Matayo 6

Yesu todiŋdyö kulya ti ’doka na lomerika

1 # Mat 23.5 Kunyar ta an ta ko koŋdya takonesi kasu na ’but ko ŋutu i komor anyen se memet; ko ta a koŋdya sona, a Monye losu lo gwon ki lu mo tine tikin ta ropet.

2Nyena ko do tiŋdu lomerika ’dokesi, an do ko laŋa i kuddya na tore, gwoso na koŋdi kamumulukak i kadijik mo moresi ko i kikolin na anyen ŋutu bubu se. ’Diri nan takiŋdya ta adi se aje wu ropesi kase. 3Ama ko do ’do’dogga lomerika, ti könin ilot lo kadoŋe gwe ti den ŋo nagon könin ilot lo lutaten kökon na, 4anyen do ’dogga a lwön; a Munyi logon memet ŋo nagon kona a lwön lo mo ropakiŋdye do.

Yesu todiŋdyö kulya ti kwakwaddu

(Köti Luka 11.2-4)

5 # Luk 18.10-14 Köti ko ta gwon i kwakwaddu, ko mirakiŋdya ta ŋutu kamumulukak logon nyanyar gwo ’dan ki i kwakwaddu i kadijik momoresi, ko i keresi ti kikolin ti köji anyen ŋutu liŋ memet se. ’Diri nan takiŋdya ta adi se aje wu ropesi kase. 6Ama ko do ’dek kwakwaddu, lupöni konut i kadi lukata i toŋkwet, kini kin kötumit, ko kwakwaddi Munyi logon ti meta lo; a Munyi logon memet ŋo nagon kona a lwön lo mo ropakiŋdye do.

7Ko ta kwakwaddu, ko nyanyaggu ta ŋo kana gwoso na koŋdi paganojin na, kogwon se yeyeju adi se mo yiyiŋa kogwon se kwakwaddu parik ko kulyaesi jore. 8An ta ko mirakiŋdya ta lepeŋat, kogwon Monye losu aje den ŋo nagon ta ’de ’dekan kine a kokwe nagon ta a ko nyuŋ pi lepeŋ.

9Ta ködyö kwakwaddu sona adi, Baba likaŋ lo ki,

Ti karin kunök bulani bula,

10Ti tumatyan inot po,

Ti ŋo nagon do ’de ’dekan kune ti konani kona i kak ni gwoso na konari se ki yu nu.

11I lo lor tiki yi kinyo likaŋ lo lor;

12Pitöki yi i ŋo nagon yi a koŋdya arabat kune,

gwoso nagon yi köti a pitökiŋdye ŋutu logon a konakiŋdya yi arabat kulo na;

13An do ko tikin yi i tema, ama lwöki yi i ŋilo loron.

14 # Mar 11.25, 26 Kogwon ko ta pipitökin ŋutu i lyaŋesi kase, a Monye losu lo gwon ki lu köti mo pitökiŋdye ta; 15ama ko ta ti ’bön pitökiŋdyö ŋutu i lyaŋesi kase, a ma ’di Monye losu lo gwon ki lu mo tine pitökin ta lyaŋesi kasu.

Yesu todiŋdyö kulya ti miŋdya

16Nyenagon ko ta mimiŋdya, ko mirakiŋdya ta kamumulukak lo gwon ko komorsikan nagusulak, kogwon se löpuggö komorsikan kase a narok anyen ŋutu memet adi se ’diri mimiŋdya. ’Diri nan takiŋdya ta adi se aje wu ropesi kase. 17Ama ko do mimiŋdya, wele we kwe inot ko welet, köti lalane lala komöŋ inot, 18anyen ŋutu böŋö gwon ti den adi do mimiŋdya, tuŋ Munyi logon ti meta lo lepeŋ lo deŋdya; a Munyi logon memet ŋo na kon do a lwön kune mö ropakiŋdye do.

’Delaki ta ’börik tukwörienjin ki yu

(Köti Luka 12.33-34)

19 # Yak 5.2, 3 Ko ’delakiŋdya ta ’börik tukwörienjin i na kak, i pirit nagon kökora se ko lolo ’dokwe kököŋi na, i pirit nagon kolak turöddu kata i kokoladdu na. 20Ama ’delaki ta ’börik tukwörienjin ki yu, i pirit nagon kökora ti bulö kököröju kode lolo ’dokwe, i pirit nagon kolak ti turöddu kata i kokoladdu nu. 21Kogwon i pirit na gwoŋdi tukwörien inot kata nu, a töili ilöt köti gwe nyu.

Lombo lo mugun

(Köti Luka 11.34-36)

22Konyen gwon a lombo lo mugun. Nyena ko konyen kulök a lo ’but, mugun inot ’bukuluŋ köti a jore ko parara. 23Ama ko konyen kulök a lörök, a mugun inöt ’bukuluŋ gwe i mudwe. Nyena ko parara na gwon konut i mugun na gwe a mudwe, a mudwe ’diri gwe a duma!

Ta ti bulö kitakiŋdya ko Ŋun ko tukwörien

(Köti Luka 16.13)

24Lele ŋuto ’bayin logon bubulö kitakiŋdya ŋutu murek; kogwon kode nye maŋdu lele a nyaŋi lele, kode nye twöju lele a lauŋdye lele. Ta ti bulö kitakiŋdya kö Ŋun ko tukwörien.

Ko wiwinya ta

(Köti Luka 12.22-31)

25Nyenagon nan takiŋdya ta adi, Ko wiwinya ta i kulya ti kinyo logon tiŋdu ta i gwon jörun, ko ta nyesu nyo kode ko ta möju nyo, kode i kulya ti boŋgwat nagon ta jupukin kasu i mugunya. Ru na ŋutu ti lwöŋ kinyo le? Mugunya ti ŋutu ti lwöŋ boŋgwat ŋona le? 26Mete ta kwen: se ti weja a tine ŋepa, a tine ’de ’ya i gugwö, ama Monye losu lo gwon ki lu lo tunyeju se. Ta ŋona ti gwon ko ’bulit a duma bia lwölwöŋ se le? 27Loŋ ŋuto losu logon wiwinyesi kanyit bubulö julakiŋdya lokiliŋ geleŋ i ru nanyit le? 28Ko nyonagon ta wiwinya i kulya ti boŋgwat? Yeyene ta köturön ti mu ’diŋ ko se ’duruŋdyö ada; se ti kita kode wiwöji waratat, 29#1 Mor 10.4-7; 2 Dek 9.3-6ama nan takiŋdya ta adi ma ’di Solomona ko minyo lonyit liŋ a ko jupu kwekwelen gwoso nene na kine köturön. 30Nyena ko Ŋun tojubbu döru lo mu ’diŋ sona logon a lodon i lo lor lo a kotumalu namarikin kimaŋ, bia parik a nye mo tine tojubbu ta, ta ŋutu logon ko yupet a na ’dit kilo le?

31Nyenagon an ta ko wiwinya ta adi, Yi de nyesu nyo? kode adi, Yi de möju nyo? kode adi, Yi de jupukiŋdya nyo?

32Kogwon paganojin gaga ’yu kine ŋo liŋ, ama Monye losu lo gwon ki lu deden adi ta ’de ’dekan kine ŋo liŋ.

33Ama a kokwe ga ’yi ta ga ’yu anyen lepeŋ lo tumatyan ko ta, köti anyen ta koŋdya löti lonyit lo rigwo, a kirut kine ŋo liŋ mo ’yalakine ta. 34Nyenagon ko wiwinya ta i kulya ti kotumalu, kogwon kotumalu mo wiwinya kulya kanyit. A kulya narok ti lor juki i ŋilu lor.

Currently Selected:

Matayo 6: BBE

Highlight

Copy