Lir. 40
40
Yosefu aboola sifuno sie kamarooro ke Baboe
1Enyuma we siise, Omukhulu owe bakholi ba bang'oonelanga Farao we Misiri endali ne khumuelesia, no mukhulu owe babaandu ba bapaanga kimikaati kia Farao, bakhola kamabi khu Farao. 2Nio Farao akhalalila bakhulu bewe babili abo, omukhulu owe bakholi ba bamung'oonelanga endali no mukhulu owe bakholi ba bapaanga kimikaati kiewe, 3mala abekalila munju eyo mukhulu owe kamae, munju nimwo Yosefu aaba ne abowa. 4Bamenya mu siboe omwo khu siise mala omukhulu owe kamae akhola Yosefu khuba omwimeelesi, lundi omuliindi wabwe.
5Nio siilo silala, omukhulu owe bakholi bang'oonanga endali oyo no mukhulu owe khu khuupa kimikaati kia Farao owa Misiri, ba baba mu siboe, baroora, buli mulala kamarooro kewe, ne buli kamarooro ne sifuno siako. 6Nga Yosefu ne abachaakho kumutikhinyi abona balikho baayaaya, 7abareeba ali, “Siina sikila luno ne mwiembeleele?” 8Bamukobosia bali, “Khuroorire kamarooro, ne se aliio omundu onyala akhuboolela sifuno siako tawe.”
Yosefu abakobosia ali, “Wele niye oanaanga bunyali bwe khubuula bifuno. Ese musaba, mumboolele kamarooro kenywe.”
9Nio, omukhulu owe khung'oona endali, aboolela Yosefu kamarooro kewe ali, “Mu marooro kase mboone kumusabibu ebweeni wase, 10kulikho chisakia chitaru. Khangu busa, nga kwasisina kamasaafu, kwamulikha mala kwaama chisabibu, mala charoba. 11Sikoombe sia Farao siaba mukhono mwase, nabuta chisabibu nakhamululilamo mala naelesia Farao sikoombe esio.”
12Yosefu amukobosia ali, “Sino nisio sifuno siako: chisakia chitaru chili chindaalo chitaru. 13Mu ndaalo chitaru Farao alakhubeela, mala akhukobosie khu milimo kiowo, ne olamwakaanisia sikoombe nga wakholanga khale ne oli omukhulu owe khung'oona endali yewe. 14Ne nosiima khebulile, nga buli siindu ne silikhubeela silayi, mala ukholele kamalayi, undomalomekho khu Farao mala unjeete ndure munju yino. 15Ese nebwa busa khukhwama mu sibala sie Baeburania ne akhaba eno yosi se nakhola sisiindu nisio khoyela khureerwa mu siboe tawe.”
16Nga omukhulu owe khung'oona kimikaati ne abona ali sifuno sie kamarooro sili silayi, aboolela Yosefu ali, “Ese, sesi ndoorire kamarooro, abele netiuukhile khu murwe bikono bie kimikaati bitaru 17ne sikono sie khungaaki khu bioosi sibelemo chingano choosi che biakhulia bia Farao, ne kakhali chinyuni chibibochilenge khukhwama mu sikono khu murwe kwase.”
18Ne Yosefu amukobosia ali, “Sifuno siako nisio sino: bikono bitaru bili chindaalo chitaru. 19Mu ndaalo chitaru Farao akhakhurusiekho kumurwe! Ne akhasuunge kumubili kwowo khu murongooro mala chinyuni chikhakhubooche.”
20Khu ndaalo ekhola khataru, yaba eye khukhebulila khusaalwa khwa Farao, Farao akholela bakholi bewe naikara emboofu. Arusia omukhulu owe khumung'oonela endali no mukhulu owe khung'oona kimikaati mu siboe, mala abareera ebweeni we bakholi bewe. 21Akobosia omukhulu owe khumung'oonela endali khu milimo kiewe mala akaanisia Farao sikoombe mu makhono. 22Ne kakhali asunga omukhulu owe khung'oona kimikaati khu murongooro, khuloondekhana nga Yosefu ne ababoolela. 23Ne kakhali, omukhulu owe khung'oonela Farao endali se akhebulila Yosefu tawe amwibilila.
Currently Selected:
Lir. 40: LUBUKUSU
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
