Lir. 37

Yosefu ne ba wandaaye

1Yakobo amenya mu sibala nisio raraawe auyilamo, sibala sia Kanaani. 2Luno nilwo lukano lwe luuya lwa Yakobo.

Yosefu ne ali ne bukhulu bwe kimiiko ekhumi na saba ayaanga kumunyele ne bawandaaye, babaana ba Biliia ne Silipa, bakhasi ba raraawe. Yosefu aboolela raraawe kamabi niko bawandaaye bakholanga.

3Isiraeli aaba asiima Yosefu khukhila babaana bewe boosi, sikila aaba omwana niye asaala ne asaakhulue. Mala amunabila engubo endeeyi eye kamakhono kamaleeyi#37.3 engubo endeeyi eye kamakhono kamaleeyi: engubo eye kamakhono kamaleeyi, namwe engubo eye kamapala. kasiimisia. 4Ne nga bawandaaye babona bali paapa wabwe asiima Yosefu khukhilakho nibo boosi, bamubiila mala khulomaloma naye mu muleembe tawe.

5Siilo silala, Yosefu aroora, ne nga aboolela bawandaaye kamarooro kewe batasa khumubiila. 6Ababoolela ali, “Rekeeresia muboolele kamarooro niko ndoorire kano. 7Khubeele khulikho khuboa binywa mu mukuunda mala nabona sinywa siase sienyokha siema bukololofu, ne binywa bienywe biebuusia biabotookhelela sisiase, mala biasisikamila.”

8Bawandaaye bamureeba bali, “Ng'ali ewe olaba omwami mala okhwamiie efwe?” Nio batasa khumubiila lukali sikila kamarooro ne kamakhuwa kewe.

9Yosefu aroora kamarooro kakaandi mala aboolela bawandaaye ali, “Lola, ndoorire kamarooro kakaandi, mala mboone, enyanga, kumwesi ne ching'enieesi ekhumi ne ndala abele bilikho bisikamila ese.”

10Ne nga akaboolela raraawe ne bawandaaye, raraawe amuyibila mala amureeba ali, “Kamarooro lukano siina niko oroorire kano? Ewe wibaasia oli ese, ne maao ne bawandaayo khukheche khwiname asi ebweeni wowo?” 11#Bikh. 7.9 Mala bawandaaye bamukhendekhela, ne kakhali raraawe amenya ne liboola lino mu mebaasio kewe.

Yosefu akusibwa mala ayilwa e Misiri

12Endaalo ndala bawandaaye ba Yosefu basamusia bibiaayo bia paapa wabwe mumayilwe siimbi ne Shekemu. 13Nio Isiraeli aboolela Yosefu ali, “Bawandaayo se basamuusie bibiaayo e Shekemu ta ku? Yiicha khurume khu nibo.”

Yosefu akobosia ali, “Yee, ese ndi ano.”

14Nio raraawe amuboolela ali, “Khoche, mala obone bawandaayo ne bali bulayi lundi obone bibiaayo undeerere likhuwa.” Nio raraawe amuruma khukhwama mu litooma lia Heburoni acha ola e Shekemu.

15Omundu okundi amunyoola mundaa ne alikho acha eyi ne neeyi mala amureeba ali, “Olikho oenja siina?”

16Amukobosia ali, “Ndikho mbenja bawandaayase, khusaba umboolele niio balikho baaya bibiaayo.”

17Omundu oyo aloma ali, “Barekuukhe, sikila mbuliile ne baloma bali khekhuche e Dotani.” Nio, Yosefu aloonda khu bawandaaye abanyoola e Dotani.

18Bamubona ne asiili ataayi ne akhaboolakho tawe mala bamwikuta bali bamwire. 19Baboolana babeene ne babeene bali, “Namarooro oyosi alikho echa. 20Yiicha khumwire mala khumumwaate mu lilala khu maloo kano mala khuche khuboole khuli esolo eye mundaa emuliile, nio khubone nga kamarooro kewe kacha khuba.” 21Ne nga Rubeni aulila lino, akhaka khumuonia, ababoolela ali, “Khukhamwiira tawe.” 22“Mukhachukha sifuki tawe, mumwaate busa mwiloo lie mu sichiimi lino, ne kakhali mukhamutilakho tawe.” Rubeni enya khumuonia, nio amukobosie khu raraawe. 23Nga Yosefu ne ola khu bawandaaye, bamufuula engubo eye kamakhono kamaleeyi ne kamapala esiimisia, niyo aaba ne afwarire eyo. 24Bamuaamba bamumwaata mwiloo. Liloo se liabamo kameechi tawe.

25Nga ne bekhala asi, baaba ne balia, babona Baisimaeli balikho bama Kileati ne chingamia chabwe bekha e Misiri. Baba basutile ekamu, kamafura ne manemane. 26Yuda aboolela bawandaaye ali, “Lili na bukhala sina khwire wandaayefwe mala khukise sifuki siewe? 27Khekhumukusie khu Baisimaeli. Khukhamuyilakho kamakhono kiefwe tawe sikila ali wandaayefwe, lundi ali kamafuki kefwe ne enyama eye kumubili kwefwe.” Mala bawandaaye bafukiilila kakeewe. 28#Bikh. 7.9 Ne nga Bamidiani baboofuli baba ne balikho babira siimbi, bawandaaye#37.28 bawandaaye: Lueburania luli nibo (Bamidiani). bakhweesa Yosefu bamurusia mwiloo mala bamukusia khu Baisimaeli khulwe bitonyi kamakhumi kabili bie efwesa mala bamuyila e Misiri. 29Nga Rubeni akobola sie loo mala alola khubonamo Yosefu tawe, atabula chingubo chewe 30mala akobola khu bawandaaye abareeba ali, “Omusoleeli se ali mwiloo tawe, aba ese ndacha waena?”

31Beera embusi, mala babukula engubo eya Yosefu basiikha mu malasile. 32Baayila engubo eye kamapala kasiimisia khu paapa wabwe, baloma bali, “Khunyoolile engubo yino, kilole ne eli eyo omwana wowo namwe tawe.”

33Akimanya mala aloma ali, “Eli engubo eyo omwana wase! Esolo eye mundaa yamuliile, ndi nang'ali ndi esolo yatabulaake Yosefu mu bitonyi.” 34Yakobo atabula chingubo mala afwara likunia munda mala alila omwana wewe khulwe chindaalo chingali. 35Babaana bewe basoleeli ne bakhaana benyokha bacha khumuoleelesia, ne kakhali aloba khuolelesibwa mala aloma ali, “Tawe ndekhe enje emakoombe khu mwana wase ne siliila busa ndi,” raraawe achiililila khumulila ario.

36Ne Bamidiani baba bamukusiisie mu Misiri khu Potifa, omukhulu owe kamae ka Farao kakamuliindanga.

Currently Selected:

Lir. 37: LUBUKUSU

Highlight

Copy