MATTHE 13

M’shi Phu Ci awn Amtumtäng Nak

(Mk 4:1-9; Lk 8:4-8)

1A cu hnüüp Bawipa Jesuh cu im ungka lut law ne, am thei nak gui vai ah tuili kam pei ah hteit ne ngok ci. 2Gawk lawk ciah chang gui cu da aih u khätah, Bawipa Jesuh cu hleiko khan ah kai ne ngok ci. Chang gui cu tui kam ah ng’düi ci gui. #Lk 5:1-3 3Bawipa Jesuh naw cun ah chang gui-am, m’tumtäng bäng bäng ne a mawng akda m’thein gui ci.

Bawipa Jesuh naw, “Hnüüp ät ung chang tumat cu m’shi phu khai ah hteit ci. 4Loma ung a phu ah geit m’shi amshah cu, lam ung va kyasei kha gui naw law ne ei ci gui. 5M’shi amshah cu, m’dek ah ng’pam nak lung khan ah kya lawk ci. 6Ng’lih pyo pang ne phi, m’dek ng’pam ci kya ne, kho naw a so law ung kä pya hlawt ne si ba yawp ci. 7M’shi amshah cu ng’hling hmu ah kya lawk ci, ng’lih pyo tupang ne phi, ng’hling gui naw k’düi u sei, si ba yawp ci. 8M’shi amshah cu, m’dek ah ni nak ung kya law ne, akni ah ng’lih pyo ghing gong sei, a phiaa, akchuk-kip. Athum-kip ah ng’sep khawi ci.

9 Bawipa Jesuh naw akhnu ah, “Nami hnga a om ung ngai ne ng’yah vä,” cine kyak na gui ci.

M’tumtäng Nak awn A Pyein Hlü

(Mk 4:10-12; Lk 8:9-10)

10Ang düihpüi gui cu Bawipa Jesuh ah pei ah law u netah, “A i ah kyasei chang gui-am m’tumtäng bä bä ne namthein gui ang?” cine ng’shik ci gui. 11Bawipa Jesuh naw, “Nangmi naw Khanpughi ah kho ah mawng thuuk ne ng’kau cicu hmuhmat nak thei vai nami gah ci. Chang hei gui cu cun kä gah tuk ci gui. 12Khawh tak ciah chang cu k’be ba mä sei da law pi khai, khawh kä tak ciah chang cu ak om hta phi lak pe yawp khai. #Mt 25:29; Mk 4:25; Lk 8:18; 19:26 13Ngahmi-am a i ah kyasei m’tumtäng ne kam thein gui ang ci ung; ngami cu teng ne phi kä hmuk ci gui, ngai ne phi kä ng’yak ci gui, a i kä ami hmuhmat su ah kyak ci. 14Cun ah kyasei Isaiah ah ng’thu thuuk ung;

‘Shin ah chang gui cu ngai ne, ngai ne phi kä hmat khai gui,

Teng ne teng ne phi kä hmuk khai gui,

15A i ah kyasei ci ung, ami m’lung cu ang ne, amik hnga cu pang ne,

ami mik cu m’shing ciah kyak ci.

Ami mik m’dei ne ami hnga ng’lang sei, ami m’lung kyong awn

hmuhmat u ne ami kyak vai sü ung,

Kei lam ah ng’hlat law u ne, na yi hnei u sei,

Kei naw phi kam gein gui khai süte,” cine Khanpughi naw pyein ci ciah kyak ci.

16Nangmi ah hmawk ah a i hlawk ah yeikyai vai kyak ci ang? Nangmi cu nami mik m’dei ne nami hnga ng’lang ci. 17Kei naw akcang ka pyein cu, profet gui la Khanpughi ah chang akda gui naw, nangmi ah mäih ah hmuh hlü u ne phi, kä hmuh hlawt ci gui, nangmi ah ng’yak ah mäih ah ng’ya hlü ne phi kä ng’ya hlawt ci gui nei.

M’shi Phu Ci awn M’tumtäng Nak M’dang ne Amthein Nak Gui

(Mk 4:13-20; Lk 8:11-15)

18“Cun ah kyasei m’shi phu ci awn m’tumtäng nak ah mawng cu ngai kheng shüm vä. 19Lam ung kya lawk ciah m’shi ci cu, Khankho uknak ah mawng ng’thu k’ni cu ng’yak tu lang ne phi, kä hmat ci awn täng ci. Ami m’lung kyong ung phu ah ng’thu m’shi cu, khoshe naw la ne hteh püi yawp ci. 20Lung ung kya lawk ciah m’shi ci cu, ng’thu k’ni cu ami ng’yak tu vai-am yeikyai ne dou tuk ci gui ah kyak ci. 21Cun ung phi ng’thu ni cu ngami ah m’lung kyong ung kä khäng htek ci, ashäng hta bäng gawk ne om ci. Ami dou ah ng’thu ni ah hmawk ah yaica nak la shedam nak ami aut law ung, acun vai-am ng’hlat ba ci gui. 22Hliing hmu ah kya lawk ciah m’shi ci cu, ng’thu ni cu ng’ya tulang ne phi, ami ng’ä ai nak gui la ami bämang nak hlü gui naw, shung shet gui sei ng’thu ni cu kä vui pai hlawt ciah kyak ci. 23M’dek ni ung kya lawk ciah m’shi ci cu, ng’thu ni cu ngai ng’ya tu ne hmuhmat ci gui ah kyak ci. Ngami cu amshah aphiaa, amshah ak chuk-kip, amshah athum-kip ah vuipai ci gui,” cine m’thein gui ci.

Khumghaw Gui awn M’tumtäng Nak

24 Bawipa Jesuh naw a hei tumat awn m’tumtäng ne am thein ba gui cu, “Khankho uknak cu shin ah mäih ah kyak ci. Chang tumat naw aloma ah m’shi k’ni cu geit ci. 25Khomü ät ung chang van ip yawp khätah, gaa tumat law ne m’ghaw m’shi cu phu shüt netah hteit ba ci. 26Geit gui lut law ne ghing gong law u sei, m’ghaw gui phi lut law tuk ci gui. 27Loma ah ak chang ghüh gui law u netah, ‘Bawipa, na loma ah geit m’shi k’ni na geit ciah kä kya ne ang? Khu m’ghaw gui a hawi kaa ang ami gawk law,” cine ng’shik ci gui. 28Lo mah naw, shin cu gaa ah bi ah kyak ci nei,’ ci khätah, a ghüh gui naw, “Cun ah a kyak ung m’ghaw avan kami mawih yüm yüm vai ang?’ cik ci gui. 29Lo mah naw, ‘Kaa, kä mawi yawp hnga vä, khu m’ghaw avan nami mawih yawp ung, geit gui phi ng’mawi tuk khai gui nei. 30Geit khäm khin ung khüt sei, geit la m’gho cu a täng ah phung ghing cang ni sä. Geit khäm khin a gawk law ung geit khäm ci gui-am; khu m’ghaw gui cu mawih sak gui ma netah, k’bum ne mei ung m’khih vä, cun kawn ah geit gui cu aat u ne, ka khei ung thun vä, cine kam cäi gui khai,’ cik ci,” cine m’thein gui ci.

Anhta-ui awn Amtumtäng Nak

(Mk 4:30-32; Lk 13:18-19)

31 Bawipa Jesuh naw a hei tumat awn m’tumtäng ne a pyein cu, “Khanpughi ah uknak ah kho cu shin ah mäih ah kyak ci. Chang tumat naw anhta ui cu la ne aloma ah geit ci. 32Cun ah anhta ui cu geit m’shi gui nüng ung yaw pibäih ci. Cun ung phi ng’lih pyo ne a ghing gong law ung, a ghing gui avan ung akdäm pibäih ah kya lawk ci. Cun ah kyasei khahta gui cu ang ban gui ung ng’bu tuk ci gui” ciah kyak ci.

K’Co awn Am Tumtäng Nak

(Lk 14:20-21)

33 Bawipa Jesuh naw a hei awn m’tumtäng ne am thein ba mä gui cu, “Khanpughi ah uknak kho cu shin ah mäih ah kyak ci. Hnumi tumat naw k’co cu la netah, m’htut den pyii taang ät ung k’caw sei, m’htut den avan cu tho ne pai ci,” ciah kyak ci.

Bawipa Jesuh Naw M’Tumtäng Nak gui A pyein ah Mawng

(Mk 4:33-34)

34 Bawipa Jesuh naw chang gui-am m’tumtäng bäng bäng ne m’thein gui ci. Kä m’tumtäng ah a i ah mawng phi kä pyein ci. 35Cun ah a pyein sak ah mawng cu, profet gui ah ng’thu a khüm nak vai ah hmawk ah kyak ci. Cun ah thu cu;

“Kei naw nangmi ah ma ah ng’thu ka pyein ung m’tumtäng bäng bäng

ne ka pyein khai:

Khanpughi naw khomdek atüi ung tün ne, a u ah kä hmat man cu kei

naw m’dang ne ka pyein khai,” ciah kyak ci. #Sam 78:2

Khumghaw awn Am Tumtäng Nak M’dang Ne Am Thein Nak Gui

36 Bawipa Jesuh cu chang gui ah ng’lung ah kaa, ng’dü law ne kyong ah lut ba ci. Cun yah ung ang düihpüi gui naw a pei ah law u netah, “Khumgho awn am tumtäng nak ah mawng cu m’dang ne nam thein gui ä,” cik ci gui.

37 Bawipa Jesuh naw, “M’shi k’ni phu ciah chang cu chang ah Htapa ah kyak ci. 38Loma cu khomdek khan ah kyak ci. M’shi k’ni cu khankho uknak khäm ciah chang gui ah kyak ci. 39Khumghaw m’shi cu khoshe ah chang gui ah kyak ci. Geit khäm khin cu kho ah khüt nak vai ah khin ah kyak ci. Geit khäm ciah chang gui cu khankho chang gui ah kyak ci. 40Khu m’ghaw gui cu aat ne k’bum ne mei ung m’khih ah mäih ah, kho a khüt hnüüp ung khoshe ah chang gui cu mei awn m’khih ne m’di nak gui om khai nei. 41Chang ah Htapa naw ak khankho chang gui tüi law ne, chang gui shetkat lam hma sak ci gui la shetkat nak bik ciah chang gui cu, a uknak kho ung kaa, ghü gui ne la gui netah, 42Caang ne ng’ai ciah mei ung k’htawm gui khai. Cun ah chang gui cu kyap ne m’lau ne, ami ha htui ne gein vai khai gui. 43Cun yah ung Khanpughi ah chang gui cu ami pa ah uknak kho ung, khohni ah mäih ah khang ne om khai gui. Ng’yak nak vai ah hnga om ci phung naw ng’ya sä,” cine m’thein gui ci.

Thup ne Gim ah Khawh awn Tumtäng Nak

44“Khanpughi ah uknak kho cu shin ah mäih ah kyak ci, Chang tumat naw, lai ah phuh ne gimah khawh ng’peeih cu hmu netah, lin ne phuh ba shüt ci. Cun kawn ah yeikyai ne hteit ba ne, akhawh avan yoi yawp netah, cun ah lai cu khleih ba ci,” cine m’thein gui ci.

Ghui Cünglung awn am tumtäng nak

45“Cun kawn ah phi Khanpughi ah uknak kho cu shin ah mäih ah kyak ci. Chang tumat cu ghui cünglung gui shui lä netah, 46Ang htei ah a phu küi ciah ghui cünglung cu hmuk ci. Cun kawn ah hteit ba ne akhawh avan yoi yawp netah ghui cünglung gui cu khleih ci.

Ng’vai awn Am Tumtäng Nak

47“Cun kawn ah phi Khanpughi ah uknak kho cu shin ah mäih ah kyak ci. Nga shui ci gui cu tuili ung ng’vai ami vawih ung nga a hlü hlü uk ne phak ci gui. 48Ng’vai ung nga be ne awk khätah ng’vai Cu kawng ah kai püi ba ci gui. Ng’vai ungka nga gui cu ghü u netah, Nga ak ni gui cu ami pem ung m’kang u ne, nga ak she gui cu set ne ghawt ci gui. 49Kho ang pyii hnüüp ung acun ah mäih ah kya lawk khai. Khankho Chang gui kyum law u ne, changnigui ah lung ung kaa, chang she gui cu ghü u netah, 50Caang ne ng’ai ciah mei ung htawm khai gui. Cun gui cu kyap ne m’lau ne ami ha htui ne geinvai khai gui.

Düngnak Akthai la Akphyim

51“Bawi Jesuh naw, “Shin ah a mawng gui cu nami hmat ci ang?” cine ng’shi gui khätah, ang düihpüi gui naw,” kami hmat ci nei,” cik ci gui.

52Cun ah kyasei Bawi Jesuh naw, “Khankho uknak kho ung düihpüi tumat ah kya lawk ciah chang phung cu, a im khei ung kaa, akhawh ak phyim akthai k’plawk ne law püi ciah, imah awn täng ci,” cine m’thein gui ci.

Bawi Jesuh cu Nazaret Chang gui Naw Hnungtuk püi ci gui

(Mk 6:1-6; Lk 4:16-30)

53Bawi Jesuh cu cun ah tumtäng nak am thein gui kawn ah, acun ungka pawng ne, 54amät ah pigaw ah hteit ba ci, Pum im ah m’theithang gui sei, Cun hmuk ciah chang gui cu cäicat u netah, “Shin ah chang naw shin ah hmuhmat nak gui ahawi a gah ang? Cäi-aih gui vai mä a i hawkcha abi hning ang? 55Ani cu m’si sheh a hta ah kä kya ne ang? Ani cu Mary ah hta, a nau gui cu James, Josef, Simon la Judas ah kä kya ne ang? 56Abe gui cu a shin ah pigaw ung om ci gui ah kä kya ne ang? ani naw shin ah hlüngtai nak gui ahawi kaa ang agah ve, 57Cun gui ah thu pyein ne ngami naw hnungtuk püi ci gui.

Bawipa Jesuh naw, ngahmi-am, “Profet cu amät ah pigaw la amät ah kyongkhui ah tha ah a u naw phi kä hnu ng’tuk püi ci,” cine kyak na gui ci. #Jn 4:44 58Cun ah Nazaret chang gui cu ami yum nak kä om khätah, Bawi Jesuh naw cäi aih vai ai phi käm dang ling ci.

Currently Selected:

MATTHE 13: CBC

Highlight

Copy