongɔ mbi. Ta sanga ma, zo ko yakere buai so popo tɛ ĩ zu ko, zo mɛ aɔ afɔ̃ lo kwɛ zu la.”

Wa yengɔ e la zo mɛ ta kɛ e ma

(Mar. 9.38-40)

49Yoanɛ atɛnɛ ya: “Wa hangɔ lo tɛ Nzapa, e hũ ndo kɔli kɔi atoma asiɔ tɔrɔ na ya tɛrɛ azi na ili mɔ, ko e ye ndo gbanzingɔ lo, ta sanga ma, ta lo na li nɔ tɛ e ma.” 50La Yezo agbinya hɛ̃ Yoanɛ ya: “Ta ĩ gbanzi lo ma, ta sanga ma, zo ko ta bɛ lo akɛ̃ ĩ ma ko, wa yengɔ ĩ la.” Azi ti mbanga kɔdɔrɔ kɔi ti Samaria akɛ Yezo 51Ngoi mɛ ndo bi tɛ Yezo ti ziangɔ sese, diringɔ ka yayu ĩ doli ko, lo hɛ̃ nyɔ lo ya, ale ni nɔ ka Yeruzalɛmɛ. 52Lo to awa nɔngɔ kwa uzu tɛ lo. Ala nɔ asi na ya mbanga kɔdɔrɔ kɔi ti Samaria ya, ani lɛkɛ ye kwɛ zu so kungɔ na Yezo. 53Ko azi ti kɔdɔrɔ ni ko akɛ̃ yambangɔ Yezo, na lo mɛ ya, lo mu ndo lege ti gwengɔ ka Yeruzalɛmɛ. 54Ngoi mɛ Yoanɛ na Zaki mɛ ava lo ĩ hũ so ko, ala pa ya: “Gbia, mɔ ye ya e hɛ̃ nyɔ, ko wá alo ka ndozu azu, agbi azi olo?” 55Yezo ĩ ma so ko, asana tɛre lo ka tɛ la, aba la, abela la. 56La ala gwe ndo ka mbanga kɔdɔrɔ mɛ ndɛ̃.

Azi mɛ asepara ɔngɔ ndoni kɔi na Yezo

(Mat. 8.19-22)

57Ngoi mɛ ala so lege gwe ko, mbanga kɔli kɔi apa hɛ̃ Yezo ya: “Ndo zu mɛ mɔ na gwengɔ da ko, mbi e na mɔ e na nɔngɔ.” 58Yezo agbinya hɛ̃ lo ya: “Aganvana na dó tɛ la da, ahũ nga na da tɛ la da. Kanda tɛ mbi Nyi Zo ko, ta mbi na ndo ya, mbi se da, mbi wɔ tɛrɛ mbi ma.” 59Yezo apa hɛ̃ mbanga kɔli mɛ ndɛ̃ ya: “Ga e ɔ ndoni kɔi.” Ko kɔli ko agbinya hɛ̃ lo ya: “Gbia, zia mbi nɔ, mbi hɔ kinda tɛ to mbi hĩ.” 60Yezo agbinya hɛ̃ lo ya: “Zia awa kwáni ahɔ akinda tɛ la, ko mɔ nɔ, mɔ pa pa ti lo Lɛngɔ Gbia tɛ Nzapa hɛ̃ azi.” 61Mbanga kɔli mɛ ndɛ̃ nga apa ya: “Gbia, mbi e na mɔ e na ɔngɔ ndoni kɔi, wa zia mbi nɔ, mbi zei asongo mbi hĩ.” 62Yezo apa hɛ̃ lo ya: “Zo ko ato nda lingɔ kwa, ko lo dɔ lingɔ kwa ni lo zia ko, ta lo lengbi ti dungɔ wa kwa ti Kɔdɔrɔ Gbia tɛ Nzapa ma.”

Currently Selected:

Luka 9: NGB87

Highlight

Copy