Lir. 39

Yosefu ne mukha Potifa

1Nono Yosefu ayilwa e Misiri, mala Potifa, omukhulu owe banamae babaliindanga Farao, amukula khukhwama khu Baisimaeli ba baaba ne bamuyilile emwalo eyo. 2#Bikh. 7.9 Wele Omunyali Owa Bioosi aba ne Yosefu, ne aba omundu owe bukhili mala amenya munju eyo omwami wewe Omumisiri. 3Omwami wewe abona ali Wele Omunyali Owa Bioosi aaba ne Yosefu. Wele Omunyali Owa Bioosi akhola koosi niko Yosefu akhola khuba kamalayi. 4Nio Potifa asiima Yosefu mala amukhola abe omukholela, amukhola abe owimeelela enju yewe mala amua bunyali khu buli sisiindu nisio aba nasio. 5Khukhwama khu siise nisio amukhola omwimeelesi we enju yewe, ne khumua bunyali khu buli siindu nisio aba nasio, Wele Omunyali Owa Bioosi abiita enju eyo Omumisiri sikila Yosefu. Chikhabi cha Wele Omunyali Owa Bioosi chaba khu bioosi nibio aba nabio munju ne emukuunda. 6Nio alekha bioosi nibio aba nabio mu bwimeelesi bwa Yosefu. Ne nga aba naye se ebaasiakho sisiindu siosi siosi tawe, ne kakhali siakhulia nisio alichanga siong'ene.

Yosefu aba ne kamaani lundi aaba owe lukoondo lulayi, 7Enyuma we siise, omukhasi wo mwami wewe amwikoomba mala amuboolela ali, “Kona ne nase.” 8Ne kakhali Yosefu aloba mala amuboolela ali, “Lola, omwami wase se enaniangakho khu siindu siosi siosi munju yewe tawe, mala ara buli siindu mu bunyali bwase, 9se aliio omukhulu munju yino khukhukhila ese tawe, namwe se ayinyima sisiindu siosi siosi tawe, ne okhali ewe wamwene, sikila oli omukhasi wewe. Nono ese nyala nakhola ndiena sifwaabi siboofu sino, mala khole bubwoni khu Wele?” 10Ne akhaba ne areebanga Yosefu buli busiele, Yosefu se arekeeresianga kakeewe tawe mala se afukiilila khukona ne naye tawe. 11Ne kakhali endaalo ndala, nga Yosefu ne engila munju khukhola kimilimo kiewe, omundu okundi khu bakholi be munju se abamo tawe, 12mukha Potifa amukwakho atiila engubo yewe aloma ali, “Kona ne nase.” Ne kakhali Yosefu afwarukha mungubo akilekha mu makhono kewe, elukha mala arura munju. 13Ne nga abona ali efubarure alekhile engubo yewe mu makhono kewe, mala elukhe arurire munju, 14alaanga bakholi be munju mwewe, mala ababoolela ali, “Lola, omuseecha wase areera Omueburania yuno muno khukhufwolobia efwe, ama khwicha mu lusiro nilwo ndi bali angwekho, mala nakukuula lukali, 15ne nga ne aulile ne ngukuula, elukhe arura munju alekha engubo yewe.”

16Omukhasi abiikha engubo eya Yosefu nabwila omwami owa Yosefu nga ne aloota. 17Nio omukhasi amuboolela kamakhuwa mene ako ali, “Nasioobi mueburania niye ewe wakhureerera echile mu lusiro niio ndi bali afwoloobie ese, 18ne nga ngukuulile elukhe arura munju alekha engubo yewe niio ndi.”

19Nga omuseecha wewe ne aulila kamakhuwa niko omukhasi wewe amuboolela ali, “Kano niko omukholi wowo akholele ese,” Aambwa lirima lukali. 20Abukula Yosefu amuyila mu siboe, abuundu niio baboe bo mwami baboangwa mala amenya mubwenomwo. 21#Bikh. 7.9 Ne kakhali Wele Omunyali Owa Bioosi aaba ne Yosefu mala amwekesia busiime bukhawao tawe, ne khumua kumwalaalo mumoni mwo muliindi we mu siboe. 22Omuliindi we mu siboe akhola Yosefu khuba omwimeelesi owe baboe boosi. Ne siosi siosi sisiekholekhanga mu siboe, Yosefu niye owakholanga. 23Omuliindi we mu siboe se enaana mu siindu siosi siosi sisiaba mu bwimeelesi bwa Yosefu tawe sikila Wele Omunyali Owa Bioosi aaba ne Yosefu, ne buli siindu nisio akhola Wele Omunyali Owa Bioosi asikhola khuba silayi.

Currently Selected:

Lir. 39: LUBUKUSU

Highlight

Copy