Popular Bible Verses from Matayo 6

Share

Ama a kokwe ga ’yi ta ga ’yu anyen lepeŋ lo tumatyan ko ta, köti anyen ta koŋdya löti lonyit lo rigwo, a kirut kine ŋo liŋ mo ’yalakine ta.

Nyenagon ko wiwinya ta i kulya ti kotumalu, kogwon kotumalu mo wiwinya kulya kanyit. A kulya narok ti lor juki i ŋilu lor.

Nyenagon nan takiŋdya ta adi, Ko wiwinya ta i kulya ti kinyo logon tiŋdu ta i gwon jörun, ko ta nyesu nyo kode ko ta möju nyo, kode i kulya ti boŋgwat nagon ta jupukin kasu i mugunya. Ru na ŋutu ti lwöŋ kinyo le? Mugunya ti ŋutu ti lwöŋ boŋgwat ŋona le?

Ama ko do ’dek kwakwaddu, lupöni konut i kadi lukata i toŋkwet, kini kin kötumit, ko kwakwaddi Munyi logon ti meta lo; a Munyi logon memet ŋo nagon kona a lwön lo mo ropakiŋdye do.

Ta ködyö kwakwaddu sona adi, Baba likaŋ lo ki, Ti karin kunök bulani bula, Ti tumatyan inot po, Ti ŋo nagon do ’de ’dekan kune ti konani kona i kak ni gwoso na konari se ki yu nu.

I lo lor tiki yi kinyo likaŋ lo lor

Pitöki yi i ŋo nagon yi a koŋdya arabat kune, gwoso nagon yi köti a pitökiŋdye ŋutu logon a konakiŋdya yi arabat kulo na

An do ko tikin yi i tema, ama lwöki yi i ŋilo loron.

Kogwon ko ta pipitökin ŋutu i lyaŋesi kase, a Monye losu lo gwon ki lu köti mo pitökiŋdye ta

Mete ta kwen: se ti weja a tine ŋepa, a tine ’de ’ya i gugwö, ama Monye losu lo gwon ki lu lo tunyeju se. Ta ŋona ti gwon ko ’bulit a duma bia lwölwöŋ se le?

Ko ’delakiŋdya ta ’börik tukwörienjin i na kak, i pirit nagon kökora se ko lolo ’dokwe kököŋi na, i pirit nagon kolak turöddu kata i kokoladdu na. Ama ’delaki ta ’börik tukwörienjin ki yu, i pirit nagon kökora ti bulö kököröju kode lolo ’dokwe, i pirit nagon kolak ti turöddu kata i kokoladdu nu. Kogwon i pirit na gwoŋdi tukwörien inot kata nu, a töili ilöt köti gwe nyu.

Lele ŋuto ’bayin logon bubulö kitakiŋdya ŋutu murek; kogwon kode nye maŋdu lele a nyaŋi lele, kode nye twöju lele a lauŋdye lele. Ta ti bulö kitakiŋdya kö Ŋun ko tukwörien.

Nyena ko Ŋun tojubbu döru lo mu ’diŋ sona logon a lodon i lo lor lo a kotumalu namarikin kimaŋ, bia parik a nye mo tine tojubbu ta, ta ŋutu logon ko yupet a na ’dit kilo le?

Ama ko do ’do’dogga lomerika, ti könin ilot lo kadoŋe gwe ti den ŋo nagon könin ilot lo lutaten kökon na, anyen do ’dogga a lwön; a Munyi logon memet ŋo nagon kona a lwön lo mo ropakiŋdye do.

Kunyar ta an ta ko koŋdya takonesi kasu na ’but ko ŋutu i komor anyen se memet; ko ta a koŋdya sona, a Monye losu lo gwon ki lu mo tine tikin ta ropet.

Nyenagon ko ta mimiŋdya, ko mirakiŋdya ta kamumulukak lo gwon ko komorsikan nagusulak, kogwon se löpuggö komorsikan kase a narok anyen ŋutu memet adi se ’diri mimiŋdya. ’Diri nan takiŋdya ta adi se aje wu ropesi kase. Ama ko do mimiŋdya, wele we kwe inot ko welet, köti lalane lala komöŋ inot, anyen ŋutu böŋö gwon ti den adi do mimiŋdya, tuŋ Munyi logon ti meta lo lepeŋ lo deŋdya; a Munyi logon memet ŋo na kon do a lwön kune mö ropakiŋdye do.