JAKOB 3

Shaphang u thylliej

1To wat long phi ki nonghikai babun, ko parabangeit jong nga, haba tip ba ngin ïoh diang ïa ka jingbishar ba kham khraw. 2Namar ha bun kiei kiei ngi jynthut baroh. Lada uno uno ruh um jynthut ha ka ktien, une u long u briew bajanai, uba lah ban synshar ïa ka met ruh baroh kawei. 3Ha khmih, ngi buh ïa ki lakam ha ki shyntur ki kulai khnang ba kin kohnguh ïa ngi, ngi pynphai ruh ïa ka met jong ki baroh kawei. 4Ha khmih ruh ïa ki lieng bah, la ki khraw katta katta, bad ba la beh ruh ïa ki da ki lyer bajur eh, pynban, la pynphai ïalam ïa ki da i boitha i barit eh, shano shano ruh katba mon ka jingthmu uba bat boitha. 5Kumta ruh, u thylliej u long tang i dkhot i barit, hynrei, u shait kren khraw eh. Ha khmih, katno ka shi stai bah ki dieng i ding i barit i pynmeh noh!

6Te uta u thylliej u long ka ding: kata ka pyrthei ka jingbymhok long u thylliej hapdeng ki dkhot jong ngi, uba pyntngit ïa ka met baroh kawei, bad uba wiang noh ïa ka shalyntem ka jingpynlong, bad la wiang noh ïa u hi da ka jong ka dujok. 7Namar ïa ka kynja baroh ki mrad khlaw ruh bad ki sim, ki bapar ruh bad kiba ha ka duriaw, la pynjuh bad la ju pynjuh da ki kynja bynriew: 8hynrei, ïa uta u thylliej ym don u briew uba lah ban pynjuh; u long ka jingsniew bym lah synshar, uba dap keiñ da ka bih bapynïap noh. 9#Jen. 1:26.Da une hi, ngi kyrkhu ïa U Blei uba U Kpa; bad da une hi, ngi tim noh ïa ki briew, ïa kiba la thaw kat kum ka dur U Blei. 10Na kajuh hi ka shyntur ka mih ka jingkyrkhu bad ka jingtim. Kam dei, ko parabangeit jong nga, ïa kine kiei kiei ruh ban long kumta. 11Hato ka umpohliew na kajuh hi ka thliew ka pynmih ïa ka um ka babang bad ïa ka bakthang? 12Hato u dieng Dumbur u lah ne em, ko parabangeit jong nga, ban sei ïa ki soh Olib, lane u dieng soh Waiñ ïa ki soh Dumbur? lymne ka um mluh kam lah ban pynmih ïa ka babang.

Ka jingstad kaba na jrong

13Uei u bastad bad u bashemphang hapdeng jong phi? to un da pynpaw da ka jinglong babha jong u ïa kita ki jingleh jong u da ka jingjemnud ka jingstad. 14Hynrei, lada phi don ka jingpihuiñ bakthang bad ka jingpyneh sat ha ka dohnud jong phi, wat ïalamler pyrshah ïa ka jingshisha. 15Kane ka jingstad kam long kata kaba wan hiar na jrong, hynrei, kaba kynja pyrthei, kaba kynja doh, kaba kynja ksuid keiñ. 16Namar ha kaba don ka jingpihuiñ bad ka jingpyneh sat, hangta don ka jingkhihwin bad ka jingleh basniew baroh. 17Hynrei, kata ka jingstad kaba na jrong ka long nyngkong ka bakhuid, ynda kumta, kaba suk, kaba shah jemnud, kaba ngeit eh, kaba dap da ka jingisynei bad da ki soh babha, kaba khlem ñiew shiliang khmat, bad kaba khlem arsap. 18Te ïa u soh ka hok la bet ha ka jingsuk ïa kita kiba pynïasuk.

Currently Selected:

JAKOB 3: KHB

Highlight

Copy