JAKOB 5

Ka jingmaham ïa ki bariewspah

1To mynta phi ki bariewspah, to ïam da lynñiar eh namar kita ki jinglanot khop jong phi kiba wan ha phi. 2#Mat. 6:19.Kata ka spah jong phi ka la pyut noh, bad kita ki jaiñkup jong phi ki la bam khñiang. 3Ïa kata ka ksiar bad ïa kata ka rupa jong phi, la bam sarang; te kata ka jingsarang jong ki, kan long sakhi pyrshah ïa phi, bad kan bam duh ïa ka doh jong phi kum ka ding. Phi la kynshew la ka jingkynshew ha ki sngi ki bakhatduh. 4#Deu. 24:14,15.Ha khmih, kata ka bainong jong kita ki nongtrei kiba la ot ïa ki lyngkha jong phi, ïa kaba la bat klop noh ma phi, ka kyang kyrpad; te kita ki jingkyang jong kita kiba la ot ki la leit bsut sha ki shkor U Trai ki Paid#5:4 U Trai ki Paid: U Trai ki Paid.. 5Phi la shongsuk sarong ha kata ka khyndew, bad phi la im pahuh pahai; phi la pynsngaid ïa ki dohnud jong phi ïa ka sngi ka jingpynïap. 6Phi la pynrem noh, phi la pynïap noh ïa uta u bahok; te um ïeng ïaleh pyrshah ïa phi.

Ka jingïaishah bad ka jingduwai

7Namar kata, to shah slem, ko parabangeit, haduh kata ka jingwan U Trai. Ha khmih, uba rep u ap khmih ïa u soh bakor jong ka khyndew, u da ïai-ap slem ïa u, tad ynda u la ïoh pdiang ïa u slap bashuwa bad bakhatduh. 8To ïashah slem ruh ma phi, to pyneh skhem ïa ki dohnud jong phi, naba kata ka jingwan U Trai ka la jan. 9To wat ïakren khñium paralok hi, ko parabangeit, ba yn ym pynrem ïa phi: ha khmih, uta U Nongbishar u ïeng keiñ ha khmat ka jingkhang. 10To shim, ko parabangeit jong nga, ïa kita ki nongïathuhlypa kiba la kren ha ka kyrteng U Trai, kum ka rukom ka jingshahshitom bad ka jingshahslem. 11#Job. 1:21,22; 2:10; Salm. 103:8; 111:4.Ha khmih, ngi ñiew suk ïa kita kiba ïaishah: phi la ïohsngew shaphang ka jingïaishah u Job, bad phi la ïohi ïa kata ka jingpynkut U Trai, ba U Trai u long uba dap da ka jingisynei, bad uba leh isynei thoiñ.

12 # Mat. 5:34-37. Hynrei, nalor kiei kiei baroh, ko parabangeit jong nga, to wat smai, lymne da ka bneng lymne da ka khyndew, lymne da kano kano kawei pat ka jingsmai: hynrei, kaba “Ho-oid” jong phi, to ai kan long “Ho-oid”, bad kaba “Em” jong phi, “Em”; ba phin ym hap ha ka jingbishar.

13Don uno uno ruh uba shah shitom hapdeng jong phi? to un duwai. Don uno uno ruh uba sngewkmen? to un rwai ïaroh. 14#Mrk. 6:13.Don uno uno ruh u bapang hapdeng jong phi? to un da khot ïa ki tymmen basan jong ka balang; bad to kin duwai na ka bynta jong u, haba ki la pynsleh ïa u da ka umphniang ha ka kyrteng U Trai; 15te kata ka jingduwai ka jong ka jingngeit kan pynkhiah ïa uta u bapang, bad U Trai un pynïeng ïa u; bad lada u la leh ïa ki pop, ïa kita yn map noh ïa u. 16To ïaphla noh paralok hi ïa la ki jingpalat, bad to ïaduwai na ka bynta paralok hi, ba yn dup pynkhiah ïa phi; ka jingkyrpad minot u bahok ka lah shibun. 17#1 Syiem. 17:1; 18:1; Luk. 4:25.U Elias u la long u briew uba ïadei jinglong kum ngi; te u la duwai da ka jingduwai ba kan ym hap slap, te kam shym la hap slap ha kata ka khyndew, lai snem hynriew bnai; 18#1 Syiem. 18:42-45.te u la duwai pat, bad ka bneng ka la ai ïa u slap, te kata ka khyndew ka la pynmih noh ïa u soh jong ka.

19Ko parabangeit, lada uno uno ruh hapdeng jong phi u la ïaid sakma noh na ka jingshisha, bad lada uno uno ruh u da pynphai pat ïa u, 20#Pro. 10:12.to un tip ba uta uba la pynphai pat ïa u bapop na ka jingïaid sakma ka lynti jong u, un pynim ïa ka mynsiem na ka jingïap bad un tap noh ïa ki bun byllien ki pop.

Currently Selected:

JAKOB 5: KHB

Highlight

Copy