Mat. 8

Yesu aonia owe kamakele

(Mk. 1.40-45; Lk. 5.12-16)

1Yesu nga ne ekha khukhwama khu sikulu, babaandu bakali bamuloondakho. 2Nio omundu owe kamakele echa asikama ebweeni wewe, aloma ali, “Omwami, waaba ne wenya onyala wandakaasa.”#8.2 wandakaasa: khutakaasa ano khuli khuonia omundu owe kakakele kumubili nio afukiililwe khukhwakaanana ne khulia ne babaandu nga Lilaka lia Musa ne liboola.

3Yesu amutilakho ne aloma ali, “Nenya, takaasibwa.” Ne abwene ne abwene kamakele kamururakho. 4#Bal. 14.1-32 Nio Yesu amuboolela ali, “Rekeeresia, okhaboolelakho omundu yesi yesi sisiindu siosi siosi tawe, ne kakhali cha weyokesie khu musaayi, orusie siianwa nisio Musa alaka, nio babaandu boosi bamanye bali waonile.”

Yesu aonia omukholi owo mukhulu owe banamae Barumi

(Lk. 7.1-10)

5Yesu aba nga alikho engila mu lukoba lwa Kaperinaumu omunamae omukhulu owe Barumi amwichakho amwikoonjelela ne aloma ali, 6“Omwami omukholi wase ali engo, akonile aasi se anyala akhaba khukhweyusia tawe.”

7Yesu amuboolela ali, “Kane niche muonie.”

8Ne omukhulu owe banamae chana amukobosia ali, “Tawe Omwami! Ese se nolaana ewe wiche munju mwase tawe, ne kakhali loma busa Elomo, mala omukholi wase alaona. 9Sikila akhaba ese ndi ne omukhongo wase, ne lundi ndi ne banamae aasi wase, ne mboolela mulala ndi ‘Cha!’ Ne acha; okundi ndi, ‘Yiicha!’ Ne echa, ne nasioobi wase, ndi ‘Khola lino!’ Ne akhola!”

10Yesu nga aulila kano, auka mala aboolela ba bamuloondakho ali, “Ng'ali muboolela enywe ndi, khanyoolakho lisuubila nga lino liri akhaba mu Isiraeli tawe. 11#Lk. 13.29 Ng'ali ese muboolela enywe ndi, bakali baliama e bukwe ne mumbo mala bekhale khu siaalwa nende Aburahamu, Isaaka, ne Yakobo mu Bwami bwe mwikulu. 12#Mat. 22.13; 25.30; Lk. 13.28 Ne kakhali bakhoyelwa khuba mu Bwami bwene obwo balimwaatwa enje mu siilima, balililemo ne khukhwelumakaka.” 13Yesu aboolela omukhulu owe banamae chana oyo ali, “Cha engo, lekha kabe nga ne osubiile.” Nio omukholi chana oyo aaona mu siise esio ne sisiene.

Yesu aonia babaandu bakali

(Mk. 1.29-34; Lk. 4.38-41)

14Yesu nga ne engila munju eya Petero, abona masalaawe owa Petero akonile aasi ali ne kumureengo. 15Amutiila kumukhono; mala aona nio enyokha amuelesia siakhulia.

16Ekolooba ao bamureerera babaandu bakali ba baaba ne bisieeno, mala Yesu abirusia khulwe khuloma elomo yewe, lundi aonia balwaale boosi. 17#Isa. 53.4 Lino liaba lirio khukhwichusia niko omung'oosi Isaya aaloma ali,

“Aabukula butekhele bwefwe,

Lundi asuta bulwaale bwefwe.”

Baakhoyela khuuba babeeka ba Yesu

(Lk. 9.57-62)

18Yesu nga ne abona baandu bakali ne bamwichuleo, aboolela babeeka bewe bambukhe enyanja. 19Nio omuandiki owe lilaka echa niio Yesu aba amuboolela ali, “Omwekisia, ndakhuloondakho buli osi osi niio ocha!” 20Yesu amuboolela ali, “Chinjusi chili ne kamaloo, ne chinyuni chili ne biswi, ne kakhali Omwana wo Mundu se ali ne abuundu niio auluukhila tawe.”

21Okundi khu beeka bewe amuboolela ali, “Omwami lekha nje siikhe paapa nio.” 22Ne kakhali Yesu amuboolela ali, “Nondekho, mala olekhe bafu babeene basiikhe bafu babwe.”

Yesu ayenjeesia embembeesi

(Mk. 4.35-41; Lk. 8.22-25)

23Yesu aniina mu liaaro, mala babeeka bewe bamuloondakho. 24Nio embembeesi engali yaaba khu nyanja, yakila liliaaro liarakikha khutengaala sikila bibuli bie kameechi, ne Yesu aaba alikho akona. 25Babeeka bamusiisimusia ne baloma bali, “Omwami, khuonie! Khulikho khubuna.”

26Nio abareeba ali, “Siina sikila ne muriire?” Muli ne lisuubila litiiti lukali! Enyokha arafwira embembeesi ne enyanja biyenjeele, mala biayenjeela. 27Buli mundu auka lukali ne baloma bali, “Omundu owa lukano siina yuno, niye akhaba ekhuungu ne nyanja biria!”

Yesu aonia babaandu babili be bisieeno

(Mk. 5.1-20; Lk. 8.26-39)

28Yesu nga oola engelekha mu sibala silaangwa Katara babaandu babili be bisieeno bamwakaanana, ne baama e biliindwa. Baba barafu lukali abele omundu yesi yesi se abirira khu ngila ng'ene eyo tawe. 29Nio baapa lulwang'a bali, “Mwana owa Wele ewe wenya okhukhole oriena? Ewe wechile ano khu khuukuuma efwe endaalo ne siili khwola?”

30Abeele chimbiichi chingali chilikho chaaya sinao khukhwama niio baba. 31Mala bisieeno biekoonjelela Yesu bili, “Waaba ne okhurusia efwe enje, khuile mwituuli lie chimbiichi.” 32Nio Yesu abiboolela ali, “Khemuche.” Abwenao biabaruramo biacha mu mbiichi, mala lituuli lioosi liasalamata khu mwikha kwe sikulu kumukali liaweela mu nyanja. 33Nio babaayi belukha, bacha mu lukoba baboola bibiindu bioosi bibiekholeekhe khu be bisieeno chana abo. 34Khwako be lukoba boosi barura, khukhwakaanana Yesu mala bamwekoonjelela bali arure mu sibala siabwe.

Currently Selected:

Mat. 8: LUBUKUSU

Highlight

Copy