Mat. 7

Khukhalakila babaandi

(Lk. 6.37-38,41-42)

1“Mukhakhalakila babaandi tawe, mwesi mukhakhola murio mwakhalakilwa tawe. 2#Mk. 4.24 Sikila mulakhalakilwa khuloondekhana ne likhalaka nilio murumbura, lundi sikelo nisio mukelelamo mwesi mulakelelwamo. 3Siina sikila ne obona khasosono khaali mumoni eya wandaayo, ne se obona lilindu lili mumoni yowo wamwene tawe? 4Namwe olaboolela wandaayo oriena oli, ‘Lekha khurusie khasosono mumoni yowo,’ ne khane lilindu lili mumoni yowo wamwene? 5Ewe omubacha, nyoa orusie lilindu chana elio lili mumoni yowo wamwene, nio obone bulayi nga ne orusia khasosono mumoni eya wandaayo.

6“Mukhaelesia chimbwa siili sitakatifu tawe, chilakaluukhana chimwibwaakale, lundi mukhamwaatila chimbiichi chisiimbi chenywe tawe, chikhola chirio chachiswalakilila mu bikele mala chayuukha cha mwibwaakala mwabeene.

Saba, yiima, khong'oonda

(Lk. 11.9-13)

7“Saba, ne mulaebwa, yiima, ne mulanyoola; khong'oonda, mala mulekulilwao. 8Yesi yesi osaba aebwa, ne oyo oyiima anyoola, ne okhong'oonda ekulilwao. 9Namwe mundu siina khwinywe, omwana wewe ne amusaba busuma, amuelesia libaale? 10Namwe ne asaba eng'eeni amuelesia endemu? 11Kaaba bali enywe muli bamayaanu, mumanyile khuana biianwa bilayi khu baana benywe Raraawenywe oli mwikulu alaana bibiindu bilayi bikali lukali khwaabo bamusaba!

12 # Lk. 6.31 “Nono siosi siosi nisio mwenya muli babaandu bamukholele enywe; bakholele murio, sikila lino nilio sifuno sie Lilaka lia Musa ne kamekisio ke bang'oosi.

Silibwa sinyiki

(Lk. 13.24)

13“Yingilila mu silibwa sinyiki, sikila engila echa mu khubuna ebirira mu silibwa sibalaayi, ne mala lukeendo lwakhwo luli lulwangu, ne bakibirirakho bali bakali. 14Engila echa mu bulamu ebirira mu silibwa sinyiki ne bakibona bali bakeekhe.

Kumurongooro ne bibiaamo biakwo

(Lk. 6.43-44)

15“Ba meso khulwe bang'oosi be bubeeyi babeecha niio muli ne befwarire kamasieelo ke kamakheese, ne mukari bali bisuuche bie kumuliuliu. 16Mulabamanyila mu bikholwa biabwe. Babaandu babutangakho chisabibu khu binyenya, namwe chinduli khu marakaru ku?

17“Khwako buli kumurongooro kumulayi kwaama kamatuunda kamalayi ne kumurongooro kumubi kwaama kamatuunda kamabi. 18Kumurongooro kumulayi se kunyala kwaama kamatuunda kamabi tawe, namwe kumurongooro kumubi se kunyala kwaama kamatuunda kamalayi tawe. 19#Mat. 3.10; Lk. 3.9 Kumurongooro kwosi kwosi kukhaama kamatuunda kamalayi tawe, kuremwa ne khumwaatwa mu mulilo. 20#Mat. 12.33 Khwako enywe mulamanyila bang'oosi be bubeeyi mu bikholwa biabwe.

Ese se namumanyakho enywe tawe

(Lk. 13.25-27)

21“Se kali bali buli mundu oundanga ese ali, ‘Omwami, Omwami,’ alingila mu bwami bwe mwikulu tawe, ne kakhali abo bakholanga lilienya lia Paapa wase oli mwikulu bong'ene. 22Endaalo ng'eneyo bakali balinjiloochela bali, ‘Omwami, Omwami, se khwang'oolela mwisina liowo, ne khukhola kamayia kamakali mwisina liowo!’ 23#Chiny. 6.9 Mala ndibaboolela ndi, ‘Ese se namumanyakho enywe tawe, khemundureo, enywe mukholanga kamamayaanu!’

Babombakhi be chinju babili

(Lk. 6.47-49)

24“Nono buli mundu oulila kamakhuwa kase kano ne khukakhola alaba nga omukesi owombakha enju khu lwanda; 25mala efula yakwa, kimikhula kiekha, lundi ekhuungu yaucha ne khukhwikhupa khunju ng'ene eyo ne kakhali se yasiuukha tawe, sikila yaba yombakhwa khu lwanda.

26“Ne kakhali buli mundu oulila kamakhuwa kase kano ne khulekha khukakhola aliba nga omusilu owombakha enju yewe mumuyekhe. 27Efula yakwa kimikhula kiekha, lundi ekhuungu yauucha ne khukhwikhupa khunju ng'ene eyo, mala yasiukha, ne likwa liayo liaba liboofu lukali!”

Bunyali bwa Yesu

28 # Mk. 1.22; Lk. 4.32 Yesu nga ne amala khuloma kamakhuwa kano bipupu biauka khulwe kamekisio kewe. 29Sikila abekisia nibo nga oyo owaba ne bunyali, se abekisia nga baandiki tawe!

Currently Selected:

Mat. 7: LUBUKUSU

Highlight

Copy