Matayo 3

Yoane Kabatisanit a tokujö Loŋe Lo ’but

(Köti Marako 1.1-8; Luka 3.1-9, 15-17; Yoane 1.19-28)

1Nyena i ŋinu diŋit a Yoane Kabatisanit lo poŋdi a tokuje i yöbu na Yudaya adi, 2#Mat 4.17; Mar 1.15Löpuŋge ta töilyet kogwon Tumatyan na Ki aje yepuŋdya. 3#Yis 40.3Kogwon ŋilo a nye logon nebi Yisaya köju a jambu i kulya kanyit adi,

Gworo lo lele ŋuto wowoŋon i yöbu adi,

Yayaraki ta kiko lo MATAT jojo, rine ta gwokiot kanyit gwogwo.

4 # 2 Mor 1.8 A Yoane iŋge jupu boŋgo nagon tetena ko kupir ti kamilo, ko a dukukiŋdyö gom nagon a ’böriköt kanyit i mukök, a kinyo lonyit gwe a mayat se ko siwatat na mu ’diŋ. 5A ŋutu ti Yerusalema ko ŋutu ti Yudaya ’bukuluŋ, se ko ŋutu ti jur ’bukuluŋ lo diŋö ko Yardene, iti ko lepeŋ yu, 6a lepeŋ iŋge batiddya se i kare Yardene, a se tuŋge toronjin kase.

7 # Mat 12.34; 23.33 Ama a na meddi lepeŋ Parusijin jore se ko Sadokejin jore poŋdya i batisa nu, a nye pije se adi, Ta torela ti munuö, ŋa lo tokujöŋdu ta i woran na popo nu, anyen ta rwörwöddu le?

8Koŋdi ta ŋo nagon kwekiŋdya adi ta ’diri aje löpuggö töilyet, 9#Yoa 8.33an ta ko yeyeju ta kasu i töilyet adi, Abarayama a merenye likaŋ. Nan takiŋdya ta adi Ŋun bubulö pipiluŋdya nyakwariat ti Abarayama ma ’di i kilo ŋurupö. 10#Mat 7.19Ma ’di soŋinana tulu a tetenaki ajo anyen tokori kaden i kokori. Kaden liŋ logon ti radan ludweki lo ’but kilo toko kak agubani i kimaŋ. 11Nan lo batiddya ta ko piŋo anyen kwekiŋdya adi ta aje löpuggö töilyet. Ama lele ŋilo pöpö köyö i mukök logon riŋit nanyit a duma lwölwoŋ nio, logon nan ti jukin ’doggu kamuka kanyit. Lepeŋ mo batiddya ta ko Mulokötyo Loke ko kimaŋ. 12A nye gwe ko köbi setet kanyit i konin, a nye moseddi ’bolot liŋ lo gwon kanyit i pirit gwutet na ’bolot kulo, a yuŋdye ’bolot kanyit i gugu, ama a nye mo ’yuŋe pudi ko kimaŋ nagon ti bulö peŋa.

Batisa na Yesu

(Köti Marako 1.9-11; Luka 3.21-22)

13Nyena a Yesu ŋiu kaŋo i Galilaya a poŋdi Yardene ko Yoane ni i batisa ko lepeŋ. 14Ama a Yoane ködyö möŋi teŋgu lepeŋ adi, Do ködyö lo batiddya nan, a do kölumbö lo poŋdi köyö ni! 15Ama a Yesu waddi lepeŋ adi, Söŋinana ti gwe sona, kogwon ködyö a na ’but koyi kökon ŋo liŋ nagon Ŋun ’de ’dekan i ŋilo kiko. Nyena a Yoane ruŋge batiddya lepeŋ. 16a nagon Yesu aje batisa nu, ’de ’de a nye poŋdi kaŋo i piŋo kata, mete, a ki iŋge ŋaju, a nye meddi Mulökötyo lo Ŋun poŋdi gwoso gure a ’duki ko lepeŋ loki; 17#Sul 22.2; Sau 2.7; Yis 42.1; Mat 12.18; 17.5; Mar 1.11; Luk 9.35mete, a gworo lo kuu ki yu adi, ŋilo a pilili liŋ lo Ŋuro lo nyanyara, logon nan a lyöŋgi parik lo.

Currently Selected:

Matayo 3: BBE

Highlight

Copy