JAKOB 4

Ka jingïalok bad ka pyrthei

1Nangno ki wan ki jingïaleh thma, bad nangno ki jingïania hapdeng jong phi? Ym nangta hi, na kita ki jingkwah brai jong phi kiba ïaleh thma ha kita ki dkhot jong phi? 2Phi kwah eh, bad phim ïoh: phi pynïap noh bad phi sngewpihuiñ, te phim lah ban ïoh; phi ïania bad phi ïaleh thma, hynrei, phim ïoh, namar ba phim pan. 3Phi pan, te phim ïoh pdiang, naba phi pan bymdei, khnang ba phin ïoh pynlut keiñ ha kita ki jingkwah brai jong phi. 4Phi kiba klim, hato phim tip ba kata ka jingïalok bad ka pyrthei ka long ka jingshun ïa U Blei? namar kata, uno uno ruh uba mon ban long u lok ka pyrthei, u pynlong ïa lade uba shun ïa U Blei keiñ. 5Ne phi mut ba Ka Jingthoh ka ong lehnohei? “Kata ka mynsiem ba u pynshong ha ngi ka kwah eh kat ban sngewpihuiñ”? 6#Pro. 3:34.Hynrei, u ai ïa ka jingaiei ba kham bun: naba kumta la ong: “U Blei u ïaleh pyrshah ïa kiba sngewkhraw, hynrei, ha kiba sngewrit u ai ka jingaiei.” 7Namar kata, to da pynkohnguh ïa lade ha U Blei; hynrei, to ïaleh pyrshah ïa u Soitan, te un phet ïap noh na phi. 8To wan hajan ïa U Blei, te un wan hajan ïa phi. To thet noh ïa la ki kti, ko phi ki bapop, bad to pynkhuid noh ïa la ki dohnud, ko phi kiba synrop mynsiem. 9To phin sngewlanot khop, bad to phin sngewsih, bad to phin ïam: to ai ba yn pynkylla noh ïa kata ka jingrkhie jong phi sha ka jingïam, bad ïa kata ka jingkmen jong phi sha ka jingsngewsih. 10To phin pynrit ïa lade ha khmat U Trai, te un pynkhraw ïa phi.

La adong ïa ka jingkren siar sniew

11To wat ïakren pyrshah paralok hi, ko parabangeit. Jar uba kren pyrshah ïa la u parabangeit, lane uba bishar ïa uta u parabangeit jong u, u kren pyrshah keiñ ïa ka hukum, bad u bishar ïa ka hukum: hynrei, lada me bishar ïa ka hukum, mem long u nongleh ïa ka hukum, hynrei, u nongbishar. 12Don tang uwei u nongai hukum bad u nongbishar, uba lah ban pynim bad ban pynjot: ma me, me long uei ba me bishar ïa uwei pat?

Ka jingmaham ïa kiba kren sarong

13 # Pro. 27:1. To mynta, phi kiba ong, “Ha kane ka sngi ne lashai ngin ïaleit sha kane ne kata ka nongbah; bad ngin ïashong hangta shi snem, bad ngin ïakhaïi bad ngin ïaïoh nong:” 14hynrei, haba phim tip ïa kaei ka ban jia ha kaba lashai. Kaba kumno kata ka jingim jong phi? Namar ka long u lyoh uba mihpaw ïa tang shibit, ynda kumta te, u da jah noh jar. 15Naba kumta, ka la dei ïa phi ban ong, “Lada mon U Trai, ngin im, bad ngin leh ruh ïa kane lane ïa kata.” 16Hynrei, mynta pleng phi leh kmen ha kita ki jingkren sarong jong phi: ka jinglehkmen kum kata baroh ka long ka basniew. 17Namar kata, ha uba tip ban leh ïa ka babha, bad u bymleh, ha uta keiñ ka long ka pop.

Currently Selected:

JAKOB 4: KHB

Highlight

Copy