MATTHE 2

Hnilaw Lam ah kaa Khawihnah Lawk Ci Gui

1Bawi Jesuh cu Judea kho, Bethlehem gawu ah, Herod ghangpughang ah uk yah ung ami hta nak ah kyak ci. Cun yah ung hnilaw lam ah kaa, aisi läk lawk ciah hmuhmat chang gui cu, Jerusalem ah gawk law u netah, 2“Tuhbäi ng’tüi lawk ciah Jew chang gui ah ghangpughang cu a hawi ang? Hnilaw lam ah ani ah aisi dang sei hmu u ne, ani cu khawihnah vai ah kami lawk ci nei,” cine ng’shi gui ci gui.

3Acun ng’ya u netah Herod ghangpughang la Jerusalem ah chang gui cu cäicat yawp ci gui. 4Herod ghangpughang naw taigüpa gui la thukhän saya gui cu khü gui netah, “Messiah cu a hawi ah ng’tüi khai ang?” cine ng’shi gui ci.

5Ngahmi naw, “Judea kho, Bethlehem gawnu ah ng’tüi khai nei, Profet ah guk ah cacim ung:

6‘Judea kho ung om ciah Bethlehem gawnu,

Nang cu Judea kho gawnu gui ung,

Ak yaw pibäih ah kä na kyak ci nei,

Ka chang Israel gui, lam shüm gui khai cu,

Nang ungka dang lawk khai nei’ ciah om ci,”

ci ne m’thein ba gui ci. #Mik 5:2

7Cun kawn ah Herod ghangpughang naw hmuhmat chang gui cu a düm ah khü gui netah, aisi ah ang dang law nak ah akhin cu, ang khai ah ng’shi gui ci. 8Cun ah ghangpughang naw, “Nangmi hteit ne ak hmaw cu nami hmuh vai ah nami shui vai, nami hmuh ung nami nam thein law ba vai, kei phi hteit ne ka khawihnah tuk khai,” cine m’cäi gui ci.

9Cun ah kyasei ngami cu ng’düi law ne hteit ba u ne, ami hmuh te ah aisi cu hmuh ba u netah ang htei ah yeikyai ci gui. 10Cun ah aisi naw ngami cu lam shüm gui lä ne, ak hmawhta ah omnak ung gawk netah ng’düm ci. 11Ngahmi cu im kyong ah va lut u netah, ak hmawhta cu anu Mari awn atäng ah hmuk ci gui. Cun kawn ah ngami cu m’khuukdoong ne kaup u netah, ami law püi ah ghui ni, Frankinsen tui ng’ui ni, mura tui ng’ui ni gui awn khawihnah ci gui.

12Herod ghangpughang ah om nak lam ah kä ami hteh ba vai ah Khanpughi naw ami ng’mang ung m’thein gui khätah, ngami cu alam hei ung ami kho ah hteit ba ci gui.

Ejip Kho ah Ami Ng’thuh Nak

13Hmuhmat chang gui ami hteh ba kawn ah Khanpughi ah khankho chang cu Josef ah ih mang ung dang law netah, “Herod naw ak hmaw cu ngawn vai ah shui lawk khai nei, tho law ne ak hmaw la anu cu Ejip kho ah dawng püi goi ä, Kei naw ‘Law ba vä,’ kä ka ci pha ah chuih a cu ah na om püi goi vai nei,” cine pyein ci. 14Josef cu tho law ne, ak hmaw la anu cu khomü ung Ejip kho ah hteh püi gou netah, Herod a sih güt a cu ah om püi goi ci. 15Cun ah mawng gui cu, “Ka Htapa cu Ejip kho ah kaa, ka law püi ba ci,” ciah profet gui ung gawk lawk ciah Khanpughi ah ng’thu aküm nak ah kyak ci. #Hos 11:1

Herod naw ak Hmaw Tha Gui a Ngawn ah Mawng

16Herod cu hmuhmat chang gui naw ami theileh nak hmat netah ang htei ah m’lungshe ci. Cun ah kyasei ngami ah m’thein tu ah aisi ang dang nak ah khin cu m’khin ba netah, Bethlehem gawnu la apei ung pigaw gui ung kaa, a khokum kum goi la kum goi ah k’hmaw ba ciah ak hmaw gui cu avan ngawn sak gui ci.

17Cun cu profet Jeremiah ah ng’thu pyein a khüm nak ah kyak ci. Ani ah ng’thu pyein cu:

18“Ramah kho kyong ah thüi kyah nak ah

k’aw cu thang lawk ci,

Rachelah cu a hta gui ah hmawk ah viik ne kyap ci,

A hta gui cu sihnak ung kä phiawn sak gui hlawt ci,” ciah kyak ci.

Ejip Kho ah Kaa Ami Law Ba

19Herod asih kawn ah Khanpughi ah khankho chang naw, Ejip kho ah Josef ah ih mang ung, 20“Tho law ne ak hmaw la anu cu Israel kho ah hteh püi ba goi ä, akhmaw ngawn hlük ciah chang gui cu si pyii ci gui nei,” cine pyein ci. 21Josef cu tho law ne, ak hmaw la anu cu Israel kho ah hteh püi ba goi ci.

22Cun ung phi Judea kho ung Archelaus cu apa Herod ah hnün ung ghangpughang ah ngoh ba ne om ci. Acun cu ng’ya netah Josef cu Judea kho ah a hteh ba vai ah kyik ci. Cun ah kyasei ani cu Khanpughi naw ang mang ung ak phlan ah mäih ah Kalile kho ah hteit ne, 23Nazaret gawnu ah om tuk ci. Cun cu profet gui ah ng’thu pyein ung, “Ani cu Nazaret chang ah kyak khai nei” ciah om ci cu aküm nak ah kyak ci. #Mk 1:24; Lk 2:39; Jn 1:45

Currently Selected:

MATTHE 2: CBC

Highlight

Copy