Matayo 4

Satani a temba Yesu

(Köti Marako 1.12-13; Luka 4.1-13)

1 # Eb 2.18; 4.15 Nyena a Mulokötyo Loke nyömöddi Yesu i yöbu nagon ŋutu ’bayin kata anyen kaŋöönit temba lepeŋ.

2A Yesu miŋdye miŋdya perok merya iŋwan, a i mukök a nye gwe ko magor.

3A katemanit lo poŋdi, a kulyani ko lepeŋ adi, Ko do a Ŋuro lo Ŋun taki kilo ŋurupö anyen wora a ambatajin.

4 # Nyö 8.3 Ama a nye waddi adi, A wurö adi, ŋutu ti gwolor kogwon kinyo ka ’de,

ama gwolor ko kulyaesi liŋ logon lupe kaŋo ko Ŋun i kutuk,

5A ŋilo kaŋöönit joŋgi lepeŋ i köji nake, a togwi ’dikiŋdye lepeŋ i lotek lo Kadi na Ŋun, 6#Sau 91.11, 12a kulyani ko lepeŋ adi, Ko do a ŋuro lo Ŋun, gubara mugun kak; kogwon a wurö adi,

Ŋun de saŋu malaikajin kanyit i kulya kunök.

Köti adi, Se de ’de ’dep do ko könisi kase,

an do ko julökin moköt ilot i ŋurupit.

7 # Nyö 6.16 A Yesu waddi lepeŋ adi, A wuro koti adi, Do ködyö ti möŋu MATAT Ŋun ilot.

8A kaŋöönit köti joŋgi lepeŋ i inere lojo parik, a kwekiŋdye lepeŋ tumatya-njin liŋ ti kak, se ko minyo lose;

9kulya adi, Nan de titikin do kine ŋo liŋ ko do a dulaki kak i twoju na nan.

10 # Nyö 6.13 A Yesu kulyani ko lepeŋ adi, Iŋgo, Satani! kogwon a wurö adi,

Do ködyö kugga MATAT Ŋun ilot a kitakiŋdye lepeŋ ka ’de.

11A kirut kaŋilonit kö ’yi lepeŋ, a malaikajin lo poŋdi a kitakiŋdye lepeŋ.

Yesu a suluja kita nanyit Galilaya

(Köti Marako 1.14-15; Luka 4.14-15)

12 # Mat 14.3; Mar 6.17; Luk 3.19, 20 A Yesu ko yiŋge adi Yoane aje moka nu, a nye kö ’yi ŋinu pirit a iti Galilaya. 13#Yoa 2.12A nye kö ’yi Najareta, a iti tu a si ’dani Kaperanauma nyona ko tor na Galilaya, i kak na Jebulun ko na Napatali, 14anyen kine kulya ködyö kokona gwoso na jambi nebi Yisaya köju nu adi,

15 # Yis 9.1, 2 Jur lo Jebulun se ko lo Napatali,

kiko lo tiri tör duma na ’balaŋ inu pele na Yardene, Galilaya na ŋutu ti juron ka ’de ka ’de—

16ŋutu lo si ’da i mudwe kilo a meddya parara duma,

se lo si ’da i jur logon twan gwon kata kilo parara a pukökin kase.

17 # Mat 3.2 Suluja i ŋinu diŋit a Yesu suluje tokujö adi, Löpuŋge ta töilyet, kogwon Tumatyan na Ki aje yepuŋdya.

Yesu a luggu kalokak iŋwan ti somot

(Köti Marako 1.16-20; Luka 5.1-11)

18A na wöröjine Yesu i kijit na tor na Galilaya nu, a nye meddi luŋasirik murek, Simona logon luou a Petero, se ko Aŋöarea luŋaser lonyit, gubaddu ku ’yi i tör, kogwon se a ŋutu kalokak ti somot. 19A nye kulyani ko lepeŋat adi, Kipuŋdye ta nan, a nan mo tiŋdi ta i jikuŋdyö na ŋutu köyö ni gwoso ŋutu logon jikuŋdyö somot ko ku ’yi. 20a lepeŋat kö ’yi ku ’yilan kase adi wulek, a kepoddi lepeŋ.

21A na tirikin ŋeröt nu, a nye köti meddi kulye ŋutu murek logon a luŋasirik, Yakobo ŋuro lo Jebedayo se ko Yoane luŋaser lonyit, gwon i ki ’bo kata i pirit na geleŋ ko Jebedayo monye lose ririgga ku ’yilan kase. A nye luŋgi lepeŋat? 22A de ’de se kölökiŋdye ki ’bo se ko monye lose, a se kepoddi lepeŋ.

Yesu a kitakiŋdya ŋutu jore parik

(Köti Luka 6.17-19)

23 # Mat 9.35; Mar 1.39 A Yesu wöröni i Galilaya liŋ, totodinöddu kase i kadijik momoresi, ko totokuöddu Loŋe Lo ’but lo Tumatyan, ko totokeladdu ŋutu i twana liŋ ka ’de ka ’de ko i gilösi liŋ, 24a lore i kulya ti lepeŋ kuörö i jur lo Suria ’bukuluŋ, nyena a ŋutu joŋdi ŋutu kase kanyit ni logon ŋoŋoŋga ko twana ka ’de ka ’de, ko logon totomie ko gilosi ka ’de ka ’de, ko logon a moka ko mulökö, ko lo gwon ko lomerya, se ko se logon a babatatu mugunya kase a twatwa, a nye iŋge toke se. 25a ŋutu jore parik kepoddi lepeŋ. Kilo ŋutu po Galilaya, ko Dekapoli, ko Yerusalema, ko Yudaya, ko i nu pele na Yardene.

Currently Selected:

Matayo 4: BBE

Highlight

Copy