Lir. 41

Yosefu aboola sifuno sie kamarooro ka Farao

1Enyuma we kimiiko kibili kimimufu, Farao aroora ali, aaba emile a luuchi lwa Naili. 2Nio chikhaafu saba chindayi lundi chikhomefu charura mu Naili mala chaaya bunyaasi. 3Chikhaafu chichiindi saba chifutuufu lundi ching'au charura mu Naili chachiloondakho enyuma, mala checha chema siimbi achiindi echo khu sikiingi sia Naili. 4Mala chikhaafu chifutuufu lundi ching'au echo chalia chikhaafu chimiufu lundi chikhomefu. Mala Farao asisimukha. 5Akona mala aroora lukhola khabili. Abona bikala saba bie engaanu, biboofu lundi bitukunyafu ne bilikho bichoela khu sisina silala. 6Ne enyuma wabio bikala saba biamela, bie kamatere busa, ne luucho lwe mu sichiimi lwaba lwabiomia. 7Nio bikala bie kamatere busa, biamila bikala saba biboofu lundi bitukunyafu ebio. Mala Farao asisimukha, mala amanya ali kamarooro niko. 8#Dan. 2.2 Nio kumutikhinyi eembeelela, mala arumania alaanga be kamaya ne bakesi boosi be mu Misiri mala ababoolela kamarooro kewe ne se abao onyala khumuboolela sifuno siako tawe.

9Nio omukhulu owang'oonelanga Farao endali amuboolela ali, “Endaalo yino nakhebuliile kamakhiikha kase. 10Nga Farao ne akhalalila bakholi bewe mala anda ese ne omung'ooni owe kimikaati mu siboe, munju eyo omukhulu owe kamae kakaliindanga Farao, 11khwaroora silo silala, niye ne nase. Buli mulala aaba ne kamarooro ne sifuno siako. 12Omusoleeli Mueburania abayo ne nafwe, aba omukholi owo mukhulu owe kamae kakaliinda omwami. Aakhuboolela bifuno bie kamarooro kefwe, buli sia mulala khuloondekhana ne kamarooro kewe. 13Ne nga akhuboolela, kecha kaba kario, ese nakalusibwa khu milimo kiase, ne omung'ooni we kimikaati asungwa.”

14Farao arumania, alaanga Yosefu, mala bamureera khangu khukhwama mu siboe. Ne nga ne abeka akaluukhasia chingubo, echa ebweeni wa Farao. 15Nio Farao aboolela Yosefu ali, “Ndoorire kamarooro mala se aliio omundu onyala amboolela namanya sifuno siako tawe, ne nauliile ne baloma khwiwe bali ne oulila kamarooro onyala waboola sifuno siako.”

16Yosefu akobosia Farao ali, “Ese senyala tawe, ne kakhali Wele alaelesia Farao sifuno sisienyekhana.”

17Farao aboolela Yosefu ali, “Mu marooro kase mbele nemile khu sikiingi sie luluuchi lwa Naili, 18mala chikhaafu saba chikhomefu lundi chimiufu miu, charura mu Naili mala charakikha khukhwaaya bunyaasi. 19Ne chikhaafu chichiindi saba charura enyuma wacho, chimbi, chifutuufu lundi ching'au lukali nicho khaabonakho mu sibala sia Misiri sioosi tawe. 20Nio chikhaafu ching'au lundi chifutuufu echo chalia chikhaafu che khunyoa chikhomefu echo. 21Ne nga chaba ne chichiliile, mbao abele omundu onyala amanya ali chachiliile tawe, sikila charama busa chifutuufu nga mu khurakikha. Mala nasisimukha. 22Lundi naroora, nabona mu marooro kase bikala saba bie engaanu bili khu sisina silala. Biaba biboofu lundi bibiafumbara bulayi. 23Ne bikala bibiindi bibianiaala, bitiiti bibiomisibwa ne luucho lwe bukwe biamela enyuma we ebio. 24Nio bikala bitiiti biamila bikala saba bilayi. Mboleele bakhola kamaya, ne se abeleo onyala amboolela sifuno tawe.”

25Nio, Yosefu aboolela Farao ali, “Kamarooro ka Farao kali busa malala, Wele afunuliile Farao nisio ali siimbi khukhola. 26Chikhaafu saba chindayi chili kimiiko saba ne bikala saba bilayi bili kimiiko saba, kamarooro kali busa malala. 27Chikhaafu saba ching'au lundi chifutuufu chicharura enyuma we echo chili kimiiko saba ne bikala saba biikhalimo sindu tawe bibiomisibwa ne luucho lwe bukwe bioosi bili kimiiko saba kie enjala. 28Kali busa nga mboleele Farao, Wele ekeesie Farao niko ali siimbi khukhola. 29Kileecha kimiiko saba kie enjikura engali lukali mu sibala sia Misiri siosi. 30Ne kakhali enyuma wakio kileechao kimiiko saba kie enjala, mala enjikura yoosi ekhebililwe mu sibala sia Misiri sioosi. 31Enjikura se elimanyikha mu sibala tawe, sikila enjala elikiloondakho, sikila eliba endafu lukali. 32Ne khukalukhilamo khwe kamarooro ka Farao khwekesia khuli Wele arereo likhuwa lino mala alalikhola likholekhe mu ndaalo ngekhe chichiicha.

33“Nono, khwako Farao kharobore omundu oli owe limanya lundi omukesi, mala amure mu bwimeelesi bwe sibala sia Misiri sioosi. 34Lekha Farao arobore baloleelesi khu sibala siosi, mala babukule silala khu biraano bie biakhulia bie sibala sia Misiri mu siise sie kimiiko saba kie enjikura. 35Mala babuusie biakhulia bioosi bie kimiiko kimilayi kilikho kikiicha kino babibuunge asi we bunyali bwa Farao, mu ngoba, mala babiliinde. 36Biakhulia ebio biliba libiikhilo khulwe sibala mu miiko saba kie enjala elikho yiicha mu sibala sia Misiri. Nio babaandu bakhafwa mu njala tawe.”

Yosefu akholwa omwami

37Likhuwa lino liaba lilayi khu Farao ne bakasa bewe. 38Mala Farao areeba bakasa bewe ali, “Khunyala khwanyoola omundu nga Yosefu yuno niye Roho owa Wele alimo ku?” 39Nio Farao aboolela Yosefu ali, “Sikila Wele akhwekeesie ewe kano koosi, se aliio yesi yesi owe limanya lundi omukesi nga ewe tawe. 40#Bikh. 7.10 Ndakhura khu bwimeelesi bwe enju yase, ne khu baandu base boosi balaria kamalaka kowo, ne kakhali khuloondekhana ne bubwami bwong'ene ese ndaba angaaki wowo.” 41Mala Farao aboolela Yosefu ali, “Nakhuroboore ewe obe omwami khu sibala sia Misiri sioosi.” 42#Dan. 5.29 Farao afuula embete eye simanyisio khukhwama khu mukhono kwewe akifwara khu mukhono khwa Yosefu. Amufwara chingubo chimiufu cha katani mala amufwara lunyololo lwe sahabu mwikosi. 43Nio amwikhasia mu likaari liewe lia khabili mala babaandu batima ebweeni wewe ne balaangilila khu baandu bali, “Sikama!” Farao amiisie Yosefu khu sibala sia Misiri sioosi. 44Lundi Farao aboolela Yosefu ali, “Ese ndi Farao, mbao omundu mu sibala sia Misiri sioosi, olasuta kumukhono namwe sikele ewe ne okhaanile kumunwa tawe.” 45Nio Farao atiuukha Yosefu lisina ali Safenati-panea, mala amua Asenati, omukhaana owa Potifera, omusaayi owa Oni, amuyile abe omukhasi wewe. Nio Yosefu akeenda mu sibala sia Misiri sioosi.

46Yosefu aba ne bukhulu bwe kimiiko kamakhumi kataru nga engila mu bukholi bwa Farao omwami owa Misiri. Mala Yosefu arura ebweeni wa Farao, acha mu sibala sia Misiri sioosi. 47Mu miiko saba kie enjikura sibala siama bibiaamo bikali lukali. 48Ne Yosefu abuusia biakhulia bioosi bie kimiiko saba nga enjikura yaba mu sibala sia Misiri. Mala abuunga biakhulia mu buli lukoba, khukhwama mu mikuunda kikiaba siimbi. 49Mala Yosefu abuunga biakhulia bikali lukali nga kumuyekhe nabwila alekha khubipiima, sikila biatuuma sikelo.

50Kimiiko kie enjala ne kisiili khukhwola tawe Yosefu aba asaalile babaana babili mu Asenati, omukhaana owa Potifera, omusaayi owa Oni. 51Yosefu atiuukha omubele lisina ali Manase#41.51 Manase: lisina lino lilomekha nga lie Lueburania liliekesia “Khukila wibilile.” sikila aloma ali, “Wele akholile nibilile buandalafu bwase bwoosi, ne enju eya paapa wase yoosi.” 52Lisina lio mwana owa khabili, atiuukha ali Efuraimu#41.52 Efuraimu: lisina lino lilomekha nga lie Lueburania liboola lili “Aana babaana.”, sikila aloma ali, “Wele akholile ese saale babaana mu sibala sie sibi siase.”

53Kimiiko saba kie enjikura kikiaba mu sibala sia Misiri kiawa, 54#Bikh. 7.11 mala kimiiko saba kie enjala kiarakikha nga Yosefu ne aloma. Enjala yabao mu bibala bioosi, ne kakhali mu sibala sia Misiri sioosi, biakhulia biabamo. 55#Yn. 2.5 Nga enjala ne yakwa mu sibala sia Misiri sioosi, babaandu balilila Farao abae siakhulia. Mala Farao aboolela ba Misiri boosi ali, “Khemuche khu Yosefu. Siosi siosi nisio amuboolela, khola.” 56Nio, nga enjala ne yamalatana khu sibala sioosi, Yosefu ekula birara, mala akusia biakhulia khu Bamisiri, sikila enjala yaba endafu lukali mu sibala sia Misiri. 57Khutasa khwako, babaandu becha e Misiri khu Yosefu khukula siakhulia, sikila enjala yaba endafu mu sibala mwoosi.

Currently Selected:

Lir. 41: LUBUKUSU

Highlight

Copy