Lir. 38

Yuda ne Tamari

1Mu biise ebio Yuda ekha arura mu bawandaaye acha amenya wo omundu okundi Omuatulami owalaangwa bali Hira. 2Ebweeneyo Yuda abonayo omukhaana owo Omukanaani okundi, lisina liewe liaba bali Siua. Amuyila, 3mala amusaalila omwana owe sisoleeli. Yuda atiuukha omwana lisina ali Eri. 4Aesia lundi mala amusaalila omwana owe sisoleeli okundi mala mukha Yuda amutiuukha lisina ali Onani. 5Lundi asaala omwana okundi owe sisoleeli amutiuukha lisina ali Shela. Yuda aba e Kesibu nga omwana yuno ne asaalwa.

6Nio Yuda abukulila omwana wewe omubele Eri, omukhasi. Lisina lio mukhasi liaba bali Tamari. 7Ne kakhali Eri, omubele owa Yuda, aba omumayaanu ebweeni wa Wele Omunyali Owa Bioosi mala Wele Omunyali Owa Bioosi amwiira. 8Yuda aboolela Onani ali, “Kobosia mukha wandaayo okone naye mala osaalile wandaayo babaana.” 9Ne kakhali Onani amanya ali babaana se balaba babewe tawe. Khwako amalilaanga anje kamaani kewe ko museecha nga ne aakonaanga nende ngwa wandaaye, sikila akhakhola ario asaalila wandaaye babaana tawe. 10Ne nilio akhola, se liasiimisia Wele Omunyali Owa Bioosi tawe mala Wele Omunyali Owa Bioosi amwiira yesi. 11Nio Yuda aboolela omukhaana wewe Tamari ali, “Khoche ewenywe, omenye busa nga namulekhwa khukhwola nga omwana wase Shela ne achoa.” Yuda aria ali Shiela yesi akhola ario afwa nga bawandaaye. Tamari acha amenya munju mwa raraawe.

12Enyuma we biise, mukha Yuda, omukhaana owa Siua afwa. Oli kamasika kaweele, Yuda ne omusaale wewe Hira, Omuatulami baniina bacha Timuna niio kamakheese ka Yuda kabekelwa bufuumbo. 13Ne nga Tamari aboolelwa ali, “Masalaao alikho aniina Timuna khubeka bufuumbo bwe kamakheese kewe,” 14efuula chingubo chewe che bunamulekhwa mala ebiimba eneti mumoni mala ekhala asilibwa sia Enaimu lukoba luli amuyila kuucha Timuna, sikila abona ali Shela achoyile mala se aelesibwa amuyile nga omukhasi tawe.

15Nga Yuda ne amubona ebaasia ali ali omulaaya, niye sikila aaba efumile mumoni. 16Acha niio aaba amuyila ao mala amureeba ali, “Nenya ngone ne nawe,” sikila se amanya ali ali omukhaana wewe niye tawe. Amureeba ali, “Ne okona ne nase olambelesia siina?”

17Amukobosia ali, “Kane khurumire emeeme khukhwama mwituuli liase.” Tamari amukobosia ali, “Okhupa sina kumusiingo khukhwola nga ne oreera?”

18Yuda amureeba ali, “Khupila musiingo sina?” Amukobosia ali, “embete eye simanyisio siowo, ne lukoye ne esiimbo yowo.” Nio amua, akona naye mala aesia. 19Tamari enyokha acha engo, afuula lububi mala afwara chingubo chewe che bunamulekhwa.

20Nga Yuda aruma omusaale wewe, Omutulami ne emeeme asikule bibiindu biewe khukhwama khu mukhasi oyo, se amunyoola tawe. 21Mala areeba babaandu be Enaimu ali, “Omulaaya owaba Enaimu amuyila ali waena?”

Bamukobosia bali, “Ano omulaaya se alikhoo tawe.”

22Akobola khu Yuda mala amuboolela ali, “Se namunyoolile tawe lundi babaandu be abwenao balomile bali, ‘Omulaaya se alikhoo ano tawe.’ ”

23Nio Yuda akobosia ali, “Lekha abe ne bibiindu ebio, babaandu bakhola bario bakhuchekha efwe. Bona, murumiile emeeme mala ewe khumunyoola tawe.”

24Oli embi kimieesi kitaru Yuda aboolelwa ali, “Omukhaana wowo Tamari akholile bueeyani ne khutasa khwako anyoolile enda.” Yuda aloma ali, “Khemumurusie mala osibwe.”

25Nga nilwo aba ne alikho arusibwa arumania likhuwa khu masalaawe ali, “Ndi ne enda eyo omundu omwene biindu bino, Khusaba ololeelesie omanye bili bia naanu, embete eye simanyisio, lukoye ne esiimbo.”

26Yuda abimanya mala aloma ali, “Tamari ali owa ng'ali khukhukhila ese, sikila nga ne khamuua omusoleeli wase Shela.” Mala Yuda khukona naye lundi tawe.

27Nga siise sie khusaala ne siola aba ne bukhwana munda. 28Ne nga aba ne alikho asaala, omwana mulala arusia kumukhono mala osaasia akutila aboakho lukoye lubesemu ne aloma ali, oyuno anyoile echa. 29Ne kakhali nga akobosiayo kumukhono kwewe, wandaaye asaalwa. Osaasia aloma ali, “Oata ebweeni busa oriena!” Khwako bamutiuukha bali Peresi#38.29 Peresi: sifuno sie lisina lino mu Lueburania sili “Khufunaka endakaano.” 30Wandaaye amaliilikha asaalwa ne lukoye lubesemu khu mukhono kwewe mala bamutiuukha bali Sera.

Currently Selected:

Lir. 38: LUBUKUSU

Highlight

Copy