MATTHE 12

Kyin Hnüüp ah Mawng

(Mk 2:23-28; Lk 6:1-8)

1Cun kawn ah kä shou pha sei Bawipa Jesuh cu kyin hnüüp ung ami loma sun pah ne hteit ci. Ang düihpüi gui cu cawi law u netah, ami kiung htang cu m’yawt ne ei ci gui. #Tln 23:25 2Cun cu pharisee gui naw hmu u netah, “Teng shüm ä, na düihpüi gui naw kyin hnüüp ung ami bilawh cu ng’thukhän awn hnu ng’tuk ci nei,” cik ci gui.

3 Bawipa Jesuh naw, “David ghangpughang naw, amät la ak chang gui ei cawi law u netah, bi abi cu kä nami phat tu man ci ma? 4Ani la apaw gui cu Khanpughi ah pum im kyong ah lut u netah, taigü gui bäng naw ami ei man ah Khanpughi-am peit ah m’htut cu ei ci gui ah kä kya ne ang? #1Sml 21:1-6 5Cun kawn ah taigü gui naw kyin hnüüp päng ung kyin nak ah thukhän gui cu m’shet u sei phi m’kat nak gui kä om ci, ciah Mosesah thukhän ung om cicu kä nami phat tu man ci ma? #Kn 28:9-10 6Kei naw ka ning m’thein gui cu, shin ung pum im ah tah hlüngtai pi ci om ci nei. 7Cacim ung ‘Kei naw ngawnsheh vawihpeh ah mä, m’gein nak cu kamhni pi ci,’ ciah om ciah a mawng cu nami hmat vai sü ung, katnak kä bik ciah chang gui düt thüi nah ne kä nami m’kat gui khai sü te. #Mt 9:13; Hos 6:6 8Chang ah Htapa cu kyin hnüüp ah Bawipa ah kyak ci nei,” cine kyak na gui ci.

Akut Shum Ciah Chang

(Mk 3:1-6; Lk 6:6-11)

9 Bawipa Jesuh cu acun ungka naw pum im tumat ah hteit ci. 10Pum im kyong ah a kut vangtäng shum ciah chang tumat om ci. Bawipa Jesuh naw katnak abi vai cu däät ne m’kat hlük ciah chang gui naw, “Kyin hnüüp ung gaw nak gai sak hning vai ang?” cine ng’shik ci gui.

11 Bawipa Jesuh naw, “Nangmi ungka chang tumat ah htome tumat cu, kyin hnüüp ung khui ung ang kyak ah a kyak ung, kä yu chaan tu ba ah nawng khai ah chang om ne ang? #Lk 14:5 12Chang cu htome ah mä hlüngtai pi ci. Cun ah kyasei m’htei phyak ci m’htei tu vai cu, thukhän naw phi khüng ci,” cine kyak na gui ci. 13Cun kawn ah Bawipa Jesuh naw a kut shum ci-am, “Na kut m’cün ne k’phiäih ä,” cine pyen nak ci. Akut shum ciah chang naw a kut cu k’phiäih khätah, shum ciah a kut cu vangtäng ah mäih ah akni ah kya ba ci. 14Pharisee gui cu pum im ungka hteit ba u netah Bawipa Jesuh cu ngawn vai ah ng’ge ci gui.

Khanpughi naw Aghü ah Changshäm

15 Bawipa Jesuh cu cun ah ami ng’ge ah mawng ng’yah netah, a hei lam ah hteit ba sei chang akda naw a hnu ah läk ci gui. 16Ani naw gawipai ci gui cu gai sak gui ci. Cun ung phi ani ah mawng kä ami pyein-en vai ah m’yih sak gui ci. 17Cun ah m’cäi ne am yih sak gui cu Khanpughi naw profet Isaiah-am a pyein sak ah ng’thu abäi nak ah kyak ci. Cun ah ng’thu cu:

18“Shin cu kei naw ka ghü ah ka changshäm,

Kam hni, ka yeikyai nak nei.

Kei ah ka mümcha cu ani ah khan ah

ka gawk sak khai,

Ani naw kei ah k’bäi ah

m’khoichaa nak cu kho nüng ung

ng’shäu khai nei.

19Ani naw a i kä ng’cuh tuk khai,

käm lau ng’pyang khai,

Lam yung ah phi ak’aw m’can ne

ng’thu a pyein nak kä om khai.

20Ani naw ak thagui kä om cicu k’dükdawm ne,

a yi-hnei vai kä om cicu chimgein khai.

Ani cu düng nak awn näng nak ung

khüt khai ah bi bik khai.

21Chang pakhui avan naw phi

ani cu ngaih u khai gui,” ciah kyak ci.

Bawipa Jesuh La Beelyebul

(Mk 3:20-30; Lk 11:14-25)

22Khoshe naw kai sei a i kä hmu ba ne, kä ng’thu ba hlawt ciah chang tumat cu, chang gui naw Bawipa Jesuh ah law püi ci gui. Bawipa Jesuh naw khoshe k’täm khätah cun ah chang cu, amik m’dei ba sei ng’thu law ba thei ci. 23Chang gui cu ang htei ah cäicat u netah, “Shin ah chang cu David ah htapa ah kyak khai ang? cine kyak ci gui.

24Cun ami cicu pharisee gui naw ng’ya u netah, “Shin ah chang naw khoshe gui ah bawimang Beeyebul ah ming awn nei khoshe gui cu ak täm hning,” cine kyak ci gui. #Mt 9:34; 10:25

25Ngami ah m’lung ngaih cu hmat netah Bawipa Jesuh naw, “Khopäng tumat ung chang gui cu ami m’lung ngaih hnga hnga sei, ami mät gui ami ng’tuk-ah a kyak ung, cun ah khopäng cu kä shou pha sei, dimaih khai. Acun ah mäih ah m’lung ngaih kä kawng ät ciah pigaw, kä cun ung kyong khui cu kä khäng htek khai. 26Cun ah kyasei, satan ah uknak kho ung om ci gui cu ami mät gui ng’tu ng’aat u ne, ami kyak ung ani ah kho cu ng’phyeekpai pyii ci kya ne, dimaih khai ah kyak ci. 27Nangmi naw kei cu Beelyebul ah na peit ah k’thagui awn khoshe ka k’täm ciah nami pyein ci, cun ah a kyak ung nangmi ah chang gui naw mä a u ah peit ah k’thamah nak awn, khoshe cu ami k’täm hning ang? Nangmi nami katnak mawng cu nami chang gui ah bilawh naw ng’dang sak ci nei. 28Kei naw Beelyebul ah na peit ah k’thamah nak awn kä kyak ciah, Khanpughi ah Mumcha ah na peit ah bämang thamah nak awn, khoshe gui cu ka k’täm ci. Cun ah kyasei Khanpughi ah uknak kho cu nami khan ah gawk law pyii ci nei.

29A u chang naw phi k’thagui mah ciah chang cu khit ne kä ak pawng cang ung, a im kyong ah lut ne a khawhcham kä lak pe hlawt khai, khit ne ak pawng kawn ah vah lak pe hlawt khai.

30‘Kei täng ah kä om ciah chang cu na hnu ng’tuk püi ciah kyak ci. Kei awn a täng ah kä ng’bum tuk cicu ng’yaih-yam düt ciah kyak ci. #Mk 9:40 31Cun ah kyasei kei naw akcang ka pyein cu, katnak ah hmawk ah phi bäi, akshe ah thu ng’htau ah hmawk ah phi bäi, chang gui cu m’gein nak hning om ci. Cun ung phi Mumcha Theing m’shetkat ne ng’thu ah hmawk ah m’gein nak kä om hning ci. 32Chang ah Htapa m’shetkat ne ng’thu cicu m’gein hning ung phi, Mumcha Theing m’shetkat ne ng’thu ci läi cu, ngawi yä güt m’gein nak kä om hlawt khai. #Lk 12:10

A Ghing La Ak Theih

(Lk 6:43-45)

33‘Ak theih ak ni ng’yak hlü ung a ghing ak ni geit vai, a ghing shek cicu ak she ah m’theih ci, ak theih awn a ghing ah mawng cu hmat vai kyak ci. #Mt 7:20; Lk 6:44 34K’pyu m’äm mah gui, nangmi cu changshe ah nami kyak ci kya ne, a i hawk chaa ah ak ni ah nami ng’thu hlawt khai aw? M’lung kyong ah be ne om cicu m’gawngshai ung ng’thu ah lut lawk ci. #Mt 3:7; 23:33; Lk 3:7; Mt 15:18; Lk 6:45

35Chang ni naw akni m’lung nane akni dang sak ci, changshe nak akshe m’lung nane akshe dang sak ci. 36Kei naw akcang ka pyein cu, “m’khoichaa nak ah hnüüp ung chang gui cu ami ng’thu m’gawng düt düt ah hmawk ah k’cet ne ng’shi nak om khai. 37Nangmi m’shekat nak nami gah vai la kä nami gah vai cu, nami mät ah ng’thu m’gawn awn m’khoichaa nak om khai nei” cine pyen na gui ci.

Cäi-aih Vai Gui Ami K’thäh ah Mawng

(Mk 8:11-12; Lk 11:29-32)

38Amshah Thukhän saya gui la pharisee gui naw, “Sayapa, keimi am cäi-aih vai tumat nam hnuh gui ä,” cine k’thäh ci gui. #Mt 16:1; Mk 8:11; Lk 11:16

39 Bawipa Jesuh naw, “Shetkat nak awn om ne, Khanpughi kä yum ci gui ah tuhchü chang gui naw, cäi-aih vai cu k’thäh ci gui nei. Nangmi naw profet Jonah ah cäi-aih vai ah kawn ah, a hei nami hmuh vai a i kä om khai nei. #Mt 16:4; Mk 8:12 40Jonah cu nganu ah puk khui ah hnüüp thum la mü thum a om ah mäih ah, chang ah Htapacun phi m’dek khui ah hnüüp thum la mü thum om khai nei. #Jn 1:17 41Nineveh chang gui cu Jonah ah ng’thu ngai u ne, katnak ungka ng’yu ba ci gui ah kyasei, m’khoichaa nak ah hnüüp ung, ngami cu ng’düi law u ne, nangmi cu ning k’taap gui khai gui nei. Kei naw akcang ka pyein cu, shin ung tuhbäi Jonah ah hlüngtai pi ci gawk law pyii ci nei. #Jon 3:5

42Sheba kho päng ciah ghangpughangnu cu, hmuhmat pi ciah Solomon ghangpughang ah ng’thu ngai tuk khai ah gawk law pyii ci nei. M’khoichaa nak ah hnüüp ung ani naw ng’düi law ne, nangmi cu ning k’taap gui khai nei. Kei naw akcang ka pyein cu, shin ung tuhbäi Solomon ghangpughang ah mä hlüngtai pi ci, gawk law pyii ci nei. #1Gpg 10:1-10; 2Stn 9:1-12

Khoshe A Law Ba ah Mawng

(Lk 11:24-26)

43‘Khoshe cu a om nak ah chang ungka lut law ne a hei ah a hteh ung, kiangma kho ng’gau yung ah a om nak vai shui shüi shüi ci. Cun ah shui shüi ne kä hmu law hlawt netah, 44‘Ayan ka om nak man ah ka hteit ba khai,’ cine, amät ng’htau ci. Ayan a om nak man ah hteit ba khätah, a om nak man cu aung ne, theingthap khai ah pheih phai ah kyasei hmuk ci. 45Cun kawn ah amät ah mä shekha pi ciah khoshe pachih cu va khü tu ba gui sei, acun ung a täng ah om ci gui. Cun ah kyasei khoshe ah kai ah chang, ak hnu ah a shetkat nak cu, ak htük ungka ah mä, shekha law pi ci. Shin cu tuhbäi shekhak ciah chang gui ung gawk lawk khai ah a mawng ah kyak ci nei” cine pyen na gui ci.

Bawipa Jesuh ah Anu La Anau Gui

(Mk 3:31-35; Lk 8:19-21)

46 Bawipa Jesuh naw chang gui am theithang gui yah ung, anu la anau gui cu gawk law u neh, ani awn ng’hmuh hlü u netah akpung ah ng’düi ne ak ngäng ci gui. 47Chang tumat naw, “Bawipa, nanu la na nau gui naw ning hmu hlü u ne, akpung ah ning ngäng ci gui nei,” cine m’thein lawk ci gui.

48 Bawipa Jesuh naw, “Kei ah nu cu a u ang? Kei ah phäi nau gui cu a u gui ang? cine ng’shi gui netah, 49ang düihpüi gui cu tawk gui ne, “Teng gui vä, shin gui cu kei ah kanu la ka phäi nau gui nei. 50Khankho ah om ciah Kapa Khanpughi ah ang yak hlü ah bik ciah chang phung cu, kei ah phäi, kei ah nau, kei ah be, kei ah nu ah kyak ci nei,” cine m’thein gui ci.

Currently Selected:

MATTHE 12: CBC

Highlight

Copy