Matayo 5

Yesu a suluja todiŋdyö i mere ki

(Kine todinesi tutuŋgö i sapita 7)

1A Yesu ko meddi ŋutu jore parik, a nye iti i mere ki. A nye si ’dakine kak, a ŋutu kanyit kajujumuk iti kanyit yu.

Ko ŋa logon a kalyöŋök

(Koti Luka 6.20-23)

2A nye suluje todiŋdyö se adi,

3ŋutu logon a lomerika i töilyet kilo a kalyöŋök;

kogwon Tumatyan na Ki a nase.

4 # Yis 61.2 ŋutu logon dedelya kilo a kalyöŋök;

kogwon se mo susuka.

5 # Sau 37.11 ŋutu logon a lokoyokak kilo a kalyoŋok;

kogwon kak liŋ mo gwon a nase.

6 # Yis 55.1, 2 ŋutu logon ko magor ko a mokakure i koŋdya na torigwo kilo akalyöŋök;

kogwon se mo yiyimöno.

7ŋutu logon wowon konyen ko ŋutu kilo a kalyöŋök;

kogwon se mo woworikin konyen.

8 # Sau 24.3, 4 ŋutu logon a loke i töilyet kilo a kalyöŋök; kögwon se mo memet Ŋun.

9ŋutu logon tomor a kulye ŋutu anyen gwon ko taliŋ kilo a kalyöŋök;

kogwon Ŋun mo luŋ se a ŋwajik kanyit.

10 # 1 Pet 3.14 ŋutu logon a sasanya kogwon löti lo rigwo kilo a kalyöŋök;

kogwon Tumatyan na Ki a nase.

11 # 1 Pet 4.14 Ta a kalyöŋök ko ŋutu momoröju ta, ko a sasaŋdi ta, ko a ŋökiŋdye ta kulya narok liŋ ka ’de ka ’de kogwon kulya kwe. 12#2 Dek 36.16; Kon 7.52ŋutu köju a sasaŋdu nebijin sona logon kasu ŋerot kulu i ŋilo kiko lo geleŋ ŋilo. Nyena lyöŋi ta lyöŋön ko nyolani ta nyola parik, kogwon ropet duma nasu a ’delaki ta ki yu.

Lilim lo ’balaŋ se ko lo parara

(Köti Marako 9.50; Luka 14.34-35)

13 # Mar 9.50; Luk 14.34, 35 Ta a ’balaŋ na na kak. Ama ko ’balaŋ a wora pötö nye bubulö to ’busa ada? A nye köti gwe ’bak ’bulit ama a gubajine kaŋo i ryoryoka ko mok.

14 # Yoa 8.12; 9.5 Ta kilo a parara na na kak. Köji nagon a ’duköki i mere loki na ti bulö ’dela. 15#Mar 4.21; Luk 8.16; 11.33Lele ŋuto ’bayin logon mokakiŋdya lombo a muke muk ko kupö, ama nye togwi ’dikin ki, anyen pararakiŋdya i ŋutu liŋ lo gwon kadi kilo.

16 # 1 Pet 2.12 Nyena ti parara nasu kobbi kobbu sona ko ŋutu i komor, anyen na meddi lepeŋat ŋo na ’but na kon ta kine nu, a se böŋö pupurje Monye losu lo gwon ki lu.

Yesu todiŋdyö kulya ti Saresi ti Mose

17Ko yeyeju ta adi nan aje po i tu ’baka ’yu na Saresi ti Mose se ko ŋo na wur nebijin kune; nan a ko po i tu ’baka ’yu na se ama i tutuŋokiŋdyö na se. 18#Luk 16.17’Diri nan takiŋdya ta adi, tojo ko ki se ko kak a likin, ma ’di leta geleŋ na ’dit kode kotet na leta mo ti likin i Saresi tojo ko kine ŋo liŋ aje kona. 19Nyenagon ko ŋuto logon a köŋu ma ’di saret lo ’dit i kilo saresi, todinikiŋdye kulye ŋutu anyen koŋdya sona, lepeŋ mo luŋu a lo ’dit i Tumatyan na Ki; ama ko ŋuto ’de ’dep Saresi, a todinikiŋdye kulye ŋutu anyen ’de ’dep, ŋilo ŋuto mo luŋu a duma i Tumatyan na Ki. 20Kogwon nan kulya ko ta adi, ko löti losu lo rigwo a ko lwöŋ lo katodinok ti Saresi ti Mose se ko lo Parusijin, a ta mo tine lupö i Tumatyan na Ki.

Yesu todiŋdyö kulya ti woran

(Köti Luka 12.57-59)

21 # Yuö 20.13; Nyö 5.17 Ta aje yiŋ adi ŋutu ti ’beron köju kulu a saraki adi, Do ködyö ti tatuja ŋuto; nyena ŋuto logon a tatuja lo ködyö jwe i ’duŋöki na putet. 22kölumbö nan takiŋdya ta adi, ko ŋa lo woran ko luŋaser lonyit ködyö jwe i ’duŋöki na putet; a kö ŋa lo momoröju luŋaser lonyit, lepeŋ ködyö jwe i ’duŋöki na putet i teŋ na kaliliyak; a ko ŋa lo kulya adi, Do lu ’böŋ! lepeŋ ködyö joŋa i kimaŋ na Geena. 23Nyena kö dö wukiŋdya ’doket inot i pirit ’yuret na rubaŋgajin, a do yiyiuŋdye nyu adi do a konakiŋdya luŋösur arabat,

24kölöki ’doket inot nyu i komor na pirit ’yuret na rubaŋgajin. A kokwe iti i mora ko luŋösur, a do kirut yitwene bot i wukiŋdya na ’doket inot. 25Jeteŋdi tojulin ’de ’de ko miriku ilot na tiri ta i kiko ko lepeŋ i putet nu, an lepeŋ ko ŋutu kin do ko ka ’duŋönit lo putet i könin, a ka ’duŋönit tiŋdi do ko katiyunit i könin, a do tikine i kadi rereket. 26’Diri nan takiŋdya do adi, do mo ti kölwe kwöŋ tojo ko do a roŋ taripatat na ’dutet.

Yesu todiŋdyö kulya ti lubbo

27 # Yuö 20.14; Nyö 5.18 Ta aje yiŋ adi köju a saraki adi, Do ködyö ti lubbö. 28Kölumbö nan takiŋdya ta adi, I ŋutu liŋ geleŋ geleŋ, ŋuto logon a be ’ya ŋuto nakwan lo ’diri aje luŋ lepeŋ kanyit i töili. 29#Mat 18.9; Mar 9.47A ko koŋe ilot lutaten lo lokuŋdya do i toroŋdya, wuluddu nye kaŋo ko gubara nye mu ’diŋ; bia a na ’but ko do tolikiŋdyö lele swöt ilot lo mugun lwölwöŋ do gubaji i Geena ko mugun inot ’bukuluŋ. 30#Mat 18.8; Mar 9.43A ko könin ilot lutaten lo lokuŋdya do i toroŋdya, ’duŋu nye kaŋo ko gubara nye mu ’diŋ; bia a na ’but ko do tolikiŋdyö lele swöt ilot lo mugun Iwolwöŋ do gubaji i Geena ko mugun inot ’bukuluŋ.

Yesu todiŋdyö kulya ti yaŋdu

(Köli Matayo 19.9; Marako 10.11-12; Luka 16.18)

31 # Nyö 24.1-4; Mat 19.7; Mar 10.4 Köti köju a saraki adi, Ŋuto logon yaŋdu nakwan nanyit lo, ti lepeŋ ködyö tiki nakwan waraga yanyet.

32 # Mat 19.9; Mar 10.11, 12; Luk 16.18; 1 Kor 7.10, 11 Kölumbö nan takiŋdya ta adi, I ŋutu liŋ geleŋ geleŋ ŋuto logon yaŋdu nakwan nanyit ake yaŋdu ko a rye i lupö, a nye tiŋdi lepeŋ wora a kalupe, a ko ŋa lo yemba ŋuto nagon aje yanya na köti a luŋ lepeŋ.

Yesu todiŋdyö kulya ti ’beleŋgu na milyejin

33 # Lew 19.12; Ken 30.2; Nyö 23.21 Köti ta aje yiŋ adi ŋutu ti ’beron köju kulu a saraki adi, Do ködyö ti ’beleŋgu milye ilot, ama ŋo nagon do a milyekin MATAT kune do agu ködyö kökon. 34#Yak 5.12; Yis 66.1; Mat 23.22Kölumbö nan takiŋdya ta adi, ta ti milyeju kwöŋ, kode i ’diŋdya na ki, kogwon nye a si ’daet na Ŋun, 35#Yis 66.1; Sau 48.2kode i ’diŋdya na kak, kogwon nye a tökit nanyit na mokosi, kode i ’diŋdya na Yerusalema, kogwon nye a köji nanyit na Mor duma; 36köti ko milyeju i ’diŋdya na kwe inot, kogwon do ti bulö löpuggö lele kupiret ilot geleŋ a lokwe kode a lurwö. 37a ko ruket inot gwon a Ee, a ti nye gwe a Ee, ama ko gwon a ’Bayin, a ti nye gwe a ’Bayin. Kulyaesi logon a lwöŋgu kilo po ko ŋilo Loron.

Yesu todiŋdyö adi ti loto gwe ti ropakiŋdya toron

(Köti Luka 6.29-30)

38 # Yuö 21.24; Lew 24.20; Nyö 19.21 Ta aje yiŋ adi koju a saraki adi, Koŋe ropa ko koŋe, a kele ropani ko kele. 39Kölumbö nan takiŋdya ta adi, Do ködyö ti mörö ko ŋuto logon konakiŋdya do arabat. A ko lele ŋuto a naŋgu do i ŋebi lutaten, löpuköki lepeŋ lo kadoŋe lo köti anyen nanaŋa. 40a kö lele ŋuto ’dek joŋga do i putet yöŋö ’dumaddu jölobiya inot, ti lepeŋ köti ’dumaddi boŋgo inot muit na.

41A ko lele ŋuto a ri ’diaddu do i tu maili geleŋ, a ti do moraddi ko lepeŋ mailijin murek. 42Tiŋdi ŋuto logon a mo ’yu ŋo konut, an do ko renyakiŋdya ŋuto logon yöŋo kuŋö ŋo konut.

Nyare nyar merok kulök

(Köti Luka 6.27-28, 32-36)

43Ta aje yiŋ adi köju a saraki adi, Do ködyö nyanyar marate ilot a do maŋdi miriku ilot. 44Kölumbö nan takiŋdya ta adi, Nyare ta nyar merok kasu, ko momo ’yi ta Ŋun kogwon kulya ti ŋutu lo sasaŋdu ta kilo, 45anyen ta böŋo gwon a ŋwajik ti Monye losu lo gwon ki lu, logon tiŋdu kolor nanyit i nyerakin i ŋutu lo ’but ko lorok, ko a sunyuŋdye kudu i ŋutu lo yiyiniki ko logon ti yiniki. 46a ko ta nyaŋu ŋutu logon nyanyar ta kilo, a ta wuji nan ropet? Kapepenak ti usur ti koŋdya sona le? 47a ko ta roman ko luŋösurök ka ’de, a ta Iwoŋgi kulye ŋutu ko nyo? Paganojin köti ti koŋdya sona le? 48#Lew 19.2; Nyö 18.13Nyenagon ta ködyö gwon a lo ’but i ŋo liŋ, gwoso na gwoŋdi Monye losu lo ki a lo ’but i ŋo liŋ na.

Currently Selected:

Matayo 5: BBE

Highlight

Copy