MATTHE 11

Tuihnim Johan ah Ng’shä Chang Gui

(Lk 7:18-35)

1 Bawipa Jesuh naw cun ah ang düihpüi gha-lei-goi cu m’cäi gui netah, acun ah kho pei yung pigaw gui ah ng’thu pyein ne m’theithang gui khai ah hteit ci.

2 Bawipa Jesuh ah bilawh gui cu Tuinim Johan naw thawng kyong ah a om nak ah ng’ya netah, ang khahpüi gui amshah cu tüi law ne, 3“Nang cu Johan naw lawk khai, a ciah Bawipa ang? Kä cung a hei Bawipa kami ngäng ba khai ang? ciah ng’shi vä, cine, ng’shi sak gui ci.

4 Bawipa Jesuh naw, “Hteit ba ne nami hmuh nami ng’yak cu Johan-am m’thein ba vä. 5Amik m’dauh gui, m’dei ba ci gui, shumkhem ci gui hteithon ba ci gui, kheilei ah ei gui theek ba ci gui, akpang ak ang gui ng’lang ba ci gui. Aksi gui ghing ba ci gui. Chang pyaam gui naw ng’thu k’ni ng’ya pyii ci gui. #Isa 35:5-6; Isa 61:1 6Kei ah khan ah ngaih gep ciah chang gui cu yeikyai nak om ci nei” cine m’cäi gui ci.

7Johan ah a tüih law gui ami hteh ba kawn ah Bawipa Jesuh naw Johan ah mawng cu chang gui-am m’thein gui ci. “Nangmi cu a i vai Johan ah om nak k’pya lün nu ah nami hteh ang? Kho khi sei hnün ciah khu m’sai gui nami teng khai ang? 8Kä cun ung a i vai nami hteit ci ang? Ak kyom suisak ci gui nami teng khai ang? Ak kyom suisak ci gui cu mang im kyong ah nei ami om. 9Kä cun ung profet nami teng khai ang nami hteh? Akcang ah nangmi naw profet ah hlüngtai pi cicu nami hmu pyii ci nei. 10Johan ah mawng cu cacim ung; ‘Khanpughi naw, nang ah hteh nak vai ah lam cu pyang khai ah, kei naw ka ng’shä ka tüi law ma khai,” cik ci ciah om ci. Johan cu acun ah kyak ci. #Mal 3:1

11Kei naw akcang ka pyein cu, khomdek khan ung Johan ah hlüngtai pi ci, a u kä om ci. Cun ung phi khankho ung ak hmaw pibäih cu, Johan ah mä hlüngtai pi ci nei. 12Tuihnim Johan naw ng’thu a pyein law ung tün ne, tuhngawi ung khüt sei khankho cu, changshe gui naw ng’tuk ng’ah püi ci gui. Cun ah kho cu changshe gui naw khäm yawp vai ah k’tha nak ci gui. 13Johan ah ng’dang law nak ung khüt lawk khai ah profet gui la Mosesah ng’thukhän naw khankho ah mawng cu pyein pyii ci gui. #Lk 16:16 14Ngami ah ng’thu pyein cu nami yum ah a kyak ung, Johan cu dang lawk khai ciah Elijah ah kyak ci, ci cun phi nami yum khai. #Mal 4:5; Mt 17:10-13; Mk 9:11-13 15Cun gui cu ak hnga om ci phung naw ngai ne ng’ya u sä.

16‘Tuhngawi chang gui cu a i awn m’tumtäng gui vai ang? Ngami cu sumlei hmun ung ngok ciah ak hmaw hta awn täng ci gui. Ak hmawhta gui amshah naw, a hei am shah-am, 17‘Keimi tumkhawng u ngä sei phi, nangmi kä nami ng’lam ci, keimi ng’äi kyap u ngä sei phi nangmi kä nami kyap ci’ cine ng’hawh tuk ci gui. 18Tuihnim Johan cu ei phi hlawi ne, yu phi kä aw ne, nangmi ah om nak ah gawk law sei, nangmi naw “Shin ah chang cu khoshe ah kai nei,” nami cik ci. 19Chang ah Htapa cu ei ne, aw ne law sei phi, nangmi naw, ‘Teng tu vä, shin ah chang cu, ei aih aw aih ci nei. Akhawn look ci gui la changshe gui ah teihpüi ah kyak ci nei,’ cine nami pyein ci.

Khanpughi ah hmuhmat nak akcang ah a kyak cu, acun ah hmuhmat nak ungka gawk lawk ciah, a mawng gui naw ng’dang sak ci gui nei” cine pyein ah gui ci.

Kä Zum Tuk Ciah Gawnu Gui

(Lk 10:13-15)

20 Bawipa Jesuh naw cäi aih gui vai am dang nak pyii ah pigaw gui cu, katnak ungka ng’yu ba nak kä om khätah, shin ah yüi ne m’cäi gui ci. 21“Aw Khorayin gawnu, nang cu thüisei nak om ci. Aw Bethsaidah gawnu, nang phi thüisei nak om ci. Nangmi ung kamdang ah cäi aih gui vai cu, Tire la Sidon ung kamdang vai sü ung, ngami cu cau pui, katnak ungka ng’yu nak ah sui sui ne, m’vut awn ng’hluk ne ami katnak ungka ng’yu ba khai sü gui te. #Isa 23:1-18; Ezk 26:1—28:26; Jol 3:4-8; Amo 1:9-10; Zek 9:2-4 22Cun ung phi Khanpughi naw am khoichaa law nak ah hnüüp ung, nangmi cu, Tire la Sidon ah mä däm pi ciah, hma m’kat nak cu nami gah khai. 23Aw Kapernaum gawnu, nang cu khankho ah khüt khai ah, m’hlüngtai nak na gah khai ah na ngai ci ma? Nang cu m’hteikho ah khüt sei yuk buh nak na gah khai nei. Nang ung kamdang ah cäi aih gui vai cä, Sodom gawnu ung kamdang vai sü ung, cun ah gawnu cu tuhgüt om khai süte. #Isa 14:13-15; Tün 19:24-28 24M’khoichaa nak ah kho hnüüp ung nang cu, Sodom ah mä däm pi ciah hma m’kat nak cu na gah khai nei,” cine pyein ci. #Mt 10:15; Lk 10:12

Kei ah Law Vä Ka ning Hüiyang Sak Gui Khai

(Lk 10:21-22)

25Cun kawn ah Bawipa Jesuh naw, “Khankho la khomdek van uk ciah kapa, hmuhmat nak om ci gui-am kä nam dang gui cu, hmuhmat nak kä om ci gui-am m’dang gui ci sei ka ning m’hlüngtai ci. 26Kapa Khanpughi, cun gui cu nang na mät ah ng’yak hlü ah kyak ci,” cine pyein ci.

27 Bawipa Jesuh naw, “Kapa naw a päng avan na pe pyii ci, Kapa ah kawn ah a hta hmat ci, a u kä om ci. A hta la a hta naw am dang gui ah chang ah kawn ah apa hmat ci a u kä om ci. #Jn 3:35; 1:18; 10:15

28‘A phuih gih sei cümbawng ciah chang gui kei ah law vä, kei naw ka ning hüiyang sak gui khai. Kei cu hnip hnoi ng’awi ng’gi ne, kamlung neim ci. 29Kei ah ka kawh cu kawt ne, kei ah ng’thei law vä, Nangmi cu hüiyang nak nami hmuk khai. 30Kei ah ning kawh sak gui ah kawh nak cu yäi ne, kei ah ning phuih sak gui ah phuih cu yang ci,” cine m’cäi gui ci.

Currently Selected:

MATTHE 11: CBC

Highlight

Copy